STADI ATIKOL 45
ANE 138 Buruka Taudia be mai Edia Hairai
Abidadama Tatau Edia Hereva amo Diba Abia
“Burukadia dekenai aonega ia noho, ani? Bona idia mauri daudau taudia be mai edia laloparara, ani?”—IOBU 12:12.
STADI ENA BADINA
Iehova Dirava badinaia karana amo hari hahenamo ita abia bona vaira nega ai mauri hanaihanai do ita abia.
1. Dahaka dainai buruka taudia ese ita idia durua diba?
ITA IBOUNAI be abia hidi namodia ita karaia totona, heduru ita abia be namo. Bona unai bamona heduru be elda taudia bona lo Keristani taudia amo ita abia diba. Bema idia be buruka taudia, namo lasi ita laloa edia sisiba be ita do ia durua lasi. Iehova ia ura buruka taudia amo diba ita abia. Idia be edia mauri ai gau momo idia dibaia bona edia laloparara bona aonega be bada.—Iobu 12:12.
2. Inai atikol ai dahaka do ita dibaia?
2 Baibel negadia ai, Iehova ese abidadama buruka taudia ia gaukaralaia ena taunimanima ia hagoadaia bona hakaua totona. Idia haida be, Mose, Davida, bona aposetolo Ioane. Idia be nega idauidau ai idia noho bona edia noho daladia be idauidau. Edia mauri ena dina ginigabedia ai matamata taudia dekenai sisiba namodia idia henia. Unai abidadama buruka taudia ese idia hahedinaraia Dirava badinaia karana be mai anina bada. Iehova ese edia aonega hereva be Baibel lalonai ia atoa, unai amo diba do ita abia. Ena be ita matamata eiava buruka, to edia sisiba amo namo ita abia diba. (Roma 15:4; 2 Tim. 3:16) Inai atikol ai, ita be unai tatau burukadia toi edia hereva dokodia do ita laloa bona unai amo diba do ita abia.
“DO UMUI MAURI DAUDAU”
3. Mose be dahaka gaukara haida ia karaia?
3 Mose ena mauri ibounai lalonai Iehova totona ia gaukara goada. Ia karaia gaukaradia haida be peroveta gaukara, diadi, tuari biaguna bona toretore tauna. Mose be ena mauri lalonai idia vara gaudia amo diba ia abia! Ia ese Israela besena be Aigupito amo ia hakaua raka-lasi. Bona ia ese Iehova ena hoa karadia momo ia itaia. Iehova ese Mose ia gaukaralaia Baibel ena buka ginigunadia 5, Salamo 90, bona reana Salamo 91 ia torea totona. Danu, ia ese Iobu bukana ia torea.
4. Mose be daika ia sisiba henia, bona dahaka dainai?
4 Mose ena mauri lagani be 120, bona kahirakahira do ia mase neganai, ia ese Israela taudia ibounai ia haboua, bona Iehova ese guna idia totona ia karaia gaudia ia hadibaia lou. Idia momo be idia matamata neganai, Iehova ese ia karaia toa, hoa karadia bona Aigupito taudia ia panisia dalana idia itaia. (Eso. 7:3, 4) Idia be Iehova ese ia hapararaia Davara Kakakakana amo idia raka hanai, bona Iehova ese Farao bona ena tuari taudia ibounai ia hamasea karana idia itaia. (Eso. 14:29-31) Taunimanima lasi gabuna ai, Iehova ese idia ia gimaia bona ia naria dalana idia itaia. (Deu. 8:3, 4) Israela taudia be kahirakahira Gwauhamata Tanona dekenai do idia vareai, unai dainai Mose ia do mase lasi neganai, ia ura idia do ia hagoadaia. a
5. Deuteronomi 30:19, 20 ai, Mose ena hereva dokona ese edena dala ai Israela taudia ia hagoadaia?
5 Mose be dahaka ia gwau? (Deuteronomi 30:19, 20 duahia.) Ia ese Israela besena ia hadibaia vaira negana ai gau namodia do idia vara. Iehova ese idia ia hanamoa dainai, idia totona ia gwauhamatalaia tanona ai idia mauri daudau diba. Unai be tano namona bona aniani momo gabuna! Mose be unai tano ia herevalaia, bona ia gwau: “Tano be mai ena siti badadia bona namodia, umui haginia lasi gaudia unai, bona edia ruma be gau namodia idauidau amo idia honu, umui haboua lasi gaudia unai, ranu guridia, umui geia lasi gaudia unai, bona vain uma bona olive audia, umui hadoa lasi gaudia unai.”—Deu. 6:10, 11.
6. Dahaka dainai idau bese taudia ese Israela idia tuari henia neganai, Dirava ese ia koua lasi?
6 Mose ese Israela taudia dekenai hadibaia hereva ia henia danu. Unai tano namona ai idia mauri noho totona, Iehova ena taravatu idia badinaia be namo. Mose ese idia ia hagoadaia ‘mauri do idia abia hidi,’ anina be Iehova do idia kamonai henia bona idia “badinaia” noho. To, Israela taudia ese Iehova idia dadaraia. Unai dainai, Asuria taudia ese idia tuari henia bona edia tano dekenai idia abidia lao. Bona gabeai, Babulonia taudia ese idia tuari henia danu bona edia tano dekenai idia abidia lao.—2 Ki. 17:6-8, 13, 14; 2 Siv. 36:15-17, 20.
7. Mose ena hereva amo dahaka ita dibaia? (Laulau itaia danu.)
7 Unai amo dahaka ita dibaia? Bema Iehova ita badinaia do ita mauri hanaihanai diba. Israela taudia be kahirakahira Gwauhamata Tanona dekenai idia vareai hegeregerena, ita danu be kahirakahira Dirava ese ia gwauhamatalaia tanobada matamata lalonai do ita vareai. Bona daudau lasi, do ita itaia tanobada be paradaiso ai do ia lao. (Isa. 35:1; Luka 23:43) Diabolo bona ena demoni do idia noho lasi. (Apok. 20:2, 3) Tomadiho ta do ia noho lasi Iehova amo taunimanima idia hakaua siri totona. (Apok. 17:16) Taunimanima edia gavamani ta do ia noho lasi, edia henunai idia noho taudia idia dagedage henia totona. (Apok. 19:19, 20) Paradaiso ai gwau-edeede taudia do idia noho lasi. (Sal. 37:10, 11) Taunimanima ibounai ese Iehova ena kara maoromaoro taravatu do idia badinaia, unai ese lalotamona bona maino do ia havaraia. Unai dainai, ta ta do idia lalokau henia bona abidadama henia. (Isa. 11:9) Ita ese unai nega namona ita naria noho! Bema Iehova ita badinaia, tanobada paradaisona ai do ita noho. Bona lagani haida sibona do ita noho lasi, to do ita noho ela bona hanaihanai.—Sal. 37:29; Ioa. 3:16.
Iehova ita badinaia neganai, paradaiso ai do ita noho ela bona hanaihanai (Paragraf 7 itaia)
8. Edena dala ai, misinari tadikaka be mauri hanaihanai ena gwauhamata ese ia durua? (Iuda 20, 21)
8 Hanaihanai Dirava ena gwauhamata namodia ita laloa dobu neganai, unai ese ita do ia durua ia ita badinaia totona, ena be hekwakwanai idauidau do ita davaria. (Iuda 20, 21 duahia.) Danu, unai gwauhamata ese ita ia hagoadaia diba, iseda manoka gaudia ita hanaia totona. Africa ai, nega daudau misinari gaukara ia karaia tadikaka ta be ena manoka gauna ia herevalaia neganai, ia gwau: “Lau laloparara, bema Iehova lau badinaia lasi, paradaiso ai mauri hanaihanai do lau abia lasi, unai ese lau ia durua egu hekwakwanai lau hanaia totona. Bona Iehova dekenai unai lau gurigurilaia loulou. Iena heduru amo unai manoka gauna lau hanaia.”
“DO OI KWALIMU”
9. Davida ena mauri lalonai dahaka hekwakwanai ia davaria?
9 Davida be king namona. Ia be miusiki gadaralaia tauna, toretore tauna, tuari tauna goadana, bona peroveta tauna. Ia be hekwakwanai momo ia davaria. Lagani momo lalonai ia hunia loaloa, badina King Saulo ese ia ura hamasea. Davida be king ai ia lao murinai, ena natuna mero Abesaloma ia ura ena gabu ia abia dainai ia heau bona hunia lou. Ena be Davida ese hekwakwanai badadia ia davaria, bona kara dika badadia haida ia karaia, to ia be Dirava ia badinaia ela bona ia mase. Iehova ese Davida ia gwauraia ena “kudouna ia hamoalea” tauna. Oibe, Davida ena sisiba namodia ita badinaia be namo!—Kara 13:22; 1 Ki. 15:5.
10. Dahaka dainai, Davida be ena natuna Solomona, ena gabu do ia abia tauna dekenai sisiba ia henia?
10 Davida ese ena natuna Solomona, ena gabu ia abia tauna, dekenai ia henia sisiba herevadia ita laloa. Iehova ese Solomona ia abia hidi, dubu helaga do ia haginia, unai amo taunimanima be Dirava do idia tomadiho henia. (1 Siv. 22:5) Solomona be gaukara badadia momo do ia karaia bona Israela besena ia hakaua totona Iehova ena heduru ia abia be namo. Davida be Solomona dekenai dahaka do ia gwau? Mani ita itaia.
11. King Taudia Ginigunana 2:2, 3 hegeregerena, Davida be Solomona dekenai dahaka sisiba ia henia, bona unai ia badinaia dainai dahaka namo ia davaria? (Laulau itaia danu.)
11 Davida be dahaka ia gwau? (1 King Taudia 2:2, 3 duahia.) Davida ese ena natuna ia hamaoroa, bema Iehova ia badinaia, ena mauri lalonai do ia kwalimu. Bona lagani momo lalonai, Iehova ese Solomona ia hanamoa bona ia durua. (1 Siv. 29:23-25) Ia ese dubu helaga hairaina ia haginia bona Baibel ena buka haida ia torea. Iena aonega bona taga bada dainai, taunimanima momo be ia idia diba. (1 Ki. 4:34) To Davida ia gwau bamona, bema Solomona be Iehova ia badinaia noho, ena mauri lalonai do ia kwalimu. To madi, gabeai Solomona be dirava haida ia tomadiho henia. Iehova be unai ia ura henia lasi, unai dainai Solomona dekenai aonega ia henia lou lasi ena taunimanima be hebogahisi bona dala maorona ai ia lohiaia totona.—1 Ki. 11:9, 10; 12:4.
Davida ena natuna Solomona totona ia gwauraia hereva dokodia ese ita do idia durua, Iehova ita badinaia totona, Ia ese ita dekenai aonega do ia henia abia hidi maorodia ita karaia totona (Paragraf 11-12 itaia) b
12. Davida ena hereva amo dahaka ita dibaia?
12 Unai amo dahaka ita dibaia? Iehova ita badinaia neganai, do ita kwalimu. (Sal. 1:1-3) Momokani, Iehova ia gwauhamata lasi ita dekenai taga eiava ladana bada do ia henia, Solomona bamona. To bema iseda Dirava ita badinaia, ia ese ita dekenai aonega do ia henia, unai amo abia hidi namodia do ita karaia. (Aon. 2:6, 7; Iam. 1:5) Iena hakaua herevadia ese ita idia durua diba, moni gaukara, edukeisen, eiava moale karadia dekenai abia hidi namodia ita karaia totona. Bema ena sisiba ita badinaia, iseda hetura karana ia ida do ita gimaia bona mauri hanaihanai do ita abia. (Aon. 2:10, 11) Ma haida ida iseda hetura karana do ia goada. Bona iseda ruma bese lalonai moale do ia noho.
13. Dahaka ese Carmen ia durua abia hidi namona ia karaia totona?
13 Mozambique ai, taihu ladana Carmen ia laloa, sikuli badana ia abia neganai, ena mauri do ia namo. Ia be iunivesiti dekenai ia lao bona ruma haginia dalana (architecture) ia stadilaia. Ia gwau: “Lau dibaia noho gaudia lau ura henia. To unai ese egu nega bada bona goada ia haorea. Lau be 7:30 daba ai sikuli lau matamaia ela bona 6 oklok adorahi lau ore. Hebou dekenai lao be ia auka bona egu hetura karana Iehova ida ia manoka. Bona lau laloparara, lau be Iehova ena sisiba lau badinaia lasi.” (Mat. 6:24) Ena hekwakwanai ia gurigurilaia bona iseda pablikeisen ai tahua gaukara ia karaia. Ia gwau: “Elda taudia bona egu sinana amo sisiba namodia lau abia murinai, egu lalona lau hadaia iunivesiti do lau rakatania bona Iehova ena ful-taim hesiai gaukara do lau karaia. Lau mamia lau be abia hidi namona lau karaia bona lau moale bada.”
14. Mose bona Davida be dahaka idia gwau?
14 Mose bona Davida be Iehova idia lalokau henia bona idia diba ia idia badinaia be mai anina bada. Unai dainai edia hereva dokodia ai, ma haida idia hagoadaia edia haheitalai idia tohotohoa bona Iehova do idia badinaia noho. Bona idia gwau bema Iehova idia badinaia lasi, iena lalonamo do idia haboioa bona idia do ia hanamoa lasi. Hari ita dekenai edia sisiba be mai anina bada. Lagani momo murinai, Iehova ena hesiai tauna ma ta ese ia hahedinaraia Dirava badinaia karana be mai anina bada.
“LAU MOALE BADA HEREA”
15. Aposetolo Ioane ena mauri lalonai dahaka gaudia ia itaia?
15 Ioane be Iesu Keriso ena turana namona bona aposetolo tauna. (Mat. 10:2; Ioa. 19:26) Ioane be nega momo haroro gaukara ai Iesu ia bamoa, ia karaia hoa karadia ia itaia bona metau negadia ai Iesu ia badinaia. Ia itaia noho lalonai Iesu idia hamasea bona ia toreisi lou murinai ia itaia. Danu ia ese Keristani kongrigeisen ia bada ia lao dalana ia itaia. Bona sivarai namona be “tanobada hegegemadai idia harorolaia” negana ia itaia danu.—Kol. 1:23.
16. Ioane ese ia torea revareva be daidia ia durua?
16 Ioane ia buruka neganai, Apokalupo bukana ia torea, unai be hahenamo ta. (Apok. 1:1) Danu Ioane ese evanelia bukana ta ia torea. Bona ia ese revareva toi ia torea danu, unai be hari idia gwauraia Ioane ginigunana, iharuana bona ihatoina. Ena revareva ihatoina be abidadama Keristani tauna, Gaio totona ia torea. Ia ese Gaio be ena lalokau natuna ta bamona ia laloa. (3 Ioa. 1) Unai amo ita diba, reana Ioane ese momo ia gwauraia ena Keristani natudia. Ioane ese ia torea gaudia be Iesu ena murinai idia raka taudia ia hagoadaia ela bona hari iseda negai danu.
17. Ioane Ihatoina 4 hegeregerena, dahaka ese moale bada ia havaraia?
17 Ioane be dahaka ia torea? (3 Ioane 4 duahia.) Ioane ena revareva ihatoina ai Dirava badinaia karana ena moale ia herevalaia. Unai revareva ia torea negana ai, haida be hahediba hereva koikoi idia gwauraia loaloa bona kongrigeisen idia hapararaia. To haida be “hereva momokani ai idia raka noho.” Idia be Iehova idia badinaia bona ‘iena taravatu hegeregerena ai idia raka noho.’ (2 Ioa. 4, 6) Unai abidadama Keristani taudia be Ioane bona Iehova idia hamoalea bada.—Aon. 27:11.
18. Ioane ena hereva amo dahaka ita dibaia?
18 Unai amo dahaka ita dibaia? Iehova abidadama henia karana ese moale ia havaraia. (1 Ioa. 5:3) Hegeregere, ita moale badina Iehova ita hamoalea. Ia moale badina ia itaia, ita ese tanobada ena hahetoho idauidau ita dadaraia bona hereva momokani ita abia dae. (Aon. 23:15) Guba ai aneru danu idia moale. (Luka 15:10) Danu, iseda tadikaka taihu be dagedage eiava hahetoho lalonai Dirava idia abidadama henia neganai, ita moale. (2 Tes. 1:4) Bona Dirava ese Satani ena tanobada ia hadikaia neganai do ita moale, badina ena be inai tanobada dikana ai ita noho to Iehova ita badinaia.
19. Taihu Rachel be hereva momokani hadibaia karana dekenai dahaka ia gwau? (Laulau itaia danu.)
19 Ma haida dekenai hereva momokani ita hadibaia neganai, ita moale bada. Dominican Republic ai, taihu ta ladana Rachel ia mamia, ma haida dekenai Iehova Dirava herevalaia karana be hahenamo badana. Ia ese haida ia durua Iehova idia tomadiho henia totona, ia gwau: “Lau moale bada, badina lau itaia edia lalokau Iehova dekenai ia bada ia lao. Iehova dekenai idia tabekau bona ia idia hamoalea totona edia mauri idia haidaua. Unai dainai lau moale bada, ena be idia hadibaia totona lau hekwarahi.”
Ma haida ita hadibaia Iehova idia lalokau henia bona badinaia neganai ita moale (Paragraf 19 itaia)
ABIDADAMA TATAU EDIA HAGOADAIA HERAVA DOKODIA
20. Edena dala ai, ita be Mose, Davida, bona Ioane ida ita hegeregere?
20 Mose, Davida, bona Ioane idia noho negadia bona edia mauri daladia be iseda amo ia idau. To gau momo dekenai idia ida ita hegeregere. Idia be Dirava momokani idia hesiai henia bona ita danu be unai bamona ita karaia. Idia hegeregerena, Iehova ita guriguri henia, ia dekenai ita tabekau bona iena hakaua herevadia ita tahua. Bona unai tatau hegeregerena, ita diba momokani Iehova idia badinaia taudia be ia ese do ia hanamoa.
21. Mose, Davida, bona Ioane edia sisiba idia badinaia taudia be dahaka hahenamo do idia abia?
21 Namona be unai abidadama tatau edia sisiba bona Iehova ena taravatu ita badinaia. Unai amo ita karaia gaudia ibounai lalonai do ita kwalimu. Bona do ita “mauri daudau” ela bona hanaihanai! (Deu. 30:20) Danu do ita moale bada badina iseda guba Tamana ita hamoalea, ia ese ita totona ena gwauhamata ibounai do ia hagugurua.—Efe. 3:20.
ANE 129 Do Ita Haheauka Noho
a Davara Kakakana ai Iehova ena hoa karadia idia itaia Israela taudia momo be Gwauhamata Tanona idia itaia lasi. (Num. 14:22, 23) Iehova ia gwau edia mauri lagani 20 ia daekau tatau be taunimanima lasi gabuna ai do idia mase. (Num. 14:29) To, Iosua, Kaleba, bona mauri lagani 20 amo ia diho memero momo bona Levi iduhu taudia momo idia roho mauri. Idia be Ioridane Sinavai idia hanaia bona Gwauhamata Tanona dekenai idia vareai.—Deu. 1:24-40.
b LAULAU: Lauri kahana: Davida ese ena natuna Solomona dekenai aonega herevadia haida ia henia. Idiba kahana: Painia Sikuli ai tadikaka taihu be diba idia abia.
