NEGA ia ginidae Ierusalema ai hebou badana ta do idia abia. King Davida ese ena lohia taudia, ena tuari taudia goadadia, bona tau badadia ibounai ia haboua. Hebou ai idia kamonai hadibaia hereva namona dainai idia moale. Iehova be Davida ena natuna Solomona ia hagania, Dirava momokanina ena tomadiho rumana ta do ia haginia. King Davida ese Dirava amo unai ruma ena palani ia abia, bona Solomona dekenai ia henia. Davida ia gwau: “Gaukara danu be bada herea, badina inai ruma badana be taunimanima totona lasi, to Dirava Lohiabada totona.”​—1 Siv. 28:1, 2, 6, 11, 12; 29:1.

Bena Davida ia henanadai: “Daika ese, . . . mai ena lalokau danu harihari gaudia Lohiabada dekenai do ia henia?” (1 Siv. 29:5) Bema oi be idia danu oi noho, dahaka do oi gwau? Emu lalona do oi hadaia inai gaukara badana oi durua totona, a? Israela taudia be maoromaoro kara ta idia karaia. Oibe, “taunimanima ese mai edia laloa namo danu unai harihari gaudia momo Lohiabada dekenai idia henia.”​—1 Siv. 29:9.

Lagani handred murinai, Iehova ese dubu helaga ia hereaia gauna ta ia haginia. Ia ese tomadiho ena dala matamatana ia hegaegaelaia, unai be Iesu ena boubou karana amo taunimanima be Ia idia tomadiho henia diba. (Heb. 9:11, 12) Edena dala ai hari Iehova ese taunimanima ia durua, ia ida maino idia karaia totona? Hahediba taudia halaoa gaukarana amo. (Mat. 28:19, 20) Unai gaukara dainai, lagani ta ta ai Baibel stadi milioni momo idia karaia, hahediba taudia tausen momo be idia bapatiso, bona kongrigeisen matamatadia handred momo idia haginia.

Gaukara ia bada noho dainai, Baibel bukadia momo idia printaia, Kingdom Hall idia haginia bona hanamoa, bona hebouhebou badadia bona maragidia abia gabudia idia hegaegaelaia. Momokani, sivarai namona harorolaia gaukara be gaukara badana bona namona, ani?​—Mat. 24:14.

Dirava ena taunimanima ese Ia bona edia dekena taudia idia lalokau henia bona Basileia harorolaia gaukarana dainai, ‘harihari gaudia Lohiabada dekenai idia henia.’ Ita moale badina iseda “uma ena anina namodia, be Lohiabada dekenai” ita henia, bona ita henia harihari monina be mai momokani ida idia gaukaralaia Basileia ena gaukara idia durua totona!​—Aon. 3:9.