1. Iehova ese ita ia koua lasi dahaka ita karaia totona?

IEHOVA ese ita ia koua lasi iseda mauri dalana ita abia hidi totona. To, ia ese abia hidi namodia ita karaia dalana ia hadibaia, bona ita ia durua ita karaia abia hidi ita badinaia totona. (Sal. 119:173) Dirava ena Hereva amo ita abia aonega ita badinaia neganai, abia hidi namodia ita karaia diba.​—⁠Heb. 5:14.

2. Abia hidi ta ita karaia murinai dahaka ia vara diba?

² Herevana abia hidi namona ta ita karaia, to nega haida do ia auka ita badinaia totona. Mani haheitalai haida oi laloa: Matamata tadikaka ta be ia ura Baibel ibounai ia duahia haorea. Wiki haida lalonai unai ia badinaia to gabeai ia hadokoa. Taihu ta ia ura regula painia gaukara ia karaia to do ia hamatamaia dinana ia do abia hidi lasi. Elda oreana be abia hidi idia karaia kongrigeisen lalonai mamoe vadivadi gaukara idia karaia totona, to hua haida lalonai unai idia do hamatamaia lasi. Unai haheitalai be idauidau to gau tamona sibona be ia hegeregere. Idia karaia abia hidi be idia badinaia lasi. Unai bamona hekwakwanai be Korinto ai idia noho Keristani taudia ginigunadia dekenai ia vara danu. Idia amo dahaka ita dibaia?

3. Korinto taudia be dahaka abia hidi idia karaia, to dahaka ia vara?

³ Lagani 55 C.E. bamona ai, Korinto taudia be abia hidi badana ta idia karaia. Idia kamonai edia tadikaka bona taihu Ierusalema bona Iudea dekenai be idia ogogami bona metau bada idia davaria, unai dainai kongrigeisen ma haida be kontribiusen  idia haboua heduru idia henia totona. Korinto taudia edia kara namo bona hariharibada karana dainai aposetolo Paulo idia noia edena dala ai heduru idia henia diba. Paulo ese kongrigeisen dekenai hakaua herevadia ia henia bona Tito ia abia hidi kontribiusen ia haboua totona. (1 Kor. 16:1; 2 Kor. 8:6) To, hua haida murinai Paulo ia kamonai Korinto taudia be edia kontribiusen idia do henia lasi. Unai dainai, kongrigeisen ma haida edia kontribiusen be Ierusalema dekenai idia ura abia lao neganai, Korinto taudia edia harihari gauna be idia do henia lasi.​—⁠2 Kor. 9:4, 5.

4. Korinto Iharuana 8:7, 10, 11 ena hereva bamona, Paulo ese Korinto taudia ia hagoadaia dahaka idia karaia totona?

⁴ Korinto taudia be abia hidi namona ta idia karaia, bona Paulo ese edia abidadama bona henia karana dainai idia ia hanamoa. To danu, idia ia hagoadaia idia karaia vadaeni abia hidi idia badinaia totona. (2 Korinto 8:7, 10, 11 duahia.) Unai haheitalai amo ita diba, abidadama Keristani taudia dekenai nega haida do ia auka idia karaia abia hidi ta idia badinaia totona.

5. Edena henanadai do ita haerelaidia?

⁵ Korinto taudia bamona, nega haida do ia auka ita karaia abia hidi ta ita badinaia totona. Dahaka dainai? Ita be goevadae lasi taudia dainai ita karaia abia hidi to do ita badinaia haraga lasi. Eiava idia vara kava gaudia dainai do ia auka iseda abia hidi ita badinaia totona. (Had. 9:11; Roma 7:18) Edena dala ai ita karaia vadaeni abia hidi ta ita laloa lou bona hamaoromaoroa diba? Edena dala ai ita karaia vadaeni abia hidi ita badinaia diba?

6. Dahaka dainai abia hidi ma haida ita haidaua?

⁶ Ita karaia abia hidi badadia haida be do ita haidaua diba lasi. Hegeregere, abia hidi ita karaia Iehova ita hesiai henia, bona iseda lalona ita hadaia iseda adavana do ita badinaia. (Mat. 16:24; 19:6) To, abia hidi ma haida ita haidaua diba. Dahaka dainai? Badina iseda noho daladia idia idau diba. Dahaka ese ita do ia durua abia hidi maorona ita karaia totona?

7. Dahaka totona ita guriguri bona dahaka dainai?

⁷ Aonega totona oi guriguri. Iehova ena hahekau henunai Iamesi ia gwau: “Bema umui ta ena aonega be hegeregere lasi, namona be Dirava dekenai ia noinoi noho, bona Dirava ese ia dekenai do ia henia, badina ia be mai hariharibada ida taunimanima ibounai dekenai ia henia.” (Iam. 1:5) Momokani, ita ibounai iseda “aonega be hegeregere lasi.” Unai dainai abia hidi ta oi ura karaia eiava oi haidaua neganai, namona be Iehova ena heduru oi noia. Bona Iehova ese oi do ia durua abia hidi maorona oi karaia totona.

8. Abia hidi ta ita do karaia lasi lalonai, dahaka ita karaia be namo?

⁸ Research namona oi karaia. Baibel bona Baibel pablikeisen idauidau oi duahia, bona sisiba namona do idia henia taudia oi hereva henia. (Aon. 20:18) Unai bamona research be mai anina bada bema oi ura emu moni gaukara oi haidaua, gabu ma ta dekenai oi lao, eiava edukeisen maorona ta oi abia hidi unai amo emu haroro gaukara ia durua diba.

9. Edena dala ai mai momokani ida ita kara be mai ena namo?

⁹ Oi karaia abia hidi ena badina oi laloa. Iehova ese ita karaia gaudia ena badina ia laloa bada. (Aon. 16:2) Ia ura gau ibounai lalonai mai momokani ida ita kara. Unai dainai abia hidi ita karaia neganai, ita ura mai momokani ida ma haida dekenai iseda abia hidi ena badina ita hahedinaraia. Bema mai momokani lasi ida abia hidi ta ita karaia, do ia auka ita badinaia totona. Hegeregere, matamata tadikaka ta be ia ura regula painia ta ai ia lao. To,  gabeai ia hekwarahi ena hora ia hagugurua totona, bona ena haroro gaukara ia moalelaia lasi. Reana ia laloa painia gaukara ia karaia ena badina be ia ura Iehova ia hamoalea. To, reana painia gaukara ia karaia ena badina korikori be, ia ura ena tama sina eiava ma haida ia hamoalea.

10. Dahaka ese ta ia durua senisi ia karaia totona?

¹⁰ Mani inai haheitalai oi laloa. Baibel stiuden ta be ia ura kuku ania karana ia hadokoa. Matamanai, wiki ta eiava rua lalonai ia hekwarahi unai ia badinaia totona, to gabeai kuku ma ia ania lou. Dokonai, kuku ia anina lou lasi! Iehova ia lalokau henia bona ia ura hamoalea dainai kuku ania karana ia hadokoa.​—Kol. 1:10; 3:23.

11. Dahaka dainai tahua gaudia oi atoa be namo?

¹¹ Tahua gaudia oi atoa. Unai bamona oi karaia neganai emu tahua gaudia oi hagugurua diba. Hegeregere, reana oi be abia hidi oi karaia Baibel oi duahia hanaihanai totona. To, bema sediual ta oi karaia lasi do ia auka emu tahua gauna oi hagugurua totona. * Eiava elda taudia idia ura kongrigeisen ai mamoe vadivadi idia karaia, to gabeai idia karaia abia hidi idia badinaia lasi. Elda taudia ese edia abia hidi idia badinaia totona, reana inai bamona henanadai idia laloa diba: “Edena tadikaka taihu be mamoe vadivadi karana amo heduru idia abia diba? Do ai vadivadi henidia ena nega ai makaia vadaeni, a?”

12. Dahaka ita karaia be namo, bona dahaka dainai?

¹² Oi karaia diba gaudia sibona oi karaia. Iseda nega, kohu, bona goada be hegeregere lasi, ita ura karaia gaudia ibounai ita karaia totona. Unai dainai ita karaia diba gaudia sibona ita karaia. Bema dala ia noho, oi hagugurua diba lasi abia hidi ta oi haidaua diba. (Had. 3:6) To, reana emu abia hidi oi laloa namonamo bona ia hegeregere neganai oi haidaua, unai amo oi badinaia diba. Emu abia hidi oi badinaia totona, heduru daladia faiv mani ita herevalaia.

13. Edena dala ai goada oi abia diba, emu abia hidi oi badinaia totona?

¹³ Goada abia totona oi guriguri. Dirava ese oi ia “hagoadaia” diba emu abia hidi oi badinaia totona. (Fili. 2:13) Unai dainai Iehova oi noia iena lauma helaga amo oi ia hagoadaia totona. Namona be oi guriguri noho, ena be emu guriguri ena haere oi abia haraga lasi. Iesu ia gwau: “Umui noinoi noho, bona umui dekenai [lauma helaga] do idia henia.”​—Luka 11:9, 13.

14. Luka 14:28 ena hakaua herevana ese edena dala ai oi ia durua diba, emu abia hidi oi badinaia totona?

¹⁴ Palani ta oi karaia. (Luka 14:28 duahia.) Project ta oi hagugurua totona, palani oi karaia be namo. Bena unai palani oi badinaia. Unai hegeregerena, abia hidi ta oi karaia neganai, unai abia hidi oi badinaia totona do oi hagugurua gaudia edia lista ta oi torea be namo. Bema gaukara badana ta oi abia, namona be kahana maragidia ta ta ai oi haria, unai amo oi hagugurua diba. Paulo ese Korinto taudia ia hagoadaia namona be “pura ibounai edia dina ginigunadia ai” edia kontribiusen idia haboua, to namo lasi idia naria ela bona Paulo ia ginidae. (1 Kor. 16:2) Gaukara badadia oi haria karana ese oi do ia durua oi lalohekwarahi lasi totona.

15. Palani ta oi karaia murinai, dahaka oi karaia be namo?

¹⁵ Emu palani oi torea hedinarai karana ese oi ia durua diba emu abia hidi oi badinaia totona. (1 Kor. 14:40) Hegeregere, elda oreana  be elda ta idia abia hidi idia karaia disisen ta ta, daika ese unai do ia karaia, bona edena negai do idia hagugurua ena lista ia torea totona. Unai hakaua herevana idia badinaia elda taudia ese idia karaia disisen idia badinaia diba. (1 Kor. 9:26) Unai bamona lista oi karaia diba dina ta ta ai oi karaia gaudia oi hagugurua totona. Hegeregere, emu lista ai do oi karaia guna gaudia bona gabeai do oi karaia gaudia oi torea, unai amo oi hagugurua diba. Unai amo nega kwadogi lalonai gaukara momo oi hagugurua diba.

16. Oi palanilaia gaukarana oi hagugurua totona dahaka be mai anina bada, bona Roma 12:11 ese edena bamona unai ia herevalaia?

¹⁶ Oi gaukara goada. Oi palanilaia gaukarana oi hamatamaia bona oi hagugurua totona, gaukara goada karana be mai anina bada. (Roma 12:11 duahia.) Paulo ese Timoteo ia hadibaia namona be ia “gaukara goada” bona hahediba tauna namona ena gaukara ia “badinaia noho.” Iehova ena hesiai gaukara ma haida ita ura karaia neganai, unai sisiba ita badinaia be namo.​—1 Tim. 4:13, 16.

17. Edena dala ai Efeso 5:15, 16 ese ita durua, iseda gaukara ita hagugurua totona?

¹⁷ Emu nega oi gaukaralaia namonamo. (Efeso 5:15, 16 duahia.) Oi abia hidi gauna do oi karaia ena nega oi makaia bona unai oi badinaia. Namo lasi nega namona totona oi naria; reana nega namona do ia vara lasi. (Had. 11:4) Namo lasi emu nega bona goada oi haorea anina lasi gaudia dekenai, namona be mai anina bada gaudia oi atoa guna. (Fili. 1:10) Namo lasi ma haida ese emu gaukara totona oi abia hidi nega idia hadikaia. Namona be idia oi hadibaia, oi ura unai nega ai emu gaukara oi hagugurua. Emu fon oi koua bona email eiava social media be gabeai oi sekea. *

18-19. Dahaka ese oi ia durua diba emu gaukara oi hagugurua totona, herevana hekwakwanai idia vara?

¹⁸ Emu gaukara ena anina oi laloa bada. Emu abia hidi ese do ia havaraia anina namona oi laloa karana be gabu ta oi lao henia karana ida oi hahegeregerea diba. Bema oi ura dikadika oi lao henia gabuna ai oi ginidae, oi be dala ma haida do oi tahua, herevana dala ta ia koua. Unai hegeregerena, bema ita karaia abia hidi ese do ia havaraia anina namona ita laloa bada, do ita hesiku haraga lasi herevana hekwakwanai haida idia vara.​—Gal. 6:9.

¹⁹ Abia hidi namona ta oi karaia bona oi badinaia karana be mai ena hekwarahi. To, Iehova ese oi dekenai aonega bona goada do ia henia, oi ura karaia gauna oi hagugurua totona.