1-2. Apokalupo bukana ita laloa bada ena badina ta be dahaka?

 NEGA ta oi be ta ese ia invait ma ta ena foto albam oi itaia totona, a? Foto oi itaia noho lalonai, oi itaia taudia momo be oi diba lasi. To, foto ta ese emu lalona ia veria. Dahaka dainai? Badina oi be unai foto dekenai oi noho. Unai foto oi itaia noho lalonai, foto idia abia negana bona gabuna oi laloa lou. Danu foto ai idia noho taudia ma haida oi itaia namonamo. Oi dekenai unai foto be mai anina bada.

² Apokalupo bukana be unai foto hegeregerena. Dahaka dainai? Ena badina be rua. Ginigunana be, inai Baibel bukana be ita totona idia torea. Karoa 1 ena siri ginigunana ai, ia gwau: “Iesu Keriso ese hunia herevana ia hahedinaraia, unai be Dirava ese ia dekenai ia henia gauna, kahirakahira do idia vara gaudia be ena hesiai taudia dekenai ia hahedinaraia totona.” (Apok. 1:1) Unai dainai, Apokalupo bukana ai idia noho gaudia be Dirava ena hesiai taudia totona idia torea. Ita be Dirava ena taunimanima dainai, ita hoa lasi badina ita ese Apokalupo bukana ena peroveta herevadia edia guguru karana ita durua noho. Danu Apokalupo bukana ita duahia neganai, ita laloparara unai gaudia be ita dekenai idia vara noho.

3-4. Apokalupo bukana hegeregerena, peroveta herevadia be edena negai do idia guguru, bona dahaka ita karaia be namo?

³ Iharuana be, Apokalupo bukana ese ia perovetalaia gaudia do idia guguru negana ia herevalaia. Aposetolo Ioane ese unai nega ia gwauraia hedinarai, ia gwau: “Lauma helaga amo lau be Lohiabada ena dina lalonai lau noho.” (Apok. 1:10) Lagani 96 C.E. bamona ai Ioane ese unai hereva ia torea neganai,  “Lohiabada ena dina” be ia do matamaia lasi. (Mat. 25:14, 19; Luka 19:12) To Baibel ena peroveta hereva hegeregerena, unai dina be lagani 1914 ai ia matamaia, unai negai Iesu be guba dekenai King ai ia lao. Unai lagani amo, Apokalupo bukana ese Dirava ena taunimanima ia herevalaia peroveta herevadia idia guguru matamaia. Oibe, hari ita be “Lohiabada ena dina” lalonai ita noho!

⁴ Hari gau momo idia vara noho dainai, Apokalupo 1:3 ese ia herevalaia sisiba namodia ita badinaia be namo, ia gwau: “Inai peroveta hereva ia duahia badabada tauna be do ia moale, bona inai hereva idia kamonai bona idia badinaia taudia be do idia moale, badina Dirava ena abia hidi negana be kahirakahira.” Momokani, namona be unai peroveta herevadia ita “duahia badabada,” ‘ita kamonai bona ita badinaia.’ Do ita badinaia herevadia haida be dahaka?

5. Edena dala ai Apokalupo bukana ese ia hahedinaraia Iehova ese iseda tomadiho dalana ia abia dae be mai anina bada?

⁵ Apokalupo bukana ena karoa ginigunana amo ita itaia, Iesu be kongrigeisen dekenai idia vara gaudia ia diba. (Apok. 1:12-16, 20; 2:1) Iesu ese Asia Minor dekenai idia noho kongrigeisen 7 dekenai ia henia sisiba amo unai ia hahedinaraia. Unai sisiba lalonai, unai negai idia noho Keristani taudia durua totona hakaua herevadia ia henia, unai amo Iehova ese edia tomadiho dalana ia abia dae diba. To, hari Dirava ena taunimanima ibounai dekenai unai sisiba be mai anina bada. Dahaka ita dibaia? Iseda Gunalaia Tauna, Keriso Iesu, ia diba iseda hetura karana Iehova ida be ia goada eiava lasi. Ia ese ita ia gunalaia bona gimaia, bona gau ibounai ia itaia. Ia diba gau haida ita karaia be namo Iehova ena lalonamo ita abia noho totona. Ia ese dahaka hakaua daladia ia henia ita badinaia totona?

6. (a) Iesu ena hereva Apokalupo 2:3, 4 hegeregerena, Efeso kongrigeisen be dahaka hekwakwanai ia davaria? (b) Unai sivarai amo dahaka ita dibaia?

⁶ Apokalupo 2:3, 4 duahia. Guna Iehova totona ita hahedinaraia lalokauna ita haboioa lasi. Iesu ese Efeso kongrigeisen taudia ia hamaoroa, idia be idia haheauka noho bona hekwakwanai idauidau lalonai Iehova idia hesiai henia noho. To, idia ese guna idia hahedinaraia lalokauna idia haboioa. Bema unai lalokau idia hagoadaia lou lasi, Iehova ese edia tomadiho dalana do ia abia dae lasi. Unai hegeregerena, hari inai negai badina maorodia dainai ita haheauka be namo. Iseda Dirava be ita karaia gaudia sibona lasi, to danu ita karaia ena badina ia ura diba. Iehova ese ita karaia gaudia edia badina ia laloa bada, ia ura ia ita lalokau henia bona laloa bada dainai ita tomadiho henia.​—Aon. 16:2; Mar. 12:29, 30.

7. (a) Apokalupo 3:1-3 hegeregerena, Iesu ese Sadi kongrigeisen dekenai dahaka hekwakwanai ia itaia? (b) Dahaka ita karaia be namo?

⁷ Apokalupo 3:1-3 duahia. Ita noga noho be gau badana. Sadi kongrigeisen ai idia noho taudia edia hekwakwanai be idau. Ena be guna Iehova idia hesiai henia, to gabeai unai kara idia hadokoa. Unai dainai Iesu ese idia ia hamaoroa idia “noga” totona. Unai sivarai amo dahaka ita dibaia? Oibe, Iehova ese iseda hesiai gaukara do ia laloaboio lasi. (Heb. 6:10) To, namo lasi ita laloa, guna Iehova ita hesiai henia dainai hari unai do ita karaia lasi. Ena be hari gau momo ita karaia diba lasi, to namona be “Lohiabada ena gaukara” lalonai ita bisi bona ita noga noho ela bona dokona.​—1 Kor. 15:58; Mat. 24:13; Mar. 13:33.

8. Apokalupo 3:15-17 hegeregerena, Iesu ese Laodikea tadikaka dekenai ia torea herevadia amo dahaka ita dibaia?

 ⁸ Apokalupo 3:15-17 duahia. Namona be mai ura bona kudouna ibounai ida tomadiho karadia ita karaia. Iesu ese ia hahedinaraia, Laodikea ai idia noho tadikaka taihu ese idia davaria hekwakwanai be idau. Idia be edia tomadiho karadia lalonai idia “siahu sisina,” anina be mai kudouna ibounai ida idia gaukara lasi. Unai dainai Iesu ese idia ia hamaoroa idia be “dika momokani” bona “hebogahisi gauna.” Namona be Iehova idia ura henia bada bona ena tomadiho totona idia gaukara goada. (Apok. 3:19) Dahaka ita dibaia? Bema iseda ura ia maragi, namona be Iehova bona ena orea ese ia henia gau namodia ibounai ita laloa bada. (Apok. 3:18) Namo lasi kohu o moni momo tahua karana ese ita ia hakaua kerere, unai amo iseda mauri lalonai Iehova tomadiho henia karana do ita laloa bada lasi.

9. Iesu ena hereva Peregamo bona Tuatira Keristani taudia dekenai ese ia hahedinaraia, dahaka dika ita dadaraia be namo?

⁹ Aposteit edia hahediba herevadia ita dadaraia. Iesu ese Peregamo kongrigeisen taudia ia sisiba henia badina haida idia ura kongrigeisen idia hapararaia. (Apok. 2:14-16) Ia ese Tuatira kongrigeisen ia hanamoa badina “Satani ena dobu gaudia” idia dadaraia, bona idia ia hagoadaia hereva momokani idia “dogoatao noho” totona. (Apok. 2:24-26) Unuseniai idia noho manoka Keristani taudia be hadibaia hereva koikoi idia abia dae matamaia, unai dainai idia helalo-kerehai be namo. Ita be edena bamona? Iehova ena lalohadai idia badinaia lasi hahediba herevadia ita dadaraia be namo. Aposteit taudia ese ‘Dirava badinaia karana be toana sibona idia hahedinaraia,’ to ‘Dirava idia badinaia lasi.’ (2 Tim. 3:5) Baibel ita stadilaia namonamo neganai, do ia auka lasi aposteit taudia edia hahediba herevadia ita lalopararalaia bona dadaraia totona.​—2 Tim. 3:14-17; Iuda 3, 4.

10. Iesu ese Peregamo bona Tuatira tadikaka dekenai ia gwauraia herevadia amo dahaka gaudia ma haida ita dibaia danu?

¹⁰ Matabodaga karadia idauidau ita dadaraia be gau badana. Peregamo bona Tuatira ai idia noho tadikaka dekenai hekwakwanai ma ta ia noho danu. Unai kongrigeisen ai idia noho taudia haida be matabodaga karadia idia dadaraia lasi dainai, Iesu ese idia ia gwau henia. (Apok. 2:14, 20) Dahaka ita dibaia?  Ena be lagani momo Iehova ita hesiai henia bona hari gaukara namodia momo ita karaia, to bema matabodaga karana ta ita karaia noho, Iehova be unai ia itaia. (1 Sam. 15:22; 1 Pet. 2:16) Bona ena be tanobada taudia edia kara ia dika ia lao, to Iehova ia ura iena kara maoromaoro taravatudia ita badinaia noho.​—Efe. 6:11-13.

11. Ita herevalaia gaudia amo dahaka ita dibaia? (Maua itaia: “ Ita Dibaia Gaudia.”)

¹¹ Ita herevalaia gaudia amo dahaka ita dibaia? Namona be ita gaukara goada Iehova ese iseda tomadiho dalana ia abia dae totona. Bema ita karaia gauna ta dainai Dirava ese iseda tomadiho dalana ia abia dae lasi, namona be hari iseda kara ita haidaua haraga, unai amo Dirava ena lalonamo ita abia diba. (Apok. 2:5, 16; 3:3, 16) To, Iesu ese unai kongrigeisen ta ta totona ia henia hereva dekenai gau ta ia gwauraia danu. Unai be dahaka?

12. Iesu ese Semurana bona Filadelefia kongrigeisen totona ia gwauraia herevadia amo dahaka ita dibaia? (Apokalupo 2:10)

¹² Iesu ese Semurana bona Filadelefia kongrigeisen taudia totona ia gwauraia herevadia mani ita itaia. Ia ese unai Keristani taudia ia hamaoroa dagedage karadia dainai idia gari lasi be namo, badina Dirava ese idia do ia hanamoa bema ia idia badinaia noho. (Apokalupo 2:10 duahia; 3:10) Dahaka ita dibaia? Ita be dagedage do ita davaria bona unai ita haheaukalaia be namo. (Mat. 24:9, 13; 2 Kor. 12:10) Dahaka dainai unai hadibaia herevana be mai anina bada?

13-14. Apokalupo karoa 12 ese ia herevalaia gaudia dainai Dirava ena taunimanima dekenai dahaka ia vara?

¹³ Apokalupo bukana ese ita ia hadibaia hari ita noho negana o “Lohiabada ena dina” lalonai, Dirava ena taunimanima do idia dagedage henia. Apokalupo karoa 12 ia gwau Iesu be Dirava ena Basileia ena King ai ia lao murinai, maoromaoro guba dekenai tuari ia vara. Mikaela, Iesu Keriso unai, bona ena aneru ese Satani bona ena demoni idia tuari henia. (Apok. 12:7, 8) Bona Dirava ena inai taudia idia halusia bona tanobada dekenai idia negea diho, bona idia ese taunimanima idia hahisia bada. (Apok. 12:9, 12) To unai ese Dirava ena taunimanima dekenai dahaka ia havaraia?

¹⁴ Apokalupo bukana ese gabeai Satani dekenai ia vara gauna ia herevalaia. Ia be guba dekenai ia giroa lou diba lasi, unai dainai tanobada ai Dirava ena horoa taudia ia dagedage henia noho. Idia be Dirava ena Basileia ena gwaukau taudia bona “edia gaukara be Iesu idia gwauraia hedinarai.” (Apok. 12:17; 2 Kor. 5:20; Efe. 6:19, 20) Edena dala ai unai peroveta herevana ia guguru?

15. Apokalupo karoa 11 ese ia herevalaia “witnes taudia rua” be daidia ia laulaulaia, bona idia dekenai dahaka ia vara?

 ¹⁵ Satani ese Dirava ena inai taudia ia gaukaralaia, Basileia harorolaia gaukarana idia gunalaia horoa taudia idia dagedage henia totona. Apokalupo bukana ai “witnes taudia rua” idia hamasea karana ia herevalaia, bona idia be horoa taudia ia laulaulaia. * (Apok. 11:3, 7-11) Lagani 1918 ai, orea idia gunalaia tadikaka 8 idia samania koikoi bona dibura ruma ai lagani momo do idia noho. Taunimanima momo idia laloa unai horoa tadikaka edia gaukara ia doko.

16. Lagani 1919 ai dahaka ia vara, to unai nega amo Satani be dahaka ia karaia?

¹⁶ Danu Apokalupo karoa 11 ena peroveta herevana ia gwau idia hamasea “witnes taudia rua” be daudau lasi murinai do idia mauri lou. Unai peroveta herevana be dala idauna ai ia guguru, badina horoa tadikaka idia hadiburaia bona murina laganina ai gau ta ia vara. Lagani 1919 ai, March hua lalonai unai tadikaka be dibura ruma amo idia ruhaia. Bena maoromaoro Basileia harorolaia gaukarana idia karaia lou. To unai ese Satani ia koua lasi Dirava ena taunimanima ia dagedage henia totona. Unai nega amo, Satani ese Dirava ena taunimanima ibounai dekenai “sinavai” bamona dagedage karadia ia havaraia. (Apok. 12:15) Momokani, ita ta ta ‘ita haheauka bona abidadama noho’ be gau badana.​—Apok. 13:10.

17. Ena be Satani ese Dirava ena taunimanima ia tuari henia noho, to edena dala ai heduru idia abia?

¹⁷ Apokalupo karoa 12 ese ia hahedinaraia Dirava ena taunimanima be dala ma ta amo heduru do idia abia. Unai be hegeregere “tanobada ese iena uduna ia kehoa” bona “sinavai ranuna,” dagedage karadia unai, ia hadonoa. (Apok. 12:16) Bona unai ia vara. Nega haida, Satani ena tanobada oreadia haida, hegeregere kota karaia oreadia haida, be Dirava ena taunimanima idia durua. Nega momo, Iehova ena hesiai taudia be kota dekenai idia kwalimu, bona unai ese idia dekenai dala ia kehoa. Dahaka idia karaia totona? Idia ese unai nega idia gaukaralaia Iehova ese ia henia gaukarana idia karaia totona. (1 Kor. 16:9) Unai gaukara be dahaka?

18. Inai nega dokona ai iseda gaukara badana be dahaka?

 ¹⁸ Iesu ia peroveta dokona ia do mai lasi neganai, ena taunimanima be tanobada ibounai dekenai “[Dirava] ena Basileia ena sivarai namona” do idia harorolaia. (Mat. 24:14) Unai idia karaia neganai, aneru ese idia durudia, bona Baibel ia gwau aneru ese “noho hanaihanai sivarai namona be tanobada ai idia noho taudia, bese ibounai bona iduhu ibounai, gado ibounai, bona kopi idauidau taudia ibounai dekenai [idia] gwauraia.”​—Apok. 14:6.

19. Iehova idia lalokau henia taudia ese edena sivarai ma ta do idia harorolaia?

¹⁹ Dirava ena taunimanima ese Basileia ena sivarai namona idia harorolaia bona aneru edia gaukara idia durua danu, unai be Apokalupo karoa 8 ia lao 10 ese ia herevalaia. Unai aneru be Dirava ena Basileia idia dadaraia taudia dekenai do ia vara dika idia herevalaia. Oibe, Iehova ena Witnes taudia ese Satani ena tanobada dikana ena kahana ta ta dekenai hahemaoro sivaraina idia gwauraia, unai sivarai be “aisi nadi bona lahi” bamona. (Apok. 8:7, 13) Namona be taunimanima idia diba dokona be ia kahirakahira vadaeni, unai amo edia mauri idia haidaua bona Iehova ena badu dinana amo idia roho mauri diba. (Sef. 2:2, 3) To momo be unai sivarai idia diba lasi. Unai sivarai oi gwauraia totona oi gari lasi be namo. Hisihisi badana lalonai, do ita gwauraia hahemaoro sivarai dokona ese momo do ia habadua momokani.​—Apok. 16:21.

20. Atikol 20 bona 21 ai dahaka do ita herevalaia?

²⁰ “Inai peroveta hereva” ita badinaia be namo, badina Apokalupo bukana ai ita duahia gaudia be ita dekenai ia guguru danu. (Apok. 1:3) To edena dala ai dagedage do ita haheaukalaia bona mai gari lasi ida unai sivarai ita harorolaia noho diba? Inai gau rua ese ita do ia hagoadaia: Ginigunana be, Apokalupo bukana ese Dirava ena inai taudia ia gwauraia hedinarai karana, bona iharuana be, bema Dirava ita badinaia noho vaira nega ena hahenamo do ita abia. Atikol 20 bona 21 ese unai do idia herevalaia.