To unai be gabeai do lau stori, ful-taim hesiai gaukara lau hamatamaia ena sivarai do lau gwauraia guna.

Lau be 1942 ai Caribbean motumotu ta ladana Curaçao dekenai lau vara. Egu tama ena hanua be Suriname, to gaukara totona unai motumotu dekenai ia lao. Lau do vara lasi neganai, lagani haida gunanai egu tamana be Curaçao dekenai bapatiso idia abia Iehova ena Witnes taudia ginigunana ta. a Wiki ta ta lalonai emai tamana be ai ida Baibel ia stadilaia, ena be ai ura lasi. Egu mauri lagani be 14 neganai, egu tamana ese Suriname dekenai emai famili ia abia lao, ena sinana burukana naria totona.

Suriname dekenai, kongrigeisen ai Iehova idia hesiai henia goadagoada memero kekeni lau bamoa. Edia mauri lagani be sisina bada bona regula painia gaukara idia karaia. Haroro gaukara ai idia davaria ekspiriens idia herevalaia neganai, edia moale toana lau itaia. Kongrigeisen hebou murinai, lau bona egu turadia be Baibel ena topik haida ai herevalaia​—nega momo hanuaboi ai hisiu ai itadia bona ai herevahereva. Unai turadia ese lau idia durua bona lau laloparara lau ura Iehova ena gaukara do lau karaia. Unai dainai, egu mauri lagani be 16 neganai, lau bapatiso. Gabeai, egu mauri lagani be 18 neganai, regula painia gaukara lau hamatamaia.

Painia gaukara amo gau momo lau dibaia, bona egu ful-taim hesiai gaukara lalonai unai diba ese lau ia durua. Hegeregere lau dibaia gauna ginigunana be, ma haida treinia karana be mai anina bada. Lau painia matamaia neganai, misinari ta ladana Willem van Seijl be lau ia durua bada. b lau dekenai kongrigeisen ena  maduna idauidau huaia dalana ia hadibaia. Unai nega ai lau laloparara lasi unai treinin be mai anina bada. Unai lagani murinai lau dekenai spesel painia gaukara idia henia bona unai murinai, Suriname ena uda badana gabudia bona gunika ai idia noho grup maragidia lau vadivadi henia matamaia. Oibe, tadikaka ese lau idia treinia karana lau laloa bada! Unai nega amo, edia haheitalai lau badinaia bona haida lau treinia danu.

Lau dibaia gauna iharuana be, kohu momo lasi maurina bona palani karaia namonamo karana be mai ena namo. Hua ta ta ena matamanai, lau bona egu spesel painia turana ese vaira puradia totona aniani bona ura gaudia ena lista ai torea. Bena ai ta ese gabu daudau ia lao unai gaudia ia hoia totona. Hua ta ta ena moni ai gaukaralaia namonamo bona aniani danu ai haria namonamo unai amo emai aniani do ia noho ela bona hua dokona. Bema uda lalonai gau ta dekenai ai dabu, ta ese ai do ia durua lasi. Lau abia dae lau do matamata negana ai kohu momo lasi maurina bona palani karaia namonamo karana, ese lau ia durua egu mauri ibounai lalonai Iehova ena ura lau atoa guna totona.

Lau dibaia gauna ihatoina be, hanua taudia edia gado ai idia oi hadibaia karana be mai ena namo. Lau maragi neganai lau ese Dutch, English, Papiamento bona Sranantongo (danu idia gwauraia Sranan gado), dekenai lau herevahereva. To uda lalonai, sivarai namona ai harorolaia neganai lau itaia hanua taudia be edia gado korikori ai idia kamonai namonamo. To edia gado haida, hegeregere Saramaccan gado ai lau hereva be auka. Ena be lau hekwarahi to unai lau karaia dainai lau moale. Lagani momo lalodiai taunimanima momo dekenai hereva momokani lau hadibaia, badina edia gado korikori ai lau hereva.

To, nega haida gado dekenai kerere lau karaia bona lau hemarai. Hegeregere, nega ta Saramaccan gado ia veria Baibel stadi hahinena ta be bogana ia hisihisi bona ia gorere. Lau ura henanadai bema ia namo, to hereva kererena lau gwauraia bona lau nanadaia bema ia be mai bogana! Ia be ia hemarai bada. To herevana unai bamona ia vara, to lau hekwarahi noho egu teritori ai idia noho taudia edia gado lau dibaia totona.

Lagani 1970 ai, lau idia abia hidi sekit gaukara lau karaia totona. Unai lagani ai uda lalonai idia noho grup maragidia momo dekenai slaid piksa ladana, “Visiting the World Headquarters of Jehovah’s Witnesses” lau hahedinaraia. Unai tadikaka taihu ai vadivadi totona, vanagi latana amo sinavai dekenai ai diho lao. Unai vanagi lalonai genareita, gasolin tanka, petrol lamepa, bona slaid projekta kohudia ai udaia. Ai ginidae neganai, piksa ai hahedinaraia hanuana dekenai unai kohu ibounai ai huaia lao. To, lau laloatao gauna be gunika gabudia ai taunimanima be slaid piksa idia moalelaia bada. Lau moale bada badina taunimanima lau durua Iehova bona iena tanobada oreana idia diba totona. Lau itaia taunimanima be Iehova idia tura henia neganai, egu hekwarahi lau moalelaia.

Ena be lau itaia singul maurina be mai ena namo bada ful-taim hesiai gaukara lalonai, to lau ura lau headava. Unai dainai, lau guriguri kekeni ta do lau davaria bona ia be mai moale ida uda bada gabudia ai ful-taim hesiai gaukara do ai karaia hebou. Reana lagani ta murinai, spesel painia taihu Ethel, lau tura henia. Ena be ena mauri ia auka, to ia ese Iehova ia hesiai henia goadagoada. Ia maragi negana amo, Ethel be aposetolo Paulo ia laloa bada bona ia ura haroro gaukara ai ia do ia tohotohoa. September 1971 lalonai, ai headava bona sekit gaukara ai karaia hebou.

Ethel be kohu momo lasi maurina ai ia tubu daekau, unai dainai uda bada gabudia ai sekit gaukara ia manadalaia haraga. Hegeregere, uda badana lalonai idia noho kongrigeisen ai vadivadi henidia neganai, gau momo ai abia lasi. Sinavai dekenai ai digu bona dabua ai huria. Danu tadikaka ese ai idia henia aniani ai ania sibona, herevana ia be iguana gaigai, piranha gwarume eiava uda lalonai o sinavai lalonai idia abia gauna ta. Mereki lasi neganai, biku raudia amo ai aniani. Sipuni be lasi neganai, emai imana ai gaukaralaia ai aniani totona. Ai mamia sibona emai ura ai dadaraia bona Iehova ai hesiai henia neganai, unai ese ai ia durua Iehova kahirakahira ai lao diba. (Had. 4:12) Unai ekspiriens idauidau ai moalelaia bada!

Dina ta uda gabuna ai tadikaka ai vadivadi henia bona ai giroa lou lalonai, matamana ai lau gwauraia gauna ia vara. Aru ia heau goadagoada gabuna ai, vanagi be ranu lalonai ia diho bona ia daekau. Namo herea ai be laif jaketi ai hahedokilaia bona vanagi amo ai moru lasi. To vanagi be ranu amo ia honu. Pani amo emai aniani ai negedia bona pani ai gaukaralaia vanagi lalonai ranu ai kokia totona.

Ai be aniani lasi dainai, sinavai ai diho neganai ai kimai, to gau ta ai veria lasi. Unai dainai Iehova  ai guriguri henia bona ai noia emai dina ena aniani do ia henia. Ai guriguri murinai, maoromaoro tadikaka ta be kimai ia henia bona gwarume badana ta ia veria. Unai hanuaboi ai ibounai ai ania bona ai bogakunu.

Lagani faiv lalodiai sekit gaukara ai karaia murinai, lau bona Ethel be harihari gauna ta ai davaria, ai be natuna ta do ai havaraia. Unai sivarai dekenai lau moale, to lau diba lasi edena dala ai unai ese emai mauri do ia haidaua. Lau bona Ethel ai ura bada ful-taim hesiai gaukara do ai karaia noho. Lagani 1976 ai, emai natuna mero Ethniel ia vara. Bena lagani rua mai kahana murinai, emai natuna mero iharuana, Giovanni ia vara.

So, unai negai Suriname ai pablisa be momo lasi dainai, brens ofesi ese lau idia siaia lao unuseni ai sekit gaukara lau karaia bona emai natudia do ai naria danu. Emai natudia memero be idia tubu daekau noho lalonai, lau idia siaia lao kongrigeisen momo lasi gabudia ai sekit gaukara lau naria totona. Unai dala amo hua ta ta bona wiki haida lalonai, sekit naria tauna bamona laolao lau karaia bona hua ibounai lalonai, ai noho kongrigeisen dekenai painia bamona ai gaukara. Ethel bona emai natudia memero be lau do idia bamoa bema emai gabu kahirakahira ia noho kongrigeisen lau vadivadi henia. To, uda badana lalonai idia noho kongrigeisen bona hebouhebou maragidia lau vadivadi henia neganai, lau sibona do lau lao.

Unai dainai gau ibounai lau palanilaia namonamo egu maduna idauidau lau hagugurua namonamo totona. Lau gaukara goada wiki ibounai emai famili stadi ai karaia totona. To, uda lalonai idia noho kongrigeisen lau vadivadi henia neganai, Ethel be ruma ai emai natudia memero ida famili stadi do ia hakaua. Ai be hanaihanai gau ibounai ai karaia hebou. Lau bona Ethel be emai natudia memero ida hanaihanai moale karadia ai karaia hebou​—hegeregere gadara eiava emai ruma kahirakahira ia noho gabudia ai vadivadi henia. Hanuaboi momokani ai, hanaihanai lau noga noho egu tok gaudia lau hegaegae totona. Bona Ethel be Aonega Herevadia 31:15 ese ia herevalaia hahine namona bamona, daba ia do rere lasi neganai do ia toreisi bona aniani do ia hegaegaelaia, unai amo emai natudia memero be sikuli idia do lao lasi neganai, dina ena siri do ai abia bona ai aniani hebou. Egu  lalokau hahine lau tanikiu henia badina lau ia durua Iehova ese lau dekenai ia henia hesiai gaukara idauidau lau hagugurua totona!

Ai be tama sina dainai, ai gaukara goada emai natudia memero ai durua Iehova bona haroro gaukara idia ura henia totona. Ai ura emai natudia memero be ful-taim hesiai gaukara do idia abia hidi, inai be badina ai abia hidi gaukarana lasi, to inai be badina edia abia hidi. Hanaihanai ful-taim hesiai gaukara dekenai ai abia moalena be idia dekenai ai herevalaia. Ai davaria hekwakwanai idauidau bona edena bamona Iehova ese ai ia durua bona hanamoa dalana be idia ida ai herevalaia. Danu, ai ura emai natudia memero ese Iehova idia atoa guna tadikaka taihu idia bamoa be namo.

Famili ai havaraia dainai Iehova ese emai dabu gaudia ibounai ia henia. Oibe, hanaihanai lau gaukara goada egu famili lau durua totona. Uda badana ai spesel painia gaukara lau karaia neganai, moni gaukaralaia namonamo dalana lau dibaia unai amo palani lau karaia guna emai dabu gaudia hoia totona. Ena be ai gaukara goada emai dabu gaudia ai abia totona, to nega haida unai ibounai do ai hagugurua lasi. Unai bamona negadiai, lau abia dae Iehova ese ai ia durua. Hegeregere, lagani 1980 huanai, Suriname ai tuari ia vara. Unai laganidia ai, ia auka emai dabu gaudia ai abia totona. Herevana dahaka ia vara, to Iehova ese ai ia durua.​—Mat. 6:32.

Guna ena mauri ai laloa neganai, Iehova ese ai ia naria bona ai ia durua ai dekenai idia noho gaudia hegeregerena dainai ai moale. Emai natudia ese ai idia hamoalea bada bona ai itaia Iehova idia hesiai henia be hahenamo badana. Ai moale bada danu badina edia mauri ai ful-taim hesiai gaukara idia karaia noho. Ethniël bona Giovanni be tiokratik sikuli amo idia gradueit bona hari edia adavadia danu, Suriname ena brens ofesi ai idia gaukara noho.

Hari lau bona Ethel ai buruka vadaeni, to spesel painia bamona Iehova totona ai do gaukara noho. Oibe, ai bisi bada herea dainai, nega be lasi nahu lau dibaia totona! To lau be gau ta dekenai lau lalohisihisi lasi. Egu mauri lau laloa lou neganai, lau gwau diba lau matamata lalonai disisen lau karaia egu mauri ibounai be ful-taim hesiai gaukara do lau karaia be disisen namona momokani.