1-3. Euodia bona Sunutuke huanai ia vara hekwakwanai be edena bamona ia matamaia, bona edena dala ai unai bamona hekwakwanai ita dadaraia diba? (Laulau ginigunana herevalaia.)

IEHOVA ena hesiai taudia ese iena buka helagana, Baibel, idia laloa bada. Ita be goevadae lasi dainai, nega haida Baibel amo sisiba ita abia. Sisiba ita abia neganai, dahaka ita karaia? Aposetolo edia negai idia noho Keristani taihu rua, Euodia bona Sunutuke, mani ita laloa. Unai horoa hahine rua huanai hekwakwanai badadia idia vara. Dahaka hekwakwanai idia vara? Baibel ese ia gwauraia lasi. To mani idia huanai ia vara gauna ita haheitalaia.

² Euodia ese ena ruma dekenai tadikaka taihu haida ia boiria bona idia aniani bona moale hebou. To Euodia ese Sunutuke ia boiria lasi. Gabeai Sunutuke ia kamonai tadikaka taihu be unai nega idia moalelaia. Reana Sunutuke be sibona dekenai ia gwau: ‘Dahaka dainai Euodia be lau ia boiria lasi? Lau laloa ai ruaosi be tura namodia.’ Sunutuke ia lalohisihisi dainai, Euodia dekenai lalohadai kererena ia abia matamaia. Vadaeni Sunutuke be sibona ena ruma dekenai aniani ia hegaegaelaia bona unai tadikaka taihu  ia boiridia​—to Euodia ia boiria lasi! Euodia bona Sunutuke huanai ia vara hekwakwanai ese kongrigeisen ena maino ia hadikaia diba. Unai murinai ia vara gauna be Baibel ese ia gwauraia lasi, to reana unai taihu rua ese Paulo ena sisiba idia abia dae bona badinaia.​—Fili. 4:2, 3.

³ Hari inai negai, iseda kongrigeisen lalonai unai bamona hekwakwanai ia vara diba. To, unai bamona hekwakwanai do ia vara lasi eiava ita hamaoromaoroa diba, bema ita ese Baibel ena hakaua herevadia ita badinaia. Bona bema Iehova ena Buka ita laloa bada, ia lalonai idia noho hakaua herevadia do ita badinaia.​—Sal. 27:11.

4, 5. Iseda hemami biagua karana dekenai, Baibel ena sisiba be dahaka?

⁴ Ta ese ita ia kara namo henia lasi neganai, do ia auka iseda hemami ita biagua totona. Momokani, bema iseda tano, kastom, kopina ena kala eiava gau ma ta dainai ita idia kara auka henia, do ita badu diba. To bema emu tadikaka o taihu ta ese oi dekenai unai ia karaia, do oi lalohisihisi bada, ani? To taunimanima ese ita dekenai unai idia karaia neganai, Dirava ena Hereva ese ita ia durua diba, a?

⁵ Matamana negana amo Iehova ese taunimanima edia kara heheni daladia ia itaia. Ia be iseda hemami bona kara ia itaia. Momokani, iseda lalohadai bona hemami ese ita ia doria diba hereva ta eiava kara ta ita karaia totona, bena gabeai unai ita lalohisihisilaia diba. Unai dainai aonega karana be Baibel ena sisiba ita badinaia, bona iseda badu ita biagua bona ita badu haraga lasi! (Aonega Herevadia 16:32; Hadibaia Tauna 7:9 duahia.) Namona be badu haraga karana ita dadaraia bona ma haida edia dika ita gwauatao. Iehova bona Iesu be dika gwauatao karana idia laloa bada. (Mat. 6:14, 15) Oi be ma haida edia dika do oi gwauatao o emu hemami do oi biagua, a?

6. Dahaka dainai badu karana dekenai ita naria namonamo be namo?

⁶ Ena hemami ia biagua lasi tauna be nega momo ia badu. Unai dainai, ma haida be do idia ura lasi ia idia bamoa o tura henia. Ia badu momo tauna ese kongrigeisen ena noho namo ia hadikaia diba. Reana ia ese ena badu eiava inai heheni karana ia hunia diba, to iena kudouna ai idia noho lalohadai dikadia be gabeai “taunimanima edia hebou lalonai do ia hedinaraia.” (Aon. 26:24-26) Reana elda taudia edia heduru amo unai tauna do ia laloparara, badu, inai heheni karana, bona ta lalodika henia kava karana be kerere bona unai bamona tauna be gabu lasi Dirava ena orea lalonai. Iehova ena Buka ese unai ia hahedinaraia goevagoeva. (Lev. 19:17, 18; Roma 3:11-18) Unai oi abia dae, a?

7, 8. (a) Iehova ese edena dala ai iena tanobada oreana ia hakaua? (b) Baibel lalonai idia noho hakaua herevadia haida be dahaka, bona dahaka dainai ita badinaia be namo?

⁷ Iehova ese “igui hesiai tauna mai ena kamonai bona mai ena kara maoromaoro” oreana amo ena tanobada oreana ia ubua, idia be Keriso, “kongrigeisen ena kwarana,” henunai idia gaukara. (Mat. 24:45-47; Efe. 5:23) Aposetolo edia negai ia noho hakaua oreana bamona, igui hesiai tauna ese Dirava ena hereva ia abia dae bona ia laloa bada. (1 Tesalonika 2:13 duahia.) Baibel lalonai edena hakaua herevadia ese ita idia durua diba?

⁸ Baibel ese ita ia hagoadaia, hebou ita lao hanaihanai totona. (Heb. 10:24, 25) Danu, ita ia hagoadaia, mai lalotamona ida gau ibounai ita karaia. (1 Kor. 1:10) Momokani, Baibel ia gwau namona be iseda mauri ai Basileia ita  atoa guna. (Mat. 6:33) Ma danu, Baibel ese ita ia hagoadaia ruma-ta-ruma-ta ai, pablik gabudia ai, bona nega bona gabu idauidau ai ita haroro totona. (Mat. 28:19, 20; Kara 5:42; 17:17; 20:20) Dirava ena Buka ese Keristani elda taudia ia hadibaia, iena orea idia gimaia totona, unai amo do ia goeva noho. (1 Kor. 5:1-5, 13; 1 Tim. 5:19-21) Danu, Iehova ese ita ibounai ia hagania tauanina bona kudouna ai ita goeva totona.​—2 Kor. 7:1.

9. Hari inai negai, Iesu be daika ia abia hidi ita ia durua totona?

⁹ Taunimanima haida idia laloa, idia sibona ese Baibel idia hahanaia diba. To, Iesu ese “igui hesiai tauna” ia abia hidi, Dirava amo idia mai herevadia ia halasia totona. Lagani 1919 amo, Iesu Keriso ese unai igui hesiai tauna amo ena murinai idia raka taudia ia durua, Dirava ena Buka idia lalopararalaia bona ena hakaua herevadia idia badinaia totona. Bema Baibel lalonai idia noho hakaua herevadia ita badinaia, kongrigeisen be do ia goeva, bona maino bona lalotamona do ia noho. Namona be sibona ita nanadaia, ‘Iesu ese hari ia gaukaralaia dalana lau badinaia, a?’

10. Esekiela bukana ese edena dala ai Iehova ena guba oreana ia herevalaia?

¹⁰ Iehova ena Hereva amo iena guba oreana ita dibaia. Hegeregere, peroveta tauna Esekiela ese ia itaia matahanai ta lalonai, Dirava ena guba oreana be kariota badana ta ese ia laulaulaia. (Ese. 1:4-28) Iehova be unai kariota lalonai ia helai bona unai kariota be lauma helaga ia ura lao gabudia ibounai dekenai ia lao. Unai dainai, iena guba oreana ese ena tanobada oreana ia hakaua. Oibe, kariota be ia heau noho! Mani oi laloa, idia hanaia lagani 10 lalonai, orea dekenai gau momo idia idau​—bona laloatao, Iehova ese unai senisi ibounai ia karaia. Kahirakahira Keriso bona aneru helagadia ese inai tanobada dikana do idia hadikaia ore, unai dainai Iehova ena kariota be ia heau haraga noho, iena lohia siahuna ia abia isi bona ena ladana helagana ia hahelagaia totona!

11, 12. Iehova ena orea ese ia hagugurua gaudia haida be dahaka?

¹¹ Inai nega dokona ai, Dirava ena tanobada oreana ese ia hagugurua gaudia mani oi laloa. Konstraksen. Warwick, New York, U.S.A ai, gaukara taudia handred momo be idia bisi bada, Iehova ena Witnes taudia edia hedikwota matamata idia haginia totona. To Worldwide Design/Construction Department ena hakaua henunai, volantia taudia tausen momo be idia gaukara goada Kingdom Hall matamata idia haginia bona brens ofesi idia habadaia totona. Unai volantia taudia edia gaukara namona dainai ita moale, ani? Laloatao, tanobada hegegemadai Basileia idia harorolaia taudia be Iehova ese ia hanamoa noho, badina idia be mai manau bona abidadama ida kontribusen idia henia konstraksen gaukara idia durua totona.​—Luka 21:1-4.

¹² Sikuli. Mani oi laloa, Dirava ese sikuli  idauidau amo ita ia hadibaia noho. (Isa. 2:2, 3) Hegeregere, Painia Gaukara Sikuli, Basileia Evanelia Sikuli, Gilead Sikuli, Betele Sikuli, Sekit Naria Taudia Bona Adavadia Edia Sikuli, Kongrigeisen Elda Taudia Edia Sikuli, Basileia Hesiai Gaukara Sikuli, bona Brens Komiti Taudia bona Adavadia Edia Sikuli. Unai ese ia hahedinaraia Iehova be ia ura ena taunimanima ia hadibaia! Baibel hahedibalaia dalana be iseda web sait, jw.org ai ia noho danu, unuseniai gado handred momo edia buka bona magasin idia noho. Unai web sait lalonai, natudia bona ruma bese edia kahana idia noho, bona orea ena nius kahana danu. Haroro gaukara ai bona ruma bese ena tomadiho negadiai jw.org oi gaukaralaia, a?

13. Ita be Iehova ita tomadiho henia dainai, iseda maduna be dahaka?

¹³ Iehova ena orea lalonai ita noho be hahenamo badana, ani? Ita be Dirava ena ura bona ena taravatu ita diba dainai, namona be kara namo ita karaia bona iena lohia siahuna ita abia isi. Inai tanobada ai, kara dika be ia bada ia lao noho dainai, namona be Iehova hegeregerena, kara dika ita inai henia. (Sal. 97:10) Bona namo lasi, Dirava diba lasi taudia bamona ita kara, idia be ‘dika idia gwauraia namo, bona namo idia gwauraia dika.’ (Isa. 5:20) Ita ura Dirava ita hamoalea dainai, namona be iseda tauanina, lalohadai, bona kara idia goeva. (1 Kor. 6:9-11) Ita be Iehova ita lalokau henia bona abidadama henia, bona ita ura ia ita badinaia dainai, iena Buka lalonai idia noho hakaua herevadia ita badinaia. Bona ita hekwarahi iseda ruma ai, kongrigeisen ai, gaukara gabunai, sikuli gabunai, bona gabu ma haida ai, unai hakaua herevadia ita badinaia totona. (Aon. 15:3) Edena dala ma haida ai Dirava ita badinaia diba?

14. Keristani tama sina ese edena dala ai idia hahedinaraia, idia be Iehova idia badinaia?

¹⁴ Natuna naria karana. Keristani tama sina be Baibel ena hereva hegeregerena edia natudia idia hadibaia neganai, idia hahedinaraia idia be Iehova idia badinaia. Namo lasi Dirava idia badinaia tama sina ese edia sene taudia edia lalohadai hegeregerena edia natudia idia naria. Danu, namo lasi Keristani ruma besena ese inai tanobada ena lalohadai dikadia idia badinaia. (Efe. 2:2) Ma danu, namo lasi ia bapatiso tamana ta ia laloa, ‘Emai tano ai, natudia hadibaia karana be hahine ena maduna.’ Badina Baibel ia gwau: “Tamadia e, emui natudia do umui habadua lasi, to idia tubu noho lalonai, Iehova ena matahakani bona sisiba amo idia umui hadibaia be namo.” (Efe. 6:4) Keristani tama sina idia ura edia natudia ese Samuela ena haheitalai idia tohotohoa, badina Samuela ia maragi negana amo Iehova be ia ida ia noho.​—1 Sam. 3:19.

15. Abia hidi badadia ita karaia neganai, edena dala ai ita hahedinaraia ita be Iehova ita badinaia?

¹⁵ Abia hidi karaia negadiai. Iseda mauri lalonai abia hidi badadia ita karaia neganai, namona be Dirava ena Hereva bona iena orea amo heduru ita tahua, unai ita karaia neganai, ita hahedinaraia ita be Dirava ita badinaia. Tama sina ese unai idia karaia danu be mai anina bada, mani inai haheitalai ita laloa. Moni gaukara totona tano ma ta dekenai idia lao tama sina momo ese edia beibi matamatadia be edia hanua dekenai idia siaia, edia varavara ese idia naria totona. Unai amo idia be moni gaukara idia karaia noho, bona moni momo idia haboua diba. Momokani, unai be ta ta edia abia hidi, to namona be ita laloatao, Dirava ese ita ibounai ta ta be iseda abia hidi hegeregerena do ia hahemaoro henia. (Roma 14:12 duahia.) Unai dainai iseda ruma bese bona moni gaukara totona abia hidi ita karaia neganai, Baibel  ena heduru ita tahua be aonega karana, ani? Iseda guba Tamana ena heduru ita abia be namo, badina ita sibona ese iseda mauri ita biagua diba lasi.​—Ier. 10:23.

16. Hahine ta be dahaka abia hidi ia karaia, bona dahaka ese ia durua abia hidi maorona ia karaia totona?

¹⁶ Tano ma ta ai ia noho hahine ta be beibi merona ia havaraia. Bona ia ura unai beibi be iena hanua dekenai ia siaia, iena tama sina ese idia naria totona. Unai nega ai, Iehova ena Witnes hahinena ta be ia ida Baibel ia stadilaia matamaia. Ia goada ia lao bona ena stadi amo ia dibaia gauna ta be, Dirava ese ia dekenai maduna ia henia ena natuna do ia naria, unai amo ia be Iehova ia tomadiho henia diba. (Sal. 127:3; Aon. 22:6) Baibel ena hereva hegeregerena, unai hahine ese iena lalohekwarahi ibounai be Iehova dekenai ia gwauraia. (Sal. 62:7, 8) Danu, iena stadi hahinena bona kongrigeisen taudia ma haida dekenai unai ia herevalaia. Ena be ena varavara bona turadia ese ia idia doria ena natuna be iena tama sina dekenai ia siaia totona, to ia diba momokani unai be kerere. Iena adavana ia moale bada, badina ia itaia kongrigeisen taudia ese iena hahine bona edia beibi idia durua bada. Unai dainai Baibel stadi ia abia dae bona ena hahine bona edia natuna ida hebou ia lao henia matamaia. Momokani, Iehova ese unai hahine ena guriguri ia haerelaia, ani? Bona unai ia mamia momokani.

17. Stadi karaia dalana dekenai, dahaka hakaua herevadia ita abia?

¹⁷ Hakaua dalana badinaia. Dirava ita badinaia dalana badana ta be, iena orea amo ita abia hakaua herevadia ita badinaia. Hegeregere, iseda stadi taudia durua totona, ita abia hakaua herevadia mani oi laloa. Ita idia hagoadaia bema ta ida Baibel be Dahaka Ia Hadibaia? bukana ita stadilaia, namona be miniti haida ita atoa stadi tauna ida orea ena gaukara dalana ita herevalaia totona. Unai ita karaia totona, vidio ladana Kingdom Hall Lalonai Dahaka Ia Vara? bona Daidia be Hari Iehova ena Ura Idia Karaia Noho? buklet ita gaukaralaia diba. Stadi tauna ida Baibel Hadibaia bukana ita stadilaia haorea murinai, namona be ia ida Dirava Ena Lalokau Lalonai Do Umui Noho bukana ita stadilaia, ia bapatiso murinai ia ida unai buka do ita stadilaia noho. Orea ese unai hakaua herevana idia henia, unai amo hahediba taudia matamatadia be edia ‘abidadama lalonai do idia goada noho.’ (Kol. 2:7) Oi ese Iehova ena orea amo idia mai hakaua herevadia oi badinaia, a?

18, 19. Dahaka badina haida dainai Iehova ita tanikiu henia be namo?

¹⁸ Badina momo dainai Iehova ita tanikiu henia diba! Iehova ese ita dekenai mauri ia henia, bema unai ia karaia lasi, hari do ita mauri lasi. (Kara 17:27, 28) Danu, ia ese ita dekenai harihari gauna namo hereana ia henia​—iena buka, Baibel. Ita abia dae ia be Dirava ena hereva, Tesalonika tadikaka taihu ese Dirava ena hereva idia abia dae hegeregerena.​—1 Tes. 2:13.

¹⁹ Dirava ena Hereva dainai, ita be Iehova kahirakahira ita lao bona ia be ita kahirakahira ia mai. (Iam. 4:8) Iseda guba Tamana ena orea lalonai ita noho be hahenamo badana. Unai bamona hahenamo ita lalodia bada be namo! Salamo torea tauna ia gwau: “[Iehova] do ita tanikiu henia, badina ia be namo. Iena lalokau bona bogahisihisi do idia noho hanaihanai.” (Sal. 136:1) Salamo 136 ai, inai hereva “iena lalokau bona bogahisihisi do idia noho hanaihanai” be nega 26 ia hedinarai. Iehova bona ena orea ita badinaia neganai, ita dekenai Salamo torea tauna ena hereva do ia momokani, badina do ita noho hanaihanai!