1-2. Elda taudia be dahaka “gaukara namona” idia karaia?

 BEMA oi be hesiai tauna ta, elda tauna ai oi lao totona oi gaukara goada Baibel ena hakaua herevadia oi badinaia totona. Oi ura inai gaukara namona oi karaia, a?—1 Tim. 3:1.

² Elda tauna be dahaka gaukara ia karaia? Haroro gaukara ia gunalaia, mamoe naria gaukara bona hadibaia gaukara ia karaia namonamo bona iena hereva bona kara amo kongrigeisen ia hagoadaia. Unai dainai, Baibel ese idia gaukara goadagoada elda taudia ia gwauraia “harihari gaudia.”—Efe. 4:8.

3. Elda tauna ai oi lao totona dahaka oi karaia diba? (1 Timoteo 3:1-7; Tito 1:5-9)

³ Elda tauna ai oi lao totona dahaka oi karaia diba? Elda maduna be moni gaukara bamona lasi. Inai tanobada ai, moni gaukara ta oi abia diba bema gaukara ta oi diba. To elda maduna oi abia totona, haroro bona hadibaia dalana oi diba sibona be hegeregere lasi. Namona be 1 Timoteo 3:1-7 bona Tito 1:5-9 ai idia noho hakaua herevadia oi badinaia danu. (Duahia.) Inai atikol ai unai siri ese ia gwauraia karadia haida do ita herevalaia: hegeregere, tadikaka ese ladana namona ia abia, ena ruma bese lalonai haheitalai namona ia hahedinaraia, bona mai ura ida kongrigeisen ia durua.

 LADANA NAMONA ABIA

4. “Kerere ta lasi” ena anina be dahaka?

⁴ Elda tauna ai oi lao totona, “namona be oi be kerere ta lasi,” anina be kongrigeisen ai ladana namona oi abia bona ta be oi do ia gwauraia dika lasi. Ma danu namona be murimuri taudia vairanai “oi be ladana namona tauna.” Nega haida, reana idia ese oi abia dae gaudia idia gwauraia dika, to namo lasi badina haida dainai emu kara namodia idia gwauraia kerere. (Dan. 6:4, 5) Sibona oi nanadaia, ‘Kongrigeisen lalonai bona murimuri ai lau be mai egu ladana namona, a?’

5. Edena dala ai oi hahedinaraia oi be kara namo oi ura henia?

⁵ Bema oi be ‘kara namo oi ura henia,’ oi ese ma haida edia kara namodia do oi itaia bona idia do oi hanamoa. Danu oi moale ma haida oi durua totona, bona idia noia lasi gaudia oi karaia danu. (1 Tes. 2:8) Dahaka dainai elda taudia dekenai unai kara be mai anina bada? Badina idia ese edia nega bada idia gaukaralaia, kongrigeisen ai tadikaka taihu idia durua bona asainmen idauidau idia karaia totona. (1 Pet. 5:1-3) Ena be gaukara momo idia karaia, to ma haida idia hesiai henia dainai idia moale.—Kara 20:35.

6. Edena dala ai “heabidae karana” ita hahedinaraia diba? (Heberu 13:2, 16; laulau itaia danu.)

⁶ Emu turadia eiava ma haida dekenai kara namodia oi karaia neganai, oi be “heabidae karana” oi hahedinaraia. (1 Pet. 4:9) Baibel ena referens ta ia gwau: “Heabidae tauna be ia diba lasi taudia dekenai kara namo ia hahedinaraia bona mai moale ida ena ruma dekenai ia boiridia.” Sibona oi nanadaia, ‘Vadivadi taudia idia mai neganai lau be dahaka lao karaia?’ (Heberu 13:2, 16 duahia.) Heabidae tauna be vadivadi taudia ibounai, hegeregere ogogami taudia, tok henia totona idia vadivadi tadikaka bona idia gaukara goada sekit naria taudia dekenai kara namo ia hahedinaraia.—Gen. 18:2-8; Aon. 3:27; Luka 14:13, 14; Kara 16:15; Roma 12:13.

7. Edena dala ai elda ta ese ia hahedinaraia diba ia be “moni ia ura henia dikadika lasi”?

⁷ “Moni ia ura henia dikadika lasi.” Unai ena anina be moni bona kohu oi laloa bada lasi. Herevana oi be oi taga eiava oi ogogami to emu mauri ai oi karaia gaudia ibounai lalonai Basileia oi atoa guna. (Mat. 6:33)  Namona be emu nega, goada bona kohu oi gaukaralaia, Iehova oi tomadiho henia, emu ruma bese oi naria, bona kongrigeisen oi durua totona. (Mat. 6:24; 1 Ioa. 2:15-17) Sibona oi nanadaia: ‘Lau dekenai moni be mai anina bada, a? Lau dekenai idia noho gaudia be hegeregere, a? Eiava lau ura moni bona kohu momo lau abia?’—1 Tim. 6:6, 17-19.

8. Edena dala haida ai oi hahedinaraia “emu kara oi biagua” eiava “sibona oi biagua”?

⁸ Bema “emu kara oi biagua” bona “sibona oi biagua,” emu mauri ai gau ibounai do oi karaia namonamo. Hegeregere oi aniani eiava oi inuinu momo lasi, emu dabua bona huina ena toana be ia namo, bona moale karadia dekenai abia hidi namodia oi karaia. Oi be inai tanobada taudia edia mauri dalana oi tohotohoa lasi. (Luka 21:34; Iam. 4:4) Ena be haida ese oi idia kara namo henia lasi to oi manau. Oi be “kekero tauna lasi,” eiava nega ibounai oi inuinu lasi. Sibona oi nanadaia, ‘Egu mauri dalana ese ia hahedinaraia gau ibounai lau karaia namonamo bona sibona lau biagua, a?’

9. Edena dala ai oi “laloa namonamo” bona “dala maorona oi badinaia diba”?

⁹ Bema oi be “laloa namonamo tauna,” oi karaia gaudia ibounai lalonai Baibel ena hakaua herevadia do oi laloa. Unai gaudia oi laloa dobu dainai, unai ese oi dekenai diba bona laloparara ia henia. Gau ibounai oi tahua namonamo guna, bena abia hidi oi karaia. (Aon. 18:13) Unai amo Iehova ena lalohadai hegeregerena abia hidi oi karaia diba. Bema oi be “dala maorona oi badinaia,” gau ibounai do oi karaia namonamo bona nega korikori ai do oi gaukara. Momo idia diba oi be gaukara karaia namonamo tauna bona hakaua herevadia oi badinaia. Unai ibounai dainai ladana namona do oi abia. Mani elda tauna ta be ena ruma bese lalonai haheitalai namona ia hahedinaraia totona, Baibel ena hakaua herevadia ia badinaia dalana ita herevalaia.

RUMA BESE KWARANA BE HAHEITALAI NAMONA IA HAHEDINARAIA

10. Edena dala ai tadikaka ta be “dala maorona ai iena ruma bese ia naria” diba?

¹⁰ Bema oi be headava tadikaka bona oi ura elda tauna ai oi lao, namona be ma haida dekenai emu ruma bese be haheitalai namona. Unai dainai, ‘dala maorona ai emu ruma bese oi naria.’ Unai ena anina be, mai lalokau ida emu ruma bese oi naria bona idia totona abia hidi namodia oi karaia. Emu ruma bese tomadiho oi karaia, Keristani heboudia dekenai umui lao, bona idia oi durua haroro gaukara idia karaia totona. Dahaka dainai unai be mai anina bada? Aposetolo Paulo ia gwau: “Bema ta be ena ruma bese naria dalana ia diba lasi, edena bamona Dirava ena kongrigeisen do ia naria?”—1 Tim. 3:5.

11-12. Bema tadikaka ta ia ura elda tauna ai ia lao, dahaka dainai ena ruma bese taudia be haheitalai namona idia hahedinaraia be namo? (Laulau itaia danu.)

¹¹ Bema oi be tamana ta, namona be ‘emu natudia be idia laloa namonamo bona oi henunai idia noho.’ Namona be mai lalokau ida emu natudia oi hadibaia. Momokani, natudia ma haida bamona mai moale ida idia kiri, bona idia gadara. To idia oi hadibaia namonamo dainai, hereva do idia kamonai, idia hemataurai, bona kara namodia idia hahedinaraia. Danu namona be oi hekwarahi emu natudia oi durua Iehova ida edia hetura karana idia hagoadaia, Baibel ena hakaua herevadia idia badinaia, bona tahua gauna idia atoa idia bapatiso totona.

¹² “Iena natudia be mai edia abidadama bona ta ese ia gwauraia lasi idia be mauri dikana idia badinaia eiava idia gwau-edeede.” Bema ruma bese lalonai bapatiso  natuna ta be kerere badana ia karaia neganai, tamana dekenai dahaka ia vara diba? Bema tamana ese ena natuna ia treinia bona ia matahakani henia lasi, ia hegeregere lasi elda tauna ai ia lau totona.—October 15, 1996, Gima Kohorona, rau 21, par. 6-7 itaia.

KONGRIGEISEN IDIA DURUA

13. Edena dala ai oi hahedinaraia diba oi be oi “laloa maoromaoro,” bona “sibona emu ura” oi badinaia lasi?

¹³ Keristani kara namodia idia hahedinaraia tadikaka be kongrigeisen idia durua bada diba. “Laloa maoromaoro” tauna be maino ia karaia. Ia be ma haida edia hereva ia kamonai, bona ia ura haida edia lalohadai ia lalopararalaia, bona ia abia dae. Hegeregere bema elda taudia be Baibel ena hakaua hereva hegeregerena disisen ta dekenai idia lalotamona, edia disisen do oi abia dae ena be oi lalotamona lasi, a? “Sibona ena ura ia badinaia lasi” ena anina be haida ia doria lasi ena ura idia badinaia totona. Oi diba ma haida edia lalohadai oi kamonai be mai anina bada. (Gen. 13:8, 9; Aon. 15:22) Oi “hepapahuahu lasi” eiava “oi badu haraga lasi.” Anina be haida oi matauraia, bona idia oi kara namo henia. Bona oi gaukara goada ma haida ida maino oi karaia totona, ena be nega haida ia auka. (Iam. 3:17, 18) Mai gado namo ida oi hereva neganai, ma haida, bona ita idia inai henia taudia danu, edia badu do ia hakerua.—Hah 8:1-3; Aon. 20:3; 25:15; Mat. 5:23, 24.

14. “Hahediba tauna matamatana” bona “Dirava abidadama henia” ena anina be dahaka?

¹⁴ “Hahediba tauna matamatana” be ia hegeregere lasi elda tauna ai ia lao totona. Ena be nega daudau eiava lagani haida lalonai oi bapatiso vadaeni, to mai anina bada gauna be nega oi atoa lo Keristani tauna ai oi lao totona. Elda tauna ai oi do lao lasi neganai, namona be Iesu hegeregerena oi manau bona dala idauidau ai Iehova oi hesiai henia. Bona mai haheauka ida oi naria Iehova ese asainmen ma haida ia henia totona. (Mat. 20:23; Fili. 2:5-8) Oi hamomokania diba oi be Dirava  oi “abidadama” henia, bema Iehova ena kara maoromaoro taravatu bona iena orea amo ia mai hakaua herevadia oi badinaia.—1 Tim. 4:15.

15. Elda ta be tok henia tauna namona ai ia lao be namo, a? Herevalaia.

¹⁵ Baibel ese ia hahedinaraia goevagoeva namona be elda taudia idia “hegeregere hadibaia totona.” Unai ena anina be tok henia tauna namona ai oi lao be namo, a? Lasi. Elda taudia momo be tok henia dalana idia manada momokani lasi, to haroro bona mamoe naria gaukarana ai Baibel ena hereva idia hadibaia namonamo. (1 Tim. 3:2; 1 Kor. 12:28, 29; Efe. 4:11) Ena be tok henia dalana oi manada lasi, to oi gaukara goada noho hadibaia tauna namona ai oi lao totona. Edena dala ai?

16. Edena dala ai hadibaia tauna namona ai oi lao diba? (Laulau itaia danu.)

¹⁶ “Hahediba dalanai hereva momokani ia dogoatao auka.” Hadibaia tauna namona ai oi lao totona, namona be tadikaka taihu oi hadibaia bona sisiba henia neganai, hanaihanai Baibel oi gaukaralaia. Unai oi karaia totona, Baibel bona iseda pablikeisen oi stadilaia namonamo be gau badana. (Aon. 15:28; 16:23; Tito 1:9) Oi stadi lalonai iseda pablikeisen ese Baibel siri edia anina idia herevalaia dalana oi itaia, unai amo emu mauri ai do oi badinaia namonamo. Emu hadibaia gaukara ai taunimanima oi durua Iehova idia lalokau henia bada bona idia dibaia gaudia idia badinaia danu. Emu hadibaia dalana oi hanamoa diba bema nega daudau elda gaukara idia karaia taudia edia heduru oi noia bona edia hereva oi badinaia. (1 Tim. 5:17) Namona be elda taudia ese edia tadikaka taihu idia “hagoadaia,” to nega haida “sisiba” idia henia be namo. Elda taudia be unai bamona idia karaia neganai, hanaihanai hebogahisi karana idia hahedinaraia. Bema oi kara auka lasi, haida oi lalokau henia bona emu hadibaia karana lalonai Baibel oi gaukaralaia, oi be hadibaia tauna namona badina iseda Hadibaia Tauna Badana, Iesu oi tohotohoa.—Mat. 11:28-30; 2 Tim. 2:24.

 OI GAUKARA GOADA BONA ELDA TAUNA AI OI LAO

17. (a) Dahaka ese hesiai taudia ia durua diba elda taudia ai idia lao totona? (b) Elda taudia be dahaka idia laloatao be namo bema idia ura tadikaka ta idia abia hidi elda tauna ai ia lao totona? (Maua itaia, “ Elda Taudia be Abia Hidi Idia Karaia Neganai, Idia Manau be Namo.”)

¹⁷ Hesiai taudia haida idia mamia do idia hegeregere lasi elda taudia ai idia lao totona, badina idia itaia edia kara momo idia hanamoa be namo. To laloatao Iehova bona ena orea idia diba oi be goevadae lasi. Bona unai kara ibounai do oi hahedinaraia goevagoeva lasi. (1 Pet. 2:21) Bona Iehova ena lauma helaga ese oi dekenai goada do ia henia unai kara ta ta oi hanamoa totona. (Fili. 2:13) Oi laloa emu kara ta oi hanamoa be namo, a? Iehova dekenai unai oi gurigurilaia. Tahua gaukara oi karaia, bona elda ta ena heduru oi noia unai kara oi hanamoa totona.

18. Hesiai taudia ibounai be dahaka idia karaia be namo?

¹⁸ Namona be ita ibounai bona elda taudia danu ese inai atikol ai ita herevalaia kara namodia ita hahedinaraia noho. (Fili. 3:16) Oi be hesiai tauna ta, a? Tahua gaudia ma haida oi atoa emu tadikaka taihu oi durua totona. Iehova oi noia oi do ia treinia, unai amo ia oi hesiai henia bona kongrigeisen oi durua diba. (Isa. 64:8) Oi gaukara goada noho elda tauna ai oi lao totona bona Iehova ese emu hekwarahi do ia hanamoa.