1, 2. (a) Petero ese Iesu ia hamaoroa, sibona ia hebogahisi henia neganai, Iesu be edena bamona ia haere? (Laulau ginigunana herevalaia) (b) Dahaka dainai Iesu be unai bamona ia haere?

IESU ena hahediba taudia be idia kamonai hereva dekenai idia hoa bada. Badina Iesu, idia laloa Israela ena Basileia do ia haginia lou tauna, ia gwau kahirakahira hisihisi bada do ia abia bona do ia mase. Aposetolo Petero ia gwau: “Lohiabada e, oi sibona oi hebogahisi henia, oi dekenai unai bamona do ia vara lasi.” To Iesu ese ia haere henia, ia gwau: “Satani e, egu murinai oi lao! Oi be hahekwakwanaia gauna lau dekenai, badina emu lalohadai be Dirava ena lalohadai lasi, to taunimanima edia.”​—Mat. 16:21-23.

² Iesu be ena hereva amo ia hahedinaraia Dirava ena amo ia mai lalohadai be Satana ese ia biagua tanobada ena lalohadai amo ia idau. (1 Ioa. 5:19) Petero ese ia gwauraia hereva amo inai tanobada ena lalohadai, sibona laloa bada karana, ia hahedinaraia. To Iesu ia diba ena Tamana ena lalohadai be unai bamona lasi. Dirava  ia ura Iesu ia hegaegae, badina hisihisi do ia abia bona do ia mase. Unai dainai Iesu ese Petero ia haere henia amo ia hahedinaraia goevagoeva, Iehova ena lalohadai ia abia dae bona tanobada ena lalohadai ia dadaraia.

3. Dahaka dainai tanobada ena lalohadai ita dadaraia bona Iehova ena lalohadai ita abia be mai ena hekwarahi?

³ To ita be edena bamona? Ita be Iehova ena lalohadai eiava tanobada ena lalohadai ita abia? Ita be Keristani taudia dainai, ita hekwarahi Dirava ena ura ita karaia totona. To iseda lalohadai be edena bamona? Iseda lalohadai bona hereva be Iehova ena ura o lalohadai hegeregerena, a? Unai ita karaia totona, ita hekwarahi be namo. To ia auka lasi ta be inai tanobada ena lalohadai ia abia totona. Badina inai tanobada ena lalohadai be kamonai lasi taudia edia lalona ia biagua noho. (Efe. 2:2) Danu, tanobada taudia be sibona idia laloa bada dainai, reana iseda lalona idia veria diba unai bamona lalohadai ita abia dae totona. Oibe, ta ese Iehova ena lalohadai ia abia be mai ena hekwarahi, to ia auka lasi ta ese inai tanobada ena lalohadai ia abia totona.

4. (a) Bema tanobada taudia edia lalohadai ita abia, dahaka do ia vara? (b) Edena dala ai inai stadi ese ita do ia durua?

⁴ To, bema ita be tanobada taudia bamona ita laloa, sibona do ita laloa bada bona dahaka be maoro bona dahaka be kerere be sibona ese do ita abia hidi. (Mar. 7:21, 22) Unai dainai namona be “Dirava ena lalohadai” ita abia to “taunimanima edia” lasi. Inai stadi ese ita do ia durua unai ita karaia totona. Do ia hahedinaraia dahaka dainai Iehova ena lalohadai hegeregerena gau ta ita karaia karana be ita ia biagua auka lasi, to mai ena namo. Danu, tanobada ena lalohadai ita dadaraia dalana do ita herevalaia. Stadi gabena ai gau haida ita karaia neganai Iehova ena lalohadai ita abia dalana do ita herevalaia.

5. Dahaka dainai taunimanima haida idia ura lasi ma haida ese edia lalohadai idia hamaoromaoroa?

⁵ Taunimanima haida idia ura lasi ma haida ese edia lalohadai idia hamaoromaoroa. Idia gwau: “Lau be sibona egu lalohadai lau badinaia.” Reana edia hereva ena anina be, idia ura sibona edia abia hidi idia karaia, bona unai be kerere lasi. Idia ura lasi ma haida ese idia biagua, eiava doria ma haida edia kara idia tohotohoa totona. *

6. (a) Iehova ese ita dekenai dahaka ia henia? (b) Unai ura kwalimu be mai ena hetoana, a?

⁶ To ita moale badina Iehova ena lalohadai ita abia dae neganai, ita sibona ese abia hidi ita karaia diba. Korinto Iharuana 3:17 ena hereva hegeregerena, “Iehova ena lauma helaga ia noho gabudia ibounai, ura kwalimu ia noho.” Ita ibounai dekenai ura kwalimu ia noho dainai abia hidi ita karaia diba edena bamona taudia ai ita lao totona. Reana ita ura henia gaudia bona ita dibaia gaudia haida ita abia hidi diba. Momokani, Iehova ese ita ia havaraia unai bamona ita karaia diba, to namona be iseda ura kwalimu ita gaukaralaia namonamo. (1 Petero 2:16 duahia.) Maoro bona kerere ita abia hidi karana dekenai, Iehova ia ura iena Hereva ai ia noho lalohadai ese ita ia hakaua be namo. To, unai ese ita ia biagua auka eiava ita do ia durua?

7, 8. Dahaka dainai ita gwau diba Iehova ena lalohadai ita badinaia karana ese ita ia biagua auka lasi? Haheitalai gwauraia.

⁷ Mani inai haheitalai ita laloa. Tama sina idia hekwarahi edia natudia dekenai kara namodia idia hadibaia. Hegeregere, idia hadibaia mai momokani ida idia kara, idia  gaukara goada, bona ma haida edia namo idia laloa bada. Unai ese idia ia biagua auka lasi. To edia tama sina ese idia durua idia tubu daekau neganai, taunimanima namodia ai do idia lao. Bena edia natudia ese ruma idia rakatania neganai, sibona edia abia hidi idia karaia diba. Bema edia tama sina amo idia dibaia gaudia idia badinaia, abia hidi maorodia do idia karaia. Unai amo hekwakwanai o lalohekwarahi idia havaraia gaudia idia hanaia diba.

⁸ Tama namona ta bamona, Iehova ia ura ena natudia be mauri namona do idia moalelaia. (Isa. 48:17, 18) Unai dainai iena hakaua herevadia amo ita ia hadibaia dahaka be maoro bona kerere, bona edena dala ai taunimanima ita kara henia diba. Unai bamona negadiai Iehova ese ita ia hagoadaia iena lalohadai bona ura ita badinaia. Unai ese ita ia biagua auka lasi, to ita dekenai aonega ia henia bona ita ia durua abia hidi maorodia ita karaia totona. (Sal. 92:5; Aon. 2:1-5; Isa. 55:9) Danu sibona iseda ura gaudia ita abia hidi diba, to abia hidi maorodia ita karaia dainai do ita moale. (Sal. 1:2, 3) Oibe, Iehova ena lalohadai ita abia karana be mai ena namo!

9, 10. Edena dala ai Iehova ena lalohadai be tanobada ena ia hereaia?

⁹ Iehova idia tomadiho henia taudia ese iena lalohadai idia ura badinaia ena badina ma ta be, Iehova ena lalohadai ese tanobada taudia edia lalohadai ia hereaia. Inai tanobada ese taunimanima dekenai durua herevadia haida hegeregere, dahaka be maoro bona kerere, ruma bese idia moale dalana, moni gaukara namona abia dalana, bona mauri durua daladia ma haida idia henia. To idia momo be Iehova ena lalohadai hegeregerena lasi. Hegeregere, ma haida idia hagoadaia sibona idia laloa bada, bona idia abia dae matabodaga karadia be kerere lasi. Danu nega haida headava taudia idia hamaoroa, idia moale diba bema anina lasi gaudia dainai edia headava idia hapararaia eiava idia hadokoa. Unai be Baibel ese ia hadibaia lasi. Hari inai negai tanobada ena lalohadai ita badinaia be aonega karana lasi, to ita ura Baibel ena hereva do ita badinaia.

¹⁰ Iesu ia gwau, tau ta be “ia karaia kara namodia ese idia hamomokania, ia be aonega tauna.” (Mat. 11:19) Ena be teknoloji dekenai taunimanima edia diba ia bada, to hekwakwanai badadia hegeregere tuari, bese ta inai henia karana, bona raskol karadia idia haorea diba lasi. Danu tanobada ena lalohadai dekenai matabodaga karadia be kerere lasi. Taunimanima momo idia abia dae unai bamona gaudia ese ruma bese ia hapararaia, gorere idia habadaia bona hekwakwanai ma haida idia havaraia. To Dirava ena lalohadai idia abia Keristani taudia ese ruma bese maurina idia moalelaia, idia gorere momo lasi, bona tanobada hegegemadai tadikaka taihu be maino ai idia noho. (Isa. 2:4; Kara 10:34, 35; 1 Kor. 6:9-11) Unai ese ia hahedinaraia Iehova ena lalohadai be tanobada ena ia hereaia.

11. Mose be daika ena lalohadai ia abia, bona dahaka ia vara?

¹¹ Baibel negadiai, Dirava idia tomadiho henia taudia idia diba Iehova ena lalohadai be tanobada ena ia hereaia. Hegeregere, Mose, ena be “Aigupito taudia edia aonega ibounai” be ia dekenai idia hadibaia, to ia ese Dirava amo “aonega” ia tahua. (Kara 7:22; Sal. 90:12) Danu Iehova ia noia, ia gwau: “Mani emu dala be lau dekenai oi hadibaia.” (Eso. 33:13, NWT) Mose ese Iehova ena lalohadai ia abia dae dainai, Iehova ese ia gaukaralaia ena ura ia hagugurua totona bona Baibel lalonai Mose ia gwauraia abidadama tauna.​—⁠Heb. 11:24-27.

12. Paulo be abia hidi ta ia do karaia lasi neganai, edeseni amo heduru ita tahua?

 ¹² Aposetolo Paulo be diba bada tauna ta bona gado rua ia herevalaia diba. (Kara 5:34; 21:37, 39; 22:2, 3) To, abia hidi ta ia do karaia lasi neganai, Baibel ena hakaua herevadia ai heduru ia tahua bona tanobada ena aonega ia dadaraia. (Kara 17:2; 1 Korinto 2:6, 7, 13 duahia.) Unai dainai Paulo ese ena haroro gaukara ia moalelaia bona vaira negai mauri hanaihanai helarona ia naria.​—⁠2 Tim. 4:8.

13. Keristani taudia ta ta edia maduna be dahaka?

¹³ Momokani, Dirava ena lalohadai be inai tanobada ena ia hereaia. Iena lalohadai ita badinaia karana ese ita do ia durua ita moale bada bona ita kwalimu totona. To Iehova ese ita do ia doria lasi ena lalohadai ita badinaia totona. “Igui hesiai tauna mai ena kamonai bona mai ena kara maoromaoro” bona elda taudia danu ese ita ta ta iseda lalohadai do idia biagua lasi. (Mat. 24:45; 2 Kor. 1:24) To, Keristani taudia ta ta be mai edia maduna edia lalohadai idia haidaua unai amo Iehova ena lalohadai idia abia diba. Edena dala ai unai ita karaia diba?

14, 15. (a) Iehova ena lalohadai ita abia totona, dahaka ita laloa dobu be namo? (b) Roma 12:2 ena hereva hegeregerena, dahaka dainai tanobada ena lalohadai ita dadaraia? Haheitalai gwauraia.

¹⁴ Roma 12:2 ia gwau: “Inai nega oromana ai idia noho taudia do umui tohotohoa lasi, to emui lalona do umui hamatamataia karana amo emui kara do umui haidaua noho. Vadaeni umui sibona dekenai do umui hamomokania Dirava ena ura be ia namo, ia ese ia abia dae bona ia goevadae.” Unai siri ese ita ia hadibaia guna hereva momokani ita do diba lasi neganai tanobada ena lalohadai ita abia, to hari dala ia kehoa hereva momokani ita dibaia dainai iseda lalohadai ita haidaua bona Dirava ena lalohadai ita abia. Ena be iseda tama sina edia mauri dalana bona guna iseda mauri ai idia vara gaudia ese iseda lalohadai ia biagua, to iseda lalohadai ita haidaua diba. Unai ia vara diba bema iseda lalona ai dahaka gaudia ita abia hidi bona ita laloa momo. Ita abia hidi gaudia dekenai Iehova ena laloa dalana ita laloa dobu neganai, do ita abia dae iena lalohadai be maoro. Bena iseda lalohadai ita haidaua bona Iehova ena lalohadai do ita abia.

¹⁵ To namona be ita laloatao, Iehova ena lalohadai ita abia bona iseda lalohadai ita haidaua totona, ‘inai nega oromana ai idia noho taudia do ita tohotohoa lasi.’ Unai ena anina be Dirava ena lalohadai ida ia hegeregere lasi gaudia ita dadaraia vaitani be namo. Unai ita lalopararalaia totona mani inai haheitalai ita laloa. Ta be ena helt ia durua totona reana ena tauanina ia durua aniani namodia do ia ania. To bema idia bodaga vadaeni aniani ia ania hanaihanai, namo ta do ia davaria lasi. Unai hegeregerena, ena be ita hekwarahi Iehova ena lalohadai ita abia, to bema tanobada ena lalohadai dikadia be iseda lalona ai ita atoa namo ta do ita davaria lasi.

16. Dahaka gaudia ita dadaraia be namo?

¹⁶ Tanobada ena lalohadai ibounai ita dadaraia diba, a? Lasi, badina ita be tanobada taudia huanai ita noho bona edia lalohadai haida ita kamonai danu. (1 Kor. 5:9, 10) Hegeregere, haroro gaukara dekenai ita davaria taudia haida ese hadibaia hereva koikoi o lalohadai kereredia idia gwauraia. Ena be idia ita koua diba lasi, to edia hereva ita kamonai o abia dae lasi be namo. Iesu ia karaia bamona, namona be kara haraga Satana ena lalohadai koikoidia ita dadaraia. Bona nega ibounai ita noho hegaegae tanobada ena lalohadai ibounai ita dadaraia totona.​—⁠Aonega Herevadia 4:23 duahia.

17. Edena dala ma haida ai tanobada ena lalohadai ita dadaraia diba?

¹⁷ Hegeregere, iseda turadia ita abia hidi neganai, namona be ita laloa namonamo.  Baibel ena sisiba hereva hegeregerena, bema Iehova idia tomadiho henia lasi taudia ita bamoa, edia lalohadai ita abia dae diba. (Aon. 13:20; 1 Kor. 15:12, 32, 33) Danu, namona be moale karadia ita abia hidi namonamo. Bema evolusen, dagedage, eiava matabodaga karadia idia hahedinaraia moale karadia ita dadaraia neganai, “Dirava ena diba ida idia hegeregere lasi lalohadai kereredia” ese iseda lalohadai do ia hadikaia lasi.​—⁠2 Kor. 10:5.

18, 19. (a) Dahaka dainai hunia dalana ai tanobada ena lalohadai idia hadibaia gaudia amo sibona ita gimaia be namo? (b) Edena henanadai ita laloa be namo, bona dahaka dainai?

¹⁸ Danu hunia dalana ai tanobada ena lalohadai idia hadibaia daladia ita diba bona ita dadaraia be namo. Hegeregere, nius ripoti haida ese idia gwauraia gaudia amo do idia hahedinaraia politikol oreadia edia lalohadai haida idia abia dae. Sivarai ma haida ai taunimanima edia palani bona idia hagugurua gaudia idia herevalaia. Muvi bona buka ma haida ese “sibona laloa bada” bona “ruma bese ena namo laloa bada karana” idia hahedinaraia, unai amo taunimanima idia laloa unai be lalohadai namona bona kerere lasi. Unai bamona lalohadai be Baibel ena hereva ida ia hegeregere lasi, badina Iehova ita lalokau henia guna neganai, ita bona iseda ruma bese be mai moale ida do ita noho. (Mat. 22:36-39) Danu ena be tanobada taudia ese natudia totona idia torea buka haida be kerere lasi, to idia haida be hunia dalana ai natudia idia hadibaia matabodaga karadia ena lalohadai idia abia dae totona.

¹⁹ Ita gwau lasi moale karadia ibounai be kerere. To, namona be sibona ita nanadaia: ‘Lau ese tanobada ena lalohadai, nega haida hunia dalanai idia hadibaia gaudia, lau lalopararalaia, a? Lau bona egu natudia dekenai TV program o duahia gaudia haida dekenai taravatu haida lau atoa, a? Egu natudia ese idia kamonai o itaia gaudia ese edia lalohadai ia biagua lasi totona, idia lau durua Iehova ena lalohadai unai gaudia dekenai idia lalopararalaia, a?’ Dirava ena lalohadai bona taunimanima edia lalohadai edia idau ita diba neganai, ‘inai nega oromana ai idia noho taudia do ita tohotohoa lasi.’

20. Dahaka ese ia hahedinaraia ita be daika ena lalohadai ita abia?

²⁰ Namona be ita laloatao, diba abia daladia be rua sibona​—⁠Iehova amo bona Satana ese ia biagua tanobadana amo. Daika amo diba do ita abia? Ita abia hidi tauna amo. Bema tanobada ena lalohadai ita abia dae, vadaeni unai ese iseda lalohadai bona kara do ia biagua bena sibona do ita laloa bada. Unai dainai namona be ita itaia, duahia, kamonai bona laloa gaudia ita abia hidi namonamo.

21. Stadi gabena ai dahaka mai anina bada gauna do ita herevalaia?

²¹ Inai stadi amo ita diba Iehova ena lalohadai ita abia totona, inai tanobada ena lalohadai ita dadaraia be namo. Bona Dirava ese ita abia hidi gaudia ia laloa dalana ita laloa dobu neganai, ena lalohadai hegeregerena abia hidi do ita karaia. Stadi gabena ese unai do ita karaia dalana do ia hahedinaraia.