1. Ane abia karana ese ita ia hagoadaia dahaka ita karaia totona?

ANE torea tauna ta ia gwau: “Hereva ta ta ese oi dekenai lalohadai idia henia. Bona miusiki ese hemami ia havaraia. To ane oi abia neganai, ena hereva ese emu kudouna ia pidia diba.” Iseda ane amo iseda guba Tamana, Iehova, ita hanamoa diba bona ita hahedinaraia ia ita lalokau henia. Unai dainai ita gwau diba, ane be tomadiho momokani ena kahana badana ta, herevana ita be sibona ita ane eiava Dirava ena taunimanima ida ane ita abia.

2, 3. (a) Haida ese kongrigeisen ai ane abia karana be edena bamona idia laloa? (b) Edena henanadai do ita lalodia?

² Kongrigeisen ida ane abia karana be edena bamona oi laloa? Oi dekenai ia be hemarai gauna, a? Hanua haida dekenai, tatau be idia hemarai pablik gabudiai idia ane totona. Kongrigeisen lalonai unai ese hekwakwanai ia havaraia diba, bema kongrigeisen taudia ibounai be ane idia abia, to kongrigeisen idia hakaua taudia be ane idia abia lasi, o gaukara ma haida idia karaia.​—Sal. 30:12.

³ Bema tomadiho karana lalonai, ane be mai anina bada, vadaeni ane ia heau noho lalonai, namo lasi ita raka-lasi eiava unai kahana ita reaia. Sibona ita nanadaia: ‘Hebou dekenai ane abia karana be edena bamona lau laloa? Gari o hemarai karana be edena  bamona do lau hanaia, unai amo mai moale ida ane lau abia diba? Bona dahaka lau karaia diba, unai amo ane edia hemami lau hahedinaraia diba?’

4, 5. Israela taudia edia tomadiho karadia lalonai ane be edena bamona idia laloa?

⁴ Gunaguna amo, Iehova ena abidadama hesiai taudia be miusiki idia gaukaralaia Iehova idia hanamoa totona. Momokani, Israela taudia be Iehova idia hesiai henia neganai, edia tomadiho karadia lalonai ane be mai anina bada. Hegeregere, King Davida ese dubu helaga ena gaukara idauidau ia hegaegaelaia neganai, ia ese Levi taudia 4,000 ia abia hidi miusiki amo Iehova idia hanamoa totona. Idia 288 be “Lohiabada ena ane abia dekenai idia manada.”​—1 Siv. 23:5; 25:7.

⁵ Dubu helaga idia hahelagaia neganai, miusiki idia gadaralaia bona ane idia abia danu. Baibel ia gwau: “Inai kibi hiriria taudia bona ane abia taudia ese Lohiabada idia hanamoa hebou mai regena namona, gado tamona bamona. Mai kibi bona botaia auridia bona gita gaudia danu edia ane idia abia . . . Lohiabada ena hairaina ese Dirava ena Dubu Helaga ia hahonua.” Unai ese Israela taudia edia abidadama ia hagoadaia momokani.​—2 Siv. 5:13, 14; 7:6.

6. Nehemia ia lohia lalonai, ia ese miusiki bona ane abia taudia be edena bamona ia hegaegaelaia?

⁶ Nehemia ena lohia henunai, Israela taudia ese Ierusalema ena magu idia haginia lou neganai, ia ese danu Levi taudia ia abia hegaegae, idia ane bona miusiki idia gadaralaia totona. Unai magu idia hahelagaia neganai, idia gadaralaia miusiki ese ibounai ia hamoalea. Unai nega ai, Dirava idia hanamoa “ane abia taudia” edia orea be rua. Orea ta be idiba kahanai bona ma ta be laurina kahanai ia raka, bena dubu helaga kahirakahira ia noho magu dekenai idia hedavari, unai amo edia regena be daudau gabudiai idia noho taudia ese idia kamonai diba. (Neh. 12:27, 28, 31, 38, 40, 43) Momokani, Iehova ia itaia idia be mai moale ida ane amo ia idia hanamoa neganai, ia moale.

7. Iesu ese edena bamona ia hahedinaraia Keristani tomadihona ai ane be mai anina bada?

⁷ Keristani kongrigeisen ia matamaia neganai, tomadiho momokani lalonai miusiki be do mai anina bada. Mai anina bada hanuaboina ai, Iesu ese Lohiabada Ena Anibou ia karaia haorea murinai, Dirava hanamoa anedia idia abia.​—Mataio 26:30 duahia.

8. Ane abia karana dekenai, edena dala ai Keristani taudia ginigunadia be haheitalai namona?

⁸ Keristani taudia ginigunadia be Dirava hanamoa anedia idia abia hebou. Ena be idia hebou rumadia be hairai momokani lasi, to idia be mai ura bada ida Iehova hanamoa anedia idia abia. Aposetolo Paulo be ena Keristani tadikaka dekenai ia gwau: “Umui ta ta do umui hadibaia bona sisiba henia noho mai salamo ida, Dirava hanamoa anedia bona tomadiho ane hairaidia ida. Bona emui kudouna ai Iehova dekenai ane do umui abia.” (Kol. 3:16) Namona be iseda ane buka lalonai idia noho “Dirava hanamoa anedia” be mai kudouna ibounai ida ita abia. Idia be “igui hesiai tauna mai ena kamonai bona mai ena kara maoromaoro” ese ia hegaegaelaia.​—⁠Mat. 24:45.

9. (a) Dahaka dainai kongrigeisen heboudia bona hebouhebou badadia ai haida be mai moale ida ane idia abia lasi? (b) Iehova hanamoa anedia be edena dala ai ita abia diba, bona daidia ese idia gunalaia be namo? (Laulau ginigunana herevalaia.)

⁹ Bema emu famili o noho gabuna ai taunimanima  be idia ane momo lasi be edena bamona? Teknoloji dainai, reana oi be ane diba momo taudia edia ane kamonai karana oi moalelaia. To, nega haida emu gadona be unai ane abia taudia ida oi hahegeregerea neganai, oi hemarai o lalohisihisi diba. To, namo lasi unai ese oi ia koua dainai, ane amo Iehova oi hanamoa lasi. Namona be emu ane buka oi abia, emu kwarana oi abia isi, bona mai kudouna ibounai ida ane oi abia! (Esr. 3:11; Salamo 147:1 duahia.) Hari Kingdom Hall momo dekenai, ane ena hereva be TV dekenai ia hedinarai, unai amo ane ita abia badabada diba. Moale gauna ta be hari, elda taudia be Basileia Hesiai Gaukara Sikuli ai Basileia anedia idia abia danu. Unai ese elda taudia ia hagoadaia kongrigeisen ai ane abia karana idia gunalaia totona.

10. Bema gari dainai ane ita abia badabada lasi, dahaka ita laloatao be namo?

¹⁰ Haida be idia gari ane idia abia badabada totona, badina idia laloa dika edia gado regena be bada eiava ia namo lasi. To namona be ita laloatao, ita hereva neganai, “ita ibounai be nega momo ita kerere.” (Iam. 3:2) To unai ese ita ia koua lasi ita herevahereva totona. Unai dainai ena be iseda gado regena be namo lasi, to ane amo Iehova ita hanamoa noho be namo.

11, 12. Ane abia dalana hanamoa totona, dahaka ita karaia diba?

¹¹ Reana ita gari o hemarai ane ita abia totona, badina ane abia dalana ita diba lasi. To, iseda ane abia dalana ita hanamoa diba, bema heduru daladia haida ita badinaia. *

¹² Bema oi hahodi namonamo, mai gado namo ida ane oi abia diba. Mani oi laloa, golobu be paua ia abia neganai, diari ia henia, unai hegeregerena oi hahodi neganai, emu  gadona be ia kehoa bona oi hereva o ane diba. Oi hereva badabada hegeregerena ane oi abia be namo. (Tiokratik Haroro Sikuli amo Heduru Oi Abia bukana, rau 181 ia lao 184, hereva kwarana maragina, “Emu Hahodi Biagua Namonamo” henunai idia noho heduru daladia oi itaia.) Iehova hanamoa ane ita abia neganai, nega haida Baibel ese Iehova idia tomadiho henia taudia ia hagoadaia “mai moale bona mai boiboi danu” ane idia abia totona.​—⁠Sal. 81:1.

13. Gado goadana ida ane ita abia totona, dahaka ita karaia diba?

¹³ Ruma bese ena tomadiho negana o sibona oi noho neganai, inai oi tohoa: Iseda ane buka amo oi ura henia ane ta oi abia hidi. Bona mai emu gado goadana ida ane ena hereva oi duahidia. Gabeai, hahodi tamona lalonai ane ena hereva haida oi gwauraia hebou. Bena unai dala tamona ai, unai hereva ibounai oi anelaia. (Isa. 24:14) Bema unai oi karaia, ane oi abia namonamo diba, bona unai be namo. Namo lasi gari o hemarai dainai ane oi abia lasi!

14. (a) Ane abia totona iseda uduna ita kehoa badabada ena namo be dahaka? (Maua ladana“ Ane Abia Karana Hanamoa Dalana” itaia.) (b) Oi laloa edena heduru dalana ese emu gadona ia hanamoa diba?

¹⁴ Oi ane namonamo totona, emu uduna lalonai speis ia noho be namo. Dala ma ta be emu uduna oi kehoa badabada, oi hereva neganai emu uduna oi kehoa bamona lasi. Bema oi mamia emu gadona be ia goada lasi o gado regena ena tiuni be atai momokani, dahaka oi karaia be namo? Heduru daladia haida be Tiokratik Haroro Sikuli amo Heduru Oi Abia bukana, rau 184, ena maua ladana “Hekwakwanai Haida Hanaia Daladia” henunai oi davaria diba.

15. (a) Lagani 2016 ena lagani ta ta ena hebou ai, edena hadibaia hereva idia halasia? (b) Dahaka dainai ane buka matamata idia karaia?

¹⁵ Lagani 2016 ai, Watch Tower Bible and Tract Society of Pennsylvania ese lagani ta ta ai idia karaia hebou ta ai, Hakaua Oreana  tauna ta, Tadikaka Stephen Lett ia gwau daudau lasi iseda ane buka matamata, ladana Iehova Dekenai ‘mai Moale ida Ane Abia,’ be iseda hebou dekenai do ita gaukaralaia. Tadikaka Lett ia gwau ane buka matamata idia karaia, unai amo ena hereva be New World Translation of the Holy Scriptures Baibel matamata ida do ia hegeregere. Unai dainai New World Translation Baibel matamata lalonai idia noho lasi herevadia be ane buka amo idia kokia o idia haidaua. Danu, ane matamata haida be iseda haroro gaukara bona mauri davalaia boubouna idia herevalaia. Ma danu, ane abia karana be tomadiho momokani ena kahana badana dainai, Hakaua Oreana ia ura buka namo hereana ta ia karaia, bona ia be New World Translation Baibel matamata ena toana hegeregerena.

16, 17. Ane buka matamatana lalonai dahaka gaudia haida idia haidaua?

¹⁶ Iehova Dekenai ‘mai Moale ida Ane Abia’ bukana ita gaukaralaia namonamo totona, ane orea ta ta be mai edia sinado badana. Hegeregere, ane ginigunadia 12 be Iehova idia herevalaia, bona murina anedia 8 be Iesu bona mauri davalaia boubouna idia herevalaia. Danu, pablik tok totona ane oi ura abia hidi neganai, buka ena indeks ese oi ia durua diba.

¹⁷ Ita ibounai durua totona, ane ena hereva haida idia haidaua, unai amo ane ena lalohadai ia hedinarai namonamo diba. Bona nega momo ita gaukaralaia lasi herevadia idia kokia danu. Ane ladana “Emu Kudouna Naria” be idia haidaua bona “Eda Kudouna Naria” idia atoa, bona unai be namo. Dahaka dainai? Badina kongrigeisen heboudia, hebouhebou badadia bona maragidia dekenai idia mai taudia momo be kamonai taudia, matamata taudia, bona taihu. Bona idia ese unai ane idia abia neganai, unai be hegeregere idia be ma haida idia hamaoroa dahaka do idia karaia. Unai dainai unai ane ena hereva kwarana bona hereva idia haidaua.

18. Dahaka dainai iseda ane buka matamata lalonai idia noho ane ita manadalaia be namo? (Futnout itaia.)

¹⁸ Iehova Dekenai ‘mai Moale ida Ane Abia’ bukana lalonai idia noho ane momo be guriguri herevadia. Unai ane amo Iehova dekenai emu hemami oi gwauraia hedinarai diba. Ane haida ese ita idia durua ita “lalokau heheni bona kara namodia ita karaia totona.” (Heb. 10:24) Oibe, ita ura iseda ane edia miusiki bona hereva ita manadalaia. Unai ita karaia diba bema jw.org dekenai idia noho miusiki ita kamonai. Emu ruma ai ane oi praktis neganai, mai gado bada bona kudouna ibounai ida ane oi abia diba. *

19. Edena dala ai kongrigeisen taudia ibounai ese Iehova idia tomadiho henia diba?

¹⁹ Laloatao, ane abia karana be iseda tomadiho ena kahana badana ta. Unai dala amo ita hahedinaraia Iehova ita lalokau henia bona ita ura ia ita hanamoa. (Isaia 12:5 duahia.) Mai moale ida ane oi abia neganai, ma haida do oi durua danu mai gado bada ida ane idia abia totona. Oibe, kongrigeisen taudia ibounai​—⁠matamata, buruka, bona kamonai taudia​—⁠be unai dala ai Iehova idia tomadiho henia diba. Unai dainai namo lasi gau ta ese oi ia koua. To, salamo torea tauna ena sisiba oi badinaia, ia gwau: “Lohiabada dekenai ane do umui abia.” Oibe, mai moale ida ane do umui abia!​—⁠Sal. 96:1.