1. Dahaka dainai Dirava amo ia mai aonega ita abia be namo? (Aonega Herevadia 4:7)

 NEGA ta mai anina bada abia hidi ta oi ura karaia neganai, oi be aonega totona oi guriguri, badina oi diba unai bamona oi karaia be namo. (Iam. 1:5) King Solomona ia gwau: “Aonega be mai anina bada gauna.” (Aonega Herevadia 4:7 duahia.) Momokani, Solomona be aonega idauna ma ta ia herevalaia lasi. Ia be Iehova Dirava amo ia mai aonega ia herevalaia. (Aon. 2:6) To unai aonega ese ita ia durua diba hari ita davaria hekwakwanai idauidau ita haheaukalaia totona, a? Oibe. Bona inai atikol ai unai do ita herevalaia.

2. Aonega ita abia dalana ta be dahaka?

² Aonega ita abia dalana ta be, edia aonega bada dainai idia matauraia taudia rua ese idia hadibaia gaudia ita stadilaia bona badinaia. Ginigunana be, Solomona do ita herevalaia. Baibel ia gwau “Dirava ese Solomona dekenai aonega bona laloa kehoa bada herea ia henia.” (1 Ki. 4:29) Iharuana be, Iesu do ita herevalaia, iena aonega be bada herea. (Mat. 12:42) Momokani, Iesu totona inai idia perovetalaia: “Iehova ena lauma be ena latanai do ia noho. Unai dainai ena aonega bona laloparara do ia bada.”​—Isa. 11:2.

3. Inai atikol ai dahaka do ita herevalaia?

³ Dirava ese Solomona bona Iesu dekenai aonega bada ia henia, unai dainai idia ruaosi be mai anina bada gaudia dekenai sisiba namodia idia henia diba. Inai atikol ai, unai gau toi do ita herevalaia: Moni, moni gaukara, bona ita sibona dekenai lalohadai maorona ita abia be namo.

4. Edena dala ai Solomona ena noho dalana be Iesu amo ia idau?

⁴ Solomona be taga bada tauna, bona ruma hairaina ta ai ia noho. (1 Ki. 10:7, 14, 15) To Iesu ena kohu be momo lasi, bona sibona totona ruma ta ia haginia lasi. (Mat. 8:20) To, idia ruaosi be kohu dekenai lalohadai maorona idia abia, badina idia be Iehova Dirava amo ia mai aonega idia abia.

5. Solomona ese moni dekenai dahaka lalohadai maorona ia abia?

⁵ Solomona ia gwau moni ese ita ia “gimaia.” (Had. 7:12) Moni amo ita ese mauri durua gaudia bona iseda ura gaudia haida ita abia diba. Herevana Solomona be taga tauna, to ia laloparara mai anina bada gaudia ma haida ese moni idia hereaia. Hegeregere, ia gwau: “Ladana namona ese kohu momo ia hereaia.” (Aon. 22:1) Danu, Solomona ia gwau moni idia lalokau henia taudia be idia dekenai idia noho gaudia do idia moalelaia momokani lasi. (Had. 5:10, 12) Bona ma ia gwau, iseda moni dekenai ita abidadama lasi, badina ita abia moni be ia boio haraga diba.​—Aon. 23:4, 5.

6. Iesu ese kohu dekenai dahaka lalohadai maorona ia abia? (Mataio 6:31-33)

⁶ Iesu ese kohu dekenai lalohadai maorona ia abia. Ia ese aniani bona inuinu gaudia ia moalelaia. (Luka 19:2, 6, 7) Nega ta, ia ese wain namo hereana ta ia karaia, unai be ena hoa karana ginigunana. (Ioa. 2:10, 11) Bona ena mase dinana ai, ia be dava bada dabua ta ia hahedokilaia. (Ioa. 19:23, 24) To Iesu be ena mauri lalonai kohu tahua karana ia atoa guna lasi. Iena hahediba taudia ia hamaoroa: “Tau ta be biaguna rua edia hesiai gaukara ia karaia diba lasi, . . . Dirava bona Taga be nega tamona umui hesiai henia diba lasi.” (Mat. 6:24) Iesu ia gwau bema Basileia ita tahua guna, Iehova ese iseda dabu gaudia do ia henia.​—Mataio 6:31-33 duahia.

7. Edena dala ai tadikaka ta be moni dekenai lalohadai maorona ia abia karana amo namo ia davaria?

⁷ Iseda tadikaka bona taihu momo be namo idia davaria badina Dirava ena sisiba namodia  moni totona idia badinaia. Mani singul tadikaka ta ladana Daniel ena haheitalai ita laloa. Ia gwau: “Egu matamata negana ai, abia hidi lau karaia egu mauri ai Iehova hesiai henia karana lau atoa guna.” Daniel be ena mauri lalonai, kohu bona moni momo ia tahua lasi dainai, tiokratik projek momo dekenai ena nega bona diba ia gaukaralaia. Danu, ia gwau: “Mai momokani ida lau gwau diba, egu abia hidi dainai lau lalohisihisi lasi. Momokani, reana moni momo lau abia diba bema unai be egu mauri ai lau atoa guna. To, hari lau davaria tura namodia do lau davaria lasi. Iehova ena ura lau atoa guna dainai hari lau moale, to bema egu mauri ai moni lau laloa bada unai moale do lau abia lasi. Iehova ese lau dekenai hahenamo momo ia henia bona unai ese moni ia hereaia.” Ia hahedinaraia, namo ita davaria diba bema Iehova ena ura gaudia ita atoa guna, to moni lasi.

8. Edena dala ai ita diba Solomona ese gaukara dekenai lalohadai maorona ia abia? (Hadibaia Tauna 5:18, 19)

⁸ Solomona ese gaukara goada karana amo ita abia moalena ia gwauraia, “Dirava ena harihari gauna.” (Hadibaia Tauna 5:18, 19 duahia.) Ia gwau: “Mai emu goada ida gaukara idauidau oi karaia be mai ena namo.” (Aon. 14:23) Solomona ia diba unai hereva be momokani. Ia be gaukara goada tauna ta! Ia ese ruma ia haginia, vain uma momo ia karaia, uma gabudia bona gohu ia karadia. Bona siti ia haginidia danu. (1 Ki. 9:19; Had. 2:4-6) Unai gaukara be mai ena hekwarahi, bona unai ia moalelaia. To, Solomona be unai gaukara sibona amo moale ia abia lasi. Ia be Iehova totona gau momo ia karaia danu. Hegeregere, ia ese Iehova tomadiho henia totona, lagani 7 lalonai dubu helaga hairaina haginia ena projek ia naria! (1 Ki. 6:38; 9:1) Solomona be gau momo ia karaia murinai, ia laloparara Iehova hesiai henia gaukarana be mai anina bada. Ia gwau: “Oi kamonai gaudia ibounai amo hereva dokona be inai: Dirava momokanina do oi gari henia bona ena oda herevadia do oi badinaia.”​—Had. 12:13.

9. Edena dala ai Iesu be ena gaukara dekenai lalohadai maorona ia abia?

⁹ Iesu be gaukara goada tauna. Tanobada ai ia noho neganai, ia be kapenta gaukara ia karaia. (Mar. 6:3) Momokani, Iesu ena tama sina idia moale badina ia ese edia ruma bese badana ia durua edia dabu gaudia idia abia totona. Iesu be goevadae tauna bona gaukara namodia ia karaia diba, unai dainai reana taunimanima momo be ia karaia gaudia idia ura henia bada! Iesu be ena gaukara ia moalelaia. Herevana ia be gaukara goada tauna, to nega ia atoa Iehova ia hesiai henia totona. (Ioa. 7:15) Gabeai, ful-taim haroro gaukara ia karaia neganai, ia idia kamonai henia taudia ia hamaoroa: “Ia bodaga diba aniani totona umui gaukara lasi, to ia bodaga diba lasi bona mauri hanaihanai ia henia aniani totona do umui gaukara.” (Ioa. 6:27) Bona Iesu be ena Ororo Harorona ai, ia gwau: “Guba dekenai umui sibona totona dava bada kohu do umui haboua.”​—Mat. 6:20.

10. Haida be moni gaukara dekenai dahaka hahetoho idia davaria diba?

¹⁰ Dirava amo ia mai aonega ese ita ia durua iseda moni gaukara dekenai lalohadai maorona ita abia totona. Ita be Keristani taudia dainai, ita “gaukara goada bona . . .  gaukara namona” ita karaia be namo. (Efe. 4:28) Iseda bosi be nega momo, iseda kara momokani bona gaukara goada karana idia itaia, bona reana ita do idia hadibaia iseda gaukara dalana  idia laloa bada. Reana badina maorodia dainai hora momo ita gaukara, badina ita ura iseda bosi do ia itaia Iehova ena Witnes taudia be gaukara idia karaia namonamo. To, gabeai, reana do ita laloparara ita be nega lasi iseda ruma bese ita bamoa bona tiokratik gaukara ma haida ita karaia totona. Namona be gau haida ita haidaua, unai amo iseda nega be hegeregere mai anina bada gaudia ita karaia totona.

11. Tadikaka ta be gaukara dekenai lalohadai maorona abia karana amo dahaka ia dibaia?

¹¹ Matamata tadikaka ta ladana William ia itaia moni gaukara dekenai lalohadai maorona abia karana be mai ena namo. William be guna elda ta ena kampani dekenai ia gaukara, bona unai tadikaka be inai bamona ia herevalaia: “Ia be ena gaukara dekenai lalohadai maorona ia abia. Ia be gaukara goada tauna, bona ena gaukara namona dainai ena kastoma be ia dekenai idia moale. To adorahi ai, ena gaukara ia ore neganai, ena nega bona goada ia gaukaralaia ena ruma bese bona ena tomadiho karana ia laloa bada totona. Ia be moale tauna!” *

12. Edena dala ai Solomona be sibona dekenai lalohadai maorona ia abia, to gabeai dahaka ia vara?

¹² Solomona be mai abidadama ida Iehova ia tomadiho henia neganai, ia be sibona dekenai lalohadai maorona ia abia. Ia be mero matamata dainai mai manau ida ia abia dae ia be hegeregere lasi bona Iehova ena heduru totona ia noinoi. (1 Ki. 3:7-9) Solomona ia lohia matamaia neganai, ia laloparara hekokoroku karana be mai ena dika. Ia gwau: “Hekokoroku karana be dika ia lao henia, bona sibona ia abia isi tauna be do ia moru.” (Aon. 16:18) To madi, gabeai Solomona be sibona ena sisiba ia badinaia lasi. Iena lohia negana ta ai, mai hekokoroku ida Dirava ena taravatu ia badinaia lasi. Hegeregere, taravatu ta ia gwau namo lasi Heberu king ta  ese “ia sibona totona hahine momo ia abia, dika unai ese ena kudouna ia hakaua kerere.” (Deut. 17:17) Solomona ese unai taravatu ia badinaia lasi bona ia ese hahine 700 bona hahine ma haida 300 ia adavaia, idia momo be Dirava koikoi idia tomadiho henia! (1 Ki. 11:1-3) Reana Solomona ia laloa “dika ta do ia vara lasi.” To gabeai, Iehova ia kamonai henia lasi dainai dika ia davaria.​—1 Ki. 11:9-13.

13. Iesu ena manau karana amo dahaka ita dibaia?

¹³ Iesu be sibona dekenai lalohadai maorona ia abia bona ia manau. Iesu be tanobada dekenai ia do mai lasi neganai, ia be Iehova ia hesiai henia noho lalonai gau namodia momo ia karaia. Iesu amo, Dirava ese “gau ibounai guba ai bona tanobada ai ia havaraia.” (Kol. 1:16) Iesu be ena bapatiso negana ai, ena Tamana ida ia noho neganai ia hagugurua gaudia ia laloa lou. (Mat. 3:16; Ioa. 17:5) To Iesu be unai gaudia ia laloa lou neganai, ia hekokoroku lasi. Danu, ia laloa lasi ia be ma haida ia hereaia. Iena hahediba taudia ia hamaoroa ia be tanobada dekenai ia mai, “taunimanima ese ia idia hesiai henia totona lasi, to ma haida hesiai henia totona ia mai.” (Mat. 20:28) Danu, mai manau ida ia gwau, ia be sibona ena ura dekenai gau ta ia karaia diba lasi. (Ioa. 5:19) Iesu be manau tauna momokani! Bona haheitalai namona ia hahedinaraia ita tohotohoa totona.

14. Sibona dekenai lalohadai maorona ita abia totona, Iesu amo dahaka ita dibaia?

¹⁴ Iesu ese ena hahediba taudia ia hadibaia sibona dekenai lalohadai maorona idia abia totona. Nega ta, Iesu ese ia hamaorodia: “Emui kwarana huina ibounai ia duahia vadaeni.” (Mat. 10:30) Unai hereva ese ita ia hagoadaia diba, bema ita be sibona ita laloa maragi. Anina be iseda guba Tamana be ita ia laloa bada, iena matanai ita be dava bada gauna bamona. Bema ita laloa ita be hegeregere lasi Iehova ita tomadiho henia bona ena tanobada matamatana ai mauri do ita abia lasi, ita hahedinaraia Iehova ena hahemaoro karana dekenai ita daradara.

15. (a) Gima Kohorona ia gwau sibona dekenai dahaka lalohadai maorona ita abia be namo? (b) Rau 24 ena laulau hegeregerena, bema sibona ita laloa bada, dahaka hahenamo ita reaia?

 ¹⁵ Lagani 15 gunanai, Gima Kohorona ia gwau sibona dekenai lalohadai maorona ita abia be namo: “Namo lasi sibona ita laloa bada bena ita hekokoroku; danu namo lasi sibona ita laloa maragi bena ita lalohisihisi. To, namona be ita gaukara goada sibona dekenai lalohadai maorona ita abia, anina be iseda goada bona manoka gaudia ita lalopararalaia. Keristani taihu ta ia gwau: ‘Lau be taunimanima dikana lasi, to danu lau be taunimanima namona momokani lasi. Gau haida lau karaia namonamo diba bona gau haida lau karaia namonamo lasi, bona momo be unai bamona danu.’” * Sibona dekenai lalohadai maorona ita abia ena namo oi itaia, a?

16. Dahaka dainai Iehova ese hakaua hereva namodia ia henia?

¹⁶ Iehova be ena hereva Baibel amo, hakaua hereva namodia ia henia. Ia be ita ia lalokau henia, bona ia ura ita moale. (Isa. 48:17, 18) Namona be iseda mauri ai Iehova ia hamoalea gaudia ita atoa guna, unai ese ita dekenai moale korikori do ia havaraia. Unai bamona ita karaia neganai, moni, moni gaukara, bona sibona idia laloa bada taudia ese idia davaria hekwakwanai ita hanaia diba. Namona be iseda lalona ita hadaia do ita aonega bona Iehova ena kudouna ita hamoalea!​—Aon. 23:15.