1-2. (a) Dahaka dainai headava matamata taudia be Iehova dekenai idia tabekau be namo? (Salamo 37:3, 4) (b)  Inai atikol ai dahaka do ita herevalaia?

OI BE kahirakahira do oi headava, eiava oi be headava matamata tauna, a? Bema oibe, reana oi lalokau henia bada tauna ida mauri do umui moalelaia negana oi naria noho. Momokani, headava lalonai hekwakwanai idia vara danu. Bona headava matamata taudia be abia hidi badadia idia karaia diba. Unai neganai idia karaia gaudia ese do ia hahedinaraia, lagani momo lalonai idia moale eiava lasi. Bema Iehova dekenai idia tabekau, idia ese abia hidi maorodia do idia karaia, edia headava do ia goada, bona do idia moale. To bema Dirava ena sisiba idia badinaia lasi, edia headava lalonai hekwakwanai momo do idia davaria, bona do idia moale lasi.​—Salamo 37:3, 4 duahia.

² Ena be inai atikol be headava matamata taudia totona, to headava taudia ibounai ese idia davaria hekwakwanai idauidau do ia herevalaia. Danu, atikol ese Baibel lalonai abidadama tatau bona hahine edia haheitalai amo do ita dibaia gaudia do ia herevalaia. Baibel ese ia sivarailaia taudia edia haheitalai amo ita bona headava taudia do ia durua idia ita tohotohoa totona. Bona hari idia noho headava taudia edia haheitalai amo ita dibaia gaudia do ita herevalaia danu.

3-4. Headava matamata taudia be edena hekwakwanai idia davaria diba?

³ Haida ese headava matamata taudia idia hagoadaia edia mauri ai gau momo idia tahua totona. Hegeregere, tama sina bona varavara ese headava matamata tau bona hahine  idia hamaoroa loulou natudia idia havaraia totona. Eiava turadia bona famili ese headava matamata taudia idia hagoadaia, ruma idia hoia bona kohu namodia amo idia hahonua diba.

⁴ Bema headava matamata tau bona hahine idia naria namonamo lasi, edia abia hidi dainai abitorehai momo do idia karaia diba. Bena hora momo idia gaukara unai abitorehai ena davana idia haloua totona. Bona edia nega be hegeregere lasi sibona edia stadi, ruma bese ena tomadiho, bona haroro gaukara idia karaia totona. Bona reana kongrigeisen heboudia do idia reaia, badina moni ma haida abia totona eiava edia gaukara idia haboioa lasi totona ovataim gaukara idia karaia. Unai dainai, Iehova hesiai henia karana lalonai idia vara gau namodia idia reaia.

5. Klaus bona Marisa edia haheitalai amo dahaka ita dibaia?

⁵ Ekspiriens momo ese idia hamomokania, bema iseda mauri lalonai kohu haboua karana ita atoa guna, do ita moale lasi. Klaus bona Marisa ese idia dibaia gaudia haida mani ita laloa. * Idia headava neganai, idia ruaosi be ful-taim moni gaukara idia karaia, moni bona kohu momo idia haboua totona. To, moale korikori idia davaria lasi. Klaus ia gwau: “Ai ura henia gaudia ibounai idia noho, to Iehova ena hesiai gaukara ai habadaia totona tahua gaudia ai atoa lasi. Momokani, emai mauri ia auka bona metau idauidau ai davaria.” Reana oi itaia danu, kohu momo tahua karana ese moale korikori ia havaraia lasi. Bema unai ia vara, oi lalomanoka lasi. Ma haida edia haheitalai namodia oi laloa, unai ese oi do ia durua gau haida oi haidaua totona. Ginigunana be, King Iehosapata ena haheitalai amo headava tatau ese do idia dibaia gaudia mani ita herevalaia.

6. King Iehosapata ese hekwakwanai badana ia davaria neganai, edena dala ai Aonega Herevadia 3:5, 6 ena sisiba ia badinaia?

⁶ Headava tatau e, nega haida umui laloa emui maduna be ia metau bona umui huaia diba lasi, a? Bema oibe, King Iehosapata ena haheitalai ese umui do ia durua. Ia be king dainai, iena maduna be bese ibounai do ia naria namonamo! Edena dala ai unai maduna badana ia huaia namonamo? Iehosapata ia gaukara goada iena bese taudia ia gimaia totona. Ia ese Iuda ena siti idauidau edia magu ia haginia auka bona tuari tatau 1,160,000 ia haboua. (2 Siv. 17:12-19) Gabeai, Iehosapata be hekwakwanai badana ta ia davaria. Amono taudia, Moaba taudia, bona Seiri ororo gabudia ai idia noho taudia ese edia tuari orea badana idia haboua bona Iehosapata, iena famili, bona ena taunimanima idia tuari henia. (2 Siv. 20:1, 2) Iehosapata be dahaka ia karaia? Ia ese Iehova dekenai heduru bona goada abia totona ia noinoi. Ia ese  Aonega Herevadia 3:5, 6 ena sisiba ia badinaia. (Duahia.) 2 Sivarai 20:5-12 ai, Iehosapata be ia manau dainai ia guriguri, unai ese ia hahedinaraia ia be Iehova ia abidadama henia momokani. Edena dala ai Iehova be Iehosapata ena guriguri ia haerelaia?

7. Edena dala ai Iehova be Iehosapata ena guriguri ia haerelaia?

⁷ Iehova ese Levi tauna, Iahasiele, ia gaukaralaia Iehosapata ia hereva henia totona. Iehova ia gwau: “Emui gabu dekenai umui gini, umui marere lasi, bona Iehova ese umui do ia hamauria dalana do umui itaia.” (2 Siv. 20:13-17) Unai be tuari dala idauna, ani? To, unai hadibaia herevadia be Iehova amo ia mai, to tau ta amo lasi. Iehosapata be unai hadibaia hereva ibounai ia badinaia. Ia bona ena taunimanima be edia inai taudia tuari henia totona idia lao neganai, tuari taudia idia raka guna lasi, to ane abia taudia idia raka guna. Iehova ese Iehosapata ia rakatania lasi, bona edia inai taudia ia halusia.​—2 Siv. 20:18-23.

8. Iehosapata ena haheitalai amo headava tatau be dahaka idia dibaia?

⁸ Headava tatau e, Iehosapata ena haheitalai amo gau momo do umui dibaia. Emui famili naria karana be emui maduna, unai dainai umui gaukara goada idia umui gimaia bona durua totona. Hekwakwanai umui davaria neganai, reana umui laloa umui sibona ese unai umui hanaia diba. To, sibona emui goada dekenai umui tabekau lasi. Namona be Iehova ena heduru abia totona umui guriguri. Danu, emui adavana ida umui guriguri goadagoada. Bona Iehova ena lalohadai umui diba totona, Baibel bona Dirava ena orea amo idia mai pablikeisen umui stadilaia, bona umui dibaia gaudia umui badinaia. Baibel ena hereva hegeregerena abia hidi umui karaia dainai, reana haida do idia moale lasi, bona do idia gwau umui be kavakava. Reana do idia gwau moni bona kohu ese emui ruma bese do ia naria namonamo. To Iehosapata ena haheitalai umui laloatao. Ia ese Iehova ia abidadama henia bona ena kara amo unai ia hamomokania. Iehova ese unai abidadama tauna ia rakatania lasi, bona umui danu do ia rakatania lasi. (Sal. 37:28; Heb. 13:5) Headava taudia be dahaka do idia karaia, unai amo edia mauri idia moalelaia diba?

9. Isaia bona ena adavana dekenai dahaka be mai anina bada?

⁹ Peroveta tauna Isaia bona ena adavana edia mauri lalonai Iehova hesiai henia karana be mai anina. Isaia be peroveta tauna, bona reana iena adavana be peroveta gaukara haida ia karaia danu, badina ia idia gwauraia “peroveta hahinena.” (Isa. 8:1-4) Isaia bona ena adavana ese Iehova tomadiho henia karana idia atoa guna. Idia ese headava taudia totona haheitalai namona idia hahedinaraia, ani?

10. Edena dala ai peroveta herevadia stadilaia karana ese headava taudia ia durua, Iehova ena hesiai gaukara idia habadaia totona?

¹⁰ Hari inai negai, headava taudia ese Isaia bona ena adavana idia tohotohoa bona idia gaukara goada Iehova idia hesiai henia totona. Idia ese Baibel ena peroveta herevana ta idia stadilaia hebou bona ena guguru dalana idia itaia karana amo Iehova dekenai edia abidadama ia hagoadaia diba. * (Tito 1:2) Bona Baibel ena peroveta hereva haida edia guguru karana durua totona idia karaia diba gaudia idia laloa.  Hegeregere, Iesu ia peroveta dokona ia do ginidae lasi neganai sivarai namona be tanobada ibounai dekenai do idia harorolaia, bona headava taudia ese unai peroveta herevana ena guguru karana idia durua diba. (Mat. 24:14) Headava tau bona hahine ese peroveta herevana ia guguru dalana idia itaia neganai, unai ese idia do ia hagoadaia Iehova ena hesiai gaukara idia habadaia totona.

11. Prisikila bona Akwila be dahaka idia karaia diba, bona dahaka dainai?

¹¹ Headava matamata taudia be Prisikila bona Akwila amo gau haida do idia dibaia, idia be Iuda taudia bona Roma ena siti dekenai idia noho. Idia ese Iesu ena sivarai namona idia kamonai bona Keristani taudia ai idia lao. Momokani, edia mauri durua gaudia momo idia noho. To, Pavapava Klaudio ese oda ia henia Iuda taudia ibounai be Roma do idia rakatania neganai, edia mauri dalana ia idau haraga. Unai nega ai Akwila bona Prisikila dekenai idia vara gaudia mani ita laloa. Idia manadalaia gabuna do idia rakatania, noho gabu matamata do idia tahua, bona palai turia gaukara ena bisinesi do idia karaia lou. Unai senisi dainai Iehova ena hesiai gaukara do idia habadaia, a? Reana unai henanadai ena haere oi diba vadaeni. Akwila bona Prisikila be Korinto ai noho gabu matamata idia davaria neganai, idia ese unai kongrigeisen idia durua bona aposetolo Paulo ida idia gaukara hebou tadikaka taihu idia hagoadaia totona. Gabeai, taoni bona hanua ma haida dekenai idia lao haroro gaukara idia habadaia totona. (Kara 18:18-21; Roma 16:3-5) Oibe, edia mauri lalonai idia bisi bada bona idia moale!

12. Dahaka dainai headava tau bona hahine be Iehova hesiai henia totona tahua gaudia idia atoa?

¹² Hari inai negai, headava taudia ese Basileia gaudia idia tahua guna karana amo Prisikila bona Akwila idia tohotohoa diba. Headava tau bona hahine idia hetura noho lalonai, unai be nega namona edia tahua gaudia idia herevalaia totona. Tau bona hahine be Iehova hesiai henia totona, tahua gaudia idia atoa bona idia gaukara goada unai idia hagugurua neganai, Iehova ese  dala idauidau ai idia do ia durua. (Had. 4:9, 12) Russell bona Elizabeth edia sivarai ita laloa. Russell ia gwau, “Ai hetura noho lalonai, Iehova totona do ai karaia gaudia ai herevalaia hebou.” Elizabeth ia gwau, “Ai ese unai tahua gaudia ai herevalaia hebou, unai amo gabeai do ai karaia abia hidi idauidau ese emai tahua gaudia do ia koua lasi.” Russell bona Elizabeth be mauri lalonai gau momo idia tahua lasi dainai, Micronesia ai pablisa momo lasi gabudia dekenai idia lao bona hesiai gaukara idia karaia.

13. Salamo 28:7 hegeregerena, Iehova ita abidadama henia neganai dahaka do ia vara?

¹³ Russell bona Elizabeth hegeregerena, headava taudia momo be kohu momo maurina idia tahua lasi dainai, nega bada ia noho haroro bona hadibaia gaukara idia karaia totona. Idia ese Iehova hesiai henia totona tahua gaudia idia atoa bona idia gaukara hebou unai gaudia idia hagugurua neganai, namo do idia davaria. Iehova ese idia ia naria dalana do idia itaia, Ia dekenai edia abidadama do ia goada, bona moale korikori do idia davaria.​—Salamo 28:7 duahia.

14. Edena dala ai aposetolo Petero bona ena adavana ese Mataio 6:25, 31-34 ai ia noho gwauhamata idia abidadama henia?

¹⁴ Headava taudia ese aposetolo Petero bona ena adavana edia haheitalai amo gau haida do idia dibaia. Aposetolo Petero ese Iesu ia hedavari henia bona reana hua 6 eiava lagani ta murinai, ia be mai anina bada abia hidi ta ia karaia. Petero be ena famili naria totona haoda gaukara ia karaia. Unai dainai Iesu ese ia boiria ful-taim gaukara do ia karaia neganai, Petero be ena famili edia noho dalana ia laloa danu be namo. (Luka 5:1-11) To, Petero be abia hidi ia karaia Iesu ida haroro gaukara idia karaia totona. Oibe, ia ese abia hidi maorona ia karaia! Ita gwau diba Petero ena adavana ese unai abia hidi ia durua danu. Baibel ese ia hahedinaraia Iesu ia toreisi lou murinai, Petero ena loaloa gaukarana haida lalonai ena adavana ese ia bamoa. (1 Kor. 9:5) Momokani, ia be Keristani hahine namona dainai, Petero be mai gari lasi ida Baibel ai Keristani tatau bona hahine totona sisiba herevadia ia torea diba. (1 Pet. 3:1-7) Unai ese ia hahedinaraia, Petero bona ena adavana be Iehova ena gwauhamata idia abidadama henia, unai be Basileia idia tahua guna neganai Dirava ese idia do ia naria.​—Mataio 6:25, 31-34 duahia.

15. Tiago bona Esther edia sivarai amo dahaka oi dibaia?

¹⁵ Bema umui be lagani haida umui headava vadaeni, edena dala ai Iehova ena hesiai gaukara do umui habadaia? Dala ta be, headava taudia haida edia ekspiriens idauidau umui duahia. Hegeregere, kahana haida, “Mai Ura ida Sibona Idia Henia” umui duahia be namo. Unai bamona atikol ese Brazil dekenai headava taudia Tiago bona Esther ia durua dainai, idia ura bada pablisa momo lasi gabuna dekenai idia lao bona idia haroro. Tiago ia gwau: “Iehova ese hari ena hesiai taudia ia durua daladia ai duahia neganai, ai ura Iehova ena hereva ai badinaia bona ena heduru ai mamia danu.” Gabeai Paraguay dekenai idia lao, bona unuseniai lagani 2014 amo Portuguese gado kongrigeisen idia durua noho. Esther ia gwau: “Ai ese Efeso 3:20 ena hereva ai ura henia bada. Nega momo, hesiai gaukara lalonai unai hereva idia guguru dalana ai itaia.” Paulo ese Efeso taudia ia tore henia neganai, ia gwauhamata Iehova be ita noia gaudia sibona do ia henia  lasi, to gau momo do ia henia. Nega ibounai unai gwauhamata ia guguru, ani?

16. Headava matamata taudia be edia tahua gaudia idia lalohadailaia lalonai, daidia edia heduru idia tahua diba?

¹⁶ Iehova idia abidadama henia taudia edia sivarai amo headava matamata taudia ia durua diba. Headava taudia haida be lagani momo lalonai ful-taim hesiai gaukara idia karaia. Bema emui tahua gaudia umui lalohadailaia noho, unai bamona taudia amo heduru umui tahua be namo. Unai amo umui hahedinaraia Iehova umui abidadama henia. (Aon. 22:17, 19) Danu elda taudia ese headava matamata taudia idia durua, Iehova hesiai henia totona tahua gaudia idia atoa bona hagugurua totona.

17. Klaus bona Marisa dekenai dahaka ia vara, bona edia haheitalai amo dahaka ita dibaia?

¹⁷ Nega haida ita ura Iehova hesiai henia gaukarana ta ita habadaia, to Iehova ese dala ma ta ai ita ia gaukaralaia ia ita hesiai henia totona. Unai be matamanai ita herevalaia headava taudia, Klaus bona Marisa, dekenai ia vara. Idia headava bona lagani toi murinai, edia gabu idia rakatania bona Finland brens dekenai konstraksen gaukara idia karaia. To, gabeai idia kamonai unuseniai hua 6 sibona do idia noho. Matamanai, idia lalohisihisi bada. To daudau lasi murina, idia boiridia Arabia gado idia dibaia totona, bona hari tano ma ta ai mai moale ida Arabia gado kongrigeisen idia durua noho. Marisa be idia vara gaudia ia laloa lou neganai, ia gwau: “Matamanai lau gari lau karaia lasi gaudia lau karaia totona, bona Iehova dekenai lau tabekau be namo. To Iehova ese nega ibounai ai ia durua daladia lau itaia. Unai dainai, Iehova dekenai egu abidadama ia goada ia lao.” Unai haheitalai ese ia hahedinaraia, namona be ita abia dae bema Iehova ita abidadama henia momokani, ia ese ita do ia hanamoa.

18. Headava taudia ese Iehova idia abidadama henia noho totona, dahaka idia karaia be namo?

¹⁸ Headava be Iehova ena harihari gauna. (Mat. 19:5, 6) Iehova ia ura headava taudia ese unai harihari gauna idia moalelaia. (Aon. 5:18) Headava matamata taudia e, namona be emui mauri dalana umui tahua namonamo. Iehova ese umui dekenai ia henia harihari gaudia dainai, umui gaukara goada ia umui tanikiu henia, a? Iehova umui guriguri henia. Baibel ena hakaua hereva namodia umui tahua, abia hidi maorodia umui karaia totona. Bena Iehova ese ia henia sisiba umui badinaia. Bema emui mauri lalonai Iehova hesiai henia gaukarana umui tahua guna, umui diba momokani, emui mauri do umui moalelaia bona namo do umui davaria!