1. Taunimanima ese dahaka abia hidi badana idia karaia be namo?

 HARI taunimanima be abia hidi badana do idia karaia. Idia ese guba bona tanobada edia Lohia Tauna maorona, Iehova Dirava do idia durua, eiava iena inai tauna dikana, Satani Diabolo do idia durua? Ibounai be abia hidi idia karaia be namo. Idia karaia abia hidi ese do ia hahedinaraia idia be vaira nega ai do idia mauri eiava lasi. (Mat. 25:31-33, 46) “Hisihisi badana” lalonai, do idia makaia daidia do idia mauri bona daidia be dika do idia davaria.​—Apok. 7:14; 14:9-11; Ese. 9:4, 6.

2. (a) Heberu 10:35-39 ese ita ia hagoadaia dahaka ita karaia totona? (b) Apokalupo bukana ese edena dala ai ita ia durua?

² Heberu 10:35-39 duahia. Bema abia hidi oi karaia Iehova ena lohia dalana oi durua totona, unai be abia hidi namona. Hari oi ura ma haida oi durua abia hidi maorona idia karaia totona. Apokalupo bukana oi gaukaralaia diba idia oi durua totona. Unai buka ese Iehova idia inai henia taudia dekenai do ia vara gauna ia hahedinaraia, to iena lohia dalana idia durua taudia ese do idia abia hahenamo ia herevalaia danu. Unai mai anina bada hereva momokanidia ita stadilaia be namo. Bema unai ita karaia, ita do ia durua Iehova ita hesiai henia noho totona. Ma danu, ita dibaia gaudia ita gaukaralaia diba ma haida ita durua abia hidi maorona idia karaia bona badinaia noho totona.

3. Inai atikol ai dahaka do ita herevalaia?

³ Inai atikol ai, inai henanadai do ita herevalaia: Dirava ena lohia dalana idia durua taudia dekenai dahaka do ia vara? Bona Apokalupo bukana ese ia herevalaia dagedage animal kakakakana idia durua taudia dekenai dahaka do ia vara?

4. Aposetolo Ioane ese daidia ia itaia Iesu ida guba dekenai?

⁴ Matahanai ta ai, aposetolo Ioane ese orea rua ia itaia, idia be Iehova ena lohia dalana idia durua bona mauri hanaihanai ena hahenamo idia abia. Orea ginigunana dekenai 144,000 taudia idia noho. (Apok. 7:4) Idia be Dirava ese tanobada amo ia abia hidi Iesu ida guba gavamanina, o Basileia, do idia haginia. Bona Iesu ida tanobada do idia lohiaia. (Apok. 5:9, 10; 14:3, 4) Matahanai lalonai, Ioane ese idia ia itaia guba ena Siona Ororo dekenai Iesu ida idia gini.​—Apok. 14:1.

5. Kahirakahira 144,000 taudia oredia dekenai dahaka do ia vara?

⁵ Aposetolo edia nega amo ema bona hari, Dirava ese taunimanima tausen momo ia abia hidi 144,000 oreana ai idia lao totona. (Luka 12:32; Roma 8:17) To aneru ese Ioane ia hamaoroa, nega ena dokona ai, unai orea amo haida sibona eiava namba maragina, be tanobada ai do idia mauri noho. Hisihisi badana ia do matamaia lasi neganai, unai “oredia” be edia “maka” ginigabena, unai be Iehova ena lalonamo do idia abia. (Apok. 7:2, 3; 12:17) Bena hisihisi badana ia vara noho lalonai, unai oredia be guba dekenai do idia daekau bona 144,000 taudia ma haida ida do idia hedavari. Unuseniai idia be Iesu ida Dirava ena Basileia do idia lohiaia.​—Mat. 24:31; Apok. 5:9, 10.

6-7. (a) Ioane ese edena orea ia itaia, bona idia dekenai dahaka ita dibaia? (b) Dahaka dainai orena taudia bona “hutuma bada” ese Apokalupo karoa 7 ena guguru karana idia abia dae be namo?

⁶ Ioane ese guba do idia lao oreana ia itaia murinai, “hutuma bada” ia itaia. Edia namba ese 144,000 taudia edia namba ia hanaia. (Apok. 7:9, 10) Idia dekenai dahaka ita dibaia? Tau badadia ta ese Ioane ia hamaoroa: “Inai taudia be hisihisi badana amo idia hanaia mai taudia, bona Mamoe Natuna ena rara lalonai edia dabua idia huria bona idia kurokuro vadaeni.” (Apok. 7:14) “Hutuma bada” be hisihisi badana amo idia roho mauri murinai, idia be tanobada ai do idia noho bona hahenamo momo do idia moalelaia.​—Sal. 37:9-11, 27-29; Aon. 2:21, 22; Apok. 7:16, 17.

⁷ Herevana guba dekenai do ita lao eiava tanobada ai do ita noho, ita abia dae Apokalupo karoa 7 ese ia herevalaia gaudia edia guguru karana do ita itaia, a? Oibe, unai ita abia dae. Unai orea rua dekenai unai be moale bada negana! Do ita moale bada badina abia hidi ita karaia Iehova ena lohia dalana ita durua totona. Apokalupo bukana ese hisihisi badana be edena bamona ma ia herevalaia?​—Mat. 24:21.

8. Hisihisi badana be edena bamona do ia matamaia, bona taunimanima be dahaka do idia karaia?

⁸ Atikol 20 ai ita herevalaia bamona, kahirakahira inai tanobada ena politikol oreadia ese Babulonia Badana, tomadiho koikoi ibounai unai, do idia tuari henia. (Apok. 17:16, 17) Unai kara amo hisihisi badana do ia matamaia. Unai ia vara dainai momo be Iehova do idia tomadiho henia matamaia, a? Lasi. To, Apokalupo karoa 6 ese ia hahedinaraia, unai nega aukana lalonai, Iehova idia hesiai henia lasi taudia be politikol bona bisinesi oreadia amo heduru do idia tahua, idia be ororo bamona ia herevalaia. Idia be Dirava ena Basileia idia durua lasi dainai, Iehova ese idia do ia dadaraia.​—Luka 11:23; Apok. 6:15-17.

9. Edena dala ai hisihisi badana lalonai, Iehova ena hesiai taudia be do idia idau, bona dahaka do ia vara?

 ⁹ Momokani, unai nega aukana lalonai Iehova ena abidadama hesiai taudia edia kara be do ia idau. Tanobada ai idia sibona be Iehova Dirava do idia hesiai henia noho bona “dagedage animal” do idia durua lasi. (Apok. 13:14-17) Unai idia karaia dainai, Iehova idia inai henia taudia be do idia badu dikadika. Unai dainai, tanobada besedia ese Dirava ena taunimanima tanobada hegegemadai ai do idia tuari henia. Baibel ese unai ia gwauraia Goga, Magoga tanona tauna, ena tuari.​—Ese. 38:14-16.

10. Apokalupo 19:19-21 hegeregerena, Iehova ese ena taunimanima idia dagedage henia taudia dekenai dahaka do ia karaia?

¹⁰ Unai dagedage karana dainai Iehova be dahaka do ia karaia? Ita ia hamaoroa, ia gwau: “Egu badu do ia toreisi.” (Ese. 38:18, 21-23) Apokalupo karoa 19 ese do ia vara gauna ia herevalaia. Iehova ese ena Natuna do ia siaia Iena taunimanima ia gimaia bona edia inai taudia ia halusia totona. Unai tuari ai, “guba ena tuari oreadia,” abidadama aneru bona 144,000 taudia unai, be Iesu do idia bamoa. (Apok. 17:14; 19:11-15) Unai tuari ai dahaka do ia vara? Iehova idia inai henia taudia ibounai bona orea idauidau do idia hadikaia ore!​—Apokalupo 19:19-21 duahia.

11. Apokalupo bukana ese ia herevalaia mai anina bada gauna be dahaka?

¹¹ Dirava ena inai taudia idia hadikaia ore neganai, idia roho mauri abidadama taudia edia hemami mani oi laloa! Unai nega ai, moale bada do ia vara! Ena be Babulonia Badana ia ore dainai guba dekenai moale bada do ia vara, to gau ma ta dainai do idia moale bada danu. (Apok. 19:1-3) Apokalupo bukana ese ia herevalaia mai anina bada gauna ta do ia vara, unai be “Mamoe Natuna ena headava.”​—Apok. 19:6-9.

12. Apokalupo 21:1, 2 hegeregerena, Mamoe Natuna ena headava be edena negai do ia vara?

¹² Unai headava be edena negai do ia vara? Aramagedono tuarina ia do matamaia lasi neganai, 144,000 taudia ibounai be guba dekenai idia noho vadaeni. To, unai be Mamoe Natuna ena headava negana lasi. (Apokalupo 21:1, 2 duahia.) Aramagedono tuarina ia vara bona Dirava ena inai taudia ibounai do idia kokia murinai, Mamoe Natuna ena headava do idia karaia.​—Sal. 45:3, 4, 13-17.

13. Mamoe Natuna ena headava dekenai dahaka do ia vara?

¹³ Mamoe Natuna ena headava dekenai dahaka do ia vara? Headava ese tau bona hahine ia hatamonaia hegeregerena, laulau dalanai do ia vara headavana ese King, Iesu Keriso, bona iena “headava matamata kekeni,” 144,000 taudia unai, do ia hatamonaia. Idia ese gavamani matamata do idia haginia bona lagani 1,000 lalonai tanobada do idia lohiaia.​—Apok. 20:6.

14-15. Apokalupo karoa 21 ese 144,000 taudia be dahaka ida ia hahegeregerea? (Rau 1 ena laulau itaia.)

¹⁴ Danu, Apokalupo karoa 21 ese 144,000 taudia be siti mai hairaina ladana “Ierusalema Matamatana” ida ia hahegeregerea. (Apok. 21:2, 9) Unai siti ena badina nadidia be 12, bona unai nadi ta ta ai “Mamoe Natuna ena aposetolo taudia 12 edia ladana idia noho.” Dahaka dainai unai ese aposetolo Ioane ena ura ia habadaia? Badina unai nadi ta latanai iena ladana ia itaia. Unai be hahenamo badana!​—Apok. 21:10-14; Efe. 2:20.

¹⁵ Unai siti be siti ma haida amo ia idau. Dirava ese unai siti ena dala badana be golo  goevana amo ia karaia, iduara 12 be pel nadi 12, ena badina nadi be dava bada nadi idauidau amo ia hahairaia, bona ia ese unai siti ia hahetohoa namonamo. (Apok. 21:15-21) To gau ta ia noho lasi! Ioane ia gwau: “Unai siti lalonai dubu helaga ta lau itaia lasi, badina Iehova, Siahu Ibounai Diravana unai, be unai siti ena dubu helaga bona Mamoe Natuna danu be unai siti ena dubu helaga. Bona dina bona hua ese unai siti idia hadiaria be anina lasi, badina Dirava ena hairai ese siti ia hadiaria, bona ena lamepa be Mamoe Natuna.” (Apok. 21:22, 23) Ierusalema Matamatana taudia be Iehova ida do idia noho. (Heb. 7:27; Apok. 22:3, 4) Unai dainai, Iehova bona Iesu be unai siti ena dubu helaga.

16. Dirava ena Basileia ena Lohia Lagani 1,000 lalonai, taunimanima dekenai dahaka do ia vara?

¹⁶ Horoa taudia ese unai siti idia laloa neganai, idia moale bada. To tanobada helarona do idia abia taudia ese unai siti idia laloa bada danu be namo. Dirava ena Basileia ena Lohia Lagani 1,000 lalonai, Ierusalema Matamatana ese tanobada dekenai hahenamo momo herea do ia mailaia. Ioane ia itaia unai hahenamo idauidau be “mauri ranuna ena sinavai” bamona idia aru. Bona unai sinavai ena kahana kahana dekenai, “mauri audia” idia gini, bona edia raurau be “bese idauidau hanamoa totona.” (Apok. 22:1, 2) Mauri taudia ibounai be unai gau namodia amo namo do idia davaria. Metairametaira, Dirava idia kamonai henia taudia ibounai be do idia goevadae. Gorere, hisihisi, bona taitai be do idia ore.​—Apok. 21:3-5.

17. Apokalupo 20:11-13 hegeregerena, Lagani 1,000 Lohia Negana lalonai daidia be namo do idia davaria?

¹⁷ Daidia be inai hahenamo do idia moalelaia? Aramagedono amo do idia roho mauri hutuma bada taudia bona tanobada matamatana ai do idia vara natudia ese unai hahenamo do idia moalelaia. To danu Apokalupo karoa 20 ia gwauhamata mase taudia be do idia toreisi lou. (Apokalupo 20:11-13 duahia.) Idaunegai idia mase “kara maoromaoro” abidadama taudia bona “kara maoromaoro lasi” taudia, Iehova idia dibaia lasi taudia unai, be tanobada dekenai do idia toreisi lou. (Kara 24:15; Ioa. 5:28, 29) Unai ena anina be Lagani 1,000 Lohia Negana lalonai, taunimanima ibounai do idia toreisi lou, a? Lasi. Iehova hesiai henia karana idia dadaraia taudia  be idia mase neganai do idia toreisi lou lasi. Idia dekenai dala ia noho Iehova idia dibaia totona, to edia kara amo idia hahedinaraia idia hegeregere lasi tanobada Paradaiso ai idia noho.​—Mat. 25:46; 2 Tes. 1:9; Apok. 17:8; 20:15.

18. Lagani 1,000 ena dokonai, tanobada ai dahaka do ia vara?

¹⁸ Lagani 1,000 ena dokonai, tanobada ai idia noho taudia ibounai be do idia goevadae. Idia dekenai Adamu ena kara dika be do ia hanaia lasi. (Roma 5:12) Adamu amo ita abia hanai kara dika be Dirava ese do ia kokia momokani. Unai amo, lagani 1,000 ena dokonai, tanobada ai idia noho taudia be do idia “mauri lou” badina do idia goevadae.​—Apok. 20:5.

19. Dahaka dainai hahetoho ginigabena do ia vara?

¹⁹ Ita diba Satani ese Iesu ia tohoa neganai, Iesu be Dirava ia badinaia noho. To Satani ese goevadae taudia ia tohoa neganai, Iehova do idia badinaia noho, a? Lagani 1,000 ena dokonai, Satani be guri dobu masemase amo idia ruhaia neganai, ta ta sibona ese unai henanadai do idia haerelaia. (Apok. 20:7) Unai hahetoho ginigabena ai, Iehova idia badinaia noho taudia be mauri hanaihanai do idia abia bona ura kwalimu hereadaena do idia moalelaia. (Roma 8:21) To gwau-edeede taudia ibounai be Diabolo bona ena demoni ida do idia hadikaia ore.​—Apok. 20:8-10.

20. Apokalupo bukana ai idia noho peroveta herevadia be edena bamona oi laloa?

²⁰ Apokalupo bukana ita herevalaia murinai, emu hemami be edena bamona? Unai peroveta herevadia edia guguru negana oi itaia be moale gauna, ani? Unai ese oi ia hagoadaia dainai, oi ura ma haida oi boiria ita ida iseda Dirava idia tomadiho henia totona. (Apok 22:17) Vaira nega ai do idia vara gaudia ita laloa neganai, ita moale bada bona aposetolo Ioane bamona, ita gwau: “Amen! Lohiabada Iesu e, oi mai.”​—Apok 22:20.