Inai Oi Diba, A?
Modekai be guna ia noho tau korikorina, a?
BAIBEL bukana Eseta ena sivarai lalonai Iuda tauna ta ladana, Modekai be mai anina bada tauna. Ia be Iuda igui hesiai tauna bona Parasa ena king ena ruma ai ia gaukara. Unai be lagani 500 B.C.E bamona, ‘King Ahasuero ena nega ai.’ (Hari idia gwau unai King be Xerxes I.) Haida idia ura King idia hamasea neganai, Modekai ese edia palani ia hadikaia. King be Modekai ia tanikiu henia totona, palani ia karaia taunimanima vairadiai do ia hanamoa. Gabeai, Modekai bona Iuda taudia edia inai tauna, Hamana, ia mase murinai king ese Modekai be praiminista ai ia halaoa. Modekai ese iena dagi ia gaukaralaia bona oda ta ia karaia, bona Parasa Basileiana henunai idia noho Iuda taudia be edia inai taudia ese do idia alaia ore ena palani amo ia hamauridia.—Eseta 1:1; 2:5, 21-23; 8:1, 2; 9:16.
Lagani haida gunanai, histori stadilaia taudia idia gwau Eseta bukana ena sivarai be koikoi bona Modekai be ia noho tau korikorina lasi. To lagani 1941 ai, akioleji taudia ese gau haida idia davaria bona ia hamomokania Baibel ese ia herevalaia tauna Modekai be ia noho tau korikorina ta. Dahaka idia davaria?
Tahua gaukara karaia taudia ese Parasa toretore nadina ta ai, tau ta ladana Marduka (Modekai) ena sivarai idia davaria. Susa ai ia be ofesa ta, reana akauntent gaukara ia karaia. Oriental histori ia stadilaia tauna Arthur Ungnad ia gwau idia davaria nadina be unai negai “Modekai ia sivarailaia hamomokania gauna tamona sibona.”
Ungnad ena ripoti ia halasia murinai, diba bada taudia ese Parasa ena toretore nadidia tausen momo idia hahanaia. Idia haida be Persepolis siti ena raro toretoredia. Unai be siti gunana ena magu kahirakahira ai, ia moru vadaeni kohu haboua rumana ena momoru lalonai idia davaria. Unai uro be Xerxes I ena lohia negana ai idia toredia. Idia be Elama gado ai idia torea bona Eseta bukana ese ia sivarailaia taudia edia ladana haida idia torea danu. a
Inai ladana Modekai (Marduka) be Parasa toretore nadidia ai ia hedinarai
Persepolis ena toretoredia ai tau ta ladana Marduka idia gwauraia. Ia be King Xerxes I ena lohia negana ai, Susa dekenai king ena ruma ai seketere gaukara ia karaia. Ia hahedinaraia Marduka be gado hahanaia tauna. Unai hereva be Baibel ese Modekai ia gwauraia dalana ida ia hegeregere. Ia be King Ahasuero (Xerxes I) ena ruma ai ia gaukara bona ia be gado rua ia veria diba. Modekai be nega momo king ena geiti ai ia helai. (Eseta 2:19, 21; 3:3) King ena geiti ena ruma be bada herea bona ena ofesa taudia be unuseniai idia gaukara.
Raro toretoredia ese idia gwauraia Marduka bona Baibel ese ia gwauraia Modekai edia sivarai be hegeregere. Idia be nega tamona bona gabu tamona ai idia noho, bona gaukara gabuna tamona ai maduna badana idia huaia. Unai gaudia ibounai ese idia hamomokania, akioleji ese idia davaria gaudia be Eseta bukana ese ia gwauraia tauna Modekai ia herevalaia.
a Lagani 1992 ai Profesa Edwin M. Yamauchi ese Persepolis ena toretore ai idia davaria ladadia 10 ia halasia, bona idia be Eseta bukana lalonai idia noho danu.
