STADI ATIKOL 22
“Helaga Dalana” Dekenai Umui Raka Noho
“Unuseniai haiwei ta do ia noho, . . . Helaga Dalana.”—ISA. 35:8.
ANE 31 Dirava Ida Oi Raka!
POINT BADANA a
1-2. Babulonia ai idia noho Iuda taudia ese dahaka mai anina bada abia hidi do idia karaia? (Esera 1:2-4)
KING ese hadibaia hereva ta ia gwauraia! Babulonia ai lagani 70 idia noho Iuda taudia be edia tano korikorina Israela dekenai do idia giroa lou. (Esera 1:2-4 duahia.) Iehova sibona ese unai do ia hagugurua diba. Dahaka dainai unai bamona ita hereva? Vaia, Babulonia taudia be idia guia taudia idia ruhaia diba lasi. (Isa. 14:4, 17) To Babulonia idia hadikaia dainai lohia tauna matamata ese Iuda taudia ia hamaoroa unai tano idia rakatania totona. Unai dainai Iuda taudia ibounai, ruma bese kwaradia unai, be disisen badana ta do idia karaia: Babulonia do idia rakatania o do idia noho. Dahaka dainai?
2 Reana haida be buruka dainai idia hegeregere lasi gabu daudau idia lao totona. Bona momo be Babulonia ai idia vara dainai, idia mamia unai be edia hanua. Idia dekenai Israela tanona be edia tubudia edia tano. Babulonia ai Iuda taudia haida be taga taudia ai idia lao. Unai dainai edia ruma namodia bona bisinesi idia rakatania, bona idia diba lasi tanona dekenai idia lao be auka.
3. Israela dekenai do idia giroa lou abidadama Iuda taudia be dahaka hahenamo do idia abia?
3 Abidadama Iuda taudia idia diba Israela dekenai do idia giroa lou ena hahenamo ese do idia rakatania gaudia do ia hereaia. Unai hahenamo badana be edia tomadiho karana. Ena be Babulonia ai dirava koikoidia edia dubu helaga be 50 mai kahana idia noho, to unai siti ai Iehova ena dubu helaga ia noho lasi. Mose ena Taravatu hegeregerena Israela taudia be boubou gaudia gabua totona, boubou patana ta ia noho lasi. Bona hahelaga taudia idia noho lasi unai gaukara idia karaia totona. Danu, dirava koikoidia idia tomadiho henia taudia be momo herea, to Iehova bona ena kara maoromaoro taravatudia idia badinaia taudia be momo lasi. Unai dainai Dirava idia gari henia Iuda taudia tausen momo be idia moale bada, badina edia tano dekenai do idia giroa bona tomadiho momokanina do idia haginia lou.
4. Iehova ese Israela dekenai do idia giroa lou Iuda taudia dekenai dahaka gwauhamata ia karaia?
4 Babulonia amo do idia raka lao Israela tanona ena daudau be hua foa bamona, bona unai be mai ena hekwarahi to Iehova ia gwauhamata edia dala ia koua gaudia do ia kokia. Isaia ia torea ia gwau: “Iehova ena dala umui hegaegaelaia! Tano kaukauna ena huana amo iseda Dirava totona haiwei umui hamaoromaoroa. . . . Nadi amo ia honu dala umui hanamoa, bona tano dikana be tano palakana ai umui halaoa.” (Isa. 40:3, 4) Mani inai oi piksaia: tano kaukauna ai, ororo badadia bona tano palakana huanai haiwei dala ta ia lao. Unai haiwei dalana dekenai idia lao taudia be do idia moale! Badina maoromaoro ia heau lao haiwei dalana dekenai idia raka be auka lasi, bona idia lao henia gabuna ai do idia ginidae haraga. To, ororo idia daekau bona koura ai idia diho dalana be mai ena hekwarahi.
5. Laulau dalanai Babulonia bona Israela huanai ia noho haiwei ena ladana be dahaka?
5 Hari inai negai, haiwei dala korikoridia be mai ena ladana o namba. Isaia ese laulau dalanai ia herevalaia haiwei danu be mai ena ladana. Ia gwau: “Unuseniai haiwei ta do ia noho, oibe, unai dala idia gwauraia Helaga Dalana. Goeva lasi tauna be unai dala ai do ia raka lasi.” (Isa. 35:8) Israela taudia dekenai unai gwauhamata ena anina be dahaka? Bona ita dekenai ena anina be dahaka?
“HELAGA DALANA”—GUNA BONA HARI
6. Dahaka dainai unai dala idia gwauraia helaga?
6 “Helaga Dalana,” unai haiwei dala ena ladana be namo herea! Dahaka dainai unai dala idia gwauraia helaga? “Goeva lasi tauna,” unai be matabodaga karadia, kara dika ma haida ia karaia bona kaivakuku ia tomadiho henia tauna, be Israela tanona dekenai do ia noho lasi. Idia giroa lou taudia be edia Dirava totona do idia “helaga.” (Deu. 7:6) To, Babulonia idia rakatania taudia be Dirava hamoalea totona edia kara idia haidaua be namo.
7. Iuda taudia haida be dahaka senisi idia karaia be namo? Haheitalai gwauraia.
7 Matamanai ita herevalaia bamona, Iuda taudia momo be Babulonia ai idia vara bona Babulonia taudia edia kara bona lalohadai idia badinaia. Iuda taudia ginigunadia be Israela dekenai idia giroa bona lagani momo murinai, idia momo be dirava koikoi idia tomadiho henia hahinedia idia adavaia. (Eso. 34:15, 16; Esr. 9:1, 2) Bona gabeai gavana Nehemia ia hoa badina Israela ai idia vara natudia be Iuda taudia edia gado idia diba lasi. (Deu. 6:6, 7; Neh. 13:23, 24) Unai gado ai Dirava ena Hereva idia torea. Bema matamata taudia be Heberu gado idia lalopararalaia lasi, edena dala ai Iehova do idia lalokau bona tomadiho henia diba? (Esr. 10:3, 44) Unai Iuda taudia be senisi badadia do idia karaia. To do ia auka lasi Israela dekenai unai senisi idia karaia totona, badina unuseniai metairametaira tomadiho goevana do idia haginia lou.—Neh. 8:8, 9.
Lagani 1919 C.E. amo, tatau, hahine bona natudia milioni momo be Babulonia Badana idia rakatania bona “Helaga Dalana” ai idia raka noho (Paragraf 8 itaia)
8. Dahaka dainai idaunegai idia vara gaudia ita laloa bada be namo? (Rau 1 ena laulau itaia.)
8 Haida idia laloa, ‘Unai be sivarai namona, to guna Iuda taudia dekenai idia vara gauna ese ita dekenai dahaka ia hadibaia?’ Ita danu be “Helaga Dalana” dekenai ita raka noho bamona. Herevana, ita be horoa taudia o “mamoe ma haida,” “Helaga Dalana” dekenai ita raka noho be namo. Unai ese ita do ia durua Iehova ita tomadiho henia noho ela bona nega vaira ai iena Basileia ese tanobada ai mauri namona ia mailaia. b (Ioa. 10:16) Lagani 1919 C.E. amo, tatau, hahine bona natudia milioni momo be Babulonia Badana, tomadiho koikoi ibounai edia orea unai, ena igui amo idia roho mauri, bona Isaia ese laulau dalanai ia herevalaia dalana dekenai idia raka matamaia. Reana oi be idia huanai. Ena be taunimanima be lagani 100 bamona unai dala ai idia raka matamaia, to haida ese lagani handred momo gunanai unai dala idia hegaegaelaia vadaeni.
DALA IDIA HEGAEGAELAIA
9. Isaia 57:14 hegeregerena, edena dala ai “Helaga Dalana” idia hegaegaelaia?
9 Iuda taudia be Babulonia idia rakatania neganai, Iehova ese edia koua gaudia ia kokia. (Isaia 57:14 duahia.) Hari, “Helaga Dalana” be edena bamona? Lagani momo gunanai ema bona lagani 1919 ai, Iehova ese ia idia matauraia tatau haida ia gaukaralaia, taunimanima idia durua Babulonia Badana idia rakatania totona. (Isaia 40:3 hahegeregerea.) Idia ese dala hegaegaelaia gaukarana idia karaia. Unai amo gabeai kudou-maoro taudia do ia durua tomadiho koikoina idia rakatania bona Iehova ena taunimanima ida, ia do idia tomadiho henia. Unai “hegaegae gaukarana” lalonai dahaka idia karaia? Idia karaia hegaegae gaukara haida mani ita laloa.
Idaunega amo ema bona lagani 1919 C.E. ai, Dirava idia gari henia tatau ese dala idia hegaegaelaia taunimanima be Babulonia Badana idia rakatania totona (Paragraf 10-11 itaia)
10-11. Edena dala ai Dirava ena diba be gabu ibounai dekenai ia lao? (Laulau itaia danu.)
10 Printaia gaukarana. Baibel be imana amo idia torea hanai ema bona lagani 1450 ai. Unai dainai, gaukara be ia ore haraga lasi, bona Baibel ena kopi be momo lasi bona ena davana be bada. To printa masini amo Baibel ena kopi idia karaia matamaia neganai, ia auka lasi Baibel momo idia printaia bona taunimanima dekenai idia hariharilaia.
11 Hahanaia gaukarana. Lagani momo lalonai Baibel be Latin gado sibona ai idia torea. Bona sikuli bada taudia sibona ese idia lalopararalaia diba. Printa gaukara ia bada neganai, Dirava idia matauraia taudia ese taunimanima idia diba gado ai Baibel hahanaia gaukarana idia habadaia. Unai dainai hari Baibel idia duahia taudia momo ese dubu gunalaia taudia edia hahediba herevadia be Baibel ena hahediba herevadia ida idia hahegeregerea diba.
Dirava idia gari henia tatau ese dala idia hegaegaelaia taunimanima be Babulonia Badana idia rakatania totona (Paragraf 12-14 itaia) c
12-13. Lagani 1835 bamona ai, Baibel idia stadilaia kudou maoro taudia ese tomadiho edia hahediba hereva koikoidia idia hahedinaraia matamaia dalana mani oi herevalaia.
12 Baibel stadi bukadia. Baibel idia stadilaia namonamo taudia ese Dirava ena Hereva ai idia duahia gaudia amo diba bada idia abia. Bona idia dibaia gaudia be ma haida dekenai idia herevalaia neganai, dubu gunalaia taudia idia badu. Hegeregere lagani 1835 bamona ai, kudou maoro tatau haida ese pepapepa amo tomadiho koikoi edia hahediba herevadia idia halasia matamaia.
13 Lagani 1835 bamona ai, Dirava ia gari henia tauna ladana, Henry Grew ese mase taudia dekenai ia vara gauna ena pepapepa ia halasia. Unai pepapepa lalonai Baibel amo ia hahedinaraia, mase diba lasi maurina be Dirava ese ia henia harihari gauna, to ita vara neganai unai ita abia lasi. Lagani 1837 ai, momo ese idia matauraia tauna ta George Storrs be treini ta lalonai unai pepapepa ta ia davaria. Ia duahia bona ia abia dae unai be hereva momokani. Bona ia ura ia dibaia gaudia be ma haida dekenai ia herevalaia. Lagani 1842 ai, ia ese tok idauidau ia henia bona edia sinado badana be, “Tahua Karana Ta—Kara Dika Taudia be Idia Mase Diba Lasi, A?” George Storrs ia torea gaudia ese tau matamata ta ladana Charles Taze Russell ia durua.
14. Guna idia karaia dala hegaegaelaia gaukarana ese edena dala ai tadikaka Russell bona ia idia bamoa taudia ia durua? (Laulau itaia danu.)
14 Guna idia karaia dala hegaegaelaia gaukarana ese edena dala ai tadikaka Russell bona ia idia bamoa taudia ia durua? Edia stadi karana lalonai idia ese diksenari, konkodens, Baibel ena trensleisen idauidau idia gaukaralaia. Danu idia ese Henry Grew, George Storrs bona tatau ma haida ese Baibel dekenai idia karaia tahua gaukarana amo heduru idia abia. Tadikaka Russell bona ena turadia be tomadiho dalana hanamoa gaukara idia durua. Idia ese Baibel ena topik idauidau ia herevalaia buka bona pepapepa momo idia halasia.
15. Lagani 1919 ai, dahaka mai anina bada gaudia idia vara?
15 Lagani 1919 ai, Babulonia Badana ena siahu Dirava ena taunimanima dekenai ia ore. Unai lagani ai, “hesiai tauna mai ena kamonai bona mai ena aonega” be ena gaukara ia hamatamaia, bona unai amo kudou maoro taudia be “Helaga Dalana” matamatana ai idia raka diba. (Mat. 24:45-47) Ita moale, guna haida be unai dala hegaegaelaia gaukarana idia karaia, unai amo haiwei dalana idia badinaia matamaia taudia ese Iehova ena ura dibaia karana idia habadaia. (Aon. 4:18) Danu edia mauri lalonai Iehova ena taravatu idia badinaia diba. Iehova ese ena taunimanima ia doria lasi, maoromaoro edia mauri idia haidaua totona. To metairametaira ia durudia edia mauri idia hanamoa totona. (Maua “ Iehova be Metairametaira Ena Orea Ia Hagoevaia” itaia.) Ita karaia gaudia ibounai lalonai, Dirava ita hamoalea neganai, ita danu do ita moale!—Kol. 1:10.
“HELAGA DALANA” IA DO KEHOA NOHO
16. Lagani 1919 amo “Helaga Dalana” dekenai dahaka hanamoa gaukarana idia karaia? (Isaia 48:17; 60:17)
16 Dala ibounai dekenai hanaihanai hanamoa gaukara idia karaia be namo. Lagani 1919 amo “Helaga Dalana” ena hanamoa gaukara idia karaia noho, unai amo taunimanima momo idia durua Babulonia Badana idia rakatania totona. Hesiai tauna mai ena kamonai bona mai ena aonega idia abia hidi bona ena gaukara ia hamatamaia. Bena lagani 1921 ai, Baibel stadilaia bukana ta idia halasia Baibel ena hereva momokani idia diba matamaia taudia idia durua totona. Unai buka, The Harp of God, be gado 36 ai idia karaia bona kahirakahira kopi ibounai 6 milioni bamona idia halasia. Bona momo ese unai buka amo hereva momokani idia dibaia. Hari, Baibel stadi karaia totona pablikeisen matamata ita abia, unai be Mauri Moalelaia Hanaihanai! Inai nega dokona lalonai, Iehova ese ena orea ia gaukaralaia noho Dirava ena hereva ia halasia, unai amo ita ibounai ia durua “Helaga Dalana” ai ita raka noho.—Isaia 48:17; 60:17 duahia.
17-18. “Helaga Dalana” be edeseni ai ita ia hakaua lao noho?
17 Ta be Baibel stadi ia abia dae neganai, unai be nega namona ia be “Helaga Dalana” ai ia raka totona. Haida be nega kwadogina sibona idia raka bena idia ese haiwei dalana idia rakatania. To, haida idia ura unai dala ai do idia raka noho ela bona edia ginidae gabuna dekenai. Edia ginidae gabuna be edeseniai?
18 Guba helarona idia abia taudia edia “Helaga Dalana,” be “Dirava ena paradaiso” guba dekenai ia lao. (Apok. 2:7) Tanobada helarona idia abia taudia edia haiwei ese idia ia hakaua lao, lagani 1,000 ena dokonai, unai be mauri goevadaena. Bema oi be unai haiwei dekenai oi raka noho, namo lasi oi rakatania gaudia oi laloa. Umui ai hagoadaia, unai dala ai umui raka noho ela bona tanobada matamatana ai umui ginidae!
ANE 24 Umui Daekau Iehova Ena Ororo Ai
a Iehova ese laulau dalanai Babulonia ia lao Israela ena haiwei ia gwauraia “Helaga Dalana.” Unai hegeregerena, Iehova ese ena taunimanima totona dala ia hegaegaelaia, a? Oibe! Lagani 1919 C.E. amo, taunimanima milioni be Babulonia Badana idia rakatania bona “Helaga Dalana” dekenai idia raka matamaia. Namona be ita ibounai ese unai dala ita badinaia noho ela bona ita lao henia gabuna dekenai ita ginidae.
c LAULAU: Tadikaka Russell bona ia ida idia gaukara hebou taudia be haida ese guna idia hegaegaelaia Baibel stadilaia bukadia idia gaukaralaia.