1-2. (a) Dahaka henanadai do ita herevalaia? (b) Dahaka ese ia hahedinaraia Iehova ia ura momokani ita ia durua?

 IEHOVA ese ita ia durua diba mauri ai ita davaria hekwakwanai ita haheaukalaia bona iseda hesiai gaukara ita moalelaia totona. Edena dala ai ita ia durua? Bona edena dala ai Iehova ena heduru amo namo ita davaria diba? Inai atikol ai unai henanadai do ia haerelaia. To, unai ita do haerelaia lasi neganai, mani inai henanadai ita laloa guna: Iehova ia ura momokani ita do ia durua, a?

² Aposetolo Paulo ese Heberu taudia dekenai ia torea revareva ta lalonai, ia gaukaralaia herevana ese ita dekenai haere ia henia. Paulo ia gwau: “Iehova be egu durua tauna, lau be do lau gari lasi. Taunimanima be lau dekenai dahaka do idia karaia?” (Heb. 13:6) Baibel ia herevalaia bukana ta ia gwau, inai hereva “durua tauna” ena anina be tau ta be heduru totona ia noinoi tauna dekenai ia heau lao heduru ia henia totona. Mani oi laloa Iehova be ia heau lao noho lalohisihisi tauna ia durua totona. Oi abia dae momokani unai laulau herevana ese ia hahedinaraia Iehova ia ura momokani ita ia durua. Iehova ese ita ia durua neganai, mai moale ida iseda hekwakwanai ita haheaukalaia diba.

3. Edena dala toi ai Iehova ese ita ia durua mai moale ida iseda hekwakwanai ita haheaukalaia totona?

³ Edena dala haida ai Iehova ese ita ia durua mai moale ida iseda hekwakwanai ita haheaukalaia totona? Haere ita abia totona, mani Isaia bukana ita itaia. Dahaka dainai? Isaia ese ia torea peroveta herevadia momo be, hari idia noho Dirava ena hesiai taudia totona. Unai sibona lasi, to Isaia ese ita lalopararalaia  dalana ai Iehova ia herevalaia. Isaia karoa 30 ai haheitalai haida idia noho. Unai karoa lalonai, Isaia ese haheitalai namodia ia gaukaralaia Iehova ese ena taunimanima ia durua dalana ia herevalaia totona. Ia gwau Iehova ese ita ia durua dalana be (1) iseda guriguri ia kamonai namonamo bona ia haerelaidia, (2) ita ia hakaua, bona (3) hari bona vaira negana ai ita dekenai hahenamo ia henia. Mani unai dala toi ita herevalaia.

4. (a) Iehova ese Isaia ena nega ai idia noho Iuda taudia be edena bamona ia herevalaia bona dahaka ia koua lasi? (b) Abidadama taudia totona Iehova ese dahaka helaro ia henia? (Isaia 30:18, 19)

⁴ Isaia karoa 30 ena hamatamaia herevadia ai, Iehova ese Iuda taudia ia gwauraia “kwara auka natudia,” bona idia “kara dika loulou.” Ma ia gwau: “Idia be gwau-edeede taudia, . . . idia ura lasi Iehova ena taravatu idia kamonai.” (Isa. 30:1, 9) Idia ura lasi kamonai dainai, Isaia ia gwau, idia davaria dika be Iehova ese do ia koua lasi. (Isa. 30:5, 17; Ier. 25:8-11) Bona momokani, Babulonia taudia ese Iuda taudia be igui hesiai taudia ai idia halaoa. To, Iuda taudia huanai abidadama taudia haida idia noho, bona Isaia ese idia dekenai helaro namona ia gwauraia. Idia ia hamaoroa dina ta Iehova ese idia do ia ruhaia. (Isaia 30:18, 19 duahia.) Oibe, unai ia vara bona Iehova ese Babulonia amo idia ia ruhaia. To, lagani momo murinai Iehova ese unai ia karaia. Inai hereva, “Iehova be mai haheauka ida ia naria noho umui ia lalonamo henia totona” ese ia hahedinaraia lagani haida idia ore murinai, Iehova ese abidadama taudia do ia ruhaia. Oibe, Israela taudia be lagani 70 Babulonia ai idia noho bena gabeai idia mauri noho taudia haida sibona be Ierusalema dekenai idia giroa lou. (Isa. 10:21; Ier. 29:10) Edia hanua dekenai idia giroa lou neganai, igui hesiai negana ai lalohisihisi dainai idia tai, to hari idia moale dainai idia tai.

5. Isaia 30:19 ai dahaka hagoadaia herevana ia noho?

⁵ Hari inai hereva amo goada ita abia diba: “Heduru totona ia dekenai umui taitai neganai, ia ese umui do ia hebogahisi henia.” (Isa. 30:19) Isaia ese ita ia hagoadaia Iehova dekenai ita taitai neganai, Ia be mai hebogahisi ida do ia kamonai bona iseda guriguri do ia haerelaia haraga. Isaia ma ia gwau: “Umui do ia haere henia haraga.” Unai hagoadaia herevadia ese idia ia hahedinaraia iseda Tamana be ia ura momokani ia dekenai heduru totona idia noinoi taudia do ia durua. Unai ita diba dainai mai moale ida ita haheauka diba.

6. Edena dala ai Isaia ena hereva ese ia hahedinaraia Iehova ese ena hesiai taudia ta ta edia guriguri ia kamonai?

⁶ Inai siri ese iseda guriguri dekenai dahaka gau ma haida ia hadibaia? Iehova be ita ta ta eda guriguri ia kamonai namonamo. Dahaka dainai unai bamona ita hereva? Isaia karoa 30 ena kahana ginigunana ai, inai hereva “umui” ia gaukaralaia badina Iehova ese ena taunimanima be bese ta bamona ia hereva henidia. Ena be siri 19 ese ia hahedinaraia Iehova ese ena taunimanima be bese ta bamona ia hereva henia, to Heberu gado ai ia hahedinaraia unai siri lalonai Iehova be taunimanima ta ta ia hereva henia. Heberu gado ai inai bamona idia torea: “Do oi taitai lasi”; “ ia ese oi do ia hebogahisi henia”; “oi do ia haere henia.” Iehova be lalokau Diravana dainai, ena lalohisihisi natuna mero o kekeni dekenai ia gwau lasi, “Oiemu tadikaka o taihu bamona oi goada be namo.” To, ita ta ta ia laloa bada bona iseda guriguri ia kamonai.​—Sal. 116:1; Isa. 57:15.

7. Isaia bona Iesu ese edena bamona idia hahedinaraia ita guriguri noho be mai anina bada?

⁷ Ita davaria hekwakwanai be Dirava dekenai  ita gurigurilaia neganai, Iehova ese ita dekenai goada ia henia guna unai ita haheaukalaia totona. Bona bema iseda hekwakwanai be ia ore haraga lasi, namona be hanaihanai Iehova ita guriguri henia ita haheauka noho totona. Ita ia boiria unai bamona ita karaia totona. Isaia ese ia torea herevana be inai ia hahedinaraia: “[Iehova] dekenai do umui guriguri noho.” (Isa. 62:7) Unai ena anina be dahaka? Namona be iseda guriguri Iehova dekenai hanaihanai ita gwauraia, unai be hegeregere Iehova dekenai ita guriguri noho. Isaia ia torea herevana be Iesu ese guriguri totona ia gwauraia haheitalai Luka 11:8-10, 13 ai. Unuseniai Iesu ese ita ia hagoadaia ita “noinoi loulou” bona lauma helaga totona ita “noinoi noho.” Danu Iehova ita noinoi diba ita ia hakaua disisen maorodia ita karaia totona.

8. Iuda taudia edia negai, Isaia 30:20, 21 ena hereva be edena dala ai ia guguru?

⁸ Isaia 30:20, 21 duahia. Babulonia ena tuari taudia be lagani tamona mai kahana lalonai Ierusalema idia hagegea neganai, taunimanima ese idia davaria hisihisi be hegeregere dina ibounai paraoa idia ania bona ranu idia inua karana bamona. To siri 20 bona 21 ai, Iehova ia gwauhamata bema Iuda taudia idia helalo kerehai bona edia kara idia haidaua, idia do ia hamauria. Isaia ia gwau Iehova be edia “Hadibaia Tauna Badana” dainai, Iehova ese idia dekenai ia do idia tomadiho henia dalana maorona do ia hadibaia. Iuda taudia be Babulonia amo idia ruhaia neganai, unai hereva ia guguru. Iehova ia hamomokania ia be edia Hadibaia Tauna Badana, bona ena hakaua henunai, iena taunimanima ese tomadiho goevana idia haginia lou. Hari ita moale badina Iehova be iseda Hadibaia Tauna Badana.

9. Hari edena dala amo Iehova ena hakaua herevadia ita abia?

⁹ Unai siri lalonai, Isaia ia gwau ita be stiuden taudia bamona bona Iehova ese dala rua ai ita ia hadibaia. Dala ginigunana be, Isaia ia gwau: “Emui Hadibaia Tauna Badana be  . . . emui matana amo ia do umui itaia.” Danu inai siri lalonai, Hadibaia Tauna be hegeregere ena stiuden taudia vairanai ia gini. Hari iena hadibaia herevadia amo namo ita davaria. Edena dala ai Iehova ese ita ia hadibaia? Ita moale badina ena orea amo ita ia hadibaia bona hakaua hereva namodia ita abia! Iseda kongrigeisen heboudia, hebouhebou badadia, pablikeisen, JW Broadcasting^® program, bona dala idauidau amo hakaua herevadia ia henia, unai amo mai moale ida nega aukadia ita haheaukalaia diba.

10. Edena dala ai iseda murina amo gadona ta ita kamonai?

 ¹⁰ Iehova ese ita ia hadibaia dalana iharuana be, Isaia ese ia herevalaia ia gwau: “Murina amo gado ta do umui kamonai.” Peroveta tauna ia gwau Iehova be hadibaia tauna bamona iena stiuden taudia murinai ia raka bona do idia lao dalana ia hadibaia noho. Hari iseda murina amo Dirava ena gadona ita kamonai. Edena dala ai? Dirava ena hereva be idaunegai Baibel lalonai idia torea. Baibel ita duahia neganai, unai be hegeregere iseda murina amo Dirava ena gadona ita kamonai.​—Isa. 51:4.   

11. Mai moale ida ita haheauka totona, edena dala rua ita badinaia be namo, bona dahaka dainai?

¹¹ Iehova ese ena orea bona ena Hereva amo ia henia hakaua herevadia ese edena dala ai ita ia durua diba? Isaia ese hereva rua ia gwauraia. Ginigunana be “dala be inai” bona iharuana be “inai bamona umui raka.” (Isa. 30:21) “Dala” ita dibaia sibona be hegeregere lasi. Danu namona be unai dala dekenai ita “raka.” Iehova ena Hereva bona ena orea ese ia hahedinaraia herevadia ese ita dekenai Iehova ena ura ia hadibaia. Danu ita dibaia gaudia ita badinaia dalana ia hadibaia. Iehova ena hesiai gaukara lalonai mai moale ida ita haheauka totona, namona be unai dala rua ita badinaia. Unai amo Iehova ese ita do ia hanamoa.

12. Isaia 30:23-26 ese ia hahedinaraia Iehova ese ena taunimanima be edena dala ai do ia hanamoa?

¹² Isaia 30:23-26 duahia. Iuda taudia be Israela tanona dekenai idia giroa lou neganai, unai peroveta herevana be edena bamona ia guguru? Iehova ese idia dekenai hahenamo momo ia henia idia mauri noho bona ia idia hesiai henia totona. Iehova ese ena taunimanima dekenai aniani momo ia henia. To mai anina bada gauna be gau ibounai ia henia ia kahirakahira do idia lao bona dala goevana ai do idia tomadiho henia. Unai negai, Dirava ena taunimanima ese idia moalelaia hahenamo be guna ena bamona lasi. Siri 26 ese ia hahedinaraia Iehova ese ena hereva ena diari ia habadaia. (Isa. 60:2) Iehova ena hahenamo idauidau ese ena hesiai taudia ia durudia mai moale bona lalogoada ida ia do idia hesiai henia noho “badina edia kudouna ia namo.”​—Isa. 65:14.

13. Edena dala ai unai tomadiho momokanina haginia ena peroveta herevana be hari iseda negai ia guguru?

¹³ Unai tomadiho goevana haginia ena peroveta herevana be iseda nega ai ia guguru danu, a? Oibe! Edena dala ai? Lagani 1919 C.E.  amo, taunimanima milioni momo be Babulonia Badana, tomadiho koikoi oreadia ibounai unai, ena igui amo idia roho mauri vadaeni. Idia be Israela ena Gwauhamata Tanona ia hereaia gabuna ta dekenai ia hakaudia lao. Unai amo idia be mai lalotamona ida dala goevana ai Dirava idia tomadiho henia.​—Isa. 51:3; 66:8.

14. Horoa taudia bona ita be edena tomadiho karana ita moalelaia?

¹⁴ Lagani 1919 C.E. amo, horoa taudia be mai lalotamona ida Dirava idia tomadiho henia karana idia moalelaia. Lagani momo idia hanaia lalonai, tanobada helarona idia abia taudia, “mamoe ma haida” unai, ese horoa taudia ida unai tomadiho karana idia moalelaia. Idia be Dirava amo hereva momokani idia dibaia bona hahediba hereva koikoidia idia dadaraia. Danu idia ese Dirava ena Basileia ena sivarai namona harorolaia gaukarana be mai moale ida idia karaia. Ita ibounai be Iehova ita tura henia bona iseda tadikaka taihu ida maino ai ita noho bona idia ese ita idia durua hekwakwanai idauidau ita haheaukalaia totona. Dala maorona ai Iehova ita tomadiho henia bona ia ita tohotohoa neganai, unai tomadiho goevadaena do ita moalelaia.​—Ioa. 10:16; Isa. 25:6; 65:13.

15. Tomadiho goevana be edeseniai ita davaria diba?

¹⁵ Unai tomadiho goevana be edeseniai ita davaria diba? Iehova idia tomadiho henia taudia be tanobada hegegemadai ai idia noho. Unai dainai, unai tomadiho goevana be tanobada ena kahana ibounai dekenai oi davaria diba. So, hari, herevana edeseniai ita noho, to mai lalotamona ida Dirava tomadiho henia karana ita moalelaia diba.

16. Edena dala ai hanaihanai kongrigeisen ena hairai ita laloa noho?

¹⁶ Mai lalotamona ida Dirava tomadiho henia karana ita moalelaia totona, namona be tanobada hegegemadai Keristani kongrigeisen tadikaka taihu ita laloa bada. Edena bamona unai ita hahedinaraia diba? Edia kerere ita tahua lasi, to edia kara namodia ita laloa. (Ioa. 17:20, 21) Dahaka dainai ia be mai anina bada? Mani inai oi laloa. Gabu hairaina ta o uma gabu ta ai be au idauidau idia noho. Unai hegeregerena, hari kongrigeisen lalonai tadikaka taihu idauidau idia noho. (Isa. 44:4; 61:3) Namona be hanaihanai kongrigeisen ena hairai ita laloa, to namo lasi iseda tadikaka taihu ta ta  edia manoka gaudia ita tahua. Danu namo lasi ita sibona eda o eda tadikaka taihu edia manoka gaudia ese tanobada hegegemadai Keristani kongrigeisen ena hairai ia hadikaia.

17. Ita ta ta be dahaka ita karaia diba kongrigeisen ai maino ita havaraia totona?

¹⁷ Mai lalotamona ida ita noho totona, ita ta ta be dahaka ita karaia diba? Maino karaia taudia ai ita lao be namo. (Mat. 5:9; Roma 12:18) Kongrigeisen lalonai, hanaihanai mai maino ida ma haida danu ita noho neganai, mai lalotamona ida tadikaka oreana ida ita noho. Namona be ita laloatao Iehova ese tomadiho goevana dekenai ita ta ta ia hakaua mai. (Ioa. 6:44) Iehova ia itaia ita gaukara goada tadikaka taihu huanai maino bona lalotamona ita havaraia neganai, ia moale bada.​—Isa. 26:3; Hag. 2:7.

18. Dahaka ita laloa dobu be namo, bona dahaka dainai?

¹⁸ Dirava amo ita abia hahenamo idauidau ese edena dala ai ita dekenai namo ia havaraia? Dirava ena Hereva bona pablikeisen idauidau amo ita dibaia gaudia ita laloa dobu be namo. Unai bamona stadi bona laloa dobu karana ese ita do ia durua Keristani kara namodia ita hahedinaraia, hegeregere kongrigeisen ai iseda tadikaka taihu ita “hebogahisi henia bona lalokau henia.” (Roma 12:10) Hari ita moalelaia hahenamo idauidau ita laloa dobu neganai, iseda hetura karana Iehova ida do ia goada. Bona Iehova ese vaira negana ai ita dekenai do ia henia hahenamo idauidau ita laloa dobu neganai, ia do ita hesiai henia urana be do ia goada. Unai gaudia ibounai dainai mai moale ida Iehova do ita hesiai henia noho.

19. (a) Isaia 30:18 ena hereva hegeregerena, dahaka ita diba momokani? (b) Dahaka ese ita do ia durua ita haheauka noho totona?

¹⁹ Iehova be ita totona “do ia toreisi” bona inai tanobada dikana do ia haorea. (Isa. 30:18) Ita diba momokani Iehova be “hahemaoro maoromaoro Diravana,” unai dainai ia ese Satani bona ena taunimanima dekenai nega do ia henia lasi idia noho daudau totona. (Isa. 25:9) Mai haheauka ida Iehova ese ita do ia hamauria negana ita naria noho. To hari, namona be guriguri karana ita goadalaia bona Dirava ena Hereva ita stadilaia, ita badinaia bona ita abia hahenamo idauidau ita laloa dobu. Bema unai ita karaia, Iehova ese ita do ia durua mai haheauka ida ia tomadiho henia karana do ita moalelaia.