1, 2. (a) Dirava be mai ena orea dainai, taunimanima haida be dahaka idia gwau? (b) Inai stadi ai dahaka do ita herevalaia?

DIRAVA be mai ena orea, a? Reana taunimanima haida do idia gwau: “Orea ta amo hakaua herevadia ita abia be anina lasi. To, inai sibona be mai anina bada​—emu hetura karana Dirava ida.” Unai be lalohadai maorona, a? Unai ese dahaka ia hahedinaraia?

² Inai stadi amo do ita itaia, Iehova be gau ibounai ia karaia namonamo Diravana, ma ta be ia hegeregerena lasi. Danu, Iehova ena orea amo ita abia hakaua herevadia ita laloa dalana do ita herevalaia. (1 Kor. 14:33, 40) Aposetolo edia negai bona iseda negai danu, Baibel ese Iehova ena tanobada oreana ia durua, tanobada hegegemadai sivarai namona idia harorolaia totona. Oibe, Baibel bona Dirava ena orea ese ia halasia herevadia ita badinaia dainai, kongrigeisen be ia goeva, bona maino bona lalotamona ia noho.

3. Edena bamona oi diba Iehova be gau karaia namonamo Diravana?

³ Havaraia gaudia ese idia hamomokania, Dirava be gau karaia namonamo Diravana. Baibel ia gwau: “Lohiabada ese aonega dekena amo tanobada ia karaia. Iena diba dekena amo, guba be ena gabu  dekenai ia atoa.” (Aon. 3:19) Ita be Dirava ena “kara maragidia” bona “iena sivarai ena kahana maragina sibona” ita diba. (Iobu 26:14) To, planeti, hisiu, bona galaksi amo ita dibaia gaudia ese idia hamomokania, unai guba gaudia be Dirava ese ia karaia namo herea. (Sal. 8:3, 4) Galaksi ta ta lalonai hisiu milioni momo idia noho, idia ibounai be guba ena taravatu idia badinaia. Oibe, iseda sola sistem lalonai idia noho planeti ibounai be dina idia hagegea, hegeregere idia be trafik ena taravatu idia badinaia bamona! Oibe, iunives ena gaukara dalana ita laloa dobu neganai, do ita diba Iehova ese “iena aonega dekena amo guba” bona tanobada ia karaia, bona ia ita hanamoa, badinaia, bona tomadiho henia be maoro.​—Sal. 136:1, 5-9.

4. Dahaka dainai saiens taudia be idia hegeregere lasi taunimanima edia henanadai idia haerelaidia totona?

⁴ Saiens taudia edia tahua gaukarana amo iunives bona ita noholaia tanobadana dekenai gau haida ita dibaia, bona unai ese ita ia durua bada. To, saiens taudia be taunimanima edia henanadai momo idia haerelaia diba lasi. Hegeregere, guba stadilaia taudia be iunives ia vara dalana eiava mauri gaudia amo ia honu tanobada ai ita noho ena badina idia diba lasi. Danu, ta ia diba lasi dahaka dainai taunimanima be idia ura dikadika idia mauri hanaihanai. (Had. 3:11, NWT) Dahaka dainai henanadai momo edia haere ita diba lasi? Badina saiens taudia momo bona taunimanima ma haida be Dirava ia noho lasi lalohadaina bona evolusen idia hahedibalaia. To Iehova ena Buka ai, taunimanima edia henanadai ena haere idia noho.

5. Edena dala ai Iehova ese ia atoa taravatudia ese ita idia biagua?

⁵ Matamana negana amo Iehova ese ia atoa taravatudia ese iseda dina ta ta maurina idia biagua. Elektrisen, plama, ensinia, pailot, bona doketa taudia be unai taravatu idia badinaia be namo, bema idia ura edia gaukara idia karaia namonamo. Hegeregere, doketa taudia be taunimanima edia tauanina ena kahana ta ta idia diba namonamo. Unai dainai ta idia ivaia neganai, idia diba ta ena kudouna be edeseni ia noho. Momokani, namona be ita ibounai ese Dirava ia atoa taravatudia ita matauraia. Bema ita be graviti ena taravatu ita badinaia lasi, iseda mauri ita haboioa diba!

6. Dahaka dainai Iehova idia tomadiho henia taudia ese edia gaukara idia karaia namonamo be namo?

⁶ Dirava ese guba bona tanobada gaudia ia karaia namo herea, bona edia gabu korikori ai ia atoa. Unai amo ita diba Iehova be ia ura ia idia tomadiho henia taudia ese edia gaukara idia karaia namonamo. Unai dainai Dirava ese ita dekenai Baibel ia henia ita ia hakaua totona. Bema Dirava ena orea bona ena taravatu ita badinaia lasi, iseda mauri do ita moalelaia lasi.

7. Dahaka ese ia hamomokania Baibel be Dirava ena lauma helaga ena siahu amo idia torea?

⁷ Baibel be Iuda taudia bona idaunegai Keristani taudia edia buka ta sibona lasi. To, Baibel be Dirava ena lauma helaga ena siahu amo idia torea bukana. Baibel ena buka ta ta edia sivarai ta ta be idia durua heheni. Genese amo ela bona Apokalupo, Baibel ena sinado badana be tamona​—Iehova ena lohia siahuna do ia abia isi bona ena ura tanobada dekenai do ia guguru, unai be iena Basileia, Keriso, idia gwauhamatalaia “garana” ena lohia henunai do ia karaia.​—Genese 3:15, BHḡ *; Mataio 6:10; Apokalupo 11:15 duahia.

8. Dahaka dainai ita gwau diba Israela taudia ese edia gaukara ta ta idia karaia namonamo?

⁸ Idaunega Israela taudia ese edia gaukara ta ta idia karaia namonamo. Hegeregere, Mose  ena Taravatu henunai, hahine be “Palai Dubu ena iduara dekenai hesiai gaukara idia karaia.” (Eso. 38:8) Danu, Israela taudia ese edia kamepa bona palai dubuna idia haginia bona kokia neganai, dala maorona idia badinaia. Gabeai, King Davida ese Levi taudia bona hahelaga taudia be orea ta ta dekenai ia atodia. (1 Siv. 23:1-6; 24:1-3) Bona Israela taudia ese Iehova idia kamonai henia neganai, idia noho namo, mai maino bona lalotamona ida.​—Deu. 11:26, 27; 28:1-14.

9. Dahaka ese ia hahedinaraia Keristani taudia ginigunadia be dala maorona ai gau ibounai idia karaia?

⁹ Aposetolo edia negai, Keristani kongrigeisen be dala maorona ai gau ibounai idia karaia. Idia ese hakaua oreana, aposetolo taudia unai, edia hakaua herevadia idia badinaia dainai, namo idia davaria. (Kara 6:1-6) Gabeai, tadikaka ma haida be unai hakaua oreana taudia ai idia lao. (Kara 15:6) Unai nega ai idia noho hakaua oreana taudia o edia durua taudia ese revareva amo taunimanima dekenai sisiba bona hadibaia herevadia idia siaia. (1 Tim. 3:1-13; Tito 1:5-9) Kongrigeisen ibounai ese hakaua oreana ena hakaua dalana idia badinaia neganai, dahaka namo idia davaria?

10. Keristani kongrigeisen ginigunadia ese hakaua oreana ese idia atoa taravatudia idia badinaia neganai, dahaka ia vara? (Laulau ginigunana herevalaia.)

¹⁰ Kara 16:4, 5 duahia. Hakaua oreana idia durua tadikaka be taoni idauidau dekenai idia lao neganai, idia ese unai gabu taudia “dekenai taravatu idia henidia . . . Ierusalema ai idia noho aposetolo taudia bona tau badadia ese idia abia hidi gaudia.” Kongrigeisen taudia ese unai taravatu idia badinaia neganai, “edia abidadama ia goada ia lao bona dina ta ta ai edia namba ia bada daekau.” Unai sivarai amo dahaka ita dibaia, bona hari Dirava ena orea lalonai ita badinaia diba?

11. Dirava ese ia abia hidi taudia be iena orea amo hakaua herevadia idia abia neganai, dahaka idia karaia be namo?

¹¹ Brens Komiti o Tano Komiti, sekit naria taudia, bona kongrigeisen elda taudia be Dirava ena orea amo hakaua herevadia idia abia neganai, dahaka idia karaia be namo? Iehova ena Buka ese ita ibounai ia hagania, ita idia hakaua taudia ita kamonai henia bona edia henunai ita noho totona. (Deu. 30:16; Heb. 13:7, 17) Hekokoroku bona gwau-edeede karana be Dirava ena orea lalonai ia noho lasi be namo, badina unai bamona kara ese iseda kongrigeisen ena lalokau, maino bona lalotamona ia hadikaia diba. Oibe, namo lasi Keristani tauna ese Diotrepe ena hemataurai lasi bona Dirava badinaia lasi karana ia tohotohoa. (3 Ioane 9, 10 duahia.) Namona be sibona ita nanadaia: ‘Egu tadikaka taihu edia abidadama lau hagoadaia, a? Kongrigeisen idia hakaua tadikaka edia hakaua herevadia lau abia dae bona badinaia, a?’

12. Hari elda bona hesiai taudia be edena bamona idia abia hidi?

¹² Hakaua Oreana ese vanegai ia karaia abia hidi mani ita laloa. November 15, 2014 ena Gima Kohorona ai, kahana ladana “Duahia Taudia Edia Henanadai,” ese elda bona hesiai taudia idia abia hidi dalana matamatana ia herevalaia. Unai atikol ia gwau, aposetolo edia negai, hakaua oreana ese loaloa naria taudia dekenai maoro ia henia unai abia hidi idia karaia totona. Unai dala hegeregerena, September 1, 2014 amo, sekit naria taudia ese elda bona hesiai taudia idia abia hidi. Sekit naria tauna be kongrigeisen elda taudia ese idia gwauraia tadikakana do ia dibaia namonamo guna bona bema mai dalana unai tadikaka ida ia haroro diba. Bema unai tadikaka be ia headava, namona be sekit naria tauna ese unai tadikaka ena ruma bese ia dibaia.  (1 Tim. 3:4, 5) Elda oreana bona sekit naria tauna ese Baibel ena hakaua herevana, hesiai taudia bona elda taudia totona, do idia tahua namonamo.​—1 Tim. 3:1-10, 12, 13; 1 Pet. 5:1-3.

13. Edena dala ai ita hahedinaraia diba, elda taudia edia hakaua herevadia ita laloa bada?

¹³ Namona be elda taudia amo ita abia hakaua herevadia ita badinaia. Dirava ena orea lalonai, unai mamoe naria taudia, be Dirava ena Buka lalonai idia noho “hadibaia hereva namodia” idia badinaia. (1 Tim. 6:3) Aposetolo Paulo ese kongrigeisen lalonai idia noho kamonai lasi taudia dekenai ia henia sisiba mani ita laloa. Kongrigeisen lalonai haida be “dala maorona ai idia raka noho lasi, idia be idia gaukara lasi, to ma haida edia mauri ai idia vara gaudia lalonai idia vareai kava.” Ena be elda taudia ese unai taudia idia sisiba henia, to idia be sisiba idia abia dae lasi. Kongrigeisen taudia ese unai bamona tauna be edena bamona do idia kara henia? Paulo ia gwau: “Namona be unai tauna umui makaia bona ia umui bamoa lasi.” To, ia gwau lasi unai tauna be edia inai tauna bamona do idia kara henia. (2 Tes. 3:11-15) To hari inai negai, reana elda taudia ese tok ta idia henia diba, bona unai tok ai do idia hahedinaraia edena bamona ta ena kara ese kongrigeisen ena ladana namona ia hadikaia diba, hegeregere Witnes lasi tauna tura henia karana. (1 Kor. 7:39) Elda ta be unai bamona tok ia henia neganai, edena bamona do oi kara? Bema oi diba tauna ta be tok ese ia herevalaia karana ta ia karaia, unai tauna do oi bamoa noho, a? Emui lalokau karana bona gini siri karana ese unai tauna do ia durua ia badinaia dala kererena ia dadaraia totona. ^[1]

14. Kongrigeisen ia goeva totona, dahaka ita karaia diba?

¹⁴ Kongrigeisen ia goeva noho diba, bema Baibel ena hakaua herevadia ita badinaia. Idaunegai Korinto kongrigeisen ai ia vara gauna mani ita laloa. Paulo be unai taoni ai ia haroro goadagoada, bona unuseni idia noho “helaga taudia” ia lalokau henia. (1 Kor. 1:1, 2) To, ia kamonai unai kongrigeisen amo matabodaga taudia idia kokia lasi neganai, ia lalohisihisi bada! Unai dainai elda taudia ia hamaorodia unai matabodaga tauna be Satani dekenai do idia henia​—anina be kongrigeisen amo do idia atoa siri. Kongrigeisen ia goeva totona, elda taudia ese “hatubua muramura” idia kokia be namo. (1 Kor. 5:1, 5-7, 12) Elda taudia ese ia helalo-kerehai lasi tauna be kongrigeisen amo idia atoa siri neganai, namona be idia karaia abia hidi ita badinaia. Bema unai ita karaia, kongrigeisen be do ia goeva bona idia atoa siri tauna ia helalo kerehai diba.

15. Edena dala ai kongrigeisen lalonai maino ia noho diba?

¹⁵ Korinto kongrigeisen ai hekwakwanai ma ta ia vara. Tadikaka haida ese kota dekenai edia tadikaka idia laohaidia. Unai dainai Paulo ese idia ia nanadaia, ia gwau: “Dahaka dainai umui ura lasi kara gageva umui haheaukalaia?” (1 Kor. 6:1-8) Hari unai bamona ia vara danu. Nega haida, tadikaka huanai ia noho maino be gau ta ese ia hadikaia diba, hegeregere reana bisinesi ia dika dainai moni idia haboioa bona idia laloa idia ta be koikoi dalanai moni ia gaukaralaia. Haida be kota dekenai edia tadikaka idia laohaia, to Dirava ena Buka ena heduru amo ita diba, ena be iseda moni ita haboioa, to namo lasi Dirava ena ladana o kongrigeisen ena maino ita hadikaia. ^[2] Unai bamona hekwakwanai bona hepapahuahu karadia ita hamaoromaoroa totona, Iesu ena sisiba ita badinaia be namo. (Mataio 5:23, 24; 18:15-17 duahia.) Bema unai ita karaia, Iehova ena ruma bese lalonai lalotamona do ia noho.

16. Dahaka dainai Iehova ena taunimanima idia lalotamona be namo?

¹⁶ Iehova ena Buka lalonai, iena taunimanima  be mai lalotamona ida idia noho ena badina ia noho. Salamo torea tauna ia gwau: “Bema Dirava ena taudia do idia noho hebou, mai edia laloa tamona neganai, unai kara be namo, bona mai ena moale danu.” (Sal. 133:1) Israela taudia be Iehova idia badinaia neganai, idia be gau ibounai idia karaia namonamo bona mai lalotamona ida idia noho. Dirava ese ena taunimanima edia vaira nega ia herevalaia, ia gwau: “Lau ese umui do lau haboua, mamoe naria tauna ese iena mamoe edia magu lalonai ia haboudia lou bamona.” (Mika 2:12) Ma danu, Iehova be peroveta tauna Sepanaia amo ia gwau: “Lau ese bese idauidau edia gado do lau haidaua, gado goevadaena [Baibel ena hereva momokani] do lau henidia; bena idia ibounai ese Iehova ena ladana do idia hanamoa, bona iena hesiai gaukara be mai edia lalotamona ida do idia karaia [eiava, “mai lalotamona ida ia do idia tomadiho henia,” NWT, ftn.].” (Sep. 3:9, BHḡ) Mai lalotamona ida Iehova ita tomadiho henia be hahenamo badana, ani?

17. Kongrigeisen lalonai kara goeva bona lalotamona ia noho totona, elda taudia be dahaka idia karaia be namo?

¹⁷ Kongrigeisen lalonai lalotamona bona goeva karana ia noho totona, namona be elda taudia ese hahemaoro gaukarana idia karaia namonamo bona mai lalokau ida idia karaia. Paulo ia diba, Dirava ena lalokau be hebogahisi karana ese ia biagua lasi, bona Ia ese kara dikadia ia laloa maragi lasi. (Aon. 15:3) Unai dainai Paulo be Korinto Ginigunana ia torea neganai, lalokau dalanai ia torea. Bona hua haida murinai, Korinto Iharuana ia torea, unai revareva ese ia hahedinaraia elda taudia be Paulo ena hakaua herevadia idia badinaia dainai, gau haida ia idau. Bema Keristani tauna ta be dala kererena ai ia raka bona ia diba lasi, namona be elda taudia ese unai tauna be mai manau ida idia hamaoromaoroa.​—Gal. 6:1.

18. (a) Edena dala ai Baibel ena sisiba ese Korinto kongrigeisen ia durua? (b) Stadi gabena ai dahaka do ita herevalaia?

¹⁸ Oibe, Dirava ena Buka lalonai ia noho hakaua herevadia ese Korinto bona gabu ma haida ai idia noho Keristani taudia ia durua dainai, kongrigeisen ia goeva, bona mai maino bona lalotamona ida idia noho. (1 Kor. 1:10; Efe. 4:11-13; 1 Pet. 3:8) Bona unai nega ai iseda tadikaka taihu be edia haroro gaukara ai gau momo idia hagugurua diba. Unai dainai Paulo ia gwau sivarai namona be “tanobada hegegemadai idia harorolaia.” (Kol. 1:23) Hari, Dirava ena ura be tanobada hegegemadai dekenai idia harorolaia noho, badina tadikaka taihu be mai lalotamona ida unai sivarai namona idia harorolaia. Stadi gabena ese do ia hahedinaraia, unai taudia be Baibel idia laloa bada bona edia lalona idia hadaia Iehova ena lohia Siahuna idia abia isi noho totona.​—Sal. 71:15, 16.