1, 2. (a) Dirava ena hesiai taudia be dahaka davana idia naria noho? (b) Do ita abia davana ita laloa noho totona, dahaka ita karaia be namo? (Laulau ginigunana herevalaia.)

APOSETOLO PAULO bamona, horoa Keristani taudia ese idia abia “davana be guba lao boiboina, Dirava ese . . . ia henia.” (Fili. 3:14) Guba ai, idia be Iesu Keriso ida iena Basileia lalonai do idia lohia bona taunimanima do idia durua goevadae taudia ai idia lao totona. (Apok. 20:6) Unai be helaro hereadaena! To, mamoe ma haida edia helaro be idau. Idia be tanobada paradaisona ai do idia noho hanaihanai, unai be hahenamo namona!​—⁠2 Pet. 3:13.

² Paulo ia ura horoa Keristani taudia ma haida ia durua, unai amo edia abidadama do ia goada noho bena edia davana do idia abia. Ia gwau: “Guba gaudia do umui laloa noho.” (Kol. 3:2) Oibe, idia ese edia guba helarona idia laloa noho be namo. (Kol. 1:4, 5) Momokani, Iehova amo ita abia hahenamo idauidau laloa karana ese ita ibounai ia durua do ita abia davana ita laloa noho  totona, herevana iseda helaro be guba eiava tanobada ai.​—1 Kor. 9:24.

3. Paulo be dahaka sisiba ia henia?

³ Paulo ese dika gaudia haida ia herevalaia, bona unai ese Keristani tauna ia koua diba bena davana do ia abia lasi. Hegeregere, Kolose kongrigeisen ia torea henia neganai, ia hamaorodia Keristani taudia haida be Dirava ena lalonamo abia totona, Mose ena Taravatu idia badinaia, to Keriso idia abidadama henia lasi. (Kol. 2:16-18) Paulo ese ia herevalaia gaudia ese ita idia koua diba bena davana do ita abia lasi. Hegeregere, matabodaga urana dadaraia dalana bona tadikaka taihu huanai o ruma bese lalonai idia vara hekwakwanai hamaoromaoroa daladia ia herevalaia. Ia henia sisiba amo namo ita abia diba. Paulo ese Kolose taudia dekenai ia torea revareva lalonai idia noho sisiba mani ita laloa.

4. Dahaka dainai matabodaga urana ese ta ia koua diba bena davana do ia abia lasi?

⁴ Paulo ese edia helaro namona ia herevalaia murinai, ia gwau: “Unai dainai emui tauanina ena kahadia idauidau umui hamasea, idia havaraia gaudia be inai, matabodaga karadia, kara mirodia, matabodaga urana, ura dikadia, bona mataganigani.” (Kol. 3:5) Matabodaga urana be mai ena goada bona ta ia doria diba kara kererena ia karaia totona, bena ena hetura karana Iehova ida bona vaira nega ena helaro do ia haboioa. Tadikaka ta be matabodaga karana lalonai ia vareai dainai, kongrigeisen amo idia atoa siri, to ia helalo-kerehai murinai ia gwau, matabodaga urana be ia goada momokani dainai, ia dadaraia be auka.

5. Edena dala ai sibona ita gimaia diba?

⁵ Gau badana be nega ibounai ita gima noho, dika ura kererena ese ita ia doria bena Dirava ena kara maoromaoro taravatudia ita makohia. Hegeregere, mero bona kekeni idia tura matamaia neganai, ta ta edia kopina dogoatao karana, kisi, bona sibona noho karana dekenai hetoa idia atoa be namo. (Aon. 22:3) Danu, bema Keristani tauna be moni gaukara totona gabu ma ta dekenai ia lao eiava Keristani tauna be hahine ta ida ia gaukara hebou, kerere ia vara diba. (Aon. 2:10-12, 16) Bema oi dekenai unai ia vara, namona be oi gwauraia hedinarai oi be Iehova ena Witnes tauna, mai hemataurai ida oi kara bona oi laloatao ta hauraia karana be mai ena dika. Ma danu, ita lalohisihisi bona sibona ita noho negadiai, ita naria namonamo be namo. Badina unai bamona negadiai, do ita ura dikadika ta ese ita ia ura henia. Oibe, do ita ura bada ta ese iseda lalona ia hanamoa dainai, taunimanima idauidau edia kara namo do ita abia dae haraga. Bema oi dekenai unai ia vara, Iehova bona ena taunimanima edia heduru oi tahua, unai amo emu davana oi abia diba.​—Salamo 34:18; Aonega Herevadia 13:20 duahia.

6. Muvi o miusiki ita abia hidi neganai, dahaka ita laloatao be namo?

⁶ Matabodaga urana hamasea totona, namona be moale karadia dikadia ita dadaraia danu. Hari muvi bona miusiki momo ai, taunimanima edia kara be guna Sodoma bona Gomora taudia edia kara bamona. (Iuda 7) Muvi bona miusiki karaia taudia ese edia gaukara amo idia hahedinaraia matabodaga karadia be dika lasi. Unai dainai ita gima be namo, bona tanobada taudia edia moale karadia ibounai ita abia dae haraga lasi. Namona be moale karadia ita abia hidi namonamo, unai amo iseda davana ita abia diba.​—Aon. 4:23.

7. Keristani kongrigeisen lalonai dahaka hekwakwanai ia vara diba?

⁷ Ita moale badina ita be Keristani kongrigeisen lalonai ita noho. Iseda heboudia ai, Dirava ena Hereva ita stadilaia bona ta ta dekenai lalokau bona hebogahisi ita hahedinaraia neganai, iseda davana ita laloa noho diba. To nega haida lalohadai kererena dainai, kongrigeisen taudia huanai hekwakwanai ia vara diba. Bema unai bamona hekwakwanai ita hamaoromaoroa lasi, badu ia vara diba.​—⁠1 Petero 3:8, 9 duahia.

8, 9. (a) Iseda davana ita abia totona, edena kara rua ita hahedinaraia be namo? (b) Bema Keristani tauna ta ese iseda lalona ia hahisia, dahaka ita karaia diba?

⁸ Namo lasi badu karana ese ita ia koua bena iseda davana do ita abia lasi. Paulo be Kolose taudia ia hamaoroa, ia gwau: “Umui be Dirava ena abia hidi taudia, helaga taudia bona Dirava ese umui ia lalokau henia dainai, inai bamona kara be dabua bamona do umui hahedokilaia, hebogahisi mai lalokauna, hariharibada, lalomanau, manau, bona boga-auka. Bema ta be badina ta dainai ma ta dekenai ia maumau, ta ta emui kara do umui haheaukalaia noho bona mai kudouna ibounai ida do umui gwauatao heheni. Iehova ese mai kudouna ibounai ida umui ia gwauatao hegeregerena, namona be umui danu be unai bamona do umui karaia. Bona unai gaudia sibona lasi, to lalokau be dabua bamona do umui hahedokilaia danu, badina ia be taunimanima ia hatamonaia gauna hereadaena.”​—⁠Kol. 3:12-14.

⁹ Bema lalokau bona hebogahisi ita hahedinaraia, ma ta ena dika ita gwauatao diba. Hegeregere, bema Keristani tauna ta ena hereva o kara ese iseda lalona ia hahisia, namona be sibona ita nanadaia, guna egu hereva o kara amo ta ena lalona lau hahisia, to ia ese egu dika ia gwauatao, a? Ia hahedinaraia lalokauna bona hebogahisi karana lau laloa bada, a? (Hadibaia Tauna 7:21, 22 duahia.) Ita moale badina Keriso ena hebogahisi karana ese tomadiho momokani taudia ia hatamonaia. (Kol. 3:15) Ita ibounai be Dirava tamona ita lalokau henia, sivarai tamona ita harorolaia, bona ita davaria hekwakwanai momo be hegeregere. Mai hebogahisi bona lalokau ida ita gwauatao heheni neganai, ita huanai lalotamona do ia noho bona iseda davana do ita laloa noho.

10, 11. (a) Dahaka dainai mama karana be dika? (b) Edena dala ai mama karana ita dadaraia diba?

¹⁰ Baibel lalonai idia noho sivaraidia ese idia hahedinaraia, mama karana ese ita ia koua diba bena iseda davana do ita abia lasi. Hegeregere, Kaino be Abela dekenai ia mama dainai, ia hamasea. Kora, Datana, bona Abirama be Mose idia mama henia dainai, ia idia dadaraia. Danu, Davida ia kwalimu dainai, King Saulo ia mama bona dala ia tahua ia hamasea totona. Unai dainai Baibel ia gwau: “Mama bona badu idia vara neganai, heiriheiri bona dika gaudia ibounai danu do idia vara.”​—Iam. 3:16.

¹¹ Bema ita hekwarahi lalokau bona hebogahisi ita hahedinaraia totona, do ita mama lasi. Baibel ia gwau: “Lalokau be ia boga-auka, bona ia hebogahisi. Lalokau be ia mama lasi.” (1 Kor. 13:4) Ita mama lasi totona, namona be Dirava ena lalohadai ita abia dae, bona iseda tadikaka taihu ita lalodia hegeregere ita be tauanina tamona. Bona ita hebogahisi henidia. Baibel ia gwau: “Bema tauanina ena kahana ta be hairai ia abia, ma kahana ibounai be ia ida idia moale.” (1 Kor. 12:16-18, 26) Unai dainai, haida ese hahenamo idia abia neganai, ita mama henidia lasi, to idia ida ita moale hebou. King Saulo ena natuna Ionatana mani oi laloa. Dirava ese Davida ia abia hidi King ai do ia lao neganai, Ionatana be ia mama lasi. To, Davida ia hagoadaia. (1 Sam. 23:16-18) Ionatana hegeregerena, hebogahisi bona lalokau do ita hahedinaraia, a?

12. Ruma bese taudia be davana idia abia totona, dahaka sisiba idia badinaia be namo?

¹² Bema ruma bese taudia ibounai be Baibel ena hakaua herevadia idia badinaia, ruma bese lalonai maino bona moale do ia noho, bona ibounai be davana idia abia diba. Paulo ese Kolose Keristani taudia dekenai dahaka sisiba ia henia? Ia gwau: “Umui hahine e, emui tatau henunai do umui noho, unai be maoro Lohiabada matanai. Umui tatau e, emui hahine do umui lalokau henia noho bona idia dekenai do umui badu dikadika lasi. Umui natudia e, gau ibounai dekenai emui tama sina do umui kamonai henia, badina Lohiabada ese unai ia moalelaia. Umui tamadia e, emui natudia do umui habadua lasi, dika idia lalohisihisi.” (Kol. 3:18-21) Momokani, bema ruma bese taudia ibounai ese Paulo ena sisiba idia badinaia, namo do idia davaria.

13. Edena dala ai Keristani taihu ese ena Witnes lasi adavana ena lalona ia veria diba?

¹³ Bema oi be taihu ta bona emu Witnes lasi adavana be oi ia kara namo henia lasi be edena bamona? Reana do oi badu bona ia ida do oi hepapahuahu, to unai ese iena kara do ia haidaua, a? Ena be emu adavana ese emu ura do ia badinaia, to ia ese hereva momokani do ia abia dae, a? Reana lasi. To bema emu adavana ena kwara dagina oi matauraia, emu ruma bese lalonai maino do ia noho, Iehova do oi hanamoa, bona emu adavana be tomadiho  momokani do ia abia dae; danu, umui ruaosi be davana umui abia diba.​—⁠1 Petero 3:1, 2 duahia.

14. Bema tadikaka ta ena Witnes lasi adavana be ia ia matauraia lasi, dahaka ia karaia be namo?

¹⁴ Bema oi be tadikaka ta bona emu Witnes lasi adavana be oi ia matauraia lasi be edena bamona? Bema ia oi hereva auka henia, badina oi ura hahedinaraia oi be ruma bese ena kwarana, ia be oi do ia matauraia, a? Reana lasi! Dirava ia ura Iesu hegeregerena, emu kwara dagina be mai lalokau ida oi gaukaralaia. (Efe. 5:23) Iesu be mai haheauka bona lalokau ida kongrigeisen ia naria. (Luka 9:46-48) Tau ese Iesu ena haheitalai ia tohotohoa neganai, iena adavana ena lalona ia veria diba tomadiho momokani ia abia dae totona.

15. Edena dala ai Keristani tauna ese ena adavana dekenai lalokau do ia hahedinaraia?

¹⁵ Baibel ese tatau ia hamaoroa: “Emui hahine do umui lalokau henia noho bona idia dekenai do umui badu dikadika lasi.” (Kol. 3:19) Ena adavana ia lalokau henia tauna be ena adavana ena lalohadai ia kamonai, bona ia hahedinaraia ena lalohadai ia laloa bada. (1 Pet. 3:7) Ena be ena adavana ese ia gwauraia herevana dekenai nega ibounai do ia lalotamona lasi, to herevahereva hebou karana amo abia hidi namona ia karaia diba. (Aon. 15:22) Ena adavana ia lalokau henia tauna be ena adavana do ia doria lasi ia ia matauraia totona, to do ia hekwarahi unai ia vara totona. Tau ese ena hahine bona natudia ia lalokau henia neganai, idia be mai moale ida Iehova do idia hesiai henia bona mauri hanaihanai ena davana do idia abia.

16, 17. Oi be matamata dainai, dahaka dainai emu tama sina oi badu henia lasi be namo?

¹⁶ Bema oi be matamata tauna bona oi mamia emu Keristani tama sina ese emu kara idia laloa kerere bona taravatu momo idia atoa be edena bamona? Reana oi badu dainai, oi abia dae lasi Iehova tomadiho henia karana be mauri dala namona. To bema badu dainai Iehova hesiai henia karana oi rakatania, gabeai do oi laloparara tanobada tauna ta lasi, to emu Keristani tama sina bona emu kongrigeisen sibona be oi idia lalokau henia bada.

¹⁷ Mani oi laloa, bema emu tama sina be oi idia matahakani henia lasi, edena bamona do oi diba idia be oi idia lalokau henia? (Heb. 12:8) To reana emu tama sina ese oi idia matahakani henia dalana ese emu lalona ia hahisia. Namo lasi unai oi laloa bada, to edia kara ena badina oi lalopararalaia toho. Unai dainai oi badu haraga lasi. Baibel ia gwau: “Aonega tauna ese hereva momo ia gwauraia noho lasi, bona ia badu haraga lasi tauna, be mai ena lalona kehoa.” (Aon. 17:27) Oibe, namona be tau badana bamona oi laloa bona sisiba oi abia dae, herevana unai sisiba be edena dala ai idia henia, badina idia be emu namo idia laloa. (Aon. 1:8) Emu tama sina be Iehova idia lalokau henia neganai, unai be hahenamo badana. Edia ura badana be oi ese mauri ena davana oi abia.

18. Dahaka dainai do oi abia davana oi laloa noho be namo?

¹⁸ Ita vairanai ia noho davana be hahenamo hereadaena, herevana ia be guba ai o tanobada paradaisona ai mauri hanaihanai do ita abia. Unai davana namona be do ita abia momokani. Ia be iseda Havaraia Tauna ese ia gwauhamatalaia gauna, ia gwau: “Tanobada ibounai, be Lohiabada ena diba maoro dekena amo do ia honu momokani.” (Isa. 11:9) Oibe, tanobada dekenai idia noho taudia ibounai be Dirava ese do ia hadibaia. Unai be davana hereadaena. Unai dainai Dirava ese ia gwauhamatalaia gauna do oi lalohadailaia noho, bona namo lasi gau ta ese oi ia koua bena davana oi abia lasi!