STADI ATIKOL 44
ANE 33 Emu Lalohekwarahi be Iehova Oi Henia
Kara Gageva Haheaukalaia Dalana
“Namo lasi dika ese oi ia halusia, to kara namo amo dika oi halusia noho.”—ROMA 12:21.
STADI ENA BADINA
Ma haida ese oi idia kara namo henia lasi neganai, do oi karaia diba gauna unai amo hekwakwanai oi habadaia lasi.
1-2. Edena dala idauidau ai haida ese ita idia kara namo henia lasi?
IESU ese vabu ta ena sivarai ia gwauraia, unai vabu be diadi ia noia loulou hahemaoro maorona ia karaia totona. Iesu ena hahediba taudia momo ese unai sivarai idia laloa bada, badina unai nega ai momo ese ogogami taudia idia kara namo henia lasi. (Luka 18:1-5) Ita dekenai unai sivarai be mai anina bada danu, badina iseda nega ai kara gageva idia vara bona ita idia hahisia.
2 Hari tanobada ai, haida matauraia lasi karadia, maka tamona dekenai haida kara henia lasi karadia bona haida hahisia karadia idia bada idia lao, unai dainai ta ese ita ia kara namo henia lasi neganai, ita hoa lasi. (Had. 5:8) To bema tadikaka o taihu ta ese ita ia kara namo henia lasi neganai, do ita lalohisihisi bada. Momokani, iseda tadikaka o taihu be hereva momokani idia inai henia lasi. Idia be goevadae lasi taudia sibona. Iesu be ena inai taudia ese idia dagedage henia neganai, ia karaia gauna ese ita ia durua diba. Iseda inai taudia ese ita idia kara namo henia lasi neganai, unai ita haheaukalaia. Unai hegeregerena, namona be iseda tadikaka taihu dekenai manau karana ita hahedinaraia! Murimuri taudia eiava tadikaka taihu ese oi idia kara namo henia lasi neganai, Iehova ena hemami be edena bamona? Ita dekenai ia vara gauna ia laloa bada, a?
3. Ita hisihisi neganai Iehova be ita ia laloa, a? Bona dahaka dainai?
3 Iehova be ma haida ese ita idia kara henia dalana ia laloa bada. “Iehova be kara maoromaoro ia ura henia.” (Sal. 37:28) Iesu ese ita ia hamaoroa, nega maorona ai Iehova be ita totona “hahemaoro maorona do ia karaia haraga.” (Luka 18:7, 8) Bona ia ese kahirakahira ita davaria hisihisi bona kara gageva ibounai do ia haorea.—Sal. 72:1, 2.
4. Hari Iehova be dahaka heduru ia henia?
4 Iehova ese hekwakwanai ibounai do ia hamaoromaoroa negana ita naria noho. To, hari haida ese ita idia hahisia neganai, Iehova ese ita ia durua ita haheauka totona. (2 Pet. 3:13) Hegeregere, ita ia hadibaia dahaka ita karaia diba bema ta ese ita ia kara namo henia lasi, unai amo hekwakwanai ita habadaia lasi. Kara dika ita haheaukalaia totona, Baibel amo iena Natuna ena haheitalai hereadaena ia hahedinaraia. Bona sisiba namodia ia henia unai amo ita idia hahisia taudia ita kara namo henia diba.
KARA GAGEVA TAUDIA KARA HENIA DALANA DEKENAI ITA NARIA NAMONAMO
5. Dahaka dainai kara gageva taudia kara henia dalana dekenai ita naria namonamo?
5 Ta ese ita ia kara dika henia neganai ita lalohisihisi bada. (Had. 7:7) Abidadama taudia, Habakuku bona Iobu be unai idia mamia danu. (Iobu 6:2, 3; Hab. 1:1-3) Ena be unai hemami do ita abia, to namona be ita naria namonamo, ita ura lasi edia kara dika ena davana ita haloua bona ita kerere.
6. Abesaloma ena sivarai amo dahaka ita dibaia? (Laulau itaia danu.)
6 Ta ese ita ia kara namo henia lasi neganai, reana ita ura ena kara ita haloua. To, unai ita karaia neganai, hekwakwanai do ia habadaia. Mani King Davida ena natuna Abesaloma ena sivarai ita laloa. Iena taihuna Tamara be edia kakana Aminona ese ia reipia neganai ia badu dikadika. Mose ena Taravatu hegeregerena, Aminona idia hamasea be maoro. (Lev. 20:17) Ena be Abesaloma ia badu be kerere lasi, to ia be maoro lasi Aminona ia hamasea totona.—2 Sam. 13:20-23, 28, 29.
Abesaloma ena taihuna Tamara idia kara dika henia neganai, Abesaloma be ia badu dainai kerere ia havaraia, badina ena taihuna be haida ese idia hahisia (Paragraf 6 itaia)
7. Salamo torea tauna be kara dika taudia edia kara ia itaia neganai, ena hemami be edena bamona?
7 Kara gageva taudia be panisi idia abia lasi neganai, reana do ita laloa kara maoromaoro ita badinaia be anina lasi. Salamo torea tauna mani ita laloa. Ia itaia kara dika taudia be kara maoromaoro taudia idia hahisia, to toana be unai kara dika taudia be edia mauri idia moalelaia. Ia gwau: “Kara dika taudia be idia ura gaudia idia abia haraga.” (Sal. 73:12) Ia itaia kara dika taudia ese ma haida idia hahisia dainai kahirakahira Iehova hesiai henia karana ena hahenamo ia laloaboio. Ia gwau: “Lau ura edia kara lau lalopararalaia, to unai ese egu lalona ia hahisia noho.” (Sal. 73:14, 16) Ia gwau: “To lau be kahirakahira dala maorona amo lau raka-siri, kahirakahira egu aena ia dedi.” (Sal. 73:2) Tadikaka ta ladana Alberto dekenai unai bamona ia vara.
8. Ma haida edia kara dainai tadikaka ta dekenai dahaka ia vara?
8 Tadikaka haida idia gwau Alberto be kongrigeisen ena moni ia henaoa. Unai dainai, kongrigeisen ai ena maduna ia haboioa bona momo be ena kara dainai ia idia matauraia lasi. Ia gwau: “Lau badu bona lalohisihisi.” Unai dainai ena hetura karana Iehova ida ia manoka bona lagani faiv lalonai hebou ia lao lasi. Unai sivarai amo ita itaia, dahaka do ia vara diba bema kara gageva dainai ita lalohisihisi.
IESU ESE KARA GAGEVA IA HAHEAUKALAIA DALANA TOHOTOHOA
9. Iesu be dahaka kara gageva ia haheaukalaia? (Laulau itaia danu.)
9 Iesu ena haheitalai hereadaena ese ita ia durua diba kara gageva ita haheaukalaia totona. Ia be ena famili bona murimuri taudia ese idia kara namo henia lasi. Iena murimuri varavara ese ia idia gwauraia kavakava tauna, tomadiho gunalaia taudia idia gwau ia be demoni ida ia gaukara, bona Roma tuari taudia ese idia hevasehalaia, idia botaia bona idia hamasea. (Mar. 3:21, 22; 14:55; 15:16-20, 35-37) To, Iesu ese unai kara ibounai ia haheaukalaia bona edia dika davana ia haloua lasi.
Iesu be kara gageva haheaukalaia karana dekenai haheitalai hereadaena (Paragraf 9-10 itaia)
10. Edena dala ai Iesu be kara gageva ia haheaukalaia? (1 Petero 2:21-23)
10 Petero Ginigunana 2:21-23 duahia. a Haida ese ita idia kara namo henia lasi neganai, Iesu ena haheitalai namona ita tohotohoa diba. Ia diba edena nega ai do ia hereva eiava ia hereva lasi. (Mat. 26:62-64) Haida ese idia samania koikoi neganai, ia haere henia lasi. (Mat. 11:19) Bona ia hereva neganai, ena inai taudia ia gwauraia dika lasi eiava hagaria herevadia ia gwauraia lasi. Iesu be ena kara ia biagua badina “hahemaoro maoromaoro ia karaia Diravana ena imana dekenai sibona ia atoa.” Iesu ia diba Iehova ena lalohadai be mai anina bada. Ia diba Iehova ese ena nega korikori ai kara gageva do ia hamaoromaoroa.
11. Edena dala haida ai iseda hereva ita biagua diba? (Laulau itaia danu.)
11 Haida ese ita idia kara namo henia lasi neganai, iseda hereva ita biagua karana amo Iesu ena haheitalai namona ita tohotohoa diba. Kara gageva haida be maragi dainai ita rakatania sibona. Eiava do ita hereva lasi badina ita gwauraia herevana ese hekwakwanai ia habadaia diba. (Had. 3:7; Iam. 1:19, 20) To nega haida, ita hereva diba bema ita itaia haida ese ta idia kara namo henia lasi. Eiava hereva momokani ita gimaia totona ita hereva diba. (Kara 6:1, 2) Bema ita hereva, namona be mai manau bona hemataurai ida ita hereva.—1 Pet. 3:15. b
Haida ese ita idia kara namo henia lasi neganai, iseda hereva bona do ita gwauraia negana ita abia hidi totona, Iesu ita tohotohoa diba (Paragraf 11-12 itaia)
12. Edena dala ai “hahemaoro maoromaoro ia karaia Diravana” ena imana dekenai gau ibounai ita rakatania?
12 Iesu ita tohotohoa dalana ta be “hahemaoro maoromaoro ia karaia Diravana” ena imana dekenai gau ibounai ita rakatania. Haida ese ita idia hahemaoro henia kerere eiava idia kara namo henia lasi neganai, ita abia dae Iehova be ia vara gauna ia diba. Unai ese ita dekenai boga-auka ia henia, badina ita diba Iehova be ena nega korikori ai unai hekwakwanai do ia hamaoromaoroa. Iehova dekenai unai hekwakwanai ita rakatania karana ese ita ia durua ita badu lasi bona haida ita inai henia lasi totona. Badina bema ita badu bona haida ita inai henia, kara dika ta do ita karaia, do ita moale lasi bona iseda hetura karana Iehova ida do ita hadikaia.—Sal. 37:8.
13. Dahaka ese ita ia durua diba kara gageva ita haheaukalaia totona?
13 To, ita be Iesu ena haheitalai ita badinaia goevagoeva diba lasi. Nega haida, ita karaia eiava herevalaia gaudia dainai do ita lalohisihisi. (Iam. 3:2) Bona haida ese ita idia hadikaia karana dainai nega daudau lalonai ita lalohisihisi bona iseda tauanina ai bero ena maka haida idia do noho. Bema oi dekenai unai ia vara, namona be oi diba Iehova ese unai ibounai ia itaia. Bona Iesu be emu hemami ia diba, badina ia danu be unai bamona hisihisi ia davaria. (Heb. 4:15, 16) Iehova ese Iesu ena haheitalai goevana sibona ia gaukaralaia lasi, to hakaua hereva namodia ia henia ita ia durua kara dika ita haheaukalaia totona. Mani Roma bukana ena siri rua ita herevalaia, unai ese ita do ia durua.
“DIRAVA SIBONA ESE IA DEKENAI ENA BADU DO IA HAHEDINARAIA”
14. Kara dika taudia dekenai ‘Dirava sibona ese ena badu do ia hahedinaraia’ ena anina be dahaka? (Roma 12:19)
14 Roma 12:19 duahia. Aposetolo Paulo ese Keristani taudia ia hamaoroa, Dirava sibona ese kara dika taudia dekenai ‘ena badu do ia hahedinaraia.’ Anina be kara dika ena davana be Iehova sibona ese ena nega korikori ai bona ena dala ai unai do ia hamaoromaoroa. Tadikaka John be ta ese ia kara namo henia lasi murinai, ia gwau: “Lau hekwarahi unai kerere be lau sibona ese egu ura dalana ai lau hamaoromaoroa lasi totona. Roma 12:19 ese lau ia durua Iehova lau naria totona.”
15. Dahaka dainai Iehova ese hekwakwanai ia hamaoromaoroa totona ita naria be namo?
15 Iehova ese hekwakwanai ia hamaoromaoroa totona ita naria neganai, namo ita davaria. Anina be ita sibona ita ura hekwakwanai ita hamaoromaoroa dainai idia vara hekwakwanai ma haida bona lalohisihisi do ita hanaia. Iehova ia ura ita ia durua. Unai be hegeregere ia gwau, ‘Kara dika ena davana be lau dekenai umui rakatania; Lau ese do lau haloua.’ Bema Iehova ena gwauhamata, “lau ese davana do lau haloua,” ita abia dae, do ita badu noho lasi, badina ita diba ia ese dala maorona ai do ia hamaoromaoroa. Unai ese ita herevalaia vadaeni tadikaka John ia durua. Ia gwau: “Bema Iehova lau naria, dala maorona ai do ia hamaoromaoroa, lau karaia bamona lasi.”
“KARA NAMO AMO DIKA OI HALUSIA NOHO”
16-17. Edena dala ai guriguri karana ese ita ia durua ‘kara namo amo dika ita halusia’ totona? (Roma 12:21)
16 Roma 12:21 duahia. Paulo ese Keristani taudia ia hamaoroa, “kara namo amo dika [umui] halusia noho.” Iesu ena Ororo Harorona ai, ia gwau: “Emui inai taudia do umui lalokau henia noho bona umui idia dagedage henia taudia totona do umui guriguri noho.” (Mat. 5:44) Iesu be unai bamona ia karaia. Reana Roma tuari taudia ese Iesu be au dekenai idia kokoa kau neganai ia mamia hisihisi ita laloa vadaeni. Iesu idia hahisia bada bona unai ia haheaukalaia.
17 Ena be Iesu idia hahisia bada, to Iehova ia lalokau henia bona abidadama henia noho. Tuari taudia ia badu henia lasi, to ia gwau: “Egu tamana e, edia dika oi gwauatao, badina idia diba lasi dahaka idia karaia noho.” (Luka 23:34) Ita idia kara namo henia lasi taudia totona ita guriguri neganai, unai ese ita ia durua ita badu noho lasi.
18. Edena dala ai guriguri karana ese Alberto bona John ia durua ma haida edia kara gageva idia haheaukalaia totona?
18 Guriguri karana ese ita herevalaia vadaeni tadikaka rua ia durua idia davaria kara gageva idia haheaukalaia totona. Alberto ia gwau: “Lau idia kara namo henia lasi tadikaka totona lau guriguri. Nega momo Iehova lau noia lau ia durua edia kara dainai lau badu noho lasi totona.” Ita moale badina Alberto be Iehova ia hesiai henia lou. John ia gwau: “Nega momo, lau ia hahisia tadikaka totona lau guriguri. Unai bamona guriguri ese lau ia durua egu tadikaka dekenai lau badu lasi bona lau hahemaoro henia lasi totona. Bona guriguri loulou karana ese lau dekenai lalomaino ia henia.”
19. Ela bona inai tanobada ena dokona, dahaka do ita karaia noho? (1 Petero 3:8, 9)
19 Tanobada ena dokona ia do ginidae lasi neganai, ita diba lasi dahaka kara gageva do ita davaria. Herevana dahaka hekwakwanai idia vara, namona be Iehova ena heduru totona ita guriguri noho. Danu, namona be Iesu ese kara gageva ia haheaukalaia dalana ita tohotohoa bona Baibel ena hakaua herevadia ita badinaia. Bema unai bamona ita karaia, ita diba momokani Iehova ese ita do ia hanamoa.—1 Petero 3:8, 9 duahia.
ANE 38 Oi Do Ia Hagoadaia
a Aposetolo Petero ena revareva ginigunana ena karoa 2 bona 3 ai, ia ese Keristani taudia ginigunadia momo be edia biagudia eiava abidadama lasi adavadia ese idia hahisia karadia ia herevalaia.—1 Pet. 2:18-20; 3:1-6, 8, 9.
b Websait jw.org ai inai vidio itaia, Lalokau ese Maino Korikorina ia Havaraia Dalana.
