1, 2. Dahaka dainai ta ta ita hagoadaia be mai anina bada?

MAURI lagani 18 kekenina, Cristina, ^[1] ia gwau: “Lauegu tama sina be lau idia hagoadaia lasi, to nega ibounai lau idia gwauraia dika. Bona edia hereva ese lau ia hahisia bada. Idia gwau lau be maragidia bamona lau kara, gau ta do lau dibaia lasi, bona egu tauanina be bada. Unai dainai nega momo lau tai bona idia lau hereva henia lasi. Lau mamia egu mauri be anina lasi.” Momokani, bema ta ta ita hagoadaia lasi, do ita mamia iseda mauri be anina lasi!

² Ta ta ita hagoadaia neganai, namo bada ita davaria diba. Rubén ia gwau: “Lagani momo lalonai lau mamia egu mauri be anina lasi. To nega ta, elda ta ida lau haroro noho lalonai, ia itaia lau moale lasi. Lauegu hemami lau gwauraia hedinarai neganai, ia kamonai namonamo. Bena egu kara namodia ia herevalaia, bona unai ese lau ia hamoalea. Danu, Iesu ena hereva ia gwauraia​—⁠ita ta ta ese manu maragidia ibounai ita hereaia. Nega momo unai siri lau laloatao, bona unai ese lau ia hagoadaia. Unai elda ena hereva ese egu mauri ia haidaua momokani.”​—Mat. 10:31.

3. (a) Aposetolo Paulo ese ta ta hagoadaia karana be edena bamona ia herevalaia? (b) Inai stadi ai edena henanadai do ita herevalaia?

 ³ Ita hoa lasi, badina Baibel ese ita ia hadibaia ta ta ita hagoadaia loulou totona. Aposetolo Paulo be Heberu Keristani taudia dekenai ia gwau: “Tadikaka e, umui naria namonamo, badina mauri Diravana amo umui raka siri karana amo, abidadama lasi kudou dikana umui abia garina. . . . Dina iboudiai umui ta ta umui hagoadaia noho, unai amo kara dika ena koikoi siahuna ese umui ta ena kudouna do ia ha-aukaia lasi.” (Heb. 3:12, 13) Momokani, bema guna ta ese oi ia hagoadaia, do oi abia dae ta ta hagoadaia karana be mai anina bada. Unai dainai mani inai henanadai ita lalodia: Dahaka dainai ta ta ita hagoadaia be mai anina bada? Iehova, Iesu, bona Paulo ese ma haida idia hagoadaia karana amo dahaka ita dibaia? Bona ita henia hagoadaia herevana ese edena dala ai ma ta ia durua diba?

4. Daidia be hagoadaia herevadia idia abia be namo, to dahaka dainai hari momo be unai idia karaia lasi?

⁴ Ita ibounai ita ura ma ta ese ita ia hagoadaia, ani? Ita tubu daekau noho lalonai unai be mai anina bada. Tisa ta, Timothy Evans, ia gwau: “Tubutubu gaudia be ranu idia abia be namo hegeregerena, natudia be hagoadaia herevadia idia abia be namo. Bema natudia ita hagoadaia, do idia moale.” To ita be nega aukadia lalonai ita noho. Taunimanima be sibodia idia laloa bada, lalokau be lasi, bona ta ta idia hagoadaia lasi. (2 Tim. 3:1-5) Tama sina haida be edia natudia idia hagoadaia lasi, badina guna edia tama sina be idia dekenai unai idia karaia lasi. Bosi momo ese edia gaukara taudia idia hanamoa lasi dainai, idia momo idia gwau gaukara gabunai ta ta hagoadaia karana be lasi.

5. Edena dala ai ma ta ita hagoadaia diba?

⁵ Ta ita hagoadaia diba, bema ia karaia gauna ta dainai ia ita hanamoa. Danu, ta ita hagoadaia diba, bema iena kara namodia dainai ia ita hanamoa eiava bema idia “lalometau taudia” ita gado namo henia. (1 Tes. 5:14) Grik herevana idia hahanaia “hagoadaia” ena anina be “ta ese ma ta ia boiria ena badinai do ia noho.” Iseda tadikaka taihu ida ita gaukara hebou neganai, ta ta ita hagoadaia diba. (Hadibaia Tauna 4:9, 10 duahia.) Nega idauidau ai, ma haida dekenai idia ita lalokau henia bona laloa bada ena badina ita gwauraia, a? Unai henanadai ita do haerelaia lasi neganai, namona be inai aonega herevana ita laloa: “Nega korikori dekenai, hereva namona ta ia gwauraia, be namo bada!”​—⁠Aon. 15:23.

6. Dahaka dainai Diabolo ia ura ita lalometau? Haheitalai gwauraia.

⁶ Satani Diabolo ia ura ita lalometau, badina ia diba lalometau karana ese ta ena abidadama ia hamanokaia diba. Aonega Herevadia 24:10 ia gwau: “Bema hekwakwanai neganai oi manoka neganai, oiemu goada be maragimaragi momokani.” Satani ese hisihisi idauidau bona samania herevadia ia gaukaralaia Iobu ena lalona ia hamanokaia totona, to ia kwalimu lasi. (Iobu 2:3; 22:3; 27:5) Ita ese Diabolo ena gaukara idauidau ita koua diba, bema iseda ruma bese bona kongrigeisen taudia ita hagoadaia. Bema unai ita karaia, iseda ruma ai bona Kingdom Hall ai do ita moale bona noho namonamo.

7, 8. (a) Edena Baibel sivaraidia ese idia hahedinaraia Iehova ese ma ta hagoadaia karaia ia laloa bada? (b) Edena dala ai tama sina ese Iehova ena haheitalai idia tohotohoa diba? (Laulau ginigunana herevalaia.)

⁷ Iehova. Salamo torea tauna ia gwau: “Lohiabada be lalohisihisi taudia kahirakahira ia noho, bona ia ese edia lalona ia ore taudia ia  hamauria noho.” (Sal. 34:18) Ieremia be ia gari bona ia lalometau neganai, Iehova ese unai abidadama peroveta tauna ia hagoadaia. (Ier. 1:6-10) Mani oi laloa, Dirava ese aneru ta ia siaia peroveta tauna Daniela do ia hagoadaia. Unai aneru ese Daniela ia hamaoroa Dirava be ia “ia lalokau henia bada” eiava laloa bada neganai, reana unai ese Daniela ia hagoadaia momokani! (Dan. 10:8, 11, 18, 19) Edia goada ia ore noho pablisa taudia, painia taudia, bona idia buruka tadikaka taihu oi hagoadaia diba, a?

⁸ Ena be guba ai Dirava bona ena lalokau Natuna be lagani momo idia gaukara hebou, to Iesu be tanobada dekenai ia noho neganai, Dirava ese ia hanamoa bona ia hagoadaia noho. Oibe, nega rua Iesu ese guba amo ena Tamana ena gadona ia kamonai, ia gwau: “Inai be egu Natuna, egu lalokau, ia lau lalonamo henia.” (Mat. 3:17; 17:5) Dirava ese Iesu ia hanamoa bona ia hamaoroa ia be gaukara namona ia karaia. Momokani, Iesu ese ena hesiai gaukara ia matamaia negana ai bona ena tanobada maurina dokona ai unai hereva ia kamonai neganai, reana goada ia abia. Danu, Iesu ena hanuaboi ginigabena ai ia lalohisihisi neganai, Iehova ese aneru ta ia siaia ia hagoadaia totona. (Luka 22:43) Bema oi be tama o sina ta, namona be Iehova ena haheitalai oi tohotohoa, bona hanaihanai emu natudia oi hagoadaia bona bema gau ta idia karaia namonamo, oi hanamodia. Danu, dina ta ta ai sikuli dekenai gau haida ese edia abidadama ia tohoa neganai, namona be idia oi durua.

9. Iesu ese ena aposetolo taudia ia kara henia dalana amo dahaka ita dibaia?

⁹ Iesu. Iesu ese Memorial hebouna ia karaia hanuaboina ai, ia itaia iena aposetolo taudia be idia hekokoroku. Iesu be mai manau ida edia aena ia huria, to daika be bada idia do hepapahuahulaia noho, bona Petero be ia hekokoroku. (Luka 22:24, 33, 34) To, Iesu ese ena abidadama aposetolo taudia ia hanamoa, badina ena be hahetoho ia davaria, to idia ese ia idia rakatania lasi. Ia hamaorodia do idia karaia gaukarana ese ia karaia gaukarana do ia hereaia, bona ia hadibadia Dirava be idia ia ura henia bada. (Luka 22:28; Ioa. 14:12; 16:27) Sibona ita nanadaia, ‘Iesu do lau tohotohoa bona egu natudia bona ma haida do lau hanamodia, to edia manoka gaudia do lau laloa lasi, a?’

10, 11. Edena dala ai aposetolo Paulo ia hahedinaraia ma haida hagoadaia karana ia laloa bada?

¹⁰ Aposetolo Paulo. Iena revareva lalodiai, ia ese Keristani taudia ia hanamoa. Lagani momo lalodiai, ia be idia haida ida ia loaloa dainai, edia manoka gaudia ia diba, to ia ese edia kara namodia sibona ia herevalaia. Hegeregere, Paulo ese Timoteo ia herevalaia neganai, ia gwau, “Lohiabada ena gaukara lalonai ia be egu lalokau natuna mai abidadama,” bona ia be Keristani taudia ma haida ia durua tauna. (1 Kor. 4:17; Fili. 2:19, 20) Danu, Paulo ese Korinto kongrigeisen taudia ia hamaoroa Tito ‘be iena bamona bona edia namo totona ia ida ia gaukara hebou tauna.’ (2 Kor. 8:23) Paulo ese Timoteo bona Tito be unai bamona ia laloa dainai, reana unai ese idia ia hagoadaia bada!

¹¹ Ena be Paulo bona Banaba idia diba edia mauri idia haboioa diba, to guna idia ruaosi idia dagedage henia hanuadia dekenai idia giroa lou. Hegeregere, ena be Lusitera ai dagedage idia davaria, to unuseni idia giroa lou, unai amo hahediba taudia matamata edia abidadama idia hagoadaia diba. (Kara 14:19-22) Efeso ai, heiriheiri bada ia vara. Kara 20:1, 2 ia gwau: “Vadaeni heiriheiri ia ore neganai, Paulo ese hahediba taudia ia boiria, bona idia ia hagoadaia bona bamahuta henia murinai, Makedonia dekenai ia lao. Unuseniai  ia loaloa bona tadikaka hagoadaia herevadia momo ia gwauraia murinai, Gris dekenai ia mai.” Momokani, Paulo be ma haida hagoadaia karana ia laloa bada.

12. Hebou negadiai, edena dala ai ita hagoadaia heheni diba?

¹² Iseda guba Tamana ese iseda hebou karana ia hegaegaelaia ena badina ta be, unuseniai ita hagoadaia heheni diba. (Heberu 10:24, 25 duahia.) Iesu ena hahediba taudia bamona, ita hebou unai amo diba bona goada ita abia. (1 Kor. 14:31) Matamanai ita herevalaia taihuna, Cristina, ia gwau: “Hebou lao henia karana lau moalelaia bada, badina unuseniai lalokau bona goada lau abia. Nega haida Kingdom Hall dekenai lau ginidae neganai, lau lalomanoka. To taihu idia mai, lau idia rosia, bona idia gwau egu toana be namo. Idia gwau lau idia lalokau henia bona hebou lau mai hanaihanai dainai idia moale. Edia hahegoada herevadia ese egu lalona ia hanamoa momokani!” Ita ibounai be ta ta ita “hagoadaia” neganai, do ita moale!​—⁠Roma 1:11, 12.

13. Dahaka dainai lagani momo lalonai Iehova idia hesiai henia taudia ita hagoadaia be namo?

¹³ Lagani momo lalonai Iehova idia hesiai henia taudia danu be ta ese ia hagoadaia be namo. Mani Iosua ita laloa. Ia be lagani momo lalonai mai abidadama ida Iehova ia hesiai henia. To, Iehova ese Mose ia hamaoroa ia do ia hagoadaia, ia gwau: “To Iosua do oi hadibaia, bona do oi hagoadaia, bona iena lalona do oi ha-aukaia, badina be ia ese inai bese taudia Ioridane Sinavai unai kahana, oi itaia tano, dekenai do ia hakaudia hanai.” (Deu. 3:27, 28) Iosua be maduna badana do ia abia, ia ese Gwauhamata Tanona dekenai Israela taudia do ia hakaua vareai. To, ia ese hekwakwanai haida do ia davaria bona tuari lalonai do ia kwalimu lasi. (Ios. 7:1-9) Unai dainai Mose ese Iosua ia hagoadaia be namo! Namona be ita danu ese elda taudia bona sekit naria taudia ita hagoadaia, badina idia be idia gaukara goada Dirava ena mamoe idia naria totona. (1 Tesalonika 5:12, 13 duahia.) Sekit naria tauna ta ia gwau: “Nega haida tadikaka be revareva amo edia tanikiu herevana idia gwauraia, idia gwau emai vadivadi karana idia moalelaia. Unai revareva ai dogoatao bona ai lalomanoka neganai, ai duahidia. Unai revareva ese ai idia hagoadaia bada.”

14. Sisiba ita henia neganai, ma ta ita hanamoa bona hagoadaia ena namo be dahaka?

¹⁴ Keristani elda taudia bona tama sina idia mamia, ma ta ita hanamoa bona hagoadaia karana be dala namona ma ta dekenai Baibel ena sisiba ita hadibaia totona. Korinto taudia ese Paulo ena sisiba idia badinaia dainai, ia ese ia hanamodia, unai ese reana idia ia hagoadaia kara namodia idia karaia noho totona.  (2 Kor. 7:8-11) Andreas, iena natudia be rua, ia gwau: “Natudia ita hagoadaia neganai, edia abidadama bona lalona be do ia goada. Hagoadaia herevadia amo idia oi sisiba henia diba. Ena be iseda natudia idia diba dahaka be namo, to bema hanaihanai idia ita hagoadaia, edia mauri ibounai lalonai do idia ura kara namo idia karaia.”

15. Edena dala ai ma haida ita hagoadaia diba?

¹⁵ Iseda tadikaka taihu edia hekwarahi bona kara namodia ita laloa bada. (2 Siv. 16:9; Iobu 1:8) Iseda noho dalana hegeregerena Basileia ena gaukara idauidau ita durua neganai, Iehova bona Iesu be unai idia laloa bada. (Luka 21:1-4; 2 Korinto 8:12 duahia.) Hegeregere, iseda tadikaka taihu burukadia be idia hekwarahi bada hebou idia mai, haere idia henia, bona idia haroro totona. Idia ita hanamoa bona hagoadaia diba, a?

16. Dala ia kehoa neganai, dahaka dainai ma haida ita hagoadaia be namo?

¹⁶ Nega idauidau ai ma haida ita hagoadaia. Bema dala ia kehoa ma ta ita hanamoa totona, unai ita karaia be namo. Paulo bona Banaba be Pisidia ena hanua ta, Antioka, dekenai idia noho neganai, ia vara gauna mani ita laloa. Sinagoga ena gunalaia taudia be idia dekenai idia gwau: “Tadikaka e, bema umui ura taunimanima umui hagoadaia, umui hereva diba.” Vadaeni Paulo ese haroro hereva namona ia henia. (Kara 13:13-16, 42-44) Oibe, bema dala ia kehoa ma ta ita hagoadaia totona, unai ita karaia diba. Momokani, bema hanaihanai ma haida ita hagoadaia, taunimanima ese ita do idia hagoadaia danu.​—Luka 6:38.

17. Edena dala ma ta ai ta ita hanamoa diba?

¹⁷ Mai momokani ida oi hereva bona hereva maorodia gwauraia. Hagoadaia hereva bona hanamoa herevadia be namo, to Iesu ese Tuatira Keristani taudia dekenai ia gwauraia herevana ese ia hahedinaraia, ma haida ese idia karaia gaudia ita herevalaia diba. (Apokalupo 2:18, 19 duahia.) Hegeregere, bema tama sina idia itaia edia natudia be gau haida idia karaia edia abidadama idia hagoadaia totona, unai idia herevalaia diba. Eiava bema ita itaia sina ta be ia hekwarahi ena natudia ia naria totona, ena be ia be adavana lasi, reana ita moalelaia karana ta dainai ia ita hanamoa diba. Unai bamona hanamoa bona hagoadaia herevadia ese ta ena lalona ia hamoalea diba!

18, 19. Edena dala ai ma haida ita hagoadaia diba?

¹⁸ Iehova ese iseda uduna dekenai ma ta hagoadaia herevana do ia atoa lasi, Iosua hagoadaia totona Mose dekenai ia karaia bamona. To, iseda hereva amo iseda tadikaka taihu ita hagoadaia neganai, Dirava be ia moale. (Aon. 19:17; Heb. 12:12) Hegeregere, tok ia henia tadikaka ta ita hamaoroa diba edena bamona iena tok ese ita ia hagoadaia eiava ita ia durua siri ta ita lalopararalaia totona. Revareva amo taihu ta be ia vadivadi tadikaka dekenai ia gwau: “Ena be miniti haida sibona lalonai ita herevahereva, to oi ese lau mamia noho hisihisina oi itaia, bona emu hereva amo lau oi hagoadaia. Lau ura inai oi diba, platfom amo bona lau oi hereva henia neganai, lau mamia oi gwauraia herevana be Iehova amo ia mai harihari gauna ta.”

¹⁹ Momokani, dala idauidau ai ma haida ita hagoadaia diba, bema Paulo ena sisiba ita badinaia, ia gwau: “Do umui durua heheni bona hagoadaia heheni noho, hari umui karaia noho bamona.” (1 Tes. 5:11) Ita ibounai ese Iehova ita hamoalea diba bema ‘dina iboudiai ta ta ita hagoadaia noho.’