HEBOGAHISI karana be ita ia hagoadaia kara namona ta! Bema ta ese ita ia laloa bada, unai ese ita ia hamoalea. Ita ta ta be hebogahisi karana ita ura henia dainai, edena dala ai unai kara namona ita hahedinaraia diba?

Hebogahisi karana ena anina be mai momokani ida ma haida edia namo ita laloa bada​—unai be ta durua totona ita gwauraia herevadia bona ita karaia karadia amo ita hahedinaraia. Hebogahisi karana be ta kara namo henia karana sibona lasi. To, mai eda lalokau ida ita hahedinaraia hebogahisi karana, be hebogahisi momokanina. Danu, unai bamona hebogahisi be Keristani taudia ese idia hahedinaraia karana bona ia be Dirava ena lauma helaga ena huahua ta. (Gal. 5:22, 23) Namona be hebogahisi karana ita hahedinaraia, do ita itaia Iehova bona iena Natuna ese unai kara idia hahedinaraia bona edena dala ai edia haheitalai ita tohotohoa diba.

Iehova be ita ibounai ia hebogahisi henia, “tanikiu lasi taudia bona kara dika taudia” ia hebogahisi henidia danu. (Luka 6:35) Hegeregere, Iehova “ese kara dika taudia bona kara namo taudia latanai dina ena diari ia henia noho. Bona medu danu be kara maoromaoro kara maoromaoro lasi taudia latanai ia siaia diho.” (Mat. 5:45) Unai dainai, herevana haida be idia diba lasi Iehova be edia Havaraia Tauna, to idia danu edia mauri lalonai Iena hebogahisi karana amo namo idia abia bona idia moale.

Iehova ese Adamu bona Heva ia kara henia dalana amo hebogahisi karana ia hahedinaraia. Adamu bona Heva idia kara dika murinai, “fig au ena rau idia turia hebou, bona rami idia karaia.” To, Iehova ia diba Eden umana murimuri ai “au ginigini bona ava ginigini” idia tubu gabuna ai idia noho totona, dabua idia hahedokilaia be namo. Unai dainai, Iehova be mai hebogahisi ida “boromakau edia kopina dekena amo dabua ia karaia” idia totona.​—Gen. 3:7, 17, 18, 21.

Ena be Iehova ese “kara dika taudia bona kara namo taudia” ia hebogahisi henidia, to ia ura bada Iena abidadama hesiai taudia dekenai hebogahisi ia hahedinaraia. Hegeregere, peroveta tauna Sekaraia ena negai aneru ta be ia moale lasi badina taunimanima be dubu haginia gaukara idia hadokoa. Iehova be unai aneru ena hereva ia kamonai bona “mai hanamoa bona lalona hagoadaia hereva” amo ena lalona ia hagoadaia. (Sek. 1:12, 13) Iehova ese peroveta tauna Elia dekenai danu unai bamona ia karaia. Nega ta peroveta tauna be ia lalometau bada dainai, Iehova ia noia ia mase be namo. Iehova be Elia ena hemami ia laloa bada bona aneru ta ia siaia ia hagoadaia totona. Bona Dirava ese peroveta tauna ia hadibaia ia be sibona ia noho lasi. Elia be hagoadaia herevadia bona heduru ia abia murinai, ena hesiai gaukarana ia karaia lou. (1 Kin. 19:1-18) Dirava ena hesiai taudia huanai, daika be Iehova ena kara hereadaena, hebogahisi, ia hahedinaraia?

Iesu be tanobada ai iena hesiai gaukara ia karaia neganai, ia be hebogahisi bona ma haida ia laloa bada tauna. Ma haida ia kara auka henia  lasi o biagua auka lasi. Mai ena hebogahisi ida ia gwau: “Umui hekwarahi bona metau bada umui huaia taudia ibounai e, lau dekenai umui mai bona umui dekenai goada matamata do lau henia.  . . Lauegu huaia auna be ia namo.” (Mat. 11:28-30) Iesu ena hebogahisi dainai, taunimanima be ia lao gabudia ibounai dekenai idia lao danu. Iesu be idia ia “hebogahisi” henia dainai, edia gorere ia hanamoa, bona iena Tamana totona idia dekenai “gau momo” ia hadibaia.​—Mar. 6:34; Mat. 14:14; 15:32-38.

Iena hebogahisi karana be bada dainai, ma haida ia kara henia neganai edia hemami ia lalopararalaia. Momokani, ena be ia ura ia laga-ani, to mai moale ida idia ia abia dae. (Luka 9:10, 11) Hegeregere, taravatu hegeregerena hahine ta be rara halusia gorerena dainai ia miro bona ia ura Iesu ena dabua dorina ia dogoatao bena do ia namo, to unai ia karaia neganai Iesu ese ia gwau henia lasi. (Lev. 15:25-28) Unai hahine be lagani 12 lalonai ia gorere, to Iesu be mai hebogahisi ida ia hamaoroa, ia gwau: “Natugu e, emu abidadama ese oi ia hanamoa vadaeni. Mai maino ida oi lao bona inai gorere dikana ese oi do ia hahisia lou lasi.” (Mar. 5:25-34) Unai be hebogahisi karana hereadaena!

Ataiai ita herevalaia haheitalai hegeregerena, hebogahisi momokanina be eda kara amo ita hahedinaraia. Iesu be Samaria tauna namona ena parabole amo unai ia hahedinaraia. Ena be Samaria bona Iuda taudia be idia inai heheni, to unai parabole ese ia herevalaia tauna be ena kohu idia henaoa, idia dadabaia bona dala dekenai idia rakatania neganai, Samaria tauna ese unai tau dekenai hebogahisi karana ia hahedinaraia. Samaria tauna be hebogahisi dainai unai tau ia durua. Unai tauna ena bero ia kumia bona laolao taudia edia ruma dekenai ia abia lao. Samaria tauna ese unai tau ia durua totona, laolao taudia edia ruma naria tauna dekenai moni ia henia bona gau ma haida totona davana ia karaia.​—Luka 10:29-37.

Hebogahisi be kara amo ita hahedinaraia karana, to danu hagoadaia hereva maorodia amo ita hahedinaraia diba. Unai dainai “laloa metau ese oiemu moale do ia koua,” to Baibel ia gwau danu “hereva namodia ese oi idia hamoalea diba.” (Aon. 12:25) Ma haida ita hebogahisi henia bona kara namo henia neganai, idia do ia hagoadaia bona hamoalea diba. * Iseda hagodaia herevadia ese idia hahedinaraia ita be idia ita laloa bada. Danu, idia ita hagoadaia dainai, edia mauri lalonai idia davaria hekwakwanai do idia haheaukalaia.​—Aon. 16:24.

“Dirava ese taunimanima ia karaia, ia sibona ena laulau bamona” dainai, taunimanima ibounai ese hebogahisi karana idia hahedinaraia diba. (Gen. 1:27) Hegeregere, Iulio, Roma tuari taudia edia biaguna be Roma ena siti, Sidono dekenai ia ginidae bona mai hebogahisi ida Paulo ia kara henia bona “gwaumaoro ia henia ena turadia dekenai do ia lao, ia idia naria totona.” (Kara 27:3) Daudau lasi, bouti be nadi ia botaia dainai ia makohi, Melita ai idia noho taudia ese Paulo bona ma haida dekenai “hebogahisi bada” idia hahedinaraia. Gabu ia keru dainai unai gabu ai idia noho taudia ese lahi idia karaia idia durua totona. (Kara 28:1, 2) Idia be kara namona idia hahedinaraia. Hebogahisi tauna be ma haida dekenai hebogahisi karana ia hahedinaraia sibona lasi to kara ma haida ia karaia danu be namo.

Dirava ita hamoalea totona, hebogahisi karana be iseda kara bona iseda mauri dalana ai ita halaoa be namo. Unai dainai, Iehova ese ita ia hamaoroa hebogahisi karana be ‘dabua bamona do ita hahedokilaia.’ (Kol. 3:12) Momokani, nega momo iseda mauri lalonai Dirava ena kara namodia ita badinaia be auka. Dahaka dainai? Reana ita hemarai, ita daradara, dagedage ita davaria eiava sibona ita laloa bada dainai hebogahisi karana ita hahedinaraia lasi. To, unai bamona kara ita hanaia diba bema Dirava ena lauma helaga ena heduru dekenai ita tabekau  bona Iehova ena hebogahisi karana ita tohotohoa.​—1 Kor. 2:12.

Edena dala haida ai hebogahisi karana ita hahedinaraia diba? Namona be sibona ita nanadaia: ‘Ta be ena hemami ia gwauraia neganai lau kamonai, a? Lau be ma haida edia namo lau laloa bada, a? Edena negai turana ta o idau tauna ta dekenai hebogahisi lau hahedinaraia?’ Bena tahua gaudia ita atoa, hegeregere iseda Keristani kongrigeisen ai idia noho taudia ita dibaia namonamo totona. Unai dala amo, edia noho dalana do ita diba bona edia dabu gaudia dekenai ita durudia diba. Bona ita ura ma haida ese ita idia hebogahisi henia hegeregerena ita danu idia dekenai hebogahisi karana ita hahedinaraia. (Mat. 7:12) Unai amo, bema Iehova ena heduru ita noia Ia ese ita do ia durua hebogahisi karana ita hahedinaraia totona.​—Luka 11:13.

Aposetolo Paulo be “hebogahisi” ia hahedinaraia dainai Dirava ena hesiai tauna ai ia lao. (2 Kor. 6:3-6) Paulo be ena hebogahisi karadia bona hereva amo ia hahedinaraia taunimanima edia namo ia laloa bada, unai dainai ia idia ura henia. (Kara 28:30, 31) Unai hegeregerena, iseda hebogahisi karadia dainai taunimanima ese hereva momokani do idia ura henia. Taunimanima ibounai​—⁠ita idia dagedage henia taudia danu​—dekenai hebogahisi ita hahedinaraia neganai, edia lalona ita hamoalea bona do idia badu lasi. (Roma 12:20) Reana gabeai, Baibel ena hereva do idia abia dae.

Tanobada Paradaisona ai, do idia toreisi lou hutuma bada taudia be reana edia nega ginigunana mai moale ida hebogahisi momokanina do idia mamia. Idia moale dainai ma haida dekenai hebogahisi karana do idia hahedinaraia. Haida dekenai hebogahisi karana idia hahedinaraia lasi bona haida idia durua lasi taudia be Dirava ena Basileia henunai do idia noho lasi. Bona danu, Dirava ese ia lalonamo henidia taudia be mauri hanaihanai do idia abia bona ta ta dekenai lalokau bona hebogahisi karana do idia hahedinaraia. (Sal. 37:9-11) Taunimanima be do idia moale bona maino ai do idia noho! To, unai nega namona ia do ginidae lasi lalonai, hari, edena dala ai hebogahisi karana ita hahedinaraia amo namo ita abia diba?

Baibel ia gwau: “Mai ena bogahisihisi tauna ese, sibona ena namo ia havaraia noho.” (Aon. 11:17) Taunimanima be hebogahisi karana ia hahedinaraia tauna idia ura henia, bona ia idia hebogahisi henia danu. Iesu ia gwau: “Ma haida dekenai umui henia sikele hegeregerena, umui dekenai unai bamona sikele do idia henia.” (Luka 6:38) Hebogahisi tauna ese tura namodia ia davaria haraga diba, bona edia hetura karana ia noho daudau.

Aposetolo Paulo be Efeso kongrigeisen ai idia noho taudia ia hagoadaia bona idia dekenai ia gwau: “Do umui kara namo heheni bona hebogahisi heheni, bona mai kudouna ibounai ida do umui gwauatao heheni, Dirava ese mai kudouna ibounai ida, Keriso amo umui ia gwauatao hegeregerena.” (Efe. 4:32) Bema Kongrigeisen lalonai Keristani taudia be hebogahisi karana idia hahedinaraia bona ta ta idia durua heheni, unai ese namo bada do ia havaraia. Unai bamona taudia be hereva dikadia idia gwauraia lasi, hebogahisi lasi herevadia idia gwauraia lasi o ma haida idia hadikaia lasi. Ma haida idia maumauraia lasi, to idia gaukara goada edia hereva amo ma haida idia hagoadaia totona. (Aon. 12:18) Unai amo kongrigeisen ia goada bona mai moale ida Iehova idia hesiai henia.

Oibe, hebogahisi karana be iseda hereva bona kara amo ita hahedinaraia karana. Ma haida dekenai hebogahisi karana ita hahedinaraia neganai, iseda Dirava, Iehova ena kara ita tohotohoa unai. (Efe. 5:1) Unai amo iseda kongrigeisen do ia goada bona hereva momokani lalonai ma haida ita veria mai diba. Unai dainai, namona be taunimanima idia diba ita be hebogahisi karana ita hahedinaraia taudia!