1. Edena dala ai ita diba Iehova ia ura ia kahirakahira ita lao?

 IEHOVA ia ura ia kahirakahira ita lao. (Iam. 4:8) Ia ura iseda Dirava, Tamana bona Turana ai ia lao. Iseda guriguri ia haerelaia bona nega aukadia ai ita ia durua. Bona ena orea ia gaukaralaia ita ia hadibaia bona gimaia. To dahaka do ita karaia Iehova kahirakahira ita lao totona?

2. Edena dala ai Iehova kahirakahira ita lao diba?

² Iehova kahirakahira ita lao diba bema ia ita guriguri henia, ena Hereva ita duahia bona laloa dobu. Unai ita karaia neganai, ia do ita lalokau henia bona laloa bada. Danu, ita do ia durua mai ura ida ia do ita badinaia bona ia do ita hanamoa. (Apok. 4:11) Iehova ita diba noho lalonai, ia do ita abidadama henia bona ita do durua ia hegaegaelaia orea do ita badinaia noho.

3. Edena dala ai Diabolo ia ura Iehova amo ita ia hapararaia, to dahaka ese ita do ia durua Dirava bona ena orea do ita rakatania lasi? (Salamo 31:13, 14)

³ To, hahetoho ita davaria negadiai, Diabolo ia ura Iehova amo ita ia hapararaia. Edena dala ai unai ia karaia? Diabolo be dala idauidau ia gaukaralaia unai amo iseda abidadama Iehova bona ena orea dekenai ia hamanokaia. To ena koikoi karadia ita dadaraia diba. Iseda abidadama Iehova dekenai ia goada neganai, iseda Dirava bona ena orea do ita rakatania lasi.​—Salamo 31:13, 14 duahia.

4. Inai atikol ai dahaka do ita herevalaia?

⁴ Inai atikol ai, kongrigeisen murimuri amo ita davaria hekwakwanai  toi do ita herevalaia; unai gaudia ta ta ese Iehova bona ena orea abidadama henia karana ia hadikaia diba. Unai hahetoho ese edena dala ai Iehova amo ita idia hapararaia diba? Bona dahaka ita karaia diba Satani ena koikoi karadia ita dadaraia totona?

5. Edena dala ai hekwakwanai ese iseda abidadama Iehova bona ena orea dekenai ia hadikaia diba?

⁵ Nega haida ai, hekwakwanai ita davaria hegeregere, famili ese ita idia dagedage henia o iseda moni gaukara ita haboioa. Edena dala ai unai bamona hekwakwanai ese iseda abidadama Iehova bona ena orea dekenai ia hadikaia diba? Nega daudau lalonai hekwakwanai ita davaria neganai, reana do ita lalohekwarahi bona lalohisihisi. Satani ese unai negadia ia gaukaralaia unai amo Iehova ena lalokau ita dekenai do ita daradaralaia. Diabolo ia ura do ita laloa Iehova bona Ena orea ese ita dekenai unai hisihisi idia havaraia. Aigupito ai, Israela taudia dekenai unai bamona ia vara. Matamanai idia abia dae Iehova ese Mose bona Arona ia abidia hidi Aigupito amo idia ia hamauria totona. (Eso. 4:29-31) To gabeai Farao ese edia mauri ia ha-aukaia neganai, idia davaria hekwakwanai dainai Mose bona Arona dekenai idia gwau: “Badina umui dainai Farao bona ena hesiai taudia ese ai idia ura henia lasi bona ai idia alaia totona edia imana ai tuari kaia umui atoa.” (Eso. 5:19-21) Madi, idia gwau unai be Dirava ena hesiai taudia edia kerere. Bema nega daudau lalonai hekwakwanai oi davaria noho, edena dala ai Iehova bona ena orea dekenai iseda abidadama ita hagoadaia diba?

6. Peroveta tauna Habakuku amo dahaka ita dibaia? (Habakuku 3:17-19)

⁶ Mai kudouna ibounai ida Iehova dekenai oi guriguri, bona ena heduru oi tahua. Peroveta tauna Habakuku be hekwakwanai momo ia davaria. Nega ta ai, ia daradara Iehova be ia ia laloa eiava lasi. Guriguri amo Iehova dekenai ena lalohekwarahi ia gwauraia. Ia gwau: “Iehova e, heduru totona do lau taitai ela bona edena negai, to oi kamonai lasi? . . . Dahaka dainai ma haida ese taunimanima idia hadikaia karana oi koua lasi?” (Hab. 1:2, 3) Iehova ese ena hesiai tauna ena guriguri ia haerelaia. (Hab. 2:2, 3) Habakuku ese Iehova ena hahemauri karadia ia laloa dobu murinai, ia moale lou. Ia abia dae Iehova ese ia laloa bada bona do ia durua hahetoho idauidau ia haheaukalaia. (Habakuku 3:17-19 duahia.) Unai sivarai amo dahaka ita dibaia? Hekwakwanai oi davaria neganai, Iehova dekenai oi guriguri bona emu lalohekwarahi gaudia oi gwauraia. Bena ena heduru oi tahua. Unai oi karaia neganai, oi abia dae momokani Iehova ese oi dekenai goada do ia henia oi haheauka totona. Bona ena heduru oi mamia neganai, emu abidadama ia dekenai do ia goada ia lao.

7. Shirley ena varavara ta ia ura dahaka ia karaia, bona dahaka ese ia durua Iehova ia abidadama henia totona?

⁷ Emu tomadiho karadia oi goadalaia noho. Mani Papua New Guinea dekenai taihu ta ladana Shirley ita laloa, ia be hekwakwanai ia davaria. b Shirley ena famili be idia ogogami bona nega haida idia hekwarahi aniani idia abia totona. Ena varavara ta ia ura ena abidadama Iehova dekenai ia hadikaia. Ia gwau: “Oi gwau Dirava ena lauma helaga ese oi ia durua noho, to ena heduru be edeseni? Famili be idia ogogami noho. Haroro gaukara dekenai emu nega oi haorea kava.” Shirley ia gwau: “Sibona lau nanadaia: ‘Dirava be ai ia laloa eiava lasi?’ Maoromaoro Iehova lau  guriguri henia bona egu lalohekwarahi ibounai lau gwauraia. Baibel bona iseda pablikeisen duahia karana, haroro bona hebou lao henia karana lau hadokoa lasi.” Gabeai ia laloparara Iehova ese ena famili ia durua noho. Ena famili idia hitolo lasi bona idia moale. Shirley ia gwau: “Lau mamia Iehova ese egu guriguri ia haerelaidia.” (1 Tim. 6:6-8) Bema emu tomadiho karadia oi goadalaia, hekwakwanai eiava daradara gauna ta ese Iehova amo oi do ia hapararaia lasi.

8. Iehova ena orea ai idia noho tadikaka dekenai dahaka ia vara diba?

⁸ Ita idia inai henia taudia ese nius oreadia bona intanet amo, Iehova ena orea ai idia noho tadikaka totona hereva koikoidia eiava infomeisen kereredia idia halasia. (Sal. 31:13) Tadikaka haida idia arest bona kerere taudia bamona idia kara henidia. Keristani ginigunadia edia negai unai bamona hekwakwanai ia vara. Unai negai, Aposetolo Paulo idia samania koikoi bona idia arest. Keristani taudia be dahaka idia karaia?

9. Aposetolo Paulo idia hadiburaia neganai, Keristani taudia haida be dahaka idia karaia?

⁹ Aposetolo Paulo be Roma ai idia hadiburaia neganai, Keristani taudia ginigunadia haida ese ia idia durua lasi. (2 Tim. 1:8, 15) Dahaka dainai? Idia hemarai badina taunimanima ese ia be kerere karaia tauna bamona idia laloa, a? (2 Tim. 2:8, 9) Eiava idia gari badina dika idia danu be dagedage do idia davaria, a? Herevana edia badina be dahaka, to mani Paulo ena hemami ita laloa. Hekwakwanai momo ia haheaukalaia bona ena tadikaka totona kahirakahira ena mauri ia haboioa. (Kara 20:18-21; 2 Kor. 1:8) Namo lasi Paulo idia durua lasi Keristani taudia edia haheitalai ita tohotohoa! Ita idia gunalaia tadikaka idia dagedage henia neganai, dahaka ita laloatao be namo?

10. Ita idia gunalaia tadikaka idia dagedage henia neganai, dahaka ita laloatao be namo bona dahaka dainai?

¹⁰ Dagedage ita davaria ena badina bona daika ese unai ia havaraia ita laloatao. Timoteo  Iharuana 3:12 ia gwau: “Keriso ida idia hakapua bona idia ura Dirava badinaia karana idia hahedinaraia taudia ibounai be dagedage do idia davaria danu.” Satani be ita idia gunalaia tadikaka ia dagedage henia karana dekenai do ita hoa lasi. Iena ura be iseda abidadama ia hamanokaia bona ita ia hagaria.​—1 Pet. 5:8.

11. Onesiporo ena sivarai amo dahaka ita dibaia? (2 Timoteo 1:16-18)

¹¹ Hanaihanai emu tadikaka oi durua bona badinaia. (2 Timoteo 1:16-18 duahia.) Paulo be dibura ruma ai ia noho neganai, Keristani ginigunana ta, Onesiporo ena kara be idau. Paulo ia gwau: “Dibura ruma ai lau noho neganai, [Onesiporo be] lau dainai ia hemarai lasi.” Onesiporo be Paulo ia tahua bona ia davaria neganai, ia durua gaudia haida ia karaia. Onesiporo be unai ia karaia ena be dika ia davaria diba. Unai sivarai amo dahaka ita dibaia? Haida ese iseda tadikaka idia dagedage henia neganai, namo lasi taunimanima ita gari henia dainai idia ita durua lasi. To, namona be idia ita gimaia bona durua. (Aon. 17:17) Idia ita lalokau henia bona durua be gau badana.

12. Russia ai iseda tadikaka taihu edia sivarai amo dahaka ita dibaia?

¹² Russia ai tadikaka taihu be dibura ai idia atodia neganai, iseda tadikaka taihu ese idia durudia dalana mani ita laloa. Haida be kota dekenai idia lao neganai, tadikaka taihu momo be kota dekenai idia lao idia durua totona. Unai sivarai amo dahaka ita dibaia? Ita idia gunalaia tadikaka idia edia ladana idia hadikaia, idia arest, eiava dagedage neganai, ita gari lasi be namo. Idia totona ita guriguri, edia famili taudia ita naridia bona idia durua daladia ita hahedinaraia.​—Kara 12:5; 2 Kor. 1:10, 11.

13. Edena dala ai ita idia kirikirilaia karana ese Iehova bona ena orea abidadama henia karana ia hadikaia diba?

¹³ Iseda Witnes lasi varavara, gaukara turadia eiava sikuli turadia ese reana iseda haroro gaukara eiava Iehova ena kara maoromaoro taravatudia ita badinaia karana dekenai ita idia kirikirilaia diba. (1 Pet. 4:4) Reana idia gwau diba: “Oi lau ura henia, to emu tomadiho ena kara be auka bona unai be idaunegai idia karaia karana ta sibona.” Haida be idia atoa siri taudia ita kara henia dalana idia kirikirilaia, idia gwau: “Edena bamona sibona dekenai oi gwau oi be lalokau tauna?” Unai bamona herevadia ese ita dekenai daradara ia havaraia diba. Reana do ita laloa: ‘Iehova dekenai lau henia boubou gauna be hegeregere lasi, a? Iena orea ena kara be auka herea, a?’ Bema unai bamona gauna ta oi davaria noho, edena dala ai Iehova bona ena orea oi badinaia diba noho?

14. Dahaka ita karaia be namo bema haida ese ita idia hevasehalaia? (Salamo 119:50-52)

¹⁴ Iehova ena taravatu badinaia noho. Iobu ese Iehova ena taravatu ia badinaia ena be haida ese idia hevasehalaia. Sibona ia gwauraia Iobu ena turana ta be Iobu dekenai ia gwau, ena be Dirava ena taravatu ia badinaia eiava lasi be gau badana lasi. (Iobu 4:17, 18; 22:3) To Iobu be unai bamona koikoi herevadia ia abia dae lasi. Iobu ia diba Iehova ena taravatu be maoromaoro sibona, bona ia ura unai do ia badinaia noho. Ia ura lasi ma haida ese ena abidadama karana idia hadikaia. (Iobu 27:5, 6) Unai sivarai amo dahaka ita dibaia? Namo lasi haida ese oi idia kirikirilaia dainai Iehova ena taravatu oi daradaralaia. Oi dekenai idia vara gaudia mani oi laloa. Reana emu mauri ai oi moale badina Iehova ena taravatu oi badinaia bona  oi dekenai namo ia havaraia. Unai taravatu ia badinaia oreana oi badinaia be namo. Herevana taunimanima ese oi idia kirikirilaia, to unai ese Iehova amo oi do ia hapararaia lasi.​—Salamo 119:50-52 duahia.

15. Dahaka dainai Brizit be dagedage ia davaria?

¹⁵ India ai, taihu ta ladana Brizit ena ekspiriens ita laloa. Ena abidadama dainai ena famili ese idia gwauraia dika. Lagani 1997 ai ena bapatiso murinai, ena Witnes lasi adavana be moni gaukara ia haboioa. Unai dainai abia hidi ia karaia, Brizit, bona edia natuna kekenidia ida do idia lao siti ma ta ai ena tama sina ida do idia noho. To Brizit be hekwakwanai badadia ia davaria. Ena adavana be ia moni gaukara lasi dainai, Brizit do ia gaukara ful-taim ena famili ia durua totona. Danu, idia kahirakahira ia noho kongrigeisen ena daudau be 350 kilomita bamona. Bona madi, ena abidadama dainai ena adavana ena famili ese idia dagedage henia. Unai dagedage ia bada herea dainai Brizit bona ena famili be gabu ma ta dekenai idia lao. Bena, daudau lasi murinai ena adavana ia mase. Gabeai, ena natuna kekeni ma ta, mauri lagani 12 be kensa amo ia mase. Bona danu, idia vara gaudia dainai Brizit ena varavara ese ia idia bleim. Idia gwau unai gaudia do idia vara lasi bema ia be Iehova ena Witnes ta lasi. Herevana unai ia vara, to Iehova bona ena orea ia badinaia.

16. Brizit ese Iehova bona ena orea ia badinaia dainai dahaka hahenamo ia davaria?

¹⁶ Brizit ena gabu be kongrigeisen amo ia daudau dainai, sekit naria tauna ese ia hamaoroa ena gabu dekenai do ia haroro bona hebou do ia karaia. Matamanai, ia laloa unai do ia karaia be auka. To tadikaka ena hereva ia badinaia. Mai haida dekenai sivarai namona ia harorolaia, ena ruma ai hebou ia karaia bona ena natudia kekeni ida nega ia atoa famili tomadihona totona. Dahaka ia vara? Brizit ese Baibel stadi momo ia karaia bona idia momo be bapatiso idia abia. Lagani 2005 ai regula painia gaukara ia hamatamaia. Iehova bona ena orea ia abidadama henia dainai hahenamo ia abia. Ena natudia kekeni be Iehova idia hesiai henia noho bona hari edia gabu ai kongrigeisen rua idia noho! Brizit ia abia  dae Iehova ese ia dekenai goada ia henia dainai, ena hekwakwanai bona famili ese idia kirikirilaia karana ia haheaukalaia.

17. Iseda lalona ita hadaia dahaka ita karaia totona?

¹⁷ Satani ia ura ita abia dae hekwakwanai ita davaria neganai, Iehova ese ita do ia rakatania bona Iehova ena orea ita badinaia neganai, mauri do ia auka. Ita idia gunalaia tadikaka idia gwauraia dika, dagedage henidia eiava dibura ruma ai idia atodia neganai, Satani ia ura ita ia hagaria. Bona ma haida ese ita idia kirikirilaia neganai, Satani ia ura Iehova ena taravatu bona Ena orea dekenai iseda abidadama ia hadikaia. To, ita be Satani ena palani dikadia ita diba bona ita do ia koia lasi. (2 Kor. 2:11) Namona be iseda lalona ita hadaia Satani ena koikoi karadia ita dadaraia bona Iehova bona ena orea ita badinaia noho. Laloatao, Iehova be ita do ia rakatania lasi. (Sal. 28:7) Unai dainai namo lasi gau ta ese Iehova amo ita ia hapararaia!​—Roma 8:35-39.   

18. Atikol 48 ai dahaka do ita herevalaia?

¹⁸ Inai atikol ai, kongrigeisen murimuri amo ita davaria hekwakwanai idauidau ita herevalaia. To kongrigeisen lalonai idia vara hekwakwanai idauidau ese Iehova bona ena orea ita badinaia karana ia tohoa diba. Edena dala ai unai hekwakwanai idauidau ita hanaia diba? Atikol 48 ai unai do ita herevalaia.