STADI ATIKOL 46
ANE 49 Iehova Ena Kudouna Hamoalea
Tadikaka E, Oi Ura Hesiai Tauna ai Oi Lao, A?
“Henia kara ena moale be bada, to abia kara ena moale be maragi.”—KARA 20:35.
STADI ENA BADINA
Bapatiso tadikaka ia hagoadaia hesiai tauna ena maduna idia ura henia bona idia hegeregere unai maduna idia huaia totona.
1. Aposetolo Paulo ese hesiai taudia be edena bamona ia laloa?
HESIAI TAUDIA be kongrigeisen ai mai anina bada gaukara idia karaia. Aposetolo Paulo be unai tadikaka edia gaukara ia laloa bada. Hegeregere, Filipi kongrigeisen ia tore henia neganai, ia ese hesiai taudia bona elda taudia ia hanamoa.—Fili. 1:1.
2. Tadikaka Luis ese hesiai tauna ena maduna be edena bamona ia laloa?
2 Herevana oi matamata eiava oi buruka, bapatiso tadikaka momo be hesiai tauna ena maduna idia huaia dainai idia moale bada. Hegeregere, Devan ena mauri lagani be 18 neganai, hesiai tauna ai ia lao. Ma tadikaka ta ladana Luis ena mauri lagani be 50 neganai, hesiai tauna ai ia lao. Ia be hesiai taudia momo ese idia abia hemami ia herevalaia neganai, ia gwau: “Kongrigeisen taudia ese lau dekenai idia hahedinaraia lalokau lau laloa neganai, lau mamia hesiai tauna ena maduna be hahenamo badana!”
3. Dahaka henanadai do ita herevalaia?
3 Bema oi be bapatiso tadikaka ta bona hesiai tauna ta lasi, unai be emu tahua gauna ai oi halaoa diba, a? Dahaka ese oi do ia hagoadaia unai tahua gauna oi hagugurua totona? Bona edena Baibel ena hakaua herevadia oi badinaia be namo? Inai atikol ai, ita be unai henanadai edia haere do ita herevalaia. To, mani hesiai taudia edia gaukara ita herevalaia guna.
HESIAI TAUDIA EDIA GAUKARA BE DAHAKA?
4. Hesiai taudia be dahaka gaukara idia karaia? (Laulau itaia danu.)
4 Hesiai tauna be lauma helaga ese ia abia hidi bapatiso tadikaka ta, unai amo elda taudia do ia durua kongrigeisen ena gaukara haida ia karaia totona. Hesiai taudia haida edia gaukara be haroro teritori bona buka bona magasin idia hegaegaelaia, unai amo pablisa taudia be haroro gaukara idia karaia diba. Haida be Kingdom Hall hagoevaia bona hanamoa gaukara idia durua. Hesiai taudia be atendan gaukara idia karaia, bona haida be hebou ai saun bona vidio gaudia idia naria. Hesiai taudia be unai bamona gaukara idauidau idia karaia. To, hesiai taudia edia abidadama be ia goada; Iehova idia lalokau henia bona ena kara maoromaoro taravatudia idia badinaia. Bona edia Keristani tadikaka bona taihu idia lalokau henia bada. (Mat. 22:37-39) Bapatiso tadikaka be dahaka ia karaia diba hesiai tauna ai ia lao totona?
Hesiai taudia be Iesu idia tohotohoa bona mai ura ida ma haida idia durua (Paragraf 4 itaia)
5. Tadikaka ta be dahaka ia karaia diba hesiai tauna ai ia lao totona?
5 Baibel ai hakaua herevadia idia noho hesiai tauna ena maduna idia abia taudia totona. (1 Tim. 3:8-10, 12, 13) Unai hakaua herevadia oi stadilaia bona oi badinaia, unai amo hesiai tauna ai oi lao diba. To, unai maduna do oi abia ena badina haida oi laloa guna be namo.
DAHAKA DAINAI OI URA HESIAI TAUNA AI OI LAO?
6. Namona be dahaka badina dainai emu tadikaka bona taihu oi ura durua? (Mataio 20:28; ena laulau itaia danu.)
6 Iseda haheitalai hereadaena be Iesu Keriso. Ia be ena Tamana bona taunimanima ia lalokau henia dainai, ia ura hesiai gaukara ibounai ia karaia. Unai lalokau dainai ia gaukara goada bona ia ura haida do ia hesiai henia. (Mataio 20:28 duahia; Ioa. 13:5, 14, 15) Bema lalokau dainai oi ura hesiai tauna ai oi lao, Iehova ese oi do ia hanamoa bona do ia durua emu tahua gauna oi hagugurua totona.—1 Kor. 16:14; 1 Pet. 5:5.
Iesu be ena haheitalai amo ena aposetolo taudia ia hadibaia, mai manau ida edia tadikaka taihu do idia hesiai henia, to sibona idia abia isi lasi (Paragraf 6 itaia)
7. Dahaka dainai tadikaka ta be sibona ena ladana abia isi karana ia dadaraia be namo?
7 Tanobada ai, sibona edia ladana idia abia isi taudia be nega momo taunimanima ese idia laloa bada. To Iehova ena taunimanima be unai bamona idia karaia lasi. Tadikaka ta be Iesu hegeregerena, lalokau dainai hesiai gaukara ia karaia neganai, ia ura lasi ma haida ia hanaia eiava ladana bada ia abia. Bema tadikaka ta ia ura taunimanima ese idia laloa bada, ia be mai manau ida hesiai gaukara do ia karaia lasi, Iehova ena mamoe ia naria totona. Reana unai gaukara haida be momo ese idia laloa maragi dainai, do ia laloa ia karaia lasi be namo. (Ioa. 10:12) Bema ta be ia hekokoroku eiava sibona ena namo ia tahua, Iehova ese ena hekwarahi do ia hanamoa lasi.—1 Kor. 10:24, 33; 13:4, 5.
8. Iesu be ena aposetolo taudia dekenai dahaka sisiba ia henia?
8 Nega haida, Iesu ena turana namodia haida be badina kereredia dainai, idia ura maduna idia abia. Mani aposetolo taudia rua Iamesi bona Ioane ita laloa. Idia ese Iesu idia noia ena Basileia ai dagi badana do ia henia. Iesu ese idia hamaoroa lasi, idia noia gauna be maoro. Bona ena aposetolo taudia 12 dekenai ia gwau: “Bema ta ia ura emui huanai do ia bada, namona be emui hesiai tauna ai do ia lao. Bona bema ta ia ura emui huanai do ia guna, ia be umui ibounai emui hesiai tauna ai ia lao be namo.” (Mar. 10:35-37, 43, 44) Bema tadikaka be badina maorona dainai idia ura maduna idia huaia, unai ese kongrigeisen do ia durua bada.—1 Tes. 2:8.
DAHAKA ESE OI DO IA DURUA EMU TADIKAKA TAIHU OI HESIAI HENIA?
9. Dahaka ese emu ura do ia hagoadaia tadikaka bona taihu oi hesiai henia totona?
9 Momokani, oi be Iehova oi lalokau henia bona oi ura ma haida oi hesiai henia. To reana do oi ura lasi, hesiai taudia ese idia karaia gaukara oi karaia. Dahaka ese oi do ia durua unai gaukara oi karaia totona? Emu tadikaka bona taihu oi hesiai henia neganai, do oi davaria moalena oi laloa. Iesu ia gwau: “Henia kara ena moale be bada, to abia kara ena moale be maragi.” (Kara 20:35) Iesu be ia gwauraia gauna ia karaia. Ia be ma haida ia hesiai henia dainai ia moale bada, oi danu be unai bamona oi karaia diba.
10. Edena dala ai, Iesu be ma haida hesiai henia karana ia moalelaia? (Mareko 6:31-34)
10 Iesu ese mai moale ida ma haida ia hesiai henia ena haheitalai ta ita laloa. (Mareko 6:31-34 duahia.) Nega ta, Iesu bona ena aposetolo taudia be idia hesiku, bona taunimanima lasi gabuna ta dekenai idia lao idia laga-ani totona. To hutuma be unai gabu dekenai idia ginidae guna, idia ura Iesu ese idia do ia hadibaia. Iesu ese idia ia hamaoroa diba, umui giroa lou. Badina ia bona ena aposetolo taudia be “nega lasi idia aniani totona.” Eiava Iesu be idia dekenai gau tamona eiava rua sibona ia gwauraia diba bona do ia siaidia lou. To ia be idia ia lalokau henia dainai, “idia dekenai gau momo ia hadibaia matamaia.” Bona idia ia hadibaia noho ela bona “adorahi momokani.” (Mar. 6:35) Unai bamona ia karaia, badina idia ia “hebogahisi henia.” Ia ura idia ia hadibaia badina idia ia lalokau henia. Iesu be haida ia hesiai henia dainai ia moale bada.
11. Edena dala ai Iesu be taunimanima edia dabu gaudia ia henia? (Laulau itaia danu.)
11 Iesu ese taunimanima dekenai Dirava ia herevalaia sibona lasi, to edia dabu gaudia ia henia. Ia ese hoa dalanai aniani ia haboua bena ena hahediba taudia ia hamaoroa, taunimanima dekenai ia haria totona. (Mar. 6:41) Unai amo, ena hahediba taudia dekenai ma haida hesiai henia dalana ia hadibaia. Danu, idia dekenai ia hahedinaraia unai bamona gaukara be mai anina bada. Unai be hegeregere, hesiai taudia ese idia karaia gaukara. Mani oi laloa aposetolo taudia be idia moale bada Iesu ida idia gaukara hebou. Bona hoa dalanai taunimanima dekenai aniani idia haria ela bona “ibounai idia aniani bona idia bogakunu”! (Mar. 6:42) Unai be Iesu ese ma haida edia namo ia atoa guna ena haheitalai namona ta. Ena tanobada maurina ibounai lalonai ia be taunimanima ia hesiai henia. (Mat. 4:23; 8:16) Iesu be ma haida ia hadibaia bona edia dabu gaudia ia henia dainai ia moale. Oi danu be hesiai tauna ena maduna oi abia totona oi gaukara goada neganai, do oi moale bada.
Iehova oi lalokau henia bona oi ura emu tadikaka taihu oi hesiai neganai, unai ese oi do ia hagoadaia kongrigeisen oi durua totona (Paragraf 11 itaia) a
12. Dahaka dainai ita laloa lasi, ita be ita hegeregere lasi kongrigeisen ita durua totona?
12 Bema oi mamia oi be gaukara ta oi diba lasi, namo lasi oi lalomanoka. Oi be mai emu kara namodia haida bona unai ese kongrigeisen ia durua diba. Mani Paulo ese 1 Korinto 12:12-30 ai ia gwauraia gaudia oi laloa, bena Iehova oi noia unai do oi badinaia dalana oi diba totona. Paulo ena hereva ese ia hahedinaraia, Iehova ena hesiai taudia ma haida bamona, oi be mai anina bada kongrigeisen oi durua totona. Bema oi laloa oi hegeregere lasi hesiai tauna ai oi lao totona, oi hesiku lasi. Bona oi karaia diba gaudia amo Iehova oi hesiai henia bona emu tadikaka taihu oi durua. Namona be oi laloatao, elda taudia be oi karaia diba gaudia idia itaia, unai amo kongrigeisen ai gaukara ma haida idia henia diba.—Roma 12:4-8.
13. Maduna idia abia taudia ese idia badinaia hakaua herevadia momo be daidia ese idia badinaia danu?
13 Mani inai oi laloa, Baibel ese hesiai taudia totona ia gwauraia hakaua herevadia momo be Keristani taudia ibounai ese do idia badinaia danu. Oibe, namona be Keristani taudia ibounai be Iehova kahirakahira idia lao, henia karana ena moale idia mamia, bona edia Keristani mauri lalonai haheitalai namona idia hahedinaraia. Reana oi be unai dala ibounai oi badinaia noho, unai dainai oi hegeregere, hesiai tauna ai oi lao totona.
HESIAI TAUNA AI OI LAO DALANA
14. “Idia laloa namonamo” ena anina be dahaka? (1 Timoteo 3:8-10, 12)
14 Mani 1 Timoteo 3:8-10, 12 ena hakaua herevadia ita laloa. (Duahia.) Namona be hesiai taudia “idia laloa namonamo.” Unai hereva ena anina ma haida be “idia hegeregere hemataurai idia abia totona” eiava “haida ese idia laloa bada.” Ma haida ida oi kiri eiava oi hevaseha diba. (Had. 3:1, 4) To, gau badana be emu maduna oi laloa bada. Bema kongrigeisen taudia idia diba oi be gaukara karaia namonamo tauna bona idia oi durua diba, idia ese oi do idia matauraia.
15. “Idia koikoi lasi” bona “moni idia ura henia dikadika lasi” ena anina be dahaka?
15 “Idia koikoi lasi” Mai momokani ida oi hereva bona oi kara. Oi gwauraia hereva oi badinaia, bona haida oi koia lasi. (Aon. 3:32) “Moni idia ura henia dikadika lasi” anina be emu bisinesi karadia lalonai kara momokani oi badinaia bona moni oi gaukaralaia namonamo. Koikoi dalana ai tadikaka bona taihu do oi gaukaralaia lasi moni oi karaia totona.
16. (a) “Wain momo idia inua lasi” ena anina be dahaka? (b) “Lalomamina goevana” ena anina be dahaka?
16 “Wain momo idia inua lasi” anina be nega ibounai alkahol oi inua lasi o ena sikele oi hanaia lasi, eiava namo lasi haida ese oi idia gwauraia inuinu momo tauna. “Lalomamina goevana” anina be emu mauri ai Iehova ena taravatu oi badinaia. Ena be oi be goevadae lasi, to emu hetura karana Dirava ida ia goada dainai unai ese lalomaino ia henia.
17. Edena dala ai tadikaka ta ia hahedinaraia diba ia hegeregere hesiai tauna ai ia lao totona? (1 Timoteo 3:10; laulau itaia danu.)
17 “Idia umui tohoa bema idia hegeregere” ena anina be oi hahedinaraia maduna oi huaia diba. Unai dainai elda taudia ese gaukara ta idia henia neganai, idia henia hakaua daladia bona orea ese ia henia hakaua herevadia oi badinaia. Emu gaukara oi karaia namonamo neganai, kongrigeisen taudia ese unai do idia itaia bona emu gaukara do idia laloa bada. Elda taudia e, namona be bapatiso tadikaka dekenai treinini umui henia. (1 Timoteo 3:10 duahia.) Emu kongrigeisen ai bapatiso mauri lagani 10-14 matamata tadikaka idia noho, a? Sibodia edia stadi karana idia karaia noho, a? Hebou ai hanaihanai idia haere bona idia haroro hanaihanai, a? Bema oibe, edia mauri lagani bona goada hegeregerena gaukara umui henia. Unai dala amo, do umui itaia bema “idia hegeregere” maduna idia huaia totona. Bena edia mauri lagani be 18 eiava 19 neganai, hesiai taudia ai idia lao diba.
Elda taudia ese bapatiso tadikaka dekenai asainmen idia henia neganai, unai amo do idia itaia bema “idia hegeregere” hesiai maduna idia huaia totona (Paragraf 17 itaia)
18. “Idia dekenai kerere ta idia davaria lasi” ena anina be dahaka?
18 “Idia dekenai kerere ta idia davaria lasi” anina be namo lasi ta ia gwau oi be kerere badana ta oi karaia. Oibe, nega haida Keristani taudia idia samania koikoi. Iesu danu be idia samania koikoi, bona ia gwau ia murinai idia raka taudia dekenai unai bamona do ia vara. (Ioa. 15:20) To, bema emu kara be namo Iesu bamona, kongrigeisen dekenai ladana namona do oi abia.—Mat. 11:19.
19. “Adavana be tamona” ena anina be dahaka?
19 “Adavana be tamona.” Iehova ese headava ia havaraia neganai, ia gwau tau tamona bona hahine tamona sibona do idia headava, bona namona be Keristani taudia ibounai ese idia badinaia. (Mat. 19:3-9) Keristani tauna be matabodaga karadia ia karaia lasi be namo. (Heb. 13:4) To unai sibona lasi, namona be emu adavana sibona oi lalokau henia, namo lasi hahine haida oi ura henia.—Iobu 31:1.
20. Edena dala ai tadikaka ta be “dala maorona” ai ena ruma bese do ia naria?
20 “Dala maorona ai edia natudia bona edia ruma bese idia naria.” Bema oi be ruma bese ena kwarana, namona be emu maduna oi laloa bada. Hanaihanai ruma bese tomadiho oi karaia. Emu adavana bona natudia ida hanaihanai umui haroro be namo. Emu natudia oi durua Iehova idia tura henia totona. (Efe. 6:4) Tadikaka ta be ena ruma bese ia naria namonamo neganai, ia hahedinaraia kongrigeisen ia naria diba.—1 Timoteo 3:5 hahegeregerea.
21. Tadikaka e, bema oi be hesiai tauna ai oi do lao lasi, dahaka oi karaia diba?
21 Tadikaka e, bema oi be hesiai tauna ai oi do lao lasi, mani inai atikol oi duahia lou, bona Iehova oi guriguri henia danu. Hesiai tauna ai oi lao totona, Baibel ese ia gwauraia hakaua herevadia oi stadilaia, bona oi badinaia. Iehova bona emu tadikaka taihu oi lalokau henia karana oi laloa. Idia dekenai emu lalokau oi habadaia bona idia oi hesiai henia ena badina oi laloa bada. (1 Pet. 4:8, 10) Emu tadikaka bona taihu oi hesiai henia dainai, do oi moale bada. Oi gaukara goada hesiai tauna ena maduna oi abia totona bona Iehova ese emu hekwarahi do ia hanamoa!—Fili. 2:13.
ANE 17 “Lau Ura”
a LAULAU: Lauri kahanai, Iesu be mai manau ida ena hahediba taudia ia hesiai henia; idibana kahanai, hesiai tauna ta be kongrigeisen lalonai elda tadikaka burukana ta ia durua.
