1. Iseda laloa maoromaoro karana ena anina be dahaka? (2 Timoteo 4:5)

 KONGRIGEISEN lalonai ia vara gauna ta ese ita ia hahisia neganai, Iehova bona ena orea ita badinaia noho be do ia auka. Edena dala ai unai hahetoho ita hanaia diba? Namona be ita laloa maoromaoro, noga noho bona abidadama dekenai [ita] gini goada. (2 Timoteo 4:5 duahia.) Bema ita manau, laloa namonamo bona Iehova ena dala hegeregerena unai hekwakwanai ita lalohadailaia, ita laloa maoromaoro noho diba. Unai bamona ita karaia neganai, iseda hemami ese iseda lalohadai do ia biagua lasi.

2. Inai atikol ai dahaka do ita herevalaia?

² Atikol 47 ai, kongrigeisen murimuri amo idia vara hekwakwanai toi ita herevalaidia. Inai atikol ai, kongrigeisen lalonai idia vara hekwakwanai toi ese iseda abidadama Iehova dekenai idia tohoa karana do ita stadilaia. Idia be (1) tadikaka o taihu ta ese ita ia hahisia neganai, (2) matahakani ita abia neganai, bona (3) orea ese ia karaia senisi haida ita abia dae be auka neganai. Unai bona hekwakwanai idia vara neganai, edena dala ai ita laloa maoromaoro bona Iehova bona ena orea ita badinaia noho diba?

3. Bema tadikaka o taihu ta ena kara ese ita ia hahisia, reana dahaka ita karaia diba?

³ Nega ta oi mamia tadikaka, taihu o elda ta ena kara ese oi ia hahisia, a? To, ia be oi ia hahisia lalohadaina ia abia lasi. (Roma  3:23; Iam. 3:2) To, iena kara ese emu lalona ia hahisia. Reana unai oi lalohekwarahilaia dainai emu mahuta ia hadikaia. Reana oi laloa, ‘Bema tadikaka ta be unai bamona ia karaia, inai be Dirava ena orea momokani, eiava?’ Satani ia ura unai bamona do ita laloa. (2 Kor. 2:11) Unai lalohadai kererena dainai, Iehova ena hesiai gaukara ita hadokoa bona iena orea ita rakatania diba. Bema tadikaka o taihu ta ena kara ese ita ia hahisia, edena dala ai ita laloa maoromaoro noho bona lalohadai kererena ita dadaraia diba?

4. Iosepa idia kara auka henia neganai, edena dala ai ia laloa maoromaoro noho, bona ena sivarai amo dahaka ita dibaia? (Genese 50:19-21)

⁴ Namo lasi oi badu. Iosepa be ia mero matamata neganai, ena kakadia ese idia kara auka henia. Idia inai henia bona idia haida idia ura ia idia alaia mase. (Gen. 37:4, 18-22) Gabeai, hesiai tauna bamona idia hoihoilaia. Unai dainai lagani 13 lalonai Iosepa be hahetoho badadia ia davaria. Reana Iosepa be ia laloa, ‘Iehova be lau ia lalokau henia momokani eiava?’ Bona reana ia laloa ena nega dika lalonai Iehova ese ia rakatania. To Iosepa be ia badu lasi. To, ia manau dainai ia laloa maoromaoro diba. Ena be ena kakadia edia dika ia haloua diba, to unai ia karaia lasi bona idia dekenai lalokau ia hahedinaraia bona ia gwaudiatao. (Gen. 45:4, 5) Iosepa ia laloa namonamo dainai unai ia karaia diba. Ena hekwakwanai ia laloa momo lasi, to Iehova ena ura ia laloa guna. (Genese 50:19-21 duahia.) Unai sivarai amo dahaka ita dibaia? Bema ta ese oi ia kara auka henia, namo lasi Iehova dekenai oi badu eiava oi laloa ia ese oi ia rakatania. To, ia ese oi ia durua unai hahetoho oi haheaukalaia dalana oi laloa be namo. Danu, haida ese oi idia kara auka henia neganai, namona be mai lalokau ida edia dika oi gwauatao.​—1 Pet. 4:8.

5. Tadikaka ta ese Mikaias ia kara auka henia neganai, edena dala ai ia laloa maoromaoro noho?

⁵ South America ai elda ta ladana, Mikaias  b ena ekspiriens mani ita laloa. Ia laloatao nega ta orea idia gunalaia tadikaka haida ese ia idia kara auka henia. Ia gwau: “Guna unai bamona lalometau lau mamia lasi. Lau gari bada. Hanuaboi ai lau mahuta namonamo diba lasi bona nega momo lau tai badina gau ta lau karaia diba lasi.” To, Mikaias be ia laloa maoromaoro bona ia gaukara goada ena hemami ia biagua totona. Hanaihanai Iehova ia noia lauma helaga bona goada ia henia ia haheauka totona. Danu heduru abia totona iseda pablikeisen dekenai infomeisen haida ia tahua. Unai sivarai amo dahaka ita dibaia? Tadikaka o taihu ta ese oi ia kara auka henia neganai, oi badu lasi bona emu hemami oi biagua. Reana oi diba lasi dahaka dainai unai bamona ia hereva o ia karaia. Unai dainai Iehova oi guriguri henia bona oi ia durua unai tauna ena laloa dalana hegeregerena unai hekwakwanai oi lalohadailaia totona. Unai ese oi do ia durua bena do oi laloparara, reana ia karaia o gwauraia gauna be oi hahisia totona ia karaia lasi bona ena kara dika do oi gwauatao. (Aon. 19:11) Laloatao, Iehova be oi dekenai ia vara gauna ia diba bona ia ese oi do ia durua oi haheauka totona.​—2 Siv. 16:9; Had. 5:8.

6. Dahaka dainai Iehova be lalokau dainai ita ia matahakani henia karana, ita lalopararalaia be namo? (Heberu 12:5, 6, 11)

⁶ Matahakani ita abia neganai, unai ese ita dekenai lalohisihisi ia havaraia diba. To bema ita mamia hisihisi sibona ita laloa, ita abia matahakani ena badina do ita laloa maragi, bona do ita laloa unai matahakani be gau badana lasi. Unai ese ita ia koua diba mai anina  bada gauna ta ita lalopararalaia totona​—Iehova be ita ia lalokau henia dainai ita ia matahakani henia. (Heberu 12:5, 6, 11 duahia.) Bona bema iseda lalohisihisi ita biagua lasi, Satani ena dala ita kehoa diba ita ia hadikaia totona. Satani ia ura unai matahakani ita dadaraia bona Iehova bona ena kongrigeisen amo ita noho daudau. Bema matahakani oi abia, edena dala ai do oi laloa maoromaoro noho?

7. (a) Laulau ai ita itaia bamona, Petero be matahakani ia abia dae murinai, Iehova ese edena dala ai ia gaukaralaia? (b) Petero ena sivarai amo dahaka ita dibaia?

⁷ Matahakani oi abia dae bona senisi oi karaia. Iesu ese nega momo aposetolo taudia ma haida vairanai Petero ia matahakani henia. (Mar. 8:33; Luka 22:31-34) Unai ese reana Petero ia hahemaraia bada! To, Petero ese Iesu ia badinaia noho. Matahakani ia abia dae bona iena kerere amo diba ia abia. Unai dainai, Iehova ese Petero ia hanamoa bona kongrigeisen ai mai anina bada maduna ia henia. (Ioa. 21:15-17; Kara 10:24-33; 1 Pet. 1:1) Petero ena sivarai amo dahaka ita dibaia? Ita sibona bona ma haida ita durua bema ita abia matahakani dainai ita hemarai lasi, to matahakani ita abia dae bona senisi ita karaia. Unai ita karaia neganai, Iehova bona iseda tadikaka totona gaukara namodia ita karaia diba ese ita do idia gaukaralaia.

8-9. Bernardo be matahakani ia abia murinai edena bamona ia mamia bona dahaka ese ia durua lalohadai maorona ia abia totona?

⁸ Mozambique ai ia noho tadikaka ladana, Bernardo dekenai ia vara gauna mani ita laloa. Iena elda maduna idia kokia. Matamanai Bernardo be edena bamona ia mamia? Ia gwau, “Lau badu badina lau abia matahakani lau ura lasi.” Kongrigeisen tadikaka taihu ese ia do idia laloa dalana ia laloa momo. Ma ia gwau, “Hua haida murinai lalohadai maorona lau abia, bona Iehova bona ena orea lau abidadama henia lou.” Dahaka ese Bernardo ia durua lalohadai maorona ia abia totona?

⁹ Bernardo be ena lalohadai ia hamaoromaoroa. Ia gwau: “Lau be elda neganai, Heberu 12:7 lau gaukaralaia ma haida lau durua matahakani be Iehova ena dala hegeregerena ai idia laloa totona. Hari sibona lau nanadaia, ‘Daika ese unai siri ia badinaia be namo?’ Iehova ena hesiai taudia ibounai, bona lau danu.” Bena Bernardo ese senisi haida ia karaia Iehova bona ena orea ia abidadama henia totona. Hanaihanai Baibel ia duahia bona  nega ia atoa ia duahia gauna ia laloa dobu totona. Ena be tadikaka taihu edia lalohadai dainai ia lalohekwarahi, to idia ida ia haroro hebou bona kongrigeisen heboudia ai ia haere. Gabeai, Bernardo be elda tauna ai idia abia hidi lou. Bema Bernardo bamona oi be matahakani oi abia, oi hemarai lasi, to inai matahakani oi abia dae, bona senisi oi karaia. c (Aon. 8:33; 22:4) Bema unai oi karaia, do oi abia dae Iehova ese oi do ia hanamoa badina Ia bona ena orea oi badinaia.

10. Dahaka senisi ese reana Israela tatau haida edia badinaia karana ia tohoa?

¹⁰ Orea ai idia vara senisi ese iseda badinaia karana ia tohoa diba. Bema ita laloa maoromaoro lasi, unai senisi dainai Iehova ita rakatania diba. Hegeregere, Mose ena Taravatu ese Israela taudia edia gaukara haida ia haidaua dalana mani ita laloa. Iehova ese idia dekenai Taravatu ia do henia lasi neganai, ruma bese kwaradia ese hahelaga gaukaradia idia karaia. Idia ese pata helagadia idia haginia bona edia famili totona Iehova dekenai boubou gaudia idia henia. (Gen. 8:20, 21; 12:7; 26:25; 35:1, 6, 7; Iobu 1:5) To Dirava ese idia dekenai Taravatu ia henia neganai, ruma bese kwaradia be unai gaukara idia hadokoa. Iehova ese Arona ena ruma bese amo hahelaga taudia ia abia hidi unai gaukara idia karaia totona. Unai senisi idia karaia negana amo, bema ruma bese kwarana ta be Arona ena bese amo lasi, bona hahelaga gaukara ia karaia vadaeni ia idia hamasea diba. d (Lev. 17:3-6, 8, 9) Reana unai senisi dainai Kora, Datana, Abirama, bona hahelaga taudia 250 ese Mose bona Arona idia gwau-edeede henia, a? (Num. 16:1-3) Ita diba lasi. Herevana dahaka, to Kora bona ia idia badinaia taudia be Iehova idia badinaia lasi. Orea ai senisi haida idia vara neganai, dahaka oi karaia diba?

11. Kohata ena bese taudia edia sivarai amo dahaka ita dibaia?

¹¹ Orea ai idia vara senisi oi durua. Israela taudia be taunimanima lasi gabuna ai idia raka neganai, Kohata ena bese taudia be mai anina bada gaukarana idia karaia. Israela taudia be kamepa idia kokia bona gabu ta idia lao negadiai, Kohata ena bese taudia be Taravatu Maua idia huaia bona vairanai idia raka. (Num. 3:29, 31; 10:33; Ios. 3:2-4) Hahenamo badana, ani? To Israela taudia be gwauhamata tanona dekenai idia ginidae neganai, senisi haida idia vara. Badina Taravatu Maua do idia huaia loaloa lasi. Solomona be king ai ia lao neganai, Kohata ena bese taudia haida be ane abia taudia ai idia lao, haida be geiti idia naria bona ma haida be aniani haboua ruma idia naria. (1 Siv. 6:31-33; 26:1, 24) Ena be guna Kohata ena bese taudia be mai anina bada gaukara idia karaia, to Baibel ia gwau lasi nega ta idia maumau o mai anina bada gaukaradia totona idia noinoi. Unai sivarai amo dahaka ita dibaia? Namona be Iehova ena orea ese ia karaia senisi bona iseda asainmen ai idia vara senisi be mai kudouna ibounai ida ita badinaia. Emu asainmen ai oi karaia gaukara oi moalelaia. Laloatao, Iehova ena matanai emu asainmen be gau badana lasi, to emu badinaia karana be mai anina bada.​—1 Sam. 15:22.

12. Betele ese Zaina ena asainmen idia haidaua neganai, ena hemami be edena bamona?

¹² Taihu ta ladana Zaina mani ita laloa. Ia moalelaia bada asainmen idia haidaua. Betele ai lagani 23 ia gaukara, to unai murinai ia idia  siaia painia gaukara ia karaia totona. Ia gwau: “Egu asainmen idia haidaua neganai, lau hoa bada. Lau mamia lau be anina lasi, bona nega momo sibona lau nanadaia, ‘Dahaka kerere lau karaia?’” Danu, ena lalona ia hisihisi badina kongrigeisen ai tadikaka taihu haida ese ia dekenai idia gwau: “Bema oi gaukara goada, tadikaka ese emu asainmen do idia haidaua.” Nega daudau lalonai taihu Zaina be ia lalomanoka dainai hanuaboi ibounai ia tai. To ia gwau: “Nega ta Iehova ena orea bona ena lalokau lau daradaralaia lasi.” Edena dala ai Zaina ia laloa maoromaoro noho?

13. Zaina be dahaka ia karaia ena lalohadai ia hamaoromaoroa totona?

¹³ Zaina be ia abia lalohadai kererena ia haidaua. Edena dala ai? Ia ese iseda pablikeisen ai, ena hekwakwanai idia herevalaia atikol ia duahidia. Hegeregere, February 1, 2001 ena Gima Kohorona ai atikol ladana, “Lalo-Manoka Oi Haheaukalaia Diba!” ese ia durua bada. Unai atikol ai, Baibel torea tauna Mareko be ena asainmen ai senisi ia vara neganai unai bamona hemami ia abia danu. Zaina ia gwau, “Mareko ena haheitalai be muramura bamona egu lalomanoka lau haheaukalaia totona.” Danu, Zaina be ena turadia kahirakahira ia noho. Sibona ia noho karana ia dadaraia bona ena lalona ia hagoadaia. Ena hereva dokona ai, ia gwau Iehova ena orea ese ia karaia disisen be lauma helaga ena heduru amo idia karaia bona idia gunalaia tadikaka ese ia idia laloa bada. To danu, ia laloparara Dirava ena orea ese ia karaia disisen be mai anina bada Iehova ena gaukara hagugurua totona.

14. Vlado be ia hekwarahi dahaka senisi ia badinaia totona, bona dahaka ese ia durua?

¹⁴ Slovenia ai ia noho mauri lagani 73 elda ta be ia laloa momo, badina ena kongrigeisen be ma kongrigeisen ta ida idia haboua bona ia lao henia Kingdom Hall be idia koua. Ia gwau: “Lau laloparara lasi dahaka dainai inai Kingdom Hall namona idia koua. Lau lalohisihisi badina vanegai sibona Kingdom Hall ai hanamoa. Lau be kapenta tauna, bona teibol bona sea matamata haida lau karaia. Bona danu ai, buruka tadikaka bona taihu haida dekenai unai senisi be auka.” Dahaka ese Vlado ia durua unai hakaua dalana ia badinaia totona? Ia gwau: “Iehova ena orea ese ia karaia senisi ita badinaia neganai, hahenamo momo do ita davaria. Idia vara senisi ese vaira nega totona  ita idia hegaegaelaia.” Emu kongrigeisen totona idia karaia senisi eiava emu asainmen idia haidaua neganai, unai oi badinaia totona oi lalohekwarahi, a? Namona be oi laloatao, Iehova be emu hemami ia lalopararalaia. Bema unai bamona senisi oi durua bona Iehova bona ia gaukaralaia orea oi badinaia, Ia ese oi do ia hanamoa.​—Sal. 18:25.

15. Kongrigeisen lalonai hahetoho momo idia vara neganai, edena dala ai ita laloa maoromaoro noho diba?

¹⁵ Inai nega oromana ena dokona ia kahirakahira noho lalonai, kongrigeisen lalonai hahetoho momo do idia vara. Unai hahetoho ese iseda Iehova badinaia karana ia tohoa diba. Unai dainai do ita laloa maoromaoro noho be namo. Bema oi mamia tadikaka o taihu ta ese oi ia kara auka henia, oi badu lasi. Bema matahakani oi abia, oi hemarai lasi, to sisiba oi abia dae bona senisi oi karaia. Bona Iehova ena orea ese senisi ia karaia neganai, namona be mai kudouna ibounai ida unai hakaua herevadia oi abia dae bona badinaia.

16. Edena dala ai Iehova bona ena orea dekenai emu abidadama oi hagoadaia diba?

¹⁶ Emu badinaia karana idia tohoa neganai, Iehova bona ena orea dekenai emu abidadama oi hagoadaia diba. To unai oi karaia totona, namona be oi laloa maoromaoro noho, oi manau, laloa namonamo bona Iehova ena dala hegeregerena hekwakwanai oi lalohadailaia. Baibel lalonai unai bamona hekwakwanai idia haheaukalaia taudia edia sivarai oi stadilaia bona laloa dobu. Iehova dekenai oi guriguri oi ia durua totona bona kongrigeisen kahirakahira oi noho. Bena, herevana dahaka ia vara, Iehova bona iena orea amo Satani ese oi do ia hapararaia diba lasi.​—Iam. 4:7.