1-2. Dahaka dainai hari, Keristani taudia ese Levitiko bukana idia stadilaia be namo?

APOSETOLO Paulo ese ena turana Timoteo ia hadibaia “Toretore Helagadia be Dirava ena hahekau henunai idia torea, bona ia be mai ena namo.” (2 Tim. 3:16) Levitiko bukana ia herevalaia danu. Unai Baibel bukana be edena bamona oi laloa? Haida idia laloa unai buka lalonai idia noho taravatu be hari inai negai ita ia durua lasi, to Keristani taudia momokanidia be unai bamona idia laloa lasi.

² Levitiko bukana be lagani 3,500 gunanai idia torea, to Iehova ese unai buka ia gimaia “ita hadibaia totona.” (Roma 15:4) Levitiko bukana ese Iehova ena lalohadai ia hahedinaraia dainai ita stadilaia be namo. Unai buka amo leseni namodia momo ita dibaia diba. Mani unai leseni foa ita herevalaia.

3. Dahaka dainai lagani ta ta ai, Kara Dika ena Davana Karaia Dinana ai boubou gaudia idia henia?

³ Leseni ginigunana: Iehova ena lalonamo ita abia be namo unai amo iseda boubou gaudia do ia abia dae. Lagani ta ta ai, Kara Dika ena Davana Karaia Dinana ia ginidae neganai, Israela besena be idia haboua bona animal idia bouboulaia. Israela taudia be unai boubou gaudia amo idia diba, kara dika amo idia goeva be namo! To, unai dina ai hahelaga tauna badana be Helaga Herea gabuna ai animal ena rara ia do bouboulaia lasi neganai, mai anina bada gaukara ta do ia karaia guna, unai ese  boubou gauna bona kara dika gwauatao karana ia hereaia.

4. Levitiko 16:12, 13 ena hereva bamona, hahelaga tauna badana be Kara Dika ena Davana Karaia Dinana ai nega ginigunana Helaga Herea gabuna ai ia vareai neganai, dahaka ia karaia? (Rau 1 ena laulau itaia.)

⁴ Levitiko 16:12, 13 duahia. Kara Dika ena Davana Karaia Dinana ai ia vara gauna mani oi laloa: Hahelaga tauna badana be palai dubu lalonai ia vareai. Ia be nega toi Helaga Herea gabuna ai do ia vareai. Nega ginigunana ia vareai neganai, iena imana ta dekenai be bonana namo muramura ia dogoatao, bona imana ma ta dekenai be golo amo idia karaia lahi gida udaia gauna mai ena gida ia dogoatao. Helaga Herea gabuna ia koua keten vairanai do ia gini sisina. Mai hemataurai ida, Helaga Herea gabuna ai do ia vareai bona taravatu mauana ena vairanai do ia gini. Laulau dalanai, ia be Iehova Dirava ena vairanai ia gini! Bena, hahelaga tauna ese bonana namo muramura be lahi gida ena latanai ia bubua, bona unai daiutu ena bonana be do ia namo herea. * Gabeai ia be Helaga Herea gabuna ai do ia vareai lou bona animal edia rara do ia bouboulaia. Ita itaia, hahelaga tauna be bonana namo muramura ia gabua guna, gabeai animal edia rara ia bouboulaia.

5. Kara Dika ena Davana Karaia Dinana ai bonana namo muramura idia gaukaralaia karana amo dahaka ita dibaia?

⁵ Kara Dika ena Davana Karaia Dinana ai bonana namo muramura idia gaukaralaia karana amo dahaka ita dibaia? Baibel ese ia hahedinaraia Iehova ena abidadama hesiai taudia edia guriguri be bonana namo muramura bamona. (Sal. 141:2; Apok. 5:8) Ita herevalaia vadaeni bamona, hahelaga tauna badana be mai hemataurai ida Iehova vairanai bonana namo muramura ia abia vareai. Unai hegeregerena, namona be mai hemataurai ida Iehova ita guriguri henia. Ita moale bada badina iseda Havaraia Tauna ia ura ia kahirakahira ita lao, tama ta ese natuna ia kara henia bamona. (Iam. 4:8) Ita be iena turana ai ia halaoa! (Sal. 25:14) Unai hahenamo ita laloa bada dainai ita ura lasi Iehova ita habadua.

6. Hahelaga tauna badana ese bonana namo muramura ia gabua guna, bena boubou gaudia ia henia karana amo dahaka ita dibaia?

⁶ Laloatao, hahelaga tauna badana be bonana namo muramura ia gabua guna, gabeai boubou gaudia ia henia. Unai amo ia hahedinaraia, boubou gauna ia henia neganai Dirava ena lalonamo ia abia vadaeni. Unai kara amo dahaka ita dibaia? Iesu be tanobada ai ia noho neganai, mai anina bada gauna ta ia karaia guna​—taunimanima ese mauri do idia abia karana ia hereaia gauna​—bena ena mauri be boubou gauna bamona ia henia. Unai be dahaka? Iesu be ena mauri ibounai lalonai Iehova ia badinaia unai amo Iehova ese ena boubou gauna do ia abia dae. Unai dala amo, Iesu ia hahedinaraia Iehova ena ura badinaia karana be mauri dala maorona. Iesu ese ena Tamana ena lohia siahuna ia abia isi.

7. Dahaka dainai Iesu be tanobada ai ia noho neganai ena Tamana ia hamoalea?

⁷ Iesu be tanobada ai ia noho neganai, Iehova ena kara maoromaoro taravatudia ia badinaia goevagoeva. Herevana hahetoho momo ia davaria bona ia do idia hamasea, to ia hahedinaraia iena Tamana ena lohia dalana be maoro. (Fili. 2:8) Iesu be hahetoho ia davaria neganai, “mai taitai bona mai mata ranu ida” ia guriguri. (Heb. 5:7) Iena guriguri goadagoada karana amo ia hahedinaraia ia ura Dirava ia badinaia noho. Iehova dekenai, Iesu ena  guriguri be bonana namo muramura bamona. Iesu ena mauri ibounai lalonai ena Tamana ena lohia siahuna ia abia isi bona ia hamoalea.

8. Edena dala ai Iesu ena mauri dalana ita tohotoho diba?

⁸ Iesu ita tohotohoa diba bema iseda mauri lalonai Iehova ena dala bona ena taravatu ita badinaia. Hahetoho ita davaria neganai Iehova ita guriguri henia goadagoada, badina ita ura ia ita hamoalea. Unai amo ita hahedinaraia Iehova ena lohia dalana ita badinaia noho. Ita diba Iehova ese iseda guriguri do ia abia dae lasi bema ia inai henia karadia ita karaia. To, Iehova ena taravatu ita badinaia neganai, do ita abia dae momokani iseda guriguri Iehova dekenai be bonana namo muramura bamona. Bona ita diba, iseda abidadama bona badinaia karana ese iseda guba Tamana ia hamoalea bada.​—Aon. 27:11.

9. Dahaka dainai Israela taudia be maino karaia boubouna idia henia?

⁹ Leseni iharuana: Iehova ita laloa bada dainai ia ita hesiai henia. Unai ita dibaia totona, Israela taudia ese tomadiho momokani ai maino karaia totona idia henia boubou gaudia mani ita herevalaia. * Levitiko bukana amo ita diba, Israela tauna be “Dirava tanikiu henia totona” maino karaia boubouna do ia henia. (Lev. 7:11-13, 16-18) Ia be taravatu dainai lasi, to mai ena ura ida unai boubou gauna ia henia. Ta be mai ena ura ida unai bamona boubou gauna ia henia diba badina ena Dirava, Iehova ia lalokau henia. Unai boubou gauna ia henia tauna, ena ruma  bese, bona hahelaga taudia ese idia bouboulaia animal ena vamu do idia ania hebou. To, idia bouboulaia animal ena kahana haida be Iehova sibona dekenai do idia henia. Edena kahana?

10. Edena dala ai Iesu ena hesiai gaukara bona Levitiko 3:6, 12, 14-16 ese ia herevalaia maino karaia boubou gaudia be idia hegeregere?

¹⁰ Leseni ihatoina: Lalokau dainai Iehova totona iseda nega bona goada ita henia. Iehova ese animal ena digara ia ura henia bada. Danu, ia gwau animal ena kahana ma haida, hegeregere nadinadi (kidney) be mai anina bada. (Levitiko 3:6, 12, 14-16 duahia.) Unai dainai Israela tauna ta be mai ena ura ida animal ena kahana haida bona ena digara be boubou totona ia henia neganai, Iehova ia moale bada. Unai bamona boubou gauna ia henia Israela tauna be mai ura ida Dirava dekenai harihari gauna hereadaena ia henia. Unai hegeregerena, Iesu be mai ena ura ida Iehova ia hesiai henia karana amo ena lalokau Ia dekenai ia hahedinaraia. (Ioa. 14:31) Iesu be mai moale ida Dirava ena ura ia karaia; ia ese Dirava ena taravatu ia ura henidia. (Sal. 40:8) Iehova be ia moale bada badina ia itaia Iesu be mai ena ura ida Ia ia hesiai henia!

11. Edena dala ai iseda hesiai gaukara be maino karaia boubou gaudia bamona, bona dahaka dainai ita moale?

¹¹ Maino karaia boubou gaudia hegeregerena, Iehova ita laloa bada dainai mai ura ida Ia ita hesiai henia. Danu, mai iseda kudouna ibounai ida Iehova ita lalokau henia dainai iseda nega bona goada ita henia ia ita hesiai henia totona. Iehova ia moale bada badina ia idia tomadiho henia taudia milioni momo be ia idia lalokau henia bona iena dala idia badinaia dainai, mai ura ida ia idia hesiai henia! Ita moale badina Iehova be ita karaia gaudia ia itaia bona laloa bada sibona lasi, to ita karaia gaudia ena badina ia laloa danu. Hegeregere, bema oi be buruka bona gau momo oi karaia diba lasi, namona be oi abia dae Iehova ese emu goada ena hetoana ia lalopararalaia. Reana do oi mamia oi be gau momo oi karaia lasi, to Iehova ia diba Ia oi lalokau henia dainai oi karaia diba gaudia oi karaia. Ia ese emu goada hegeregerena oi karaia gaudia ia abia dae.

12. Iehova ese maino karaia boubou gaudia ia laloa karana amo dahaka ita dibaia?

¹² Maino karaia boubou gaudia amo dahaka ita dibaia? Animal ena kahana namodia be lahi ese ia gabua bona kwalahu ia daekau neganai, Iehova be ia moale. Unai hegeregerena, Iehova ese mai emu kudouna ibounai ida oi karaia hesiai gaukara ia abia dae. (Kol. 3:23) Mani oi laloa, Iehova be oi dekenai ia moale bada. Ia ese emu hekwarahi iena hesiai gaukara lalonai ia laloa bada, bona unai do ia laloaboio diba lasi.​—Mat. 6:20; Heb. 6:10.

13. Levitiko 9:23, 24 ena hereva bamona, edena dala ai Iehova ese ia hahedinaraia hahelaga taudia ia lalonamo henidia?

¹³ Leseni ihahanina: Iehova ese ena tanobada oreana ia hanamoa noho. Lagani 1512 B.C.E. ai, Sinai Ororona henunai palai dubu idia haginia neganai, ia vara gauna mani oi laloa. (Eso. 40:17) Mose be aria ta ia karaia Arona bona ena natudia do idia abia hidi hahelaga gaukara idia karaia totona. Israela besena be idia haboua, hahelaga taudia ese nega ginigunana animal idia bouboulaia karana idia itaia totona. (Lev. 9:1-5) Edena dala ai Iehova ese ia hahedinaraia idia abia hidi hahelaga taudia ia lalonamo henidia? Arona bona Mose be taunimanima idia hanamoa noho lalonai, Iehova ese lahi amo boubou patana ai idia noho boubou gaudia oredia ia gabua ore.​—Levitiko 9:23, 24 duahia.

14. Dahaka dainai hari ita dekenai, Iehova ese Arona bona ena natudia ia lalonamo henia karana be mai anina bada?

 ¹⁴ Guba amo lahi ia diho karana ese dahaka ia hahedinaraia? Iehova ese Arona bona ena natudia ia abia hidi hahelaga gaukara do idia karaia bona idia ia lalonamo henia. Israela taudia idia itaia Iehova ese hahelaga taudia ia durua neganai, idia laloparara hahelaga taudia idia durua danu be namo. Ita dekenai unai be mai anina bada, a? Oibe! Israela ai idia karaia hahelaga gaukarana ese hahelaga gaukara badana ia laulaulaia. Hahelaga Tauna Badana, Keriso, be guba dekenai hahelaga bona king taudia 144,000 ida do ia lohia.​—Heb. 4:14; 8:3-5; 10:1.

15-16. Edena dala ai Iehova ese “igui hesiai tauna mai ena kamonai bona mai ena kara maoromaoro” ia durua noho?

¹⁵ Lagani 1919 ai, Iehova ese horoa tadikaka orea maragina ia abia hidi “igui hesiai tauna mai ena kamonai bona mai ena kara maoromaoro” ai idia lao totona. Idia ese haroro gaukara idia gunalaia noho, bona Keriso murinai idia raka taudia dekenai “nega korikori ai edia aniani” ia henia. (Mat. 24:45) Ia hahedinaraia goevagoeva, Dirava ese igui hesiai tauna mai ena kamonai bona mai ena kara maoromaoro ia abia dae.

¹⁶ Satani bona ena tanobada be gau momo idia karaia igui hesiai tauna mai ena kamonai ena gaukara idia koua totona, to Dirava ese idia ia durua noho. Ena be tuari badadia rua idia vara, moni ena hekwakwanai, bona Dirava ena taunimanima idia dagedage henia, to igui hesiai tauna mai ena kamonai bona mai ena kara maoromaoro be Keriso murinai idia raka taudia dekenai heduru idia henia noho. Mani inai oi laloa, hari ita be gado 900 mai kahana dekenai pablikeisen idauidau ita abia  noho davana lasi! Unai ese ia hahedinaraia goevagoeva Dirava ese igui hesiai tauna mai ena kamonai ia durua noho. Danu, haroro gaukara amo Iehova ena heduru ita itaia diba. Bona sivarai namona be “tanobada ibounai dekenai” idia harorolaia noho. (Mat. 24:14) Momokani, hari Iehova ese ena orea ia hakaua noho bona ia hanamoa noho.

17. Edena dala ai ita hahedinaraia ita be Iehova ena orea ita durua noho?

¹⁷ Namona be sibona ita nanadaia, ‘Lau moale badina Iehova ena orea tanobada dekenai lau bamoa noho, a?’ Mose ena negai, Iehova ese guba amo lahi ia siaia karana ese ia hahedinaraia ia abia hidi taudia ia lalonamo henia. Unai hegeregerena, Iehova ia hahedinaraia hari ia be ena orea ia durua noho. Namona be Iehova ita tanikiu henia badina ita be iena orea ai ita noho. (1 Tes. 5:18, 19) Edena dala ai ita hahedinaraia ita be Iehova ena orea ita durua noho? Namona be hebou badadia bona maragidia ai, bona iseda pablikeisen idauidau amo ita kamonai Baibel ena hakaua herevadia ita badinaia. Danu, haroro bona hadibaia gaukarana ita durua be namo.​—1 Kor. 15:58.

18. Iseda lalona ita hadaia dahaka ita karaia totona?

¹⁸ Namona be iseda lalona ita hadaia, Levitiko bukana amo ita dibaia gaudia ita badinaia totona. Ita ura Iehova ese iseda boubou gaudia do ia abia dae. Iehova ita laloa bada dainai ia ita hesiai henia. Mai kudouna ibounai ida Iehova ita lalokau henia dainai iseda nega bona goada ita henia ia ita hesiai henia totona. Bona namona be hari, iseda lalona ita hadaia iena orea ita durua noho. Unai ibounai ita karaia neganai, Iehova dekenai ita hahedinaraia, iena Witnes taudia ai ita lao bona ia ita hesiai henia karana be hahenamo badana!