GUNA negana amo, tomadiho momokani lalonai boubou karadia be mai anina bada. Israela taudia be animal idia bouboulaia, to Keristani taudia be hanaihanai “Dirava idia hanamoa.” Dirava be boubou gaudia ma haida ia moalelaia danu. (Heb. 13:15, 16) Unai boubou gaudia ese ta ia hamoalea bona hanamoa diba, henunai idia noho haheitalai ese unai do idia hahedinaraia.

Abidadama hahinena, Hana, be ia ura dikadika natuna ta ia havaraia, to ia be gabani. Guriguri amo Iehova dekenai ia gwauhamata, bema natuna ta ia havaraia, “Lohiabada dekenai do [ia] henia lou, . . . iena mauri dinadia ibounai lalonai.” (1 Sam. 1:10, 11) Nega sisina murinai, Hana ia rogorogo bona natuna ta ia havaraia, iena ladana ia hatoa Samuela. Samuela ia bada neganai, Hana ese ena gwauhamata hegeregerena dubu helaga dekenai ia abia lao. Hana be sibona ena ura ia dadaraia dainai, Iehova ese ia hanamoa. Natudia ma 5 ia havaraia bona Samuela be peroveta tauna ai ia lao bona Baibel ia torea danu.​—⁠1 Sam. 2:21.

Hana bona Samuela bamona, hari Keristani taudia be edia mauri idia gaukaralaia edia Havaraia Tauna idia hesiai henia totona. Danu, Iesu ia gwauhamata Iehova tomadiho henia totona ita karaia boubou gaudia ibounai dainai, hahenamo bada do ita abia.​—Mar. 10:28-30.

Aposetolo edia negai, Keristani hahinena ladana Doreka be “kara namodia momo ia karaia,” bona momo be unai idia diba. To madi, “ia gorere bona ia mase” dainai, kongrigeisen taudia idia lalohisihisi bada. Hahediba taudia idia kamonai Petero be unuseni ia noho neganai, maoromaoro ia dekenai hereva idia siaia. Petero ia mai bona Doreka ia hamauria lou neganai, edia moale mani oi laloa​—⁠Petero be aposetolo ginigunana ta ia hamauria totona! (Kara 9:36-41) Dirava be Doreka ena kara namodia ia laloaboio lasi. (Heb. 6:10) Ia hahedinaraia kara namodia be Baibel ai idia torea, unai amo iena kara ita tohotohoa diba.

Aposetolo Paulo danu be haheitalai namona, ia ese ena nega ia gaukaralaia ma haida ia durua totona. Iena Keristani tadikaka Korinto dekenai ia tore henidia neganai, ia gwau: “Lau be mai moale ida umui totona gau ibounai do lau henia bona lau sibona do lau henia momokani.” (2 Kor. 12:15) Paulo ia laloparara ma haida totona iena nega ia gaukaralaia neganai, do ia moale sibona lasi, to Iehova ena lalonamo bona hanamoa do ia abia danu.​—⁠Kara 20:24, 35.

Oibe, Iehova ia moale bema iseda nega bona goada ita gaukaralaia Basileia ena gaukara bona ma haida ita durua totona. To Basileia harorolaia gaukarana ita durua daladia ma haida idia noho, a? Oibe! Iseda lalokau do ita hahedinaraia dalana ma ta be iseda kontribusen amo Dirava ita hanamoa. Ita henia kontribusen idia gaukaralaia tanobada ibounai gaukarana idia durua totona, misinari bona ful-taim hesiai taudia danu. Ma danu, buka, magasin, bona vidio hahanaia gaukarana, disasta gabudia dekenai heduru idia henia, bona Kingdom matamatadia idia haginia. Ita abia dae momokani “hariharibada karana [idia] hahedinaraia” taudia be hahenamo idia abia. Danu, Iehova dekenai iseda dava bada kohudia ita henia neganai, ia moale.​—Aon. 3:9; 22:9, NWT.