Lau be lagani 1983 ai lau vara. Lau beibi neganai egu helt be ia namo, to egu mauri lagani be 10 neganai, egu tauanina ai hisihisi bada lau mamia matamaia. Bena lagani rua bamona murinai, daba ta lau noga bona lau marere diba lasi. Ena be lau hekwarahi egu aena lau hamarerea totona, to idia goada lasi. Unai nega amo lau raka lou diba lasi. Danu, unai gorere ese egu tubu dalana ia koua, bona hari egu toana be do natu maragina ta bamona.

Lau gorere bona hua haida bamona ruma sibona ai lau noho neganai, Iehova ena Witnes taudia rua idia vadivadi. Nega momo vadivadi taudia idia mai neganai lau hunia, to unai nega ai unai hahine lau abidia dae. Bona Paradaiso idia herevalaia lalonai, egu mauri lagani be faiv bamona neganai lau kamonai gauna lau laloatao. Unai negai, Suriname ai ia noho misinari ta ladana Jethro, be hua ta ta ai nega tamona emai hanua ia vadivadi bona egu tamana ida Baibel stadi ia karaia. Jethro be lau ia kara namo henia. Ia lau ura henia bada. Danu, egu tubudia be emai hanua ai, Witnes taudia edia hebou dekenai lau idia hakaua lao. Vadaeni lau idia vadivadi henia taihu ta ladana, Florence, ese lau ia nanadaia bema lau ura stadi neganai, lau gwau oibe.

Florence be ena adavana Justus ida ia giroa mai, bona lau ida Baibel stadi idia hamatamaia. Idia itaia duahiduahi lau diba lasi neganai, lau dekenai duahiduahi idia hadibaia. Bena gabeai, lau be sibona lau duahiduahi diba. Nega ta, unai headava tau bona hahine be lau idia hamaoroa idia be Suriname dekenai do idia lao, unuseniai haroro gaukara idia karaia totona. Madi, Orealla ai ta ia noho lasi egu Baibel stadi ia karaia totona. To, lau moale badina Iehova be lau ia laloaboio lasi.

Daudau lasi murinai, painia tadikaka ta ladana Floyd be Orealla dekenai ia mai, bona ruma-ta-ruma-ta haroro gaukara ai lau ia davaria. Baibel stadi totona lau ia nanadaia neganai, lau kiri. Ia henanadai, “Dahaka dainai oi kiri?” Ia lau hamaoroa lau be buklet ladana Dirava Ia Ura Dahaka Ita Karaia? lau haorea, bona Diba ese Mauri Dekenai Ita Ia Hakaua Lao * bukana amo stadi lau hamatamaia vadaeni. Ia dekenai stadi lau hadokoa ena badina lau gwauraia. Floyd ida Diba bukana ena stadi ai haorea, to ia danu idia siaia gabu ma  ta dekenai ia haroro totona. Ma ta ia noho lasi egu Baibel stadi ia karaia totona.

To lagani 2004 ai, spesel painia rua, Granville bona Joshua, be Orealla dekenai idia mai. Ruma-ta-ruma-ta ai idia haroro, bona lau idia davaria. Stadi totona lau idia nanadaia neganai, lau kiri. Idia lau noia Diba bukana do ai stadilaia lou. Lau ura diba bema idia hadibaia gaudia be egu hadibaia taudia gunadia ese idia hadibaia gaudia hegeregerena. Granville ese lau ia hamaoroa hebou be hanua dekenai idia karaia noho. Ena be lagani 10 bamona ruma lau rakatania lasi, to lau ura lau lao. Vadaeni, Granville ese wilsea ai lau ia atoa bona Kingdom Hall dekenai lau ia doria lao.

Gabeai, Granville be lau ia hagoadaia Tiokratik Haroro Sikuli lalonai lau vareai totona. Ia gwau: “Oi be diseibol, to oi herevadiba. Nega ta pablik tok do oi henia. Do ia vara momokani.” Iena hagoadaia herevadia ese lau dekenai goada ia henia.

Granville ida haroro gaukara lau karaia matamaia. To hanua ena dala momo be namo lasi wilsea totona. Unai dainai, Granville lau noia bema wilbaro ai lau ia udaia bona doria loaloa. Wilbaro be ia heau namonamo. Bena April 2005 ai, lau bapatiso. Daudau lasi murinai, tadikaka be treinini idia henia kongrigeisen ena buka bona magasin lau naria bona Kingdom Hall ai saun gaukara lau karaia totona.

To madi, lagani 2007 ai, egu tamana be bouti ai aksiden badana ia abia bena ia mase. Lau bona egu famili be ai lalohisihisi bada. Granville be ai ida ia guriguri bona Baibel amo hagoadaia herevadia ia gwauraia. Lagani rua murinai, dika ma ta ia vara dainai ai lalohisihisi bada. Madi, Granville ia mase. Hanuaboi ta ai ena bouti ia mutu bona dina rua murinai ena tauanina idia davaria.

Unai nega amo emai kongrigeisen maragina ai elda be lasi bona hesiai tauna be tamona sibona. Egu turana namona Granville ia mase dainai lau lalohisihisi bada. Ia be hanaihanai lau ia durua Iehova lau tura henia totona bona tauanina dalanai lau ia durua danu. Ia mase bona dina haida murinai, lau idia abia hidi Gima Kohorona stadi ai paragraf lau duahia totona. Paragraf rua lau duahia, to unai murinai lau tai matamaia bona lau hadokoa diba lasi bona platfom amo lau diho.

Kongrigeisen ma haida amo tadikaka idia mai Orealla dekenai ai idia durua totona, unai ese egu lalona ia hamoalea bada. Danu, brens ofesi ese spesel painia tadikaka ta ladana, Kojo idia siaia. Egu moale gauna ma ta be, egu sinana bona egu tadina mero be idia stadi matamaia bona idia bapatiso. Bena, March 2015 ai, lau dekenai hesiai tauna ena maduna idia henia. Daudau lasi murinai, egu pablik tok ginigunana lau henia. Unai dina ai, lagani haida gunanai Granville ese lau ia hamaoroa herevana lau laloa lou bena lau kiri bona tai. Ia gwau: “Nega ta pablik tok do oi henia. Do ia vara momokani.”

JW Broadcasting^® edia program amo lau itaia, tadikaka bona taihu ma haida danu be lau bamona. Ena be mai edia gorere, gau momo idia karaia diba bona idia moale. Lau danu be gau haida lau karaia diba. Lau ura egu goada lau gaukaralaia Iehova lau hesiai henia totona, unai dainai regula painia gaukara lau karaia. Bona September 2019 ai hadibaia hereva ta lau abia! Unai hua ai lau idia hadibaia elda gaukara totona lau idia abia hidi, emai kongrigeisen ena pablisa ibounai be 40 bamona.

Lau moale bada badina lau idia stadi henia tadikaka bona taihu ese lau idia durua Iehova lau hesiai henia totona. To, Iehova lau hanamoa bada, badina lau ia laloaboio lasi.