1, 2. (a) Iseda mauri lalonai dahaka gaudia ita laloa bada be namo? (b) Emu mauri lalonai edena hereva momokani be mai anina bada, bona dahaka dainai? (Laulau ginigunana herevalaia.)

EMU mauri lalonai dahaka be mai anina bada? Do oi ura anina bada lasi gauna ta ida oi haidaua, a? Ita be Iehova ita gwauhamata henia bona Ia ita tomadiho henia taudia dainai, unai henanadai haerelaia be auka lasi. Mai anina bada gauna be iseda hetura karana Iehova ida, bona ita ura lasi anina lasi gauna ta ida ita haidaua. Baibel ena hereva momokani ita laloa bada dainai, unai ese dala ia kehoa Iehova ena turana ai ita lao.​—Kol. 1:9, 10.

² Iseda Hadibaia Tauna Badana, Iehova be ena Hereva Baibel amo ita ia hadibaia gaudia ibounai mani oi laloa! Ia be ita dekenai iena ladana ena namo bona ena kara badadia ia hahedinaraia. Ita ia lalokau henia bada dainai ita totona iena Natuna tamona, Iesu ia siaia. Iehova ese Mesia Basileiana be ita dekenai ia hahedinaraia. Ia ese ita totona vaira negai ena helaro ia henia, unai be horoa orena taudia be guba dekenai do idia lao bona “mamoe ma haida” be tanobada Paradaiso ai do idia noho. (Ioa. 10:16) Iehova ese ita dekenai mauri dala maorona ia hadibaia. Unai hereva momokani ibounai ita laloa bada  be namo, badina unai ese ita ia durua iseda Havaraia Tauna kahirakahira ita lao. Iseda mauri lalonai unai be mai anina bada.

3. Hereva momokani dibaia totona Iehova be ita amo moni ia noia, a?

³ Iehova be hariharibada Diravana. Hereva momokani idia tahua taudia dekenai hariharibada karana ia hahedinaraia. Iehova be davana lasi harihari gauna bamona iena lalokau natuna ia henia ita ia hamauria totona. Hereva momokani dibaia totona Dirava be ita amo moni ia noia lasi. Aposetolo Petero be gorere hanamoa siahuna ia abia dainai, tau ta ladana Simona be ia dekenai moni ia henia. Petero be unai tauna ena lalohadai kererena ia hamaoromaoroa bona ia gwau: “Namona be emu siliva moni be oi ida ia ore, badina oi laloa moni amo Dirava ena davana lasi harihari gauna do oi abia.” (Kara 8:18-20) “Hereva momokani oi hoia” ena anina be dahaka?

4. Inai atikol ai hereva momokani dibaia totona dahaka do ita karaia?

⁴ Aonega Herevadia 23:23 duahia. * Dirava ena Hereva ai idia noho hereva momokani ita davaria totona ita hekwarahi be namo. Hereva momokani ita hoia totona gau haida ita dadaraia be namo. “Hereva momokani” ita hoia o ita dibaia neganai, ita ura lasi ita rakatania o ita “hoihoilaia” lasi. Hereva momokani do ita hoia bona dibaia daladia do ita herevalaia. Unai dainai, hereva momokani ita laloa bada bona iseda lalona ita hadaia ita rakatania o “hoihoilaia” lasi totona. Hereva momokani dibaia karana ese gau ma haida ia hereaia.

5, 6. (a) Edena dala ai moni ita gaukaralaia lasi hereva momokani ita hoia totona? Haheitalai gwauraia. (b) Edena dala ai hereva momokani ese ita ia durua?

⁵ Bema gau ta be davana lasi, to ita abia totona do ita hekwarahi. Aonega Herevadia 23:23 ai ia noho Heberu herevana “hoia” ena anina ma ta be “ta amo oi abia.” Unai hereva ruaosi ese idia hahedinaraia gau ta oi abia totona oi hekwarahi o gau ta ida oi haidaua. Hereva momokani ita hoia dalana be inai dala amo ita haheitalaia diba. Hegeregere do ita gwau maketi ai “Davana Lasi Biku” idia atoa bona idia hahedinaraia. Unai davana lasi biku be hoa dalanai emu teibolo ai do idia hedinarai, a? Lasi. Do ita hekwarahi bona do ita abidia. Unai biku be davana lasi, ani? Oibe, to kara haida do ita karaia, nega do ita atoa bona do ita hekwarahi maketi dekenai do ita lao. Unai hegeregerena, moni do ita gaukaralaia lasi. To, do ita hekwarahi hereva momokani ita dibaia totona.

⁶ Isaia 55:1-3 duahia. Hereva momokani ita hoia ena anina ma haida be Iehova ena hereva Isaia amo ia hedinarai. Inai siri lalonai, Iehova ese ena hereva be ranu, milika, bona wain ida ia hahegeregerea. Ranu paraka ese ia ranu mase tauna ena hemami ia hanamoa hegeregerena, Dirava ena hereva momokani ese ita ia hagoadaia diba. Bona danu, milika ese iseda tauanina ia hagoadaia bona natuna maragidia edia tubu dalana ia durua hegeregerena, Iehova ena hereva ese ita ia durua iseda hetura karana Ia ida ita hagoadaia totona. Iehova ena hereva be wain hegeregerena danu. Edena dala ai? Baibel ese ia hahedinaraia wain ese ta ena lalona ia hamoalea diba. (Sal. 104:15) Iehova be iena taunimanima ia hamaoroa wain idia hoia hegeregerena, bema Iena hereva be iseda mauri lalonai ita badinaia unai ese ita do ia hamoalea. (Sal. 19:8) Unai haheitalai namodia toi ese Dirava ena hereva momokani ita dibaia bona iseda mauri lalonai ita badinaia ena namo ia haheitalaia namo herea! Unai hegeregerena, hereva momokani ita dibaia totona ita hekwarahi be namo. Hari hereva momokani ita dibaia totona dala faiv do ita herevalaia.

7, 8. (a) Dahaka dainai hereva momokani ita dibaia totona nega bada ita atoa be namo? (b) Taihu ta be dahaka gaudia ia dadaraia, bona dahaka ia vara?

⁷ Nega. Hereva momokani ita hoia totona nega ita atoa be namo. Basileia ena sivarai namona ita kamonai totona, Baibel bona Baibel idia herevalaia bukadia ita duahia, sibona eda stadi ita karaia, bona kongrigeisen heboudia dekenai ita lao bona ita hegaegae totona, nega ita atoa be namo. Namona be ‘nega ita gaukaralaia namonamo,’ bona anina lasi gaudia dekenai nega bada ita haorea kava lasi. (Efeso 5:15, 16 duahia.) Baibel ena hereva momokani badadia oi dibaia totona, edena bamona emu nega oi gaukaralaia? Iseda mauri daladia be idauidau. Iehova ena aonega, iena dala bona ena gaukara dibaia karana be mai hetoana lasi. (Roma 11:33) Watch Tower ginigunana ese hereva momokani be “flaoa maragina ta” ida ia hahegeregerea bona inai bamona ia herevalaia: “Hereva momokani ena kahana ta sibona dibaia be hegeregere lasi. Bema hereva momokani tamona be hegeregere, Dirava ese ita dekenai hereva momokani ibounai ia henia be anina lasi. Unai dainai, hereva momokani ma haida ita dibaia be namo.” Reana ita be sibona dekenai do ita nanadaia, ‘Iseda diba hereva momokani dekenai be edena bamona?’ Bema ita mauri hanaihanai, Iehova totona diba ma haida do ita abia noho. Hari inai negai, hereva momokani hoia totona mai anina bada gauna be iseda mauri dalana hegeregerena mai aonega ida iseda nega ita gaukaralaia namonamo. Unai bamona ia karaia tauna ta ena haheitalai mani ita laloa.

⁸ Japan dekenai ia noho hahine ta ladana, Mariko * be sikuli totona U.S.A. New York City dekenai ia lao. Unai negai, Japan ai lagani 1950 lalonai ia be dubu oreana ta ia bamoa. Painia taihu ta ese Mariko be ruma-ta-ruma-ta haroro gaukara ai ia davaria. Baibel ena hereva momokani ia dibaia matamaia neganai, ia moale bada bona painia taihu ia noia wiki lalonai nega rua Baibel ia stadilaia. Herevana ia be sikuli ia lao bona pat-taim moni gaukarana ia karaia, Mariko be kongrigeisen hebou iboudiai dekenai ia lao. Moale karadia haida ia dadaraia, unai amo iena nega ia gaukaralaia hereva momokani ia dibaia totona. Gau haida ia dadaraia dainai, hereva momokani dekenai ia goada ia lao. Lagani tamona lalonai, bapatiso ia abia. Lagani 2006 ai hua siks murinai, painia gaukara ia karaia matamaia, bona ia do painia noho.

9, 10. (a) Edena dala ai hereva momokani ita dibaia karana ese ita ia durua kohu dekenai lalohadai maorona ita abia totona? (b) Kekeni ta ese dahaka gau haida ia dadaraia, bona hari ena hemami be edena bamona?

⁹ Kohu. Hereva momokani ita dibaia totona, pei bada moni gaukarana do ita dadaraia. Haoda taudia Petero bona Andrea be Iesu ese ia boiria “taunimanima haoda henia taudia” ai idia lao neganai, “edia reke idia rakatania.” (Mat. 4:18-20) Hereva momokani idia dibaia taudia be edia moni gaukara do idia rakatania lasi. Idia be Baibel ese ia herevalaia maduna idia laloa bada be namo. (1 Tim. 5:8) To hereva momokani idia dibaia taudia ese kohu dekenai lalohadai maorona idia abia bona mai anina bada gaudia idia atoa guna. Iesu ia gwau: “Tanobada dekenai umui sibona totona dava bada kohu do umui haboua lasi, . . .  To guba dekenai umui sibona totona dava bada kohu do umui haboua.” (Mat. 6:19, 20) Mani kekeni ta ena haheitalai ita laloa.

¹⁰ Maria be ia maragi neganai golf gadara ia moalelaia. Haisikuli ia lao neganai golf gadara ia diba momo dainai iunivesiti ese ena sikuli ena davana idia karaia. Iena mauri lalonai golf gadara be gau badana bona ena tahua gauna be golf ia diba momo kekeni ai ia lao. Maria be Baibel ia stadilaia matamaia, bona ia dibaia hereva momokani ia moalelaia. Bona unai ese ia durua ena mauri lalonai gau haida ia haidaua. Ia gwau: “Baibel ena taravatu hegeregerena egu  kara bona lalohadai lau haidaua neganai, lau moale bada.” Maria ia laloparara iena hetura karana Iehova ida bona spot gadara ia karaia hebou diba lasi. (Mat. 6:24) Unai dainai, ena mauri lalonai ia atoa guna gauna, golf gadara ia rakatania bona unai amo do ia abia moni bona kohu ia laloa lasi. Hereva momokani ia dibaia dainai, hari painia gaukarana ia karaia bona mai moale ida ia gwau, “Inai be mauri dala namo hereana.”

11. Hereva momokani ita dibaia neganai, taunimanima ese ita be edena bamona do idia laloa?

¹¹ Ma haida ida hetura karana. Baibel amo ita dibaia gaudia be iseda mauri lalonai ita badinaia dainai, iseda turadia bona varavara bamoa karana ita hamaragia. Dahaka dainai? Iesu be iena hahediba taudia totona ia guriguri, ia gwau: “Hereva momokani amo idia oi hahelagaia, oiemu hereva be momokani.” (Ioa. 17:17) “Idia oi hahelagaia” ena anina ma ta be “ma haida amo idia idau.” Baibel ena hereva momokani be iseda mauri lalonai ita badinaia neganai, tanobada amo ita idau badina ita be Dirava ena taravatu ita badinaia. Unai dainai, taunimanima ese ita do idia ura henia lasi badina iseda mauri dalana ia idau. Ita be Baibel ena hereva momokani ena taravatu hegeregerena ita noho. Ena be ita ura lasi ma haida amo ita parara, to iseda turana haida bona ruma bese taudia be ita do idia ura henia lasi o iseda abidadama dainai ita do idia inai henia. Ita diba unai be ita dekenai do ia vara. Iesu ia gwau: “Momokani, tau ta ena inai taudia be ena ruma bese taudia.” (Mat. 10:36) To Iesu ese ia hahedinaraia ena be hereva momokani dainai gau momo do ita dadaraia, hahenamo momo do ita abia.​—Mareko 10:28-30 duahia.

12. Jew bisinesi tauna ta be hereva momokani totona dahaka gaudia ia dadaraia?

¹² Bisinesi tauna ta ladana Aaron ia be Jew tauna, be ia maragi negana amo ia diba Dirava ena ladana gwauraia hedinarai karana be maoro lasi. To, ia ura bada hereva momokani ia dibaia. Ia moale bada badina nega ta Witnes ta ese ia dekenai ia hahedinaraia, vowel revarevadia bona Heberu gado revareva, consonants idia atoa hebou neganai Dirava ena ladana be “Iehova” idia gwauraia diba. Aaron be ia moale dainai sinagoga dekenai ia lao bona rabi taudia dekenai ia dibaia gauna ia herevalaia. Ia laloa do ia gwauraia herevana ese rabi taudia do ia hamoalea, to idia be ia dekenai idia badu. Ia idia kanudia bona ia idia lulua bona danu ena ruma bese taudia ese ia idia dadaraia. Ena be unai ia vara, to ia be hereva momokani ia dibaia bona mai gari lasi ida Iehova ena Witnes tauna ta ai ia lao. Aaron hegeregerena, hereva momokani ena dala ai ita raka totona namona be iseda hetura karana ruma bese lalonai o mauri lalonai idia vara senisi ita abia dae.

13, 14. Hereva momokani ita dibaia totona, iseda lalohadai bona kara ai dahaka senisi ita karaia be namo? Haheitalai gwauraia.

¹³ Dirava ia moalelaia lasi lalohadai bona kara. Hereva momokani ita abia dae bona Baibel ena taravatu hegeregerena ita noho totona, namona be mai iseda ura ida iseda lalohadai bona kara ai senisi haida ita karaia. Unai senisi karaia totona Petero ese ia herevalaia gauna mani ita laloa, ia gwau: “Umui be kamonai natudia, unai dainai guna Dirava umui diba lasi neganai umui badinaia ura idauidau umui dadaraia, to . . . emui kara ibounai lalonai do umui helaga.” (1 Pet. 1:14, 15) Korinto ai idia noho taudia be kara maoromaoro idia badinaia lasi taudia, unai dainai hereva momokani dibaia bona edia mauri lalonai senisi idia karaia be auka. (1 Kor. 6:9-11) Unai hegeregerena, hereva momokani dibaia totona taunimanima momo be Dirava ia moalelaia lasi lalohadai bona kara idia dadaraia. Petero be iena negai idia noho Keristani taudia ia hamaoroa, ia gwau: “Badina guna umui be nega bada umui haorea tanobada taudia edia ura umui badinaia. Unai neganai gwau-edeede hemarai karadia, tauanina ena ura idauidau  umui biagua lasi, wain momo inua karadia, regerege bada pati, inuinu helulu, bona kaivakuku bona laulau tomadiho henia kara dika rohorohodia umui karaia.”​—1 Pet. 4:3.

¹⁴ Lagani momo lalonai Devynn bona Jasmine be idia inuinu kekero taudia. Ena be Devynn be akaun sekea gaukara ia diba momo tauna, to inuinu kekero karana dainai moni gaukara ta ia karaia daudau diba lasi. Taunimanima momo idia diba Jasmine be dagedage hahinena ta. Dina ta Jasmine be ia inuinu kekero bona dala dekenai ia raka noho lalonai, Witnes misinari rua ia hedavari henidia. Unai misinari rua ese dala idia karaia ia danu Baibel idia stadilaia totona, to wiki ta murinai edia ruma dekenai idia ginidae neganai Devynn bona Jasmine be idia kekero. Idia laloa unai misinari rua be edia ruma dekenai do idia lao lasi. To idia vadivadi lou neganai unai bamona ia vara lasi. Stadi idia hamatamaia negana amo, Devynn bona Jasmine be Baibel stiuden namodia ai idia lao bona idia dibaia gaudia be edia mauri lalonai idia badinaia. Hua toi lalonai, inuinu kekero karana idia rakatania bona edia headava idia rejista. Taunimanima momo idia itaia Devynn bona Jasmine be edia mauri idia haidaua, bona unai ese edia hanua dekenai idia noho taudia haida idia hagoadaia Baibel idia stadilaia totona.

15. Hereva momokani ita dibaia neganai, nega haida dahaka ita dadaraia be auka, bona dahaka dainai?

¹⁵ Baibel ena taravatu idia utua kastom karadia. Hereva momokani ita dibaia totona, Baibel ena taravatu idia utua kastom karadia ita dadaraia be auka. Ena be haida idia diba Baibel ena taravatu idia utua kastom karadia idia dadaraia be namo, to ma haida be edia ruma bese taudia, gaukara turadia, bona edia tura namodia dekenai idia gari dainai do ia auka Baibel ena taravatu idia badinaia totona. Hegeregere bema edia kastom be idia mase vadaeni varavara taudia laloa bada bona matauraia karana idia hahedinaraia, unai be do ia auka. (Deu. 14:1) Mai gari lasi ida idia kara taudia edia haheitalai ese ita do ia durua senisi ita karaia totona. Mani Efeso ai mai gari lasi ida idia kara Keristani taudia ginigunadia edia haheitalai ita laloa.

16. Efeso ai idia noho taudia be hereva momokani idia dibaia totona, dahaka idia dadaraia?

¹⁶ Efeso ai idia noho taudia be babalau bona meamea karadia idia karaia taudia. Guna babalau bona meamea karadia idia karaia Keristani taudia be hereva momokani idia dibaia totona, dahaka idia karaia Baibel ena taravatu ia utua kastom karadia idia dadaraia totona? Baibel ia gwau: “Meamea karadia idia karaia taudia momo be edia buka idia haboua bona taunimanima ibounai vairanai idia gabua. Bona unai buka edia davana idia haboua neganai, idia davaria edia davana be siliva moni 50,000. Iehova ena hereva be dala badana ai ia tubu daekau bona ia kwalimu.” (Kara 19:19, 20) Abidadama Keristani taudia be edia mauri lalonai senisi idia karaia bona hahenamo idia abia.

17. (a) Hereva momokani ita dibaia totona, dahaka gaudia ma haida ita dadaraia? (b) Edena henanadai rua be stadi gabena ai do ita herevalaia?

¹⁷ Dahaka oi karaia hereva momokani oi dibaia totona? Ita ibounai be iseda nega ita henia. Ma haida be hereva momokani idia dibaia totona, kohu momo idia tahua lasi bona ma haida tura henia karana ai senisi idia karaia. Taunimanima momo be edia lalohadai bona kara idia haidaua bona Baibel ena taravatu idia utua kastom karadia idia dadaraia. Ena be gau haida ita halusia, to ita abia dae momokani Baibel ena hereva momokani ese ita halusia gaudia ia hereaia. Ita abia hahenamo hereadaena be iseda hetura karana Iehova ida. Bema unai hereva momokani ita dibaia karana amo ita abia hahenamo ita laloa neganai, do ita ura lasi hereva momokani ita rakatania. Edena dala ai hereva momokani ita rakatania diba? Bona edena dala ai unai kara ita dadaraia? Unai henanadai rua be stadi gabena ai do ita herevalaia.