1. Haroro gaukara ai dahaka do ita davaria, to dahaka ita diba?

 HARORO gaukara ita karaia neganai, dagedage do ita davaria. Vaira nega ai unai dagedage do ia bada ia lao. (Dan. 11:44; 2 Tim. 3:12; Apok. 16:21) To, ita diba momokani Iehova ese ita do ia durua. Dahaka dainai? Iehova ese hanaihanai ena hesiai taudia ia durua edia gaukara idia hagugurua totona​—ena be nega haida ia auka. Mani peroveta tauna Esekiela ena mauri ai idia vara gaudia haida ita laloa, ia ese Babulonia ai idia noho Iuda taudia ia haroro henia.

2. Iehova ese Esekiela ena teritori ai idia noho taudia be edena bamona ia herevalaia, bona inai atikol ai dahaka do ita herevalaia? (Esekiela 2:3-6)

² Esekiela ia haroro teritori ai, edena bamona taudia idia noho? Iehova ese idia ia gwauraia idia be “gwau-edeede,” “hemataurai lasi” bona “lalona auka” taudia. Idia be au ginigini bona doadoa (o scorpion) bamona. Unai dainai Iehova ese Esekiela ia hamaoroa loulou: “Oi gari lasi”! (Esekiela 2:3-6 duahia.) Esekiela be ena haroro gaukara ia karaia diba badina (1) Iehova ese ia siaia, (2) Dirava ena lauma helaga ese ia hasiahua, bona (3) Dirava ena hereva ese ia hagoadaia. Edena dala ai unai gaudia toi ese Esekiela ia durua? Bona hari edena dala ai ita idia durua diba?

3. Dahaka hereva ese Esekiela ia hagoadaia, bona edena dala ai Iehova ese ia do ia durua?

³ Iehova ese Esekiela ia hamaoroa: “Oi do lau siaia lao.” (Ese. 2:3, 4) Unai hereva ese reana Esekiela ia hagoadaia bada. Dahaka dainai? Oibe, ia laloatao badina Iehova ese Iena peroveta taudia, Mose bona Isaia dekenai unai hereva ia gwauraia danu. (Eso. 3: 10; Isa. 6:8) Esekiela ia diba Iehova ese unai peroveta taudia rua ia durua hekwakwanai idauidau idia hanaia. Iehova  ese nega rua Esekiela ia hamaoroa: “Oi do lau siaia lao,” unai hereva dainai Esekiela ia abia dae momokani Iehova ese do ia durua. Danu, Esekiela bukana ai, inai hereva be nega momo ia hedinarai: “Iehova be lau ia hereva henia.” (Ese. 3:16) Bona danu, inai hereva “Iehova be lau dekenai ma ia gwau” be nega momo ia hedinarai. (Ese. 6:1) Oibe, Esekiela ia abia dae momokani Iehova ese ia siaia. Ma danu, hahelaga tauna ena natuna, Esekiela be ena tamana ese ia hadibaia Iehova ese idaunegai amo ena peroveta taudia ia durua. Isako, Iakobo, bona Ieremia dekenai Iehova ese inai hereva ia gwauraia: “Lau be oi ida.”​—Gen. 26:24; 28:15; Ier. 1:8.

4. Dahaka hagoadaia herevadia ese Esekiela dekenai goada ia henia?

⁴ Israela taudia be Esekiela ena haroro herevana be edena bamona idia laloa? Iehova ia gwau: “Israela besena be do idia ura lasi oi idia kamonai henia, badina idia ura lasi lau idia kamonai henia.” (Ese. 3:7) Esekiela idia kamonai henia lasi neganai, idia ese Iehova idia kamonai henia lasi unai. Unai hereva ese ia hahedinaraia lasi Esekiela be peroveta tauna namona lasi. Iehova be Esekiela dekenai ia gwau, ia harorolaia hahemaoro herevana ia guguru neganai, Israela taudia do idia diba “peroveta tauna ta be idia huanai ia noho.” (Ese. 2:5; 33:33) Oibe, unai hagoadaia herevadia ese Esekiela dekenai goada ia henia ena haroro gaukara ia hagugurua totona.

5. Isaia 44:8 ena hereva bamona, edeseni amo goada ita abia?

⁵ Ita danu ita diba Iehova ese ita ia siaia dainai goada ita abia. Ita ia laloa bada dainai, ita ia gwauraia iena “hereva hamomokania taudia.” (Isa. 43:10) Unai be hahenamo badana,  ani? Iehova ese Esekiela ia hagoadaia: “Oi gari lasi,” unai hegeregerena Iehova ese ita ia hagoadaia: “Umui gari bada lasi.” Dahaka dainai ita idia inai henia taudia ita gari henia lasi? Esekiela hegeregerena, Iehova ese ita ia siaia bona ita Ia durua.​—Isaia 44:8 duahia.

6. (a) Edena dala ai Iehova ese ita do ia durua? (b) Edeseniai amo goada ita abia diba?

⁶ Iehova ia gwauhamata ita do ia durua. Hegeregere, Iehova be inai hereva, “umui be egu hereva hamomokania taudia,” ia do gwauraia lasi neganai, inai hereva ia gwauraia: “Davara oi hanaia neganai, lau be oi ida do lau noho, bona sinavai oi hanaia neganai, abata ese oi do ia koua lasi. Lahi huanai oi raka neganai, oi do ia araia lasi, eiava lahi ena hururu ese oi do ia gabua lasi.” (Isa. 43:2) Iseda haroro gaukara ita karaia neganai, nega haida abata bamona koua gaudia bona lahi bamona hahetoho ita davaria. Ena be dahaka ia vara, to Iehova ena heduru dainai ita haroro noho. (Isa. 41:13) Esekiela ena nega hegeregerena, hari taunimanima momo be idia ura lasi sivarai namona idia kamonai. Namona be ita laloatao, unai ese ia hahedinaraia lasi iseda haroro gaukara ita karaia namonamo lasi. Goada ita abia badina ita diba Iehova be ia moale bema mai abidadama ida iena sivarai namona ita harorolaia. Aposetolo Paulo ia gwau: “Ta ta be edia hekwarahi hegeregerena ahuna do idia abia.” (1 Kor. 3:8; 4:1, 2) Lagani daudau painia gaukara ia karaia taihu ta ia gwau: “Lau diba Iehova ese egu hekwarahi do ia hanamoa dainai lau moale.”

7. Esekiela be unai matahanai ia laloa neganai, dahaka ese ena abidadama ia hagoadaia? (Rau 1 ena laulau itaia.)

⁷ Esekiela ia diba Dirava ena lauma helaga ena siahu be bada herea. Esekiela ena matahanai lalonai, ia itaia lauma helaga ese aneru goadadia bona guba ena kariota ena heau dalana ia durua. (Ese. 1:20, 21) Esekiela be dahaka ia karaia? Ia vara gauna ia torea. “Lau itaia neganai, lau goru diho.” Esekiela ia hoa bada dainai tano dekenai ia goru diho. (Ese. 1:28) Gabeai, Esekiela be unai matahanai ia laloa neganai, unai ese ena abidadama ia hagoadaia bona ia diba Dirava ena lauma helaga ena heduru amo ena haroro gaukara ia hagugurua diba.

8-9. (a) Iehova ese Esekiela dekenai dahaka oda herevana ia henia? (b) Bena Iehova ese edena dala ai ia hagoadaia noho?

⁸ Iehova ese Esekiela ia oda henia: “Taunimanima ena natuna e, oi gini unai amo oi do lau hereva henia.” Unai oda herevana ese Esekiela ena lalona ia hagoadaia bada. Esekiela ia gwau: “Lauma helaga ena siahu lau mamia bona lau dekenai goada ia henia lau gini.” (Ese. 2:1, 2) Gabeai Esekiela ena haroro gaukara lalonai, Dirava ena lauma helaga ese ia gunalaia. (Ese. 3:22; 8:1; 33:22; 37:1; 40:1) Dirava ena lauma helaga ese ia durua ia abia gaukarana ia karaia totona​—unai be ena teritori ai idia noho “kwara auka bona laloauka taudia” ia haroro henia. (Ese. 3:7) Iehova ese Esekiela ia hamaoroa: “Lau ese emu vairana be edia vairana hegeregerena lau ha-aukaia bona emu baguna be edia baguna hegeregerena lau ha-aukaia. Emu baguna be daimon bamona lau ha-aukaia, nadi aukana ia hereaia. Idia . . . eiava edia vaira aukadia dainai oi gari lasi.” (Ese. 3:8, 9) Unai be hegeregere, Iehova ese Esekiela ia hamaoroa: ‘Namo lasi unai taudia edia kwara auka karana dainai oi lalomanoka. Oi do lau durua.’

⁹ Unai murinai, Dirava ena lauma helaga ese Esekiela do ia haroro teritori dekenai ia hakaua lao. Esekiela ia gwau: “Iehova ena siahu ese hoa dalanai lau ia hakaua.” Esekiela ese  wiki ta lalonai ia harorolaia sivaraina ia lalopararalaia unai amo mai goada ida ia haroro diba. (Ese. 3:14, 15) Bena Iehova ese ia hamaoroa tano palakana dekenai do ia lao, unuseniai “Dirava ena Lauma be [ia] dekenai ia vareai.” (Ese. 3:23, 24) Esekiela ia hegeregere ena haroro gaukara ia hamatamaia totona.

10. Dahaka heduru ita abia be namo iseda haroro gaukara ita karaia totona, bona dahaka dainai?

¹⁰ Dahaka heduru ita abia be namo iseda haroro gaukara ita karaia totona? Unai ita haerelaia totona, Esekiela dekenai ia vara gauna ita laloa. Haroro gaukara ia do hamatamaia lasi neganai, Dirava ena lauma helaga amo goada ia abia. Esekiela ena nega hegeregerena, hari Dirava ena lauma helaga ena heduru sibona amo iseda haroro gaukara ita karaia diba. Dahaka dainai? Badina Satani be ita ia tuari henia noho iseda haroro gaukara ia koua totona. (Apok. 12:17) Momo idia laloa Satani be ia goada dainai ia do ita tuari henia diba lasi. To iseda haroro gaukara amo ia ita halusia noho! (Apok. 12:9-11) Edena dala ai? Haroro gaukara ita karaia neganai, ita be Satani ena hagaria herevadia dekenai ita gari lasi. Nega ta ta ita haroro neganai, Satani ita halusia. Ena be iseda haroro gaukara ai dagedage ita davaria, to ita gaukara noho karana ese dahaka ia hahedinaraia? Ita gwau diba lauma helaga ese ita ia hasiahua bona Iehova be ita ia lalonamo henia.​—Mat. 5:10-12; 1 Pet. 4:14.

11. Edena dala ai Dirava ena lauma helaga ese ita ia durua, bona ita abia noho totona dahaka ita karaia be namo?

¹¹ Iehova ese laulau dalana ai Esekiela ena vairana bona baguna ia ha-aukaia karana amo dahaka ita dibaia? Dirava ena lauma helaga ese ita ia hagoadaia unai amo haroro gaukara ai ita davaria hekwakwanai ita hanaia diba. (2 Kor. 4:7-9) Vadaeni, Dirava ena lauma helaga ita abia noho totona dahaka ita karaia be namo? Namona be hanaihanai do ita guriguri bona ita abia dae Iehova ese iseda guriguri do  ia kamonai. Iesu ese ena hahediba taudia ia hadibaia ia gwau: “Umui noinoi noho, . . . tahua noho, . . . pidipidi noho.” Iehova ese guriguri ia haerelaia neganai, “lauma helaga be idia noinoi taudia dekenai do ia henia.”​—Luka 11:9, 13; Kara 1:14; 2:4.

12. Esekiela 2:9–3:3 ena hereva bamona, lokua toretore be edeseni amo ia mai bona ia lalonai dahaka ia noho?

¹² Dirava ena lauma helaga ese Esekiela ia hasiahua sibona lasi to Dirava ena hereva ese ia durua danu. Matahanai lalonai, Esekiela ese ia itaia imana ta be lokua toretore ia dogoatao. (Esekiela 2:9–3:3 duahia.) Lokua toretore be edeseni amo ia mai? Ia lalonai dahaka ia noho? Edena dala ai Esekiela ia durua? Mani ita itaia. Unai lokua toretore be Dirava ena terona amo ia mai. Esekiela ese ia itaia aneru foa amo, reana Iehova ese ta ia siaia unai lokua toretore ia henia totona. (Ese. 1:8; 10:7, 20) Unai lokua toretore lalonai Esekiela ese gwau-edeede Israela besena dekenai do ia harorolaia hahemaoro herevana ia noho. (Ese. 2:7) Unai hereva be lokua toretore ena vairana bona murinai idia torea.

13. Iehova ese Esekiela ia hamaoroa lokua toretore dekenai dahaka do ia karaia bona dahaka dainai ena mamina be namo herea?

¹³ Iehova ese ena peroveta tauna ia hamaoroa lokua toretore do ia ania bona ena “bogana [ia] hahonua.” Esekiela ese unai hereva ia kamonai bona lokua toretore ia ania haorea. Unai matahanai ena anina be dahaka? Esekiela ese do ia harorolaia herevana ia lalopararalaia be namo. Unai hereva ia abidadama henia be namo unai amo mai goada ida do ia harorolaia. Bena hoa gauna ta ia vara. Esekiela ia davaria unai lokua toretore “ena mamina be hani digarana bamona.” (Ese. 3:3) Dahaka dainai? Esekiela dekenai, Iehova totona do ia hereva ena hemami be namo herea. (Sal. 19:8-11) Ia moale bada badina Iehova ese ia abia hidi iena peroveta gaukara ia karaia totona.

14. Dahaka ese Esekiela ia durua ena asainmen ia hamatamaia totona?

¹⁴ Gabeai, Iehova ese Esekiela ia hamaoroa: “Lau gwauraia hereva ibounai do oi kamonai henia bona laloatao.” (Ese. 3:10) Unai hadibaia herevadia amo, Iehova ese Esekiela ia hamaoroa lokua toretore edia herevadia do ia laloa dobu bona ia laloatao. Unai ia karaia neganai, ena abidadama ia goada. Danu, unai lokua toretore amo, Esekiela ese taunimanima dekenai do ia harorolaia hereva aukana ia hahedinaraia. (Ese. 3:11) Esekiela be Dirava ena hereva ia lalopararalaia dainai, ia haroro matamaia bona ena asainmen ia hagugurua.​—Salamo 19:14 hahegeregerea.

15. Ita haheauka totona dahaka ita “laloatao” be namo?

¹⁵ Haroro gaukara ai ita haheauka totona, Dirava ena hereva amo iseda abidadama ita hagoadaia noho danu be namo. Iehova ese ita dekenai ia gwauraia hereva ibounai ita “laloatao” be namo. Hari, Iehova be ena Hereva, Baibel amo ita ia hereva henia. Dahaka ita karaia diba unai amo Dirava ena Hereva ese iseda lalohadai, hemami bona kara do ia biagua noho?

16. Dirava ena Hereva dekenai dahaka ita karaia be namo bona edena dala ai ita lalopararalaia diba?

¹⁶ Iseda tauanina ia goada totona. aniani ita ania bona bogana ese ia makohia hegeregerena, Dirava ena Hereva ita stadilaia bona laloa dobu karana ese iseda abidadama ia hagoadaia. Iehova ia ura lokua toretore amo unai ita dibaia. Iehova ia ura ena Hereva, Baibel ese iseda “bogana [ia] hahonua,” anina be  iena hereva do ita lalopararalaia namonamo. Guriguri, duahiduahi bona laloa dobu karana amo unai ita karaia diba. Dirava ena lalohadai ita abia totona, guriguri amo iseda kudouna ita hegaegaelaia guna be namo. Bena, Baibel ena sivarai ta ita duahia. Unai murinai, nega ita atoa ita duahia gauna ita laloa dobu. Dahaka namo do ia havaraia? Nega bada lalonai Dirava ena Hereva ita laloa dobu neganai, do ita lalopararalaia bona iseda abidadama do ia goada.

17. Dahaka dainai Baibel ita duahia bona laloa dobu be mai anina bada?

¹⁷ Dahaka dainai Baibel ita duahia bona laloa dobu be mai anina bada? Unai ita karaia neganai, ita ia hagoadaia, hari basileia ena sivarai namona do ita harorolaia bona vaira nega ai hahemaoro hereva aukana do ita gwauraia. Danu, Iehova ena kara badadia ita laloa dobu neganai, iseda hetura karana ia ida do ia goada ia lao. Bena, gau namo hereana ta do ita mamia, unai be maino bona moale.​—Sal. 119:103.   

18. Iseda teritori ai idia noho taudia ese dahaka do idia diba bona dahaka dainai?

¹⁸ Esekiela be peroveta tauna, to ita be ia peroveta taudia lasi. To, ita be Iehova ena sivarai do ita harorolaia noho ela bona ia gwau gaukara ita hadokoa. Hahemaoro negana ia ginidae neganai, iseda teritori ai idia noho taudia ese ekskius herevadia do idia gwauraia lasi, hegeregere hadibaia hereva ai abia lasi eiava Dirava be ai ia laloa lasi. (Ese. 3:19; 18:23) To, gabeai do idia laloparara ita gwauraia sivaraina be Dirava amo ia mai.

19. Dahaka ese ita do ia hagoadaia iseda haroro gaukara ita hagugurua totona?

¹⁹ Dahaka ese ita do ia hagoadaia iseda haroro gaukara ita hagugurua totona? Esekiela ia hagoadaia gaudia toi. Ita haroro noho badina ita diba Iehova ese ita ia siaia, ena lauma helaga amo ita ia hasiahua bona ena Hereva amo ita ia hagoadaia. Iehova ena heduru amo, iseda haroro gaukara be mai haheauka ida do ita karaia noho “ela bona dokona.”​—Mat. 24:13.