1. Ita momo be dahaka gauna dekenai ita hekwarahi?

 TAHUA gauna oi atoa vadaeni, to oi hekwarahi noho oi hagugurua totona, a? b Bema oibe, unai be oi sibona lasi. Hegeregere, Philip ia ura ena guriguri dalana bona hanaihani Dirava guriguri henia karana do ia hanamoa, to ia hekwarahi nega ia atoa unai ia karaia totona. Erika ena tahua gauna be haroro ena grup dekenai do ia ginidae haraga, to hanaihanai grup dekenai ia ginidae leiti. Tomáš be nega momo ia hekwarahi Baibel ibounai ia duahia ore totona. Ia gwau: “Baibel duahia karana lau moalelaia lasi. Nega toi lau tohoa, to unai negadia ai Levitiko bukana dekenai lau doko.

2. Bema hesiai gaukara ai tahua gauna ta ita hagugurua lasi, dahaka dainai ita lalohisihisi lasi?

² Bema hari oi be mai emu tahua gauna ta bona unai oi do hagugurua lasi, namo lasi oi lalohisihisi. Ena be emu tahua gauna be ia auka lasi, to nega bada do oi atoa bona oi gaukara goada oi hagugurua totona. Tahua gauna oi ura hagugurua karana ese ia hahedinaraia, emu hetura karana Iehova ida oi laloa bada, bona oi ura mai lalona ibounai ida ia oi hesiai henia. Iehova be emu lalohekwarahi ia laloa bada. Oibe, ita ia doria lasi ita karaia diba lasi gauna ita karaia totona. (Sal. 103:14; Mika 6:8) Oi abia hidi tahua gauna be emu goada hegeregerena be namo. Bona edena dala ai unai oi hagugurua diba? Mani dala haida ita herevalaia.

3. Dahaka dainai mai ura badana ida oi hekwarahi be mai anina bada?

³ Tahua gaudia oi hagugurua totona mai ura bada ida oi hekwarahi be mai anina bada. Mai ena ura bada tauna be do ia gaukara goada ena tahua gauna ia hagugurua totona. Iseda ura be lai bamona bouti ia odaia, ia lao henia gabuna dekenai ia ginidae totona. Bema lai ia toa noho, bouti ia taria tauna be ia lao henia gabuna dekenai do ia ginidae. Bona lai ia goada neganai, reana do ia ginidae haraga. Unai hegeregerena, bema iseda ura ia goada neganai, iseda tahua gaudia do ita hagugurua diba. El Salvador ai tadikaka ta ladana David ia gwau, “Emu ura ia goada neganai do oi gaukara goada. Oi ura lasi gau ta ese oi ia koua emu tahua gauna oi hagugurua totona.” Vadaeni, dahaka oi karaia diba emu ura oi habadaia totona?

4. Dahaka totona ita guriguri diba? (Filipi 2:13) (Laulau itaia danu.)

⁴ Iehova oi guriguri henia emu ura ia habadaia totona. Iena lauma helaga amo oi ia durua emu tahua gauna oi hagugurua totona. (Filipi 2:13, duahia.) Nega haida tahua gauna ita abia hidi, badina ita diba unai be gau namona. To reana unai ura ia noho lasi iseda tahua gauna ita hagugurua totona. Uganda ai taihu ta ladana Norina dekenai unai ia vara. Tahua gauna ta ia atoa, Baibel stadi ta karaia totona, to ena ura be ia goada lasi badina ia mamia ia be tisa namona lasi. Dahaka ese ia durua? Ia gwau: “Dina ta ta Iehova lau noia egu ura Baibel stadi ta karaia totona ia habadaia. Unai guriguri hegeregerena, lau gaukara goada egu hadibaia dalana lau hanamoa totona. Hua haida murinai lau itaia egu ura ia goada. Unai lagani tamona ai Baibel stadi rua lau hamatamaia.”

5. Dahaka gaudia ita laloa dobu karana ese iseda ura ia habadaia diba?

⁵ Iehova ese oi totona ia karaia gaudia oi laloa dobu. (Sal. 143:5) Aposetolo Paulo be Iehova ese ia dekenai ia hahedinaraia hebogahisi hereadaena, ia laloa dobu dainai unai ese ia hagoadaia Iehova totona ia gaukara goada. (1 Kor. 15:9, 10; 1 Tim. 1:12-14) Unai hegeregerena, Iehova ese oi totona ia karaia gauna oi laloa dobu neganai, emu ura do ia goada emu tahua gauna oi hagugurua diba. (Sal. 116:12) Mani Honduras ai dahaka ese taihu ta ia durua regula painia ai ia lao totona ita itaia. Ia gwau: “Iehova ese lau ia lalokau henia karana lau laloa dobu. Lau ia durua iena taunimanima lau davaria totona. Lau ia laloa bada bona gimaia. Unai bamona laloa dobu karana ese egu lalokau ia dekenai ia habadaia bona egu ura ia goada.”

6. Dahaka gau ma ta ese ita ia durua iseda ura ia hagoadaia totona?

⁶ Emu tahua gauna oi hagugurua ena hahenamo oi laloa. Matamanai ita herevalaia taihu, Erika, ia durua gauna ita laloa. Ia gwau: “Lau laloparara hebou dekenai lau leiti dainai  gau momo lau reaia. To lau ginidae haraga neganai, nega ia noho tadikaka taihu lau hedavari henia totona. Danu hagoadaia hereva namodia lau kamonai bona unai ese lau ia durua egu haroro gaukara lau hanamoa bona moalelaia.” Erika ese ena tahua gauna ena namo ia laloa dainai unai ia hagugurua. Dahaka hahenamo do oi laloa? Bema emu tahua gauna be, oi ura emu Baibel duahiduahi o guriguri karana oi hanamoa, unai ese emu hetura karana Iehova ida do ia hagoadaia dalana oi laloa. (Sal. 145:18, 19) Bema emu tahua gauna be emu Keristani kara namona ta oi hagoadaia, unai ese emu hetura karana ma haida ida do ia hanamoa dalana oi laloa. (Kol. 3:14) Oi ura hagugurua tahua gaudia ta ta ena badina oi torea be namo. Bona hanaihanai emu lista oi sekea. Matamanai ita herevalaia tadikaka Tomáš ia gwau: “Egu tahua gauna ena badina momo lau dibaia neganai, lau gaukara goada unai lau hagugurua totona.”

7. Dahaka ese Julio bona ena adavana ia durua edia tahua gauna idia hagugurua totona?

⁷ Oi do ia hagoadaia taudia oi bamoa. (Aon. 13:20) Dahaka ese Julio bona ena adavana ia durua pablisa momo lasi gabuna dekenai idia lao. Julio ia gwau: “Emai tahua gauna ai hagugurua totona, tura namodia ai abia hidi bona idia ida unai ai herevalaia. Idia momo be unai bamona tahua gaudia idia hagugurua vadaeni, unai dainai ai dekenai heduru dala namodia idia henia. Emai palani totona idia henanadai, bona ai lalomanoka nega ai idia hagoadaia.”

8. Dahaka do ia vara bema iseda ura ia goada lasi? (Laulau itaia danu.)

⁸ Momokani, nega haida ita ibounai iseda ura do ia goada lasi. Unai ena anina be iseda tahua gauna do ita hagugurua lasi, a? Lasi. Mani inai haheitalai ita laloa: Lai be mai ena goada bouti mai ena palai ia odaia lao, ia lao henia gabuna dekenai ia ginidae totona. To lai ena goada be idauidau bona nega haida ia toa lasi. Unai ena anina be bouti do ia heau lasi, a? Lasi. Hegeregere, bouti haida be mai edia mota eiava bara. Bouti taria tauna ese unai gaudia ia gaukaralaia amo, ia lao henia gabuna dekenai do ia ginidae. Iseda ura be lai bamona, bona ena goada be idauidau. Bona nega haida ura be ia goada lasi, tahua gauna hagugurua totona. Unai dainai bema ita ura henia negadia sibona ai iseda tahua gauna ita ura hagugurua, reana do ita kwalimu lasi. Bouti taria tauna ese dala idauidau ia gaukaralaia ia lao henia gabuna dekenai ia ginidae totona, ita danu iseda tahua gauna ita hagugurua diba, ena be unai ura be ia goada lasi. Momokani, unai be mai ena hekwarahi, to emu tahua gauna oi hagugurua neganai do oi moale. Ita karaia diba gauna ita do herevalaia lasi neganai, mani inai henanadai ita laloa.   

9. Ena be iseda ura be ia goada lasi, to tahua gauna hagugurua totona ita gaukara noho be namo, a? Herevalaia.

 ⁹ Iehova ia ura ia ita hesiai henia, mai moale bona ura ida. (Sal. 100:2; 2 Kor. 9:7) Bema iseda ura be ia goada lasi iseda tahua gauna hagugurua totona, ita hekwarahi be namo, a? Aposetolo Paulo ena haheitalai mani ita laloa. Ia gwau: “Egu tauanina lau panisia bona igui hesiai bamona lau hakaua.” (1 Kor. 9:25-27) Paulo be sibona ia doria Iehova ena ura ia karaia totona. Iehova ese Paulo ena hesiai gaukara ia abia dae, a? Oibe! Bona Iehova ese ena hekwarahi ia hanamoa.​—2 Tim. 4:7, 8.

10. Ena be iseda ura ia goada lasi, to tahua gauna hagugurua totona ita hekwarahi ena hahenamo be dahaka?   

¹⁰ Unai hegeregerena, ena be iseda ura ia goada lasi, to Iehova be ia moale bema ita hekwarahi iseda tahua gauna ita hagugurua totona. Iehova ia moale badina ia diba ia ita lalokau henia dainai ita gaukara noho. Ena be nega haida unai gaukara dekenai ita hesiku. Iehova ese Paulo ia hanamoa hegeregerena, iseda hekwarahi do ia hanamoa danu. (Sal. 126:5) Iehova ena hahenamo ita itaia neganai, unai ese iseda ura do ia hagoadaia. Poland ai taihu ta ladana Lucyna ia gwau: “Nega haida lau ura lasi haroro gaukara dekenai lau lao badina lau hesiku. To, haroro murinai lau abia moalena be hahenamo ta.” Mani ita itaia, dahaka ita karaia diba bema iseda ura ia goada lasi.

11. Edena dala ai Iehova ese ita ia durua sibona biagua karana ita hagoadaia totona?

¹¹ Sibona biagua totona ita guriguri. Sibona biagua karana ena anina be iseda hemami bona kara ita naria namonamo. Nega momo unai hereva idia gaukaralaia sibona ita biagua, kara dika ita karaia lasi totona. To, bema ia auka gaukara ta ita karaia, eiava iseda ura ia goada lasi, sibona biagua karana ese ita ia durua danu kara namo ita hahedinaraia. Laloatao, sibona biagua karana be lauma helaga ena huahua ta, unai dainai Iehova ena lauma helaga totona oi noinoi, unai amo oi ia durua unai mai anina bada karana oi hagoadaia totona. (Luka 11:13; Gal. 5:22, 23) Matamanai ita herevalaia tadikaka, David, be guriguri ese ia durua dalana ia herevalaia. Ia ura sibona ena stadi do ia karaia hanaihanai. Ia gwau: “Iehova lau noia sibona biagua karana lau hagoadaia totona. Iena heduru amo sibona egu stadi sediual namona lau hamatamaia bona lau badinaia noho.”

12. Edena dala ai Hadibaia Tauna 11:4 ese ita ia durua iseda tahua gaudia ita hagugurua totona?

¹² Nega namona totona oi naria lasi. Inai tanobada ai nega namona be lasi. Bema nega namona ita naria noho reana iseda tahua gauna do ita hagugurua lasi. (Hadibaia Tauna 11:4, duahia.) Tadikaka ta ladana Dayniel ia gwau: “Nega namona be lasi, unai dainai namo lasi ita naria, to ita hamatamaia sibona be namo.” Uganda ai, tadikaka ta ladana Paul be ita naria lasi ena badina ma ta ia herevalaia. “Ena be iseda tahua gauna hagugurua totona be auka, to ita hamatamaia neganai, Iehova ese ita do ia hanamoa.”​—Mal. 3:10.

13. Tahua gaudia maragidia amo oi hamatamaia ena namo be dahaka?

¹³ Tahua gaudia maragidia amo oi hamatamaia. Bema iseda tahua gauna hagugurua totona be ia auka, iseda ura be do ia maragi diba. Bema oi dekenai unai ia vara, tahua gaudia maragidia oi atoa be namo. Bema emu tahua gauna be Keristani kara namona ta do oi hagoadaia, namona be dala maragidia ai oi hahedinaraia guna. Bema emu tahua gauna be oi ura Baibel ibounai oi duahia haorea, namona be emu sediual ai nega kwadogina oi  abia hidi Baibel oi duahia totona. Matamanai ita herevalaia, Tomáš, ia hekwarahi lagani ta lalonai Baibel duahia karana ia hagugurua totona. Ia gwau: “Lau laloparara karoa momo duahia karana be auka. Unai dainai lau tohoa lou, bona hari palani lau karaia dina ta ta lalonai siri haida sibona lau duahia bona laloa dobu. Unai lau karaia dainai egu duahiduahi lau moalelaia.” Tomáš be Baibel duahia karana ia moalelaia dainai ia ura hora momo lalonai do ia duahia noho. Bena Baibel ibounai ia duahia haorea. c

14. Dahaka koua gaudia dainai ia auka iseda tahua gauna ita hagugurua totona?

¹⁴ Ena be iseda ura ia goada iseda tahua gauna ita hagugurua totona, to koua gaudia do idia vara. Hegeregere, idia vara kava gaudia ese iseda nega idia haorea diba. (Had. 9:11) Reana hekwakwanai dainai, do ita lalomanoka bona iseda goada do ia ore. (Aon. 24:10) Ita be goevadae lasi dainai, nega haida ita karaia gaudia ese ita ia koua iseda tahua gauna ita hagugurua lasi. (Roma 7:23) Eiava ita hesiku. (Mat. 26:43) Dahaka ese ita do ia durua koua gaudia ita hanaia totona?

15. Dahaka dainai oi hesiku lasi be namo bema koua gauna ta ia vara? (Salamo 145:14)

¹⁵ Koua gauna ta ia vara neganai, namo lasi emu tahua gauna oi rakatania. Baibel ia gwau hekwakwanai do ita davaria loulou. To ia hahedinaraia goevagoeva Iehova ena heduru dainai, iseda tahua gauna ita hagugurua diba. (Salamo 145:14, duahia.) Matamanai ita herevalaia tadikaka Philip, ia gwau: “Lau hagugurua lasi tahua gaudia dekenai lau laloa momo lasi. To tahua gauna lau hagugurua totona lau hekwarahi noho be gau badana.” Matamanai ita herevalaia tadikaka David, ia gwau: “Lau ura lasi hekwakwanai maragidia be koua gaudia bamona lau laloa,  to unai be nega namona Iehova dekenai egu lalokau lau hahedinaraia totona.” Ena be koua gaudia idia vara, to hekwarahi noho karana ese ia hahedinaraia oi ura Iehova oi hamoalea. Bona Iehova ese unai ia itaia neganai ia moale.

16. Koua gaudia amo dahaka ita dibaia?

¹⁶ Koua gaudia amo diba oi abia. Ia vara gauna oi laloa bona sibona oi henanadai, ‘Dahaka do lau karaia inai ia vara lou lasi totona?’ (Aon. 27:12) Nega haida oi mamia tahua gauna ta oi hagugurua totona be auka. Bema oi dekenai unai ia vara, emu tahua gauna oi laloa lou, unai amo do oi diba bema oi hegeregere oi hagugurua totona. d Iehova be oi do ia laloa maragi lasi, bema oi hegeregere lasi unai oi hagugurua totona.​—2 Kor. 8:12.

17. Dahaka dainai ita hagugurua vadaeni tahua gauna ita laloa?

¹⁷ Oi hagugurua vadaeni gauna oi laloatao. Baibel ia gwau, “Dirava ena kara be ia gageva lasi, Ia ese emu gaukara do ia laloaboio diba lasi.” (Heb. 6:10) Namona be oi danu oi hagugurua vadaeni tahua gauna oi laloaboio lasi. Hegeregere, emu hetura karana Iehova ida ia hagoadaia, ma haida dekenai ia oi herevalaia, eiava oi bapatiso. Guna oi hagugurua tahua gaudia hegeregerena, hari oi gaukara goada emu tahua gauna oi hagugurua totona.​—Fili. 3:16.

18. Iseda tahua gauna ita hagugurua totona dahaka ita laloatao be namo? (Laulau itaia danu.)

¹⁸ Iehova ena heduru dainai emu tahua gauna oi hagugurua diba, bouti taria tauna ese mai moale ida ia lao henia gabuna dekenai ia ginidae hegeregerena. To laloatao, bouti taria taudia momo be edia laolao idia moalelaia danu. Unai hegeregerena oi gaukara goada noho emu tahua gauna oi hagugurua lalonai, namona be Iehova ese oi do ia durua bona hanamoa dalana oi moalelaia danu. (2 Kor. 4:7) Bema oi hesiku lasi, hahenamo momo do oi abia.​—Gal. 6:9.