GUNA moni gaukara totona tano ma ta dekenai idia lao tadikaka taihu momo be hari edia hanua dekenai idia giroa. Idia be Iehova bona dekena taudia idia lalokau henia dainai, Basileia harorolaia taudia be momo lasi gabudia dekenai idia lao. (Mat. 22:37-39) Iehova hesiai henia totona dahaka gaudia idia dadaraia, bona dahaka hahenamo idia abia? Unai ita diba totona, mani Cameroon ai, western Africa dekenai ia vara gauna ita itaia.

Lagani 1998 ai, tadikaka ta ladana Onésime be ena tano Cameroon ia rakatania, bona lagani 14 tano ma ta ai ia noho. Nega ta, Keristani hebouna ta ai, haroro gaukara ia herevalaia ena haheitalai ta ia itaia. Tok henia tauna ia gwau: “Bema turana rua be gabu idauidau ai idia haoda, bona ta be gwarume momo ia veria to ta be lasi, gwarume momo ia veria lasi tauna be gwarume momo ia veria tauna ia haoda gabuna dekenai do ia lao, ani?”

Unai haheitalai dainai Onésime ia laloa, haoda gabuna namona, Cameroon dekenai do ia giroa lou, unuseniai idia noho pablisa taudia ia durua totona. To gau haida ia laloa danu. Lagani momo tano ma ta ai ia noho dainai, do ia hegeregere ena hanua maurina ia noholaia totona? Unai ia diba totona, Onésime be Cameroon dekenai ia lao bona hua siks ia noho. Bena lagani 2012 ai, ia giroa bona unuseniai ia noho.

Onésime ia gwau: “Lau hekwarahi inai gabu ena siahu bona noho dalana lau manadalaia totona. Bona Kingdom Hall ai, lau be fom aukadia dekenai helai karana lau manadalaia be namo.” Mai kiri ida ia gwau: “To, program lau kamonai namonamo neganai, lau ia durua fom aukana dekenai lau helai karana lau laloaboio totona.”

Lagani 2013 ai, Onésime be Géraldine ia adavaia. Géraldine be France dekenai lagani 9 ia noho murinai ia giroa lou. Unai headava tau bona hahine be edia mauri lalonai tiokratik gaukaradia idia atoa guna dainai dahaka hahenamo idia moalelaia? Onésime ia gwau: “Ai ruaosi be Basileia Evanelia Sikuli dekenai ai lao bona Betele dekenai ai gaukara danu. Vanegai, lagani tamona lalonai emai kongrigeisen dekenai Baibel stiuden 20 idia bapatiso. Hari lau mamia, lau be ‘haoda’ gabuna maorona dekenai lau noho.” (Mar. 1:17, 18) Géraldine ma ia gwau: “Hahenamo momo lau abia.”

Judith be United States dekenai ia lao, to ia ura dikadika ena haroro gaukara ia habadaia. Ia gwau: “Cameroon dekenai egu famili lau vadivadi henidia bona do lau giroa lou negadia ibounai lau tai, badina Baibel stadi haida lau hamatamaia bona idia do lau rakatania.” To, Judith be Cameroon dekenai ia  giroa lou totona ia daradara. Ia be pei bada moni gaukara ta ia karaia unai amo Cameroon ai, ena tamana ese ia abia medikol heduru ena davana ia karaia diba. To, Judith be Iehova ia abidadama henia dainai, Cameroon dekenai ia giroa lou. Ia gwau, guna United States dekenai ia noho bona ia moalelaia gaudia haida ia reaia. Judith be Iehova ia guriguri henia ia do ia durua gau haida ia haidaua totona, bona sekit tauna ta mai ena adavana ese idia hagoadaia danu.

Judith be guna ia karaia gaudia ia laloa lou, bona ia gwau: “Lagani toi lalonai, lau be taunimanima foa lau durua bapatiso idia abia totona.” Judith be spesel painia gaukara ia hamatamaia. Hari, ia be ena adavana Sam-Castel ida, sekit gaukara idia karaia. To, Judith ena tamana dekenai dahaka ia vara? Judith bona ena famili be tano ma ta dekenai hospital ta idia davaria, bona ena tamana be unuseniai opereisen ia abia davana lasi, bona unai ese ia durua bada.

Tadikaka ta ladana Victor be Canada dekenai ia giroa lou. Ia be Gima Kohorona ta ai edukeisen badana ia herevalaia atikol ta ia duahia murinai, ena sikuli ia laloa. Iunivesiti ai ia karaia kosi ia rakatania bona teknikol kosi kwadogina ta ia karaia. Ia gwau: “Unai ese lau ia durua moni gaukara lau abia haraga, bona lau ura henia dikadika gaukarana, painia gaukara lau karaia.” Gabeai, Victor be Caroline ia adavaia, bona idia ruaosi be Cameroon idia vadivadi. Unuseniai, brens ofesi idia vadivadi neganai, tadikaka haida ese idia hagoadadia Cameroon dekenai painia gaukara idia laloa totona. Victor ia gwau: “Unai ai dadaraia lasi, bona ai be kohu momo lasi maurina ai noholaia dainai, edia hereva ai abia dae.” Ena be Caroline be mai ena gorere, to abia hidi idia karaia Cameroon dekenai do idia lao.

Victor bona Caroline be regula painia gaukara idia karaia, badina taunimanima momo idia ura Baibel amo diba idia abia. Matamanai, idia haboua moni sisina idia gaukaralaia. Gabeai, hua haida lalonai Canada dekenai idia gaukara, unai amo Cameroon dekenai idia giroa lou bona painia gaukara idia karaia noho. Dahaka hahenamo idia moalelaia? Basileia Evanelia Sikuli dekenai idia lao, spesel painia gaukara idia karaia, bona hari konstraksen gaukara idia karaia. Victor ia gwau: “Mauri namona ai rakatania bona Iehova dekenai ai tabekau dainai, ai mamia ia ese ai ia naria.”

Lagani 2002 ai, Alain, Germany iunivesiti dekenai ia sikuli stiuden ta be inai pepapepa Matamata Taudia E​—Emui Mauri be Edena Bamona Do Umui Gaukaralaia? ia duahia. Ia duahia infomeisen ese ia durua tahua gaudia matamatadia ia atoa totona. Lagani 2006 ai, Hesiai Gaukara Hadibaia Sikulina dekenai ia lao, bona ia vara tanona, Cameroon dekenai idia siaia hesiai gaukara ia karaia totona.

Cameroon dekenai, Alain be pat-taim moni gaukara ia davaria. Gabeai, moni gaukara namona ta ia abia, to ia lalohekwarahi badina ena nega do ia hegeregere lasi haroro bona hadibaia gaukara ia karaia totona. Unai dainai ia idia abia hidi spesel painia ai do ia lao neganai, mai ura bada ida ia abia dae. Ena bosi ia ura ena pei ia habadaia, to Alain ia ura lasi bona spesel painia ai ia lao. Gabeai, Alain be Stéphanie ia adavaia, ia be France dekenai lagani momo ia noho. Stéphanie be Cameroon dekenai ia lao murinai, dahaka hekwakwanai haida ia davaria?

Stéphanie ia gwau: “Cameroon ai egu helt ia namo lasi, to hanaihanai medikol heduru lau abia bona unai ese lau ia durua.” Unai headava  tau bona hahine be edia haheauka karana dainai hahenamo idia abia. Alain ia gwau: “Daudau hanua ta ladana Katé dekenai ai lao haroro neganai, ai itaia haida idia ura Baibel idia stadilaia. Gabeai, fon amo idia ida Baibel stadi ai karaia. Bona Baibel stiuden rua be bapatiso idia abia, bona grup ta ai hamatamaia.” Stéphanie ma ia gwau: “Taunimanima ita durua Iehova dekenai edia mauri idia gwauhamatalaia ena moale be bada. Iniseniai hesiai gaukara ai karaia dainai nega momo unai bamona moale ai mamia.” Hari, Alain bona Stéphanie be sekit gaukara idia karaia.

Gisèle be Italy dekenai medikol sikuli ia karaia noho lalonai bapatiso ia abia. Ia itaia ia idia stadi henia painia headava taudia rua be kohu momo lasi maurina idia noholaia, unai dainai ia ura ena haroro gaukara ia habadaia. Unai dainai Gisèle be ia sikuli noho lalonai regula painia gaukara ia hamatamaia.

Gisèle ia ura Cameroon dekenai Iehova ena hesiai gaukara ia karaia, to gau haida ia laloa momo. Ia gwau: “Italy dekenai lau noho ena gwaumaoro do lau dadaraia, bona Italy dekenai idia noho turadia bona famili amo do lau daudau.” Ena be unai gaudia ia laloa, to May 2016 ai, Gisèle be Cameroon dekenai ia giroa lou. Gabeai, ia be Léonce ia adavaia, bona Cameroon brens ofesi ese ia noidia Ayos dekenai idia lao totona. Unai taoni dekenai Basileia harorolaia taudia be momo lasi.

Ayos dekenai edia noho dalana be edena bamona? Gisèle ia gwau: “Wiki momo lalonai paoa be lasi, bona emai mobael fon ai charge diba lasi. Nega momo unai bamona ia vara. Lahi amo aniani nadua karana lau manadalaia, bona hanuaboi ai ranu abia gabuna dekenai momo idia noho lasi neganai wilbaro bona tosi ai abia, bona ai lao ranu ai abia totona.” Dahaka ese Gisèle bona ena adavana ia durua idia haheauka totona? Gisèle ia gwau: “Iehova ena lauma helaga, headava tura namona ta, famili bona turadia edia hagoadaia herevadia bona heduru dainai ai haheauka noho.”

Gisèle be ia vara tanona dekenai ia giroa lou dainai ia moale, a? Ia gwau: “Oibe! Matamanai, hekwakwanai idia vara bona ai lalohekwarahi, to unai gaudia ai hanaia murinai, lau bona egu tau ai mamia ai ura karaia gauna ai karaia. Iehova ai abidadama henia bona ia kahirakahira ai noho.” Léonce bona Gisèle be Basileia Evanelia Sikuli dekenai idia lao, bona hari idia be nega sisina lalonai spesel painia gaukara idia karaia noho.

Haoda taudia idia gaukara goada gwarume idia tahua hegeregerena, edia tano dekenai idia giroa taudia be mai ura ida gau haida idia dadaraia, Basileia sivaraina idia abia dae kudou maoro taudia idia durua totona. Momokani, unai gaukara goadagoada pablisa taudia Iehova ese ia laloa bada, badina iena ladana dainai edia lalokau idia hahedinaraia. (Neh. 5:19; Heb. 6:10) Bema oi be tano ma ta dekenai oi noho bona oi itaia, oi vara tanona ai Basileia harorolaia pablisa be momo lasi, emu tano dekenai oi giroa diba, a? Bema unai bamona oi karaia, Iehova ese oi do ia hanamoa.​—Aon. 10:22.