1. Iehova ese ita ia hagoadaia dahaka ita karaia totona?

IEHOVA ia ura bada noho hanaihanai lalokauna ia hahedinaraia. (Hos. 6:6) Bona ena hesiai taudia ia hagoadaia unai bamona idia karaia totona. Dirava be peroveta tauna Mika amo ita ia hagoadaia, “noho hanaihanai lalokauna” ita ura henia totona. (Mika 6:8, ftn.) To, unai ita do karaia lasi neganai, noho hanaihanai lalokauna be dahaka ita diba be namo.

2. Noho hanaihanai lalokauna be dahaka?

² Noho hanaihanai lalokauna be dahaka? Nega Matamata Trensleisen Ena Buka Helaga ai, “Baibel Ena Diksenari” ena kahana ai unai hereva ena anina be, “ta badinaia momokani, abidadama henia, bona laloa bada karana ia hahedinaraia. Nega momo ia be Dirava ese taunimanima ia lalokau henia karana ia herevalaia, to taunimanima rua huanai ia noho lalokauna ia herevalaia danu.” Unai bamona lalokauna dekenai, Iehova be haheitalai namona ia hahedinaraia. Inai atikol ai, Iehova be taunimanima dekenai noho hanaihanai lalokauna ia hahedinaraia dalana do ita herevalaia. Atikol 45 ai, ita ese Iehova ita tohotohoa bona ta ta dekenai noho hanaihanai lalokauna ita hahedinaraia dalana do ita herevalaia.

3. Iehova be Mose dekenai dahaka ia gwau?

³ Israela taudia be Aigupito amo idia raka-lasi bona daudau lasi murinai, Iehova be Mose dekenai ena ladana bona kara ia gwauraia hedinarai. Ia gwau: “Lau be Iehova, lau Iehova be hebogahisi Diravana, lau badu haraga lasi, egu lalokau be bada herea bona nega ibounai egu hereva lau hamomokania. Uru tausen momo dekenai lalokau lau hahedinaraia, kerere bona  kara dika lau gwauatao.” (Eso. 34:6, 7) Unai hereva namodia amo, Iehova ese Mose ia hamaoroa ena noho hanaihanai lalokauna be mai anina bada. Dahaka dainai?

4-5. (a) Iehova be dahaka ia gwau? (b) Dahaka henanadai do ita herevalaia?

⁴ Iehova ia gwau ena noho hanaihanai lalokauna be “bada herea.” Baibel ese nega 6 inai hereva “lalokau be bada herea” ia gaukaralaia. (Num. 14:18; Neh. 9:17; Sal. 86:15; 103:8; Ioe. 2:13; Iona 4:2) Baibel ai unai hereva be Iehova sibona dekenai ia gaukaralaia. Baibel ese nega momo Iehova ena noho hanaihanai lalokauna ia herevalaia dalana be namo herea, ani? Unai dainai, Iehova dekenai noho hanaihanai lalokauna be mai anina bada. King Davida ia gwau: “Iehova e, emu lalokau be bada herea, ena bada ese guba ia abia. . . . Dirava e, emu lalokau karadia be namo herea! Emu apena ena ikerukeru ai taunimanima idia hunia diba.” (Sal. 36:5, 7) Davida bamona, ita ese Dirava ena noho hanaihanai lalokauna ita laloa bada, a?

⁵ Noho hanaihanai lalokauna ita lalopararalaia totona, inai henanadai rua mani ita herevalaia: Iehova ese daika dekenai noho hanaihanai lalokauna ia hahedinaraia? Bona Iehova ese ita dekenai unai lalokau ia hahedinaraia neganai, dahaka namo ita davaria?

6. Iehova ese daika dekenai noho hanaihanai lalokauna ia hahedinaraia?

⁶ Iehova ese daika dekenai noho hanaihanai lalokauna ia hahedinaraia? Baibel ia gwau gau momo ita ura henia diba, hegeregere “biru gaukara,” “matahakani,” “diba,” “wain bona oela,” bona “aonega.” (2 Siv. 26:10; Aon. 12:1; 21:17; 29:3) To, Dirava ese noho hanaihanai lalokauna be ia idia tura henia namonamo taudia sibona dekenai ia hahedinaraia, to gau ta dekenai ia hahedinaraia lasi. Oibe, iseda Dirava ese ena turadia ia abidadama henia momokani. Ia ese idia dekenai helaro namona ia henia, bona idia do ia lalokau henia hanaihanai.

7. Edena dala ai Iehova ese taunimanima ibounai dekenai lalokau ia hahedinaraia?

⁷ Iehova be taunimanima ibounai dekenai lalokau ia hahedinaraia. Iesu ese Nikodemo ia hamaoroa, ia gwau: “Dirava ese tanobada [taudia] ia lalokau henia bada dainai, ena Natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.”​—Ioa. 3:1, 16; Mat. 5:44, 45.

8-9. (a) Dahaka dainai Iehova be ena hesiai taudia dekenai noho hanaihanai lalokauna ia hahedinaraia? (b) Dahaka do ita herevalaia?

⁸ Matamanai ita herevalaia bamona,  Iehova be ena tura namodia sibona dekenai noho hanaihanai lalokauna ia hahedinaraia. King Davida bona peroveta tauna Daniela edia hereva amo unai ita hamomokania diba. Hegeregere, Davida ia gwau: “Oi idia diba taudia dekenai emu lalokau oi hahedinaraia noho.” “Iehova ena lalokau be do ia noho hanaihanai, ia idia gari henia taudia dekenai.” Bona Daniela ia gwau: “Iehova e, oi be Dirava badana, . . . oi idia lalokau henia bona emu oda hereva idia badinaia taudia dekenai emu lalokau oi hahedinaraia noho.” (Sal. 36:10; 103:17; Dan. 9:4) Unai siri ese idia hahedinaraia, Iehova ese ia idia diba, gari henia, lalokau henia, bona ena oda hereva idia badinaia taudia dekenai noho hanaihanai lalokauna ia hahedinaraia. Oibe, dala maorona ai Iehova idia hesiai henia taudia sibona dekenai Iena noho hanaihanai lalokauna ia hahedinaraia.

⁹ Iehova ita do hesiai henia lasi neganai, iena lalokau be taunimanima ibounai dekenai ia hahedinaraia. (Sal. 104:14) To, ita be Iehova ita tomadiho henia dainai, iena noho hanaihanai lalokauna amo namo ita abia danu. Momokani, Iehova be ena hesiai taudia ia hamaoroa: “Umui dekenai egu lalokau be do ia doko lasi.” (Isa. 54:10) Oibe, Davida be unai ia diba dainai ia gwau, “Iehova ese ia idia badinaia taudia be dala namo hereana ai do ia kara henia.” (Sal. 4:3) Unai ese ita ia hagoadaia dahaka ita karaia totona? Salamo torea tauna ia gwau: “Ia aonega tauna be unai gaudia do ia laloa, bona ia be Iehova ese ia hahedinaraia lalokau do ia laloa namonamo.” (Sal. 107:43) Unai hakaua herevadia ita laloa, bona Iehova ese ena hesiai taudia dekenai noho hanaihanai lalokauna ia hahedinaraia amo namo ita davaria daladia toi do ita herevalaia.

10. Ita diba Dirava ese hanaihanai ita ia lalokau henia, unai ese edena dala ai ita ia durua? (Salamo 31:7)

¹⁰ Dirava ena lalokau be ia noho hanaihanai. Salamo 136 ai, unai kara badana be nega 26 ia herevalaia. Siri ginigunana dekenai ia gwau: “Iehova tanikiu henia, badina ia be namo. Iena lalokau be ia noho hanaihanai.” (Sal. 136:1) Siri 2 ia lao 26 ai inai hereva, “iena lalokau be ia noho hanaihanai” be nega momo ia hedinarai. Salamo 136 ita  duahia neganai, ita hoa badina Iehova ese ena noho hanaihanai lalokauna be dala idauidau ai ia hahedinaraia bona ia hesiku lasi. Baibel ai inai hereva “iena lalokau be ia noho hanaihanai” ia hedinarai loulou, unai amo ita diba Dirava ena lalokau ena hesiai taudia dekenai be ia idau lasi. Bona Iehova be idia dekenai ia hesiku haraga lasi, unai ese ita ia hagoadaia! Momokani, Iehova be ena hesiai tauna ia lalokau henia matamaia neganai, ia rakatania diba lasi, bona hekwakwanai negadia ai, ia durua noho. Namo ita abia dalana: Iehova be ita kahirakahira ia noho, unai ita diba dainai ita moale bona ita ia hagoadaia hekwakwanai idauidau ita haheaukalaia totona bona Iehova ita hesiai henia noho.​—Salamo 31:7 duahia.

11. Salamo 86:5 hegeregerena, dahaka dainai Iehova be dika ia gwauatao?

¹¹ Dirava be ena noho hanaihanai lalokauna dainai dika ia gwauatao. Iehova ena lalokau be ia noho hanaihanai dainai, ia itaia ta be ena kara dika amo ia helalo-kerehai neganai, iena dika ia gwauatao. Salamo torea tauna Davida ese Iehova be inai bamona ia herevalaia, ia gwau: “Ia ese iseda kara dika hegeregerena ita ia kara henia lasi, bona iseda kerere hegeregerena davana ia henia lasi.” (Sal. 103:8-11) Davida ia diba, bema ta be kara dika badana ta ia karaia, do ia lalohisihisi bada. To danu ia dibaia gauna be inai, Iehova be ia “noho hegaegae dika gwauatao totona.” Dahaka dainai Iehova be dika ia gwauatao? Salamo 86:5 ese unai ia haerelaia. (Duahia.) Oibe, Davida ena guriguri hegeregerena, Iehova idia tahua taudia dekenai ena lalokau be bada herea, unai dainai edia dika ia gwauatao.

12-13. Bema kara dika gunadia dainai ita lalohisihisi noho, dahaka ese ita do ia durua?

¹² Ta ia kara dika dainai ia lalohisihisi neganai, unai be maoro. Unai ese do ia durua Dirava ia noia ena dika ia gwauatao bona ena kara ia haidaua diba. To, Dirava ena hesiai taudia haida be edia kara dika gunadia dainai idia do lalohisihisi noho. Ena be Iehova ena heduru idia noia bona edia kara dika idia rakatania vadaeni, to idia laloa Iehova ese edia dika do ia gwauatao lasi. Bema oi lalopararalaia Iehova ia ura oi dekenai ena noho hanaihanai lalokauna ia hahedinaraia, unai ese oi do ia durua lalohadai kererena oi hanaia totona.

 ¹³ Namo ita abia dalana: Ena be ita be goevadae lasi, to lalomamina goevana ida Iehova ita hesiai henia diba. Unai ita karaia diba, badina Dirava “ena Natuna Iesu ena rara ese kara dika ibounai amo ita ia hagoevaia.” (1 Ioa. 1:7) Gau haida dainai oi lalomanoka neganai, namona be oi laloatao Iehova ia ura idia helalo-kerehai taudia edia dika ia gwauatao. Davida ese noho hanaihanai lalokauna bona dika gwauatao karana ia hahegeregerea dalana mani ita laloa. Ia gwau: “Guba be tanobada amo ia daudau herea hegeregerena, Dirava idia gari henia taudia dekenai iena lalokau be bada herea. Dina ia daekau kahana be dina ia diho kahana amo ia daudau hegeregerena, Ia ese iseda kara dika be ita amo ia kokia lao daudau.” (Sal. 103:11, 12) Oibe, Iehova ia ura bada “kara dika ibounai do ia gwauatao momokani.”​—Isa. 55:7.

14. Dirava ena noho hanaihanai lalokauna ese ita ia gimaia dalana be Davida ese edena bamona ia herevalaia?

¹⁴ Dirava ena noho hanaihanai lalokauna ese iseda hetura karana ia ida ia gimaia. Davida be Iehova ia guriguri henia neganai, ia gwau: “Oi be egu hunia gabuna ta bamona, oi ese lalometau negana ai lau do oi gimaia. Emu hahemauri karana dainai, moale bada ena boiboi regena ese lau idia hagegea. . . . Iehova ia abidadama henia tauna dekenai iena lalokau ia hahedinaraia noho.” (Sal. 32:7, 10) Idaunegai, magu ese siti ia hagegea bona taunimanima be edia inai taudia amo ia gimaia. Iehova ena noho hanaihanai lalokauna be unai magu bamona, Iehova ida iseda hetura karana ia hadikaia gaudia amo ita ia gimaia. Danu, Iehova ena lalokau be ia noho hanaihanai dainai, ia kahirakahira dekenai ita ia veria lao.​—Ier. 31:3.

15. Edena dala ai Iehova ena noho hanaihanai lalokauna be heau mauri gabuna ta bamona?

¹⁵ Davida ese laulau herevana ma ta ia gaukaralaia, Dirava ese ena taunimanima ia gimaia dalana ia herevalaia totona. Ia gwau: “Oi be egu heau mauri gabuna, lau dekenai lalokau oi hahedinaraia Diravana.” Danu Davida ese Iehova ia herevalaia neganai, ia gwau: “Ia be lau dekenai lalokau ia hahedinaraia, bona ia be egu magu aukana, ia be egu hunia gabuna bona egu hamauria tauna, ia be egu kesi bona egu heau mauri gabuna.” (Sal. 59:17; 144:2) Dahaka dainai Davida ese Iehova ena noho hanaihanai lalokauna be heau mauri gabuna bona magu aukana o kohoro goadana ida ia hahegeregerea? Ita be Iehova ena hesiai taudia dainai, ena be gabu idauidau dekenai ita noho, to Iehova be dala idauidau ai ita do ia durua, iseda hetura karana ia ida ita gimaia totona. Unai laulau herevana be Salamo 91 dekenai ia noho danu. Salamo torea tauna ia gwau: “Iehova dekenai do lau gwau: ‘Oi be egu heau mauri gabuna bona egu kohoro goadana.’” (Sal. 91:1-3, 9, 14) Mose ese unai bamona laulau herevana ia gaukaralaia danu. (Sal. 90:1) Bona kahirakahira do ia mase neganai, ia ese laulau herevana ma ta ia gaukaralaia. Ia gwau: “Dirava be heau mauri gabuna gunaguna negadia amo, ena noho hanaihanai imana amo oi do ia durua.” (Deu. 33:27) Inai hereva, “ena noho hanaihanai imana amo oi do ia durua” amo, Iehova dekenai dahaka ita dibaia?

16. Edena dala rua ai Iehova ese ita ia durua? (Salamo 136:23)

¹⁶ Iehova be iseda heau mauri gabuna ai ita halaoa neganai, do ita gari lasi. To, nega haida ita lalomanoka bona ita mamia gau ta ita karaia diba lasi. Unai bamona negadia ai, Iehova be ita totona dahaka do ia karaia? (Salamo 136:23 duahia.) Iena imana amo ita do ia dogoatao, metairametaira ita ia abia isi, bona ita ia durua ita raka lou totona. (Sal. 28:9; 94:18) Namo ita abia dalana: Ita diba nega ibounai Dirava dekenai ita tabekau karana ese ita ia durua inai dala rua  ita laloatao totona. Ginigunana be, herevana edeseniai ita noho, to Iehova be hanaihanai ita ia gimaia. Iharuana be, iseda lalokau guba Tamana ese ita ia laloa bada.

17. Dahaka dainai ita diba momokani Dirava ese hanaihanai ita do ia lalokau henia? (Salamo 33:18-22)

¹⁷ Inai stadi amo ita dibaia gauna be, hekwakwanai ita davaria neganai, ita diba momokani Iehova be ita do ia durua Ia ita badinaia noho totona. (2 Kor. 4:7-9) Peroveta tauna Ieremia ia gwau: “Iehova ena lalokau dainai ita be ita mase lasi, badina iena hebogahisi karadia be idia doko diba lasi.” (Lal. 3:22) Ita diba momokani Iehova be hanaihanai ita do ia lalokau henia, badina Baibel ia gwau: “Iehova be ia dekenai idia gari taudia ia itaia noho, bona iena lalokau dekenai idia naria noho taudia ia itaia danu.”​—Salamo 33:18-22 duahia.

18-19. (a) Dahaka ita laloatao noho be namo? (b) Atikol 45 ai dahaka do ita herevalaia?

¹⁸ Dahaka ita laloatao be namo? Iehova ita do hesiai henia lasi neganai, iena lalokau be taunimanima ibounai dekenai ia hahedinaraia. To, ita be Iehova ita tomadiho henia dainai, iena noho hanaihanai lalokauna amo namo ita abia danu. Unai lalokau dainai, Iehova ena imana goadana amo ita ia gimaia. Ia be hanaihanai ita kahirakahira do ia noho bona ita dekenai ena gwauhamata do ia hagugurua. Ia ura ita be iena turadia ela bona hanaihanai! (Sal. 46:1, 2, 7) Unai dainai, ena be hahetoho idauidau ita davaria, to Iehova ese nega ibounai ita dekenai goada do ia henia ia ita badinaia noho totona.

¹⁹ Iehova ese ena hesiai taudia dekenai noho hanaihanai lalokauna ia hahedinaraia daladia ita itaia vadaeni. Bona ia ura ta ta dekenai unai noho hanaihanai lalokauna ita hahedinaraia danu. Edena dala ai unai do ita karaia? Atikol 45 ai unai do ita herevalaia.