1-2. Dahaka dainai iseda noho dalana ia idau neganai Baibel ena hakaua hereva haida ese ita do ia durua?

 HEADAVA dinana ai, nega momo elda ta be tau bona hahine totona Baibel amo headava ena tok ia henia. Unai tok ese ia herevalaia hakaua herevadia be idia diba vadaeni. To, hari idia kamonai gaudia be mai anina bada. Dahaka dainai? Badina hari idia headava bona unai do idia badinaia hebou.

² Keristani headava taudia be tama sina ai idia lao neganai unai bamona ia vara danu. Lagani momo idia hanaia lalonai, reana idia be natudia naria karana ia herevalaia tok momo idia kamonai vadaeni. To, hari idia dekenai unai tok amo idia kamonai sisiba be mai anina bada. Idia be natuna ta do idia havaraia bona naria. Unai be maduna badana ta! Unai dainai, iseda noho dalana ia idau neganai, ita diba vadaeni Baibel ena hakaua hereva haida be ita do idia durua. Unai badina dainai Iehova idia tomadiho henia taudia ese Toretore Helagadia idia duahia, bona Israela ena king taudia hegeregerena, edia mauri “dinadia ibounai lalonai” idia laloa dobu.​—Deu. 17:19.

3. Inai atikol ai dahaka do ita herevalaia?

³ Tama sina e, Keristani taudia ai umui lao be hahenamo badana, badina emui natudia umui durua Iehova idia dibaia totona. To natudia dekenai Dirava umui herevalaia sibona be hegeregere lasi. Namona be umui durudia ia idia lalokau henia bada. Dahaka umui karaia diba emui natudia ese Iehova idia lalokau henia totona? Inai atikol ai, tama sina ia durua Baibel ena hakaua hereva foa do ita herevalaia. (2 Tim. 3:16) Danu, Keristani tama sina haida ese Baibel ena sisiba namodia idia badinaia karana amo namo idia davaria dalana do ita itaia.

4. Edena hakaua herevana ta ese tama sina ia durua edia natudia dekenai Iehova lalokau henia karana idia hadibaia totona? (Iamesi 1:5)

⁴ Hakaua Hereva 1: Iehova ena hakaua dalana tahua. Iehova oi noia oi dekenai aonega ia henia, unai amo emu natudia oi durua Ia idia lalokau henia totona. (Iamesi 1:5 duahia.) Badina momo dainai ia be sisiba henia Tauna hereadaena. Mani badina rua ita laloa. Ginigunana be, Iehova be tama sina edia maduna ia diba namonamo. (Sal. 36:9) Bona iharuana be, ia henia aonega sisiba be hanaihanai mai ena namo.​—Isa. 48:17.

5. (a) Iehova ena orea ese dahaka ia henia tama sina ia durua totona? (b) Vidio ese ia hahedinaraia bamona, Tadikaka bona Taihu Amorim ese edia natudia idia durua dalana amo dahaka oi dibaia?

⁵ Iehova ese ena Hereva bona ena orea amo tama sina dekenai infomeisen momo ia henia, unai ese idia ia durua edia natudia dekenai Iehova lalokau henia karana idia hadibaia totona. (Mat. 24:45) Hegeregere, heduru hereva ma haida oi davaria diba inai kahana “Help for the Family” ai, ia be lagani momo lalonai Awake! magasin dekenai ia hedinarai bona hari iseda websait ai ia noho. Danu, jw.org ai idia noho vidio momo ese tama sina ia durua edia natudia idia naria lalonai Iehova ena sisiba namodia idia badinaia totona. *​—Aon. 2:4-6.

6. Tama ta ese Iehova ena orea amo ia abia sisiba namodia be edena bamona ia laloa?

⁶ Tama sina momo be Iehova ese ena orea amo ia henia heduru dainai idia moale bada. Tama ta ladana Joe ia gwau: “Hereva momokani ai natudia toi naria karana be mai ena hekwarahi. Lau bona egu adavana be hanaihanai Iehova ai guriguri henia ai ia durua totona. Bona nega momo ai mamia atikol ta o vidio ta be nega maorona ai ia hedinarai, bona ai ia durua ai davaria hekwakwanai ta ai haheaukalaia totona. Ai be hanaihanai Iehova ena sisiba namodia dekenai ai tabekau.” Joe bona ena adavana idia itaia unai bamona atikol bona vidio ese edia natudia ia durua Iehova kahirakahira idia lao totona.

7. Dahaka dainai tama sina ese haheitalai namona idia hahedinaraia be namo? (Roma 2:21)

⁷ Hakaua Hereva 2: Haheitalai namona hahedinarai. Natudia be edia tama sina ese  idia karaia gaudia idia itaia namonamo bona nega momo idia tohotohoa. Momokani, tama sina be goevadae lasi. (Roma 3:23) To, aonega tama sina be idia gaukara goada edia natudia totona haheitalai namona idia hahedinaraia. (Roma 2:21 duahia.) Tama ta ese natudia be inai bamona ia herevalaia, ia gwau: “Idia be spansi ese ranu ibounai ia abia vareai bamona.” Bona ma ia gwau: “Ita do idia hamaoroa bema idia dekenai ita hadibaia gaudia ita badinaia lasi.” Unai dainai bema ita ura iseda natudia ese Iehova idia lalokau henia, namona be iseda kara amo ita hahedinaraia Iehova ita lalokau henia danu.

8-9. Andrew bona Emma edia hereva amo dahaka oi dibaia?

⁸ Tama sina ese dala idauidau ai natudia idia hadibaia Iehova idia lalokau henia totona. Mauri lagani 17 tadikaka ta ladana Andrew ena hereva ita laloa, ia gwau: “Egu tama sina ese hanaihanai lau idia hadibaia guriguri karana be mai anina bada. Hanuaboi momo, egu Tamana be lau ida do ia guriguri, ena be sibona lau guriguri vadaeni. Egu tama sina be nega momo ai idia hadibaia: ‘Iehova oi hereva henia diba nega ibounai.’ Unai dainai egu mauri ai guriguri lau laloa bada, bona hari ia auka lasi Iehova lau guriguri henia bona Tama lalokauna ta bamona lau laloa.” Tama sina e, namona be umui laloatao, Iehova umui lalokau henia neganai emui natudia ese ia do idia lalokau henia danu.

⁹ Mani Emma ena haheitalai ita laloa. Iena tamana be taunimanima momo dekenai moni ia abitorehai bona edia ruma bese ia rakatania neganai, ena sinana ese abitorehai ena davana ia haloua. Emma ia gwau: “Nega haida egu sinana dekenai moni be hegeregere lasi, to nega momo Iehova ese ena hesiai taudia ia naria bona durua dalana ia herevalaia. Iena mauri dalana amo lau itaia, egu sinana be ia herevalaia gauna ia abia dae momokani. Egu sinana be lau dekenai ia hadibaia gauna ia badinaia.” Dahaka ita dibaia? Tama sina edia haheitalai amo natudia idia durua diba ena be edia noho dalana ia auka.​—Gal. 6:9.

10. Israela tama sina be edena bamona negadia ai edia natudia dekenai Iehova idia herevalaia diba? (Deuteronomi 6:6, 7)

¹⁰ Hakaua Hereva 3: Hanaihanai emu natudia ida oi herevahereva. Iehova ese idaunegai Israela taudia ia hagania hanaihanai edia natudia dekenai ia idia herevalaia be namo. (Deuteronomi 6:6, 7 duahia.) Unai tama sina be dina ibounai lalonai dala idauidau ai edia natudia idia hereva henia bona idia durudia Iehova idia lalokau henia totona. Hegeregere, Israela mero matamata ta be hora momo lalonai ena tamana ia durua uhe idia hadoa eiava idia geia aniani idia haboua. Reana iena taihuna be sinana ia durua idia turituri bona ruma gaukara ma haida ia karaia. Tama sina bona natudia idia gaukara hebou neganai, mai anina bada topik momo idia herevalaia diba. Hegeregere, idia ese Iehova ena kara namodia bona edia ruma bese ia durua dalana idia herevalaia.

11. Keristani tama sina be edena negai edia natudia ida idia herevahereva diba?

¹¹ Hari mauri ia idau, guna bamona lasi. Tano momo ai, ia auka dina ibounai lalonai tama sina bona natudia idia hebamo totona. Reana tama sina be gaukara idia lao bona natudia be sikuli dekenai idia lao. Unai dainai, namona be tama sina ese nega idia atoa edia natudia ida idia herevahereva totona. (Efe. 5:15, 16; Fili. 1:10) Ruma bese tomadiho be nega namona idia herevahereva totona. Matamata tadikaka ta ladana Alexander ia gwau: “Egu tamana be hanaihanai dala ia karaia ruma bese tomadiho ai abia totona, bona ia ura lasi  gau ta ese unai ia koua. Unai murinai mai anina bada gaudia ai herevalaia.”

12. Ruma bese ena kwarana ese ruma bese tomadiho lalonai dahaka ia laloatao be namo?

¹² Bema oi be ruma bese ena kwarana, dahaka oi karaia diba emu natudia ese ruma bese tomadiho idia moalelaia totona? Mani dala oi karaia emu natudia ida inai pablikeisen matamatana Mauri Moalelaia Hanaihanai! Umui stadilaia totona. Unai buka umui stadilaia neganai do ia auka lasi umui herevahereva totona. Oi ura emu natudia ese edia hemami bona lalohekwarahi gaudia idia gwauraia hedinarai, unai dainai namo lasi ruma bese tomadiho negana oi gaukaralaia idia oi gwau henia eiava edia kerere oi hamaoromaoroa totona. Bona oi badu lasi bema nega haida emu natudia ese idia gwauraia herevadia be Baibel ena hakaua hereva hegeregerena lasi. To, namona be oi moale badina idia be mai momokani ida edia hemami idia herevalaia, bona idia oi hagoadaia mai gari lasi ida unai idia karaia totona. Emu natudia oi durua namonamo diba bema edia hemami korikori oi lalopararalaia.

13. Tama sina ese edena dala haida ai edia natudia idia durua Iehova kahirakahira idia lao totona?

¹³ Tama sina e, dala umui tahua dina ibounai lalonai emui natudia umui durua Iehova kahirakahira idia lao totona. Namo lasi natudia ida Baibel umui stadilaia negadia sibona ai idia ida iseda lalokau Diravana umui herevalaia. Mani sina ta ladana Lisa ita laloa, ia gwau: “Havaraia gaudia ai herevalaia amo emai natudia ai durua Iehova idia dibaia totona. Hegeregere, emai sisia ese ia karaia gauna ta dainai natudia idia kiri neganai, unai ai gaukaralaia bona idia ai hadibadia Iehova be moale Diravana bona dala ia karaia ita moale totona bona fani gaudia ita moalelaia.”

14. Dahaka dainai tama sina ese edia natudia idia durua tura namodia idia abia hidi be mai anina bada? (Aonega Herevadia 13:20)

¹⁴ Hakaua Hereva 4: Emui natudia umui durua tura namodia idia abia hidi. Dirava ena Hereva ese ia hahedinaraia iseda turadia ese iseda kara do idia hanamoa eiava hadikaia diba. (Aonega Herevadia 13:20 duahia.) Tama sina e, emui natudia edia turadia  umui diba, a? Idia umui hedavari henia eiava bamoa, a? Edena dala ai emui natudia umui durua diba Iehova idia lalokau henia taudia idia tura henia totona? (1 Kor. 15:33) Iehova ena tura namodia ai idia lao taudia oi boiria emu ruma bese ida umui moale hebou, unai ese emu natudia ia durua tura namodia idia abia hidi totona.​—Sal. 119:63.

15. Tama sina be dahaka idia karaia diba edia natudia idia durua tura namodia idia davaria totona?

¹⁵ Tama ta ladana Tony bona ena adavana ese edia natudia idia durua, tura namodia idia davaria dalana ia herevalaia. Ia gwau: “Lagani momo lalonai, lau bona egu adavana be emai ruma dekenai mauri lagani bona noho dala idauidau tadikaka bona taihu ai invait. Idia ida ai aniani bona ruma bese tomadiho ai karaia hebou. Unai be dala namona Iehova idia lalokau henia bona mai moale ida ia idia hesiai henia taudia do oi dibaia. Ai ese sekit naria taudia, misinari taudia, bona ma haida ai boiria emai ruma dekenai idia noho totona. Edia ekspiriens namodia, edia ura bada karana, bona Iehova ena hesiai gaukara idia goadalaia karana ese emai natudia ia durua Iehova kahirakahira idia lao totona.” Tama sina e, mai ura bada ida emui natudia umui durua tura namodia idia bamoa totona.

16. Dahaka do oi karaia bema emu natuna ta ia gwau ia ura lasi Iehova ia hesiai henia?

¹⁶ Ena be oi gaukara goada emu natudia oi durua, to dahaka do oi karaia bema emu natuna ta ia gwau ia ura lasi Iehova ia hesiai henia? Namo lasi oi laloa emu maduna oi huaia namonamo lasi. Iehova ese ita ibounai, emu natudia dekenai danu, harihari gauna ura kwalimu ia henia, unai amo abia hidi ita karaia diba Dirava ita hesiai henia eiava lasi. Bema emu natuna be abia hidi ia karaia Iehova ia rakatania, oi hesiku lasi bona oi abia dae dina ta do ia giroa lou. Ia boio merona ena sivarai oi laloatao. (Luka 15:11-19, 22-24) Unai mero matamata be kara dikadia momo ia karaia, to gabeai ia giroa lou. Reana haida do idia gwau, “Unai be sivarai ta sibona. To, ia vara momokani diba, a?” Oibe, ia vara diba! Mero matamata ta ladana Elie dekenai unai ia vara.

17. Edena dala ai Elie ena ekspiriens ese oi ia durua?

 ¹⁷ Elie ese ena tama sina be inai bamona ia herevalaia: “Idia gaukara goada lau idia durua Iehova lau lalokau henia bona ena Hereva, Baibel lau ura henia totona. To, egu mauri lagani be 15 bamona neganai, lau gwau-edeede matamaia.” Elie be hunia dalanai idia maoro lasi gaudia ia karaia. Iena tama sina ese idia durua Iehova kahirakahira do ia noho, to idia ia kamonai henia lasi. Ruma ia rakatania murinai, kara dikadia ia karaia. To, nega haida ia be ena turana ta dekenai Baibel ia herevalaia. Elie ia gwau: “Egu turana dekenai nega momo Iehova lau herevalaia neganai, lau mamia Iehova lau laloa noho. Metairametaira, egu tama sina ese guna egu kudouna dekenai idia hadoa Baibel ena hereva momokani ena uhe idia tubu matamaia.” Gabeai, Elie be hereva momokani dekenai ia giroa. * Elie ena tama sina be idia moale bada badina ia maragi negana amo idia durua Iehova ia lalokau henia totona!​—2 Tim. 3:14, 15.

18. Edia natudia idia durua Iehova idia lalokau henia tama sina be edena bamona oi laloa?

¹⁸ Tama sina e, umui be hahenamo badana umui abia, Iehova idia tomadiho henia bese matamata umui naria totona. (Sal. 78:4-6) Momokani ia be mai ena hekwarahi, bona umui ai tanikiu henia badina umui gaukara goada emui natudia umui durua totona! Bema umui hekwarahi emui natudia umui durua Iehova idia lalokau henia bona iena taravatu bona sisiba idia badinaia, do umui abia dae iseda lalokau guba Tamana ia moale.​—Efe. 6:4.