1-3. (a) Baibel ena hereva momokani be edena bamona ita laloa? Haheitalai gwauraia. (Laulau ginigunana herevalaia.) (b) Edena henanadai be inai stadi ai do ita herevalaia?

HARI inai negai, taunimanima momo be sitoa dekenai gau ta idia hoia bona idia abia giroa lou diba. Tahua gaukara haida ese idia hahedinaraia, tano ma haida ai sitoa amo idia hoia gaudia haida be idia abia giroa lou sitoa dekenai. Danu, intanet amo idia hoia gaudia momo be idia hoia gabudia dekenai idia siaia giroa lou. Reana idia hoia gauna idia ura henia lasi o idia hoia kohu ena kahana ta ia dika. Unai dainai, idia hoia kohu idia abia giroa lou eiava edia moni idia abia lou.

² Ena be kohu dekenai unai bamona ita karaia diba, to ita ura lasi Baibel ena hereva momokani amo ita abia “diba maoromaoro” ita “hoihoilaia.” (Aonega Herevadia 23:23 duahia *; 1 Tim. 2:4) Stadi ginigunana ai ita herevalaia bamona, hereva momokani dibaia totona nega bada ita atoa be namo. Danu, hereva momokani ita dibaia totona ita ese pei bada moni gaukara ita rakatania, ma haida tura henia karana, iseda lalohadai bona kara dekenai senisi ita karaia, eiava Baibel ena taravatu idia utua kastom karadia ita dadaraia.  To, ita diba momokani hereva momokani dibaia karana amo ita abia hahenamo ese ita halusia gaudia edia namo ia hereaia.

³ Baibel ena hereva momokani ita herevalaia neganai, iseda hemami be Iesu ese ia herevalaia hoihoi tauna ta ena hemami bamona. Iesu ese Dirava ena Basileia ena hereva momokani ena namo be idia davaria taudia dekenai ia hahedinaraia totona, hoihoi tauna ese pel nadi namodia ia tahua bona pel ta ia davaria ena sivarai ia gwauraia. Unai pel ena davana be bada herea dainai karaharaga ena “gau ibounai ia hoihoilaia” bona unai pel nadi ia hoia. (Mat. 13:45, 46) Unai hegeregerena, hereva momokani​—Dirava ena Basileia ena hereva momokani bona Baibel amo ita dibaia hereva momokani ma haida unai​—be mai anina bada dainai unai ita dibaia totona, mai ura bada ida karaharaga gau haida ita dadaraia. Hereva momokani ita laloa bada neganai, do ita “hoihoilaia lasi” o rakatania lasi. To, Dirava ena taunimanima haida be hereva momokani ena namo idia laloa bada lasi dainai idia rakatania. Namo lasi unai ia vara ita dekenai! Ita hahedinaraia hereva momokani ita laloa bada bona ita ura lasi ita hoihoilaia totona, namona be Baibel ena hahegani herevana ita badinaia, ia gwau: “Hereva momokani ai oi raka noho.” (3 Ioane 2-4 duahia.) Hereva momokani ena dala ai ita raka ena anina be iseda mauri lalonai ita dibaia gaudia ita laloa bada bona ita badinaia. Mani inai henanadai toi ita laloa: Dahaka dainai bona edena dala ai haida ese hereva momokani idia “hoihoilaia” diba? Dahaka ita karaia diba hereva momokani ita rakatania lasi totona? Dahaka ese ita ia durua diba ‘hereva momokani ai ita raka noho’ totona?

4. Aposetolo edia negai dahaka dainai haida be hereva momokani idia rakatania?

⁴ Aposetolo edia negai, matamanai haida be Iesu ena hadibaia herevadia idia abia dae to gabeai hereva momokani idia rakatania. Hegeregere, Iesu be hoa dalana ai hutuma ia ubua murinai, idia be Galilea ena Davara idia hanaia bona Iesu ena murinai idia lao. Unuseniai, momo be Iesu ia gwauraia herevana dekenai idia hoa, Iesu ia gwau: “Umui lau hamaoroa momokani, bema taunimanima ena Natuna ena tauanina umui ania lasi bona ena rara umui inua lasi, umui be mauri do umui abia lasi.” Iesu idia nanadaia lasi iena hereva ena anina totona, to Iesu ena hereva ese idia ia hahekwakwanaia dainai idia gwau: “Inai be hereva metauna, daika ese do ia abia dae diba?” Unai dainai, “ena hahediba taudia momo be idia rakatania gaudia dekenai idia giroa lou, bona ia ida idia raka hebou noho lasi.”​—Ioa. 6:53-66.

5, 6. (a) Hari iseda negai, dahaka dainai haida be hereva momokani idia rakatania? (b) Edena dala ai ta be metairametaira hereva momokani ia rakatania diba?

⁵ Hari inai negai haida be hereva momokani idia rakatania. Haida be iseda laloparara Baibel ena hereva ta dekenai gau haida idia haidaua o momo ese idia dibaia tadikaka ta ena hereva eiava ia karaia karana ese idia ia hahekwakwanaia. Ma haida be Baibel amo sisiba idia abia dainai idia lalohisihisi, eiava taihu eiava tadikaka ta ena kara dainai hereva momokani idia rakatania. Bona ma haida be aposteit taudia edia hahediba hereva koikoidia bona ita idia gwauraia dika taudia edia hereva idia abia dae. Unai dainai, haida be mai lalona ibounai ida Iehova bona kongrigeisen amo idia “raka siri.” (Heb. 3:12-14) Bema Iesu idia abidadama henia bona iena hereva idia badinaia Petero ia karaia bamona, unai bamona do ia vara lasi! Iesu be iena aposetolo taudia ia nanadaia bema idia ura ia idia rakatania neganai, Petero ia gwau: “Lohiabada e, daika dekenai do ai lao? Mauri hanaihanai herevadia be oi dekenai idia noho.”​—Ioa. 6:67-69.

 ⁶ Ma haida be idia diba lasi, to metairametaira hereva momokani idia rakatania. Ta be metairametaira hereva momokani ia rakatania neganai, ia be hegeregere bouti ta be sinavai ena tano kahana amo ia hure oho. Baibel ese ita ia hadibaia hereva momokani amo ita “hure oho” lasi be namo. (Heb. 2:1) Metairametaira hereva momokani ia rakatania tauna be mai ena ura ida unai ia karaia lasi. To, unai bamona ia karaia tauna ena hetura karana Iehova ida ia hadikaia bona gabeai unai hetura karana ia haboioa diba. Dahaka ita karaia diba unai ia vara lasi totona?

7. Dahaka ese ita do ia durua hereva momokani ita rakatania lasi totona?

⁷ Hereva momokani ena dala ai ita raka noho totona, namona be Iehova ena hereva ibounai ita abia dae bona badinaia. Namona be iseda mauri lalonai hereva momokani ita laloa bada bona Baibel ena hakaua herevadia ita badinaia. King Davida be Iehova ia guriguri henia ia gwau: “Lau be oiemu momokani lalonai do lau raka.” (Sal. 86:11) Davida be ena lalona ia hadaia unai bamona do ia karaia totona. Namona be ita danu iseda lalona ita hadaia Dirava ena hereva momokani ena dala dekenai ita raka noho totona. Bema unai bamona ita karaia lasi, reana hereva momokani dainai ita rakatania gaudia do ita laloa lou. To, namona be hereva momokani ena kahana ibounai ita laloa bada. Namo lasi ita laloa hereva momokani haida sibona ita laloa bada bona ma haida be lasi. To namona be “hereva momokani ibounai” ita laloa bada. (Ioa. 16:13) Mani hereva momokani dainai ita dadaraia gaudia faiv do ita herevalaia. Unai ese ita do ia hagoadaia ita dadaraia gaudia ita laloa lou lasi totona.​—Mat. 6:19.

8. Keristani tauna ta ese ena nega ia gaukaralaia namonamo lasi neganai, dahaka ia vara diba? Haheitalai gwauraia.

⁸ Nega. Hereva momokani amo ita raka siri lasi totona, namona be iseda nega ita gaukaralaia namonamo. Bema ita naria namonamo lasi, reana nega bada be moale karadia, spot gadara, intanet ita gaukaralaia, o televisen ita raraia karana dekenai do ita haorea. Ena be unai gaudia ita karaia be kerere lasi, to sibona ena stadi bona Keristani maduna ma haida karaia totona ita gaukaralaia ena nega ia abia diba. Mani Keristani taihu ta ladana Emma * dekenai ia vara gauna ita laloa. Ia maragi negana amo Emma be hosi ia ura henia bada. Dala ia kehoa neganai, hosi dekenai ia guia bona ia loaloa. Ia mamia nega bada be hosi guia bona loaloa karana dekenai ia haorea. Ena mauri ai senisi ia karaia bona ena nega ia gaukaralaia namonamo. Cory Wells, guna hosi ai ia guia hahinena ta ena ekspiriens ese Emma ia hagoadaia bada. * Hari Emma be Keristani maduna idauidau bona iena Keristani ruma bese bona turadia totona nega bada ia gaukaralaia. Ia mamia ia be Dirava kahirakahira ia lao bona ia moale badina ia diba iena nega ia gaukaralaia namonamo.

9. Edena dala ai haida be kohu momo idia tahua dainai Dirava hesiai henia karana idia laloa bada lasi?

⁹ Kohu. Bema ita ura hereva momokani ena dala dekenai ita raka noho, namo lasi kohu be mai anina bada gauna ta ai ita halaoa. Hereva momokani ita dibaia neganai, Iehova hesiai henia karana be gau ginigunana ai ita halaoa bona gau ma haida be gabeai. Hereva momokani ena dala dekenai ita raka noho totona gau haida ita dadaraia. Lagani haida murinai, reana do ita itaia haida be mobael fon, kompiuta bona televisen matamatadia idia hoia eiava moni amo idia hoia diba gaudia ma haida idia moalelaia. Reana do ita laloa unai gaudia ita reaia noho. Bena do ita laloa ita dekenai idia noho vadaeni gaudia be hegeregere lasi, bona Dirava hesiai henia karana do ita laloa  bada lasi to kohu momo haboua karana do ita laloa bada. Dema dekenai unai ia vara. Ia be “inai nega oromana ia ura henia bada dainai” aposetolo Paulo ida ia karaia hesiai gaukarana ia rakatania. (2 Tim. 4:10) Dahaka dainai Dema ese Paulo ia rakatania? Baibel ese ia hahedinaraia lasi, Dema be kohu momo ia ura henia bona Dirava hesiai henia karana ia laloa bada lasi eiava ia ura lasi Paulo ida hesiai gaukara ia karaia totona gau haida ia dadaraia. Bema ita naria namonamo lasi kohu momo ura henia karana ena ura do ia bada bona hereva momokani do ita laloa bada lasi.

10. Hereva momokani ena dala ai ita raka noho totona, dahaka kara ita dadaraia be namo?

¹⁰ Haida tura henia karana. Hereva momokani ena dala ai ita raka noho totona, namona be ita naria namonamo. Hereva momokani ena dala dekenai ita raka matamaia neganai, iseda hetura karana Witnes lasi taudia bona ruma bese taudia ida be ia idau. Haida be ita idia koua lasi to ma haida be ita idia dagedage henia. (1 Pet. 4:4) Ena be ita hekwarahi mai manau ida ruma bese taudia ita kara henia, to namo lasi idia ita hamoalea totona Dirava ena taravatu ia utua karana ta ita karaia. Iseda ruma bese taudia ita kara namo henia noho. To, Korinto Ginigunana 15:33 ena sisiba herevana hegeregerena, namona be Iehova idia lalokau henia taudia sibona ita tura henia.

11. Edena dala ai Dirava ese ia moalelaia lasi lalohadai bona kara ita dadaraia diba?

¹¹ Dirava ese ia moalelaia lasi lalohadai bona kara. Hereva momokani ena dala ai idia raka taudia ibounai idia helaga be namo. (Isa. 35:8; 1 Petero 1:14-16 duahia.) Hereva momokani ita dibaia neganai, ita ibounai be Baibel ena kara maoromaoro taravatudia hegeregerena iseda mauri lalonai senisi haida ita karaia. Haida be senisi badadia idia karaia. Namona be nega ibounai ita helaga bona inai tanobada ena matabodaga karadia ita dadaraia. Edena dala ai matabodaga karadia ita dadaraia diba? Ita helaga totona Iehova ese ena natuna, Iesu Keriso ena dava bada rarana amo ita ia hoia karana ita laloa bada be namo. (1 Pet. 1:18, 19) Iehova vairanai ita goeva noho totona, Iesu ena mauri davalaia boubouna ena namo be hanaihanai ita laloa bada be namo.

12, 13. (a) Dahaka dainai Iehova ese kastom bona holidei haida ia ura henia lasi ena badina ita lalopararalaia be namo? (b) Hari dahaka do ita herevalaia?

¹² Dirava ena taravatu ia utua kastom karadia. Nega haida ruma bese taudia, gaukara turadia, bona sikuli turadia ese ita do idia doria holidei o birthday ena moale karadia lalonai ita vareai totona. Edena dala ai Iehova ia hamoalea lasi kastom karadia bona holidei ena moale karadia idauidau ita dadaraia diba? Namona be Iehova ese unai moale karadia ia ura henia lasi ena badina ita lalopararalaia. Iseda pablikeisen lalonai tahua karana ita karaia unai amo ita laloparara edena dala ai unai holidei idauidau idia hamatamaia. Baibel ese unai kastom bona holidei idauidau ita moalelaia lasi ena badina ia herevalaia bona bema ita laloa dobu, do ita abia dae momokani ita be “Lohiabada ese ia abia dae” dalana ita badinaia noho. (Efe. 5:10) Iehova bona iena Hereva ita abidadama henia karana ese ita do ia durua ‘taunimanima do ita gari henia’ lasi totona.​—Aon. 29:25.

¹³ Ita ura hereva momokani ena dala dekenai ita raka hanaihanai. Edena dala ai iseda lalona ita hadaia unai ita karaia totona? Dala toi do ita herevalaia.

14. (a) Edena dala ai Baibel stadilaia hanaihanai karana ese ita do ia durua hereva momokani ita rakatania lasi totona? (b) Dahaka dainai aonega, matahakani, bona laloparara ita abia be gau badana?

¹⁴ Dala ginigunana be, Dirava ena Hereva ai idia noho hereva momokani oi stadilaia bona  laloa dobu. Oibe, nega oi atoa Dirava ena Hereva ai idia noho hereva momokani oi dibaia totona. Unai ese oi do ia durua hereva momokani oi laloa bada bona emu lalona oi hadaia oi rakatania lasi totona. Danu hereva momokani oi dibaia sibona lasi, to Aonega Herevadia 23:23 (NWT) ena hereva hegeregerena, “aonega bona matahakani bona laloparara” do oi abia. Diba sibona be hegeregere lasi. Hereva momokani amo ita dibaia gaudia be iseda mauri lalonai ita badinaia. Unai amo Iehova amo ita dibaia bona ita dibaia vadaeni gaudia ita lalopararalaia diba. Aonega ese ita do ia durua ita dibaia gaudia amo kara ta ita karaia. Nega haida Dirava ena hereva momokani ese ita dekenai matahakani ia henia, unai amo iseda mauri lalonai senisi ita karaia. Unai hakaua herevadia ita badinaia be gau badana badina edia namo ese siliva ia hereaia.​—Aon. 8:10.

15. Edena dala ai hereva momokani ena beleta ese ita ia gimaia?

¹⁵ Dala iharuana be, emu lalona oi hadaia dina ta ta ai hereva momokani oi badinaia. Hereva momokani ena beleta be emu gabana dekenai oi kwatua. (Efe. 6:14) Baibel negadiai, tuari tauna ena beleta be ena gabana bona ena tauanina ia gimaia. Unai beleta ese ena tauanina ia gimaia totona, ia kwatua auka be namo. Bema ia kwatua namonamo lasi tuari tauna do ia durua lasi. Edena dala ai iseda hereva momokani ena beleta ese ita ia gimaia? Bema iseda gabana ai beleta ita kwatua namonamo, hereva momokani ese ita do ia gimaia lalohadai kereredia do ita dadaraia bona abia hidi maorodia do ita karaia. Bema hahetoho ita davaria, Baibel ena hereva momokani ese ita do ia durua kara maorodia ita karaia totona. Tuari tauna be ena beleta ia kwatua namonamo bona tuari lalonai ia hegaegae hegeregerena, iseda lalona ita hadaia hereva momokani ena beleta ita kwatua totona. Iseda beleta ita kwatua auka ena anina be, iseda mauri lalonai Baibel ena hereva momokani ita badinaia. Tuari tauna ena beleta ena gaukara ma ta be, ena tuari kaia do ia dogoatao danu. Hari ita ese dala ihatoina do ita herevalaia, unai ese ita do ia durua hereva momokani ena dala dekenai ita raka noho totona.

16. Edena dala ai ma haida dekenai hereva momokani hadibaia karana ese ita ia durua dala maorona ai ita raka noho totona?

¹⁶ Dala ihatoina be, Baibel ena hereva momokani be ma haida dekenai ita hadibaia karana ita habadaia. Unai dala amo lauma helaga ena tuari kaia, “Dirava ena hereva” unai, ita dogoatao auka. (Efe. 6:17) Namona be ita hekwarahi iseda hadibaia daladia ita hanamoa, unai amo ‘hereva momokani ita hadibaia maoromaoro’ diba. (2 Tim. 2:15) Bema Baibel ita gaukaralaia ma haida dekenai hereva momokani ita hadibaia bona idia ita durua hahediba koikoidia idia dadaraia, iseda lalokau Dirava ena hereva momokani dekenai do ia bada. Unai dala amo iseda lalona ita hadaia hereva momokani ena dala dekenai ita raka noho totona.

17. Dahaka dainai oi dekenai hereva momokani be mai anina bada?

¹⁷ Hereva momokani be harihari gauna namona ta Iehova amo. Unai harihari gauna dainai iseda guba Tamana ita tura henia diba. Ita dekenai ia hadibaia vadaeni gaudia be matamana sibona! Dirava be ita dekenai ia gwauhamata hereva momokani be ita dekenai do ia hadibaia hanaihanai. Unai dainai, hereva momokani be dava bada pel nadi bamona oi laloa bada be namo. Namona be “hereva momokani oi hoia bona oi hoihoilaia lasi.” Davida ia hereva bamona, Iehova dekenai do oi gwauhamata do oi gwau: “Lau be oiemu momokani lalonai do lau raka.”​—Sal. 86:11.