1, 2. Iehova dekenai iseda diba ia bada ia lao neganai, dahaka ita dibaia? Haheitalai gwauraia.

NATU maragina ta be harihari gauna ta ia abia. Ena tama sina ese ia do idia hamaoroa, “Oi gwau tanikiu.” Natu ia kamonai badina ena tama sina ese idia hamaoroa. Ia tubu daekau neganai, iena tama sina edia lalohadai bona ma haida dekenai hebogahisi karana do hahedinaraia ena namo ia laloa bada. Hari, tanikiu herevana be mai kudouna ibounai ida ia gwauraia. Dahaka dainai? Badina ma haida laloa bada karana be sibona ena kara ai ia halaoa vadaeni.

² Unai hegeregerena, hereva momokani ita dibaia neganai, ita diba Iehova ena taravatu badinaia karana be mai anina bada. To iseda diba Iehova ena kara dekenai ia bada ia lao neganai, Iena lalohadai​—ia moalelaia gaudia, ia ura henia lasi gaudia, bona gau ma haida ia laloa dalana​—ita dibaia. Bema iseda abia hidi bona iseda kara amo Iehova ena laloa dalana ita tohotohoa, ita hahedinaraia ita be iena lalohadai ita abia.

3. Dahaka dainai Iehova ena lalohadai ita abia be mai ena hekwarahi?

³ Iehova dibaia karana ita moalelaia, to nega haida ia auka iena laloa dalana hegeregerena ita laloa badina ita be goevadae lasi taudia. Hegeregere, ia auka goeva karana, kohu momo  tahua karana, rara abia lasi karana, bona gau ma haida dekenai Iehova ena lalohadai ita lalopararalaia. Dahaka ita karaia diba? Edena dala ai ita hekwarahi noho Dirava ena lalohadai ita abia totona? Bona edena dala ai unai ese hari bona vaira nega ai ita do ia durua iseda kara ita biagua totona?

4. Paulo ena hereva, iseda ‘lalona do ita hamatamataia,’ ena anina be dahaka?

⁴ Roma 12:2 duahia. Inai siri ai aposetolo Paulo ese Iehova ena lalohadai ita abia dalana ia herevalaia. Stadi gunana ese ia hahedinaraia ‘inai nega oromana ai idia noho taudia do ita tohotohoa lasi’ totona, namona be tanobada ena lalohadai bona ena kara ita dadaraia. To danu Paulo ia gwau, namona be iseda ‘lalona do ita hamatamataia.’ Unai ita karaia totona namona be Dirava ena hereva ita stadilaia, ena lalohadai ita lalopararalaia, ita laloa dobu, bona Dirava ena laloa dalana hegeregerena ita laloa.

5. Sibona eda stadi bona stadi atikol ita duahia karana edia idau oi herevalaia.

⁵ Stadi karana be gau ta ita duahia o henanadai edia haere makaia karana sibona lasi. To sibona eda stadi ita karaia neganai, stadi atikol ese Iehova ena kara, iena dala, bona iena lalohadai ia herevalaia dalana ita laloa. Ita ura diba dahaka dainai Dirava ese ita ia hagania gau ta ita karaia bona gau ta ita dadaraia. Danu iseda mauri bona lalohadai ai do ita haidaua gaudia ita laloa. Momokani, sibona eda stadi ai unai gaudia ibounai ita laloa dobu be hegeregere lasi. To, namona be sibona eda stadi ai nega ita atoa ita duahia gauna ita laloa dobu totona.​—Sal. 119:97; 1 Tim. 4:15.

6. Dirava ena Hereva ita laloa dobu neganai, dahaka do ia vara?

⁶ Hanaihanai Dirava ena Hereva ita laloa dobu neganai, ‘sibona dekenai do ita hamomokania’ Iehova ena laloa dalana be goevadae. Dirava ena lalohadai hegeregerena do ita laloa matamaia bona unai lalohadai do ita abia dae. Danu, iseda ‘lalona do ita hamatamataia,’ bona laloa dalana matamatana ita abia. Unai amo metairametaira Iehova ena lalohadai do ita abia diba.

7, 8. (a) Iehova ena lalohadai kohu dekenai be dahaka? (Laulau ginigunana herevalaia.) (b) Bema iena lalohadai ita abia, dahaka do ita laloa bada?

⁷ Namona be ita diba lalohadai sibona be hegeregere lasi, to kara amo unai lalohadai ita hahedinaraia. (Mar. 7:21-23; Iam. 2:17) Unai ita diba totona, mani inai haheitalai haida ita laloa. Haheitalai ginigunana be, Evanelia Bukadia ese Iehova ena lalohadai kohu dekenai idia hahedinaraia. Dirava ese tanobada ai ena Natuna do idia naria namonamo tama sina ia abia hidi​—idia be kohu momo tahua karana idia laloa bada lasi. (Lev. 12:8; Luka 2:24) Iesu ia vara neganai, Maria ese “animal idia ubua gabuna ai ia hahekurea, badina laolao taudia idia noho rumadia edia daiutu ibounai idia honu.” (Luka 2:7) Bema Iehova ia ura, dala ma haida amo idia dekenai noho gabuna namona ta ia henia diba ena Natuna ia vara totona. To Iehova ia ura Iesu be Dirava tomadiho henia karana idia laloa bada ruma besena lalonai do ia tubu daekau.

⁸ Iesu ena vara sivaraina ese ita ia hadibaia, Iehova ese kohu momo ia laloa bada lasi. Tama sina momo idia ura edia natudia be kohu namodia do idia tahua, ena be idia diba unai ese edia natudia edia hetura karana Iehova ida do ia hadikaia. To, Iehova ena lalohadai be idau, ia dekenai  iseda hetura karana ia ida be mai anina bada. Iehova ena lalohadai oi abia, a? Emu kara ese unai ia hahedinaraia, a?​—Heberu 13:5 duahia.

9, 10. Edena dala ai ita hahedinaraia Iehova ena lalohadai ma haida hahekwakwanaia lasi karana ita laloa bada?

⁹ Haheitalai iharuana be, Dirava ena lalohodai ta hahekwakwanaia karana dekenai. Iesu ia gwau: “bema lau ia abidadama henia ladana maragi tauna be ta ese ia hahekwakwanaia, do ia namo bema unai tauna ena aiona dekenai nadi badana ta idia kwatua bona davara dekenai idia negea.” (Mar. 9:42) Unai be hereva aukana! Iesu be ena Tamana ena kara ia hahedinaraia goevagoeva dainai, ita diba Iehova be do ia moale lasi bema ta be ena kara amo Iesu ena murinai ia raka tauna ta ia hahekwakwanaia.​—Ioa. 14:9.

¹⁰ Iehova bona Iesu edia lalohadai ita abia, a? Iseda kara amo unai ita hahedinaraia, a? Hegeregere, ita be dabua haida edia sitaelo ita ura henia, to reana unai ese kongrigeisen taudia edia hemami ia hadikaia eiava haida dekenai matabodaga urana ia havaraia diba. Bema iseda tadikaka bona taihu ita lalokau henia, sibona iseda ura laloa bada karana do ita dadaraia.​—1 Tim. 2:9, 10.

11, 12. Edena dala ai Iehova ena lalohadai kara dika inai henia karana bona sibona biagua karana ese ita do ia durua kara dika ita inai henia totona?

¹¹ Haheitalai ihatoina be inai: Iehova ese kara dika ia inai henia. (Isa. 61:8) Ia diba nega haida ia auka kara maorona ita karaia badina ita be goevadae lasi taudia. To, ita ia hagoadaia kara dika do ita inai henia. (Salamo 97:10 duahia.) Iehova ese kara dika ia inai henia ena badina ita laloa dobu neganai, unai ese ita do ia durua kara dika do ita inai henia totona.

¹² Iehova ena lalohadai kara dika inai henia karana dekenai diba ita abia neganai, unai ese ita do ia durua idia maoro lasi karadia ita dadaraia totona. Ena be unai bamona karadia be Dirava ena Hereva lalonai idia torea hedinarai lasi. Hegeregere, tano haida ai, tauanina idia hahedinaraia dabua idia hahedokilaia bona mai lebulebu ida idia mavaru karana be ia bada ia lao noho. Taunimanima haida idia laloa unai be kerere lasi badina idia be ta ida idia mahuta hebou lasi. * To Dirava, kara dika ibounai ia inai henia tauna, ese unai bamona lalohadai ia abia dae, a? Namona be sibona biagua karana ita hahedinaraia unai amo Iehova hegeregerena kara dika do ita inai henia.​—Roma 12:9.

13. Dahaka dainai Iehova ena lalohadai ita tahua guna be namo?

¹³ Sibona eda stadi ita karaia neganai, do ia vara hekwakwanai dekenai Iehova ena lalohadai ita tahua be namo. Unai amo bema hekwakwanai ta ia vara bona unai nega ai abia hidi ta oi ura karaia neganai, do oi daradara lasi abia hidi maorona oi karaia totona. (Aon. 22:3) Baibel ena haheitalai haida mani ita laloa.

14. Iosepa ese Potifara ena adavana ia haere henia karana amo dahaka ita dibaia?

¹⁴ Iosepa be Potifara ena adavana ese ena lalona ia ania neganai, kara haraga unai ia dadaraia. Unai ese ia hahedinaraia Iosepa be Iehova ena lalohadai, adavana badinaia karana, ia laloa bada. (Genese 39:8, 9 duahia.) Danu Iosepa ese  Potifara ena adavana ia haere henia, ia gwau: “Dirava ena vairana dekenai inai bamona do lau kara dika be edena bamona?” Unai ese ia hahedinaraia ia be Dirava ena lalohadai ia abia dae. Ita be edena bamona? Reana emu gaukara turana ta be oi ia ura henia dainai lalona veria herevadia ia gwauraia. Eiava matabodaga karana idia herevalaia meseij eiava laulau be emu fon dekenai idia siaia neganai, dahaka do oi karaia? * Do ia auka lasi unai bamona karadia oi dadaraia bema unai hekwakwanai idia do vara lasi neganai, Iehova ena lalohadai oi tahua guna unai amo do oi diba dahaka oi karaia be namo.

15. Edena dala ai unai Heberu memero toi bamona, Iehova ita badinaia noho diba?

¹⁵ Mani Heberu memero toi Sataraka, Misaka, bona Abetenigo ita laloa. King Nebukanesa ese idia ia oda henia ia karaia golo kaivakuku do idia tomadiho henia neganai, unai oda herevana idia dadaraia. King idia haere henia karana ese ia hahedinaraia, edia lalona idia hadaia Iehova idia badinaia totona. (Eso. 20:4, 5; Dan. 3:4-6, 12, 16-18) Bema emu bosi ese oi ia noia tomadiho koikoi ese idia abia dae moale karana ta totona moni oi henia, dahaka do oi karaia? Namo lasi ita naria ela bona hekwakwanai ia vara bena heduru ita tahua, to namona be hari unai ia do vara lasi neganai Iehova ena lalohadai ita tahua. Bena hekwakwanai idia vara neganai, do ita diba dahaka do ita karaia bona hereva maorona do ita gwauraia, unai Heberu memero toi idia karaia bamona.

16. Medikol heduru ita ura abia neganai, dahaka dainai Iehova ena lalohadai ita tahua guna karana ese ita ia durua diba?

¹⁶ Medikol dalana ai heduru ita ura abia neganai, Iehova ena lalohadai ita laloa guna karana ese ita do ia durua abia hidi maorona ita karaia totona. Ita diba rara bona ena kahana badadia foa abia karana ita dadaraia be namo. To, opereisen daladia ma haida ai ta be Baibel ena hakaua herevadia amo Iehova ena lalohadai do ia tahua guna, bena abia hidi do ia karaia. (Kara 15:28, 29) To ita ura lasi hospital ai eiava hisihisi ita abia neganai kara haraga  abia hidi ita karaia. Hari be nega namona tahua karana ita karaia, iseda medikol pepana, hegeregere Durable Power of Attorney for Health Care pepana ita hahonua, bona iseda doketa ita hereva henia. *

17-19. Dahaka dainai hari Iehova ena lalohadai oi tahua bona oi hekwarahi ena lalohadai oi abia be mai anina bada? Mani haheitalai ta oi gwauraia.

¹⁷ Dokonai, Petero ese Iesu ia hamaoroa, “Lohiabada e, oi sibona oi hebogahisi henia” neganai, mani Iesu ese Petero ia haere henia haraga karana ita laloa. Iesu be nega bada lalonai Dirava ena ura do ia karaia bona Baibel ese iena mauri bona mase tanobada dekenai ia perovetalaia gaudia ia laloa dobu. Unai ese Iesu ia durua Dirava ia badinaia noho bona ena mauri ia bouboulaia.​—⁠Mataio 16:21-23 duahia.

¹⁸ Hari, Dirava ia ura ita be iena turana ai ita lao bona iseda nega bona goada ita henia haroro gaukara ita karaia totona. (Mat. 6:33; 28:19, 20; Iam. 4:8) To Petero ese Iesu dekenai ia karaia bamona, taunimanima haida be lalomanoka herevadia do idia gwauraia, bona ita idia hakaua kerere diba. Hegeregere, bema emu bosi be gaukara ma ta ia ura henia bona ena pei be bada, to unai gaukara ese emu nega bada do haorea bona emu hesiai gaukara do oi karaia namonamo lasi, dahaka do oi karaia? Eiava bema emu tisa ese oi ia hadibaia, diba ma haida oi abia totona emu noho gabuna oi rakatania bona gabu daudau ai sikuli ma ta dekenai oi lao, dahaka do oi karaia? Unai nega ai, do oi guriguri, tahua gaukara do oi karaia, emu ruma bese bona elda taudia do oi hereva henia, a? Namona be hari Iehova ena lalohadai oi tahua bona oi hekwarahi ena lalohadai oi abia totona. Unai amo bema unai bamona gaudia idia vara, do ia auka lasi unai hahetoho oi hanaia totona badina emu lalona oi hadaia vadaeni Dirava ena hesiai gaukara do oi atoa guna.

¹⁹ Mani do idia vara haraga hekwakwanai haida oi laloa. Reana unai hekwakwanai ibounai totona ita hegaegae diba lasi. To bema sibona eda stadi ai Iehova ena lalohadai ita laloa dobu, hekwakwanai idia vara neganai ita stadilaia gauna do ita laloatao bona badinaia diba. Unai dainai namona be Iehova ena lalohadai gau idauidau dekenai ita laloa bada, bona ena lalohadai ita badinaia karana ese ita do ia durua hari bona vaira negai abia hidi maorodia ita karaia totona.

20, 21. (a) Edena dala ai tanobada matamatana ai iseda ura kwalimu do ita gaukaralaia? (b) Edena dala ai hari iseda mauri ita moalelaia diba?

²⁰ Ita ura dikadika tanobada matamata ita itaia. Ita ibounai ita ura tanobada paradaiso ai ita noho hanaihanai. Dirava ena Basileia henunai, hari taunimanima ese idia davaria hisihisi bona hekwakwanai be do idia davaria lasi. Bona unai nega ai taunimanima be edia ura kwalimu do idia gaukaralaia. Ta ta be sibona edia ura gaudia hegeregerena abia hidi do idia karaia.

²¹ To unai ura kwalimu be mai ena hetoana. Manau taudia be Iehova ena taravatu hegeregerena abia hidi do idia karaia. Unai ese moale bada bona maino do ia havaraia. (Sal. 37:11) To unai nega ita do naria noho lalonai, namona be Iehova ena lalohadai ita abia bona badinaia unai amo hari iseda mauri ita moalelaia diba.