Paul: Ai moale bada! Unai be November 1985 ai, emai misinari asainmen ginigunana ai abia, bona Liberia, West Africa dekenai ai lao. Peleini be Senegal dekenai ia ginidae neganai, Anne ia gwau: “Hora tamona murinai, Liberia dekenai do ita ginidae!” To hadibaia hereva ta ai kamonai: “Liberia ena pasendia be peleini amo idia diho be namo. Taunimanima haida idia ura edia gavamani idia kokia, unai dainai peleini do ia lao lasi.” Dina 10 lalonai, ai be Senegal ai misinari taudia ida ai noho, bona Liberia ena niusi ai kamonai, taunimanima momo idia hamasea bona gavamani be taravatu idia atoa, taunimanima be edia ruma dekenai do idia noho, bema dala dekenai idia loaloa do idia pidia.

Anne: Ai be gabu idaudia dekenai ai loaloa momo lasi. Danu, lau maragi negana amo, nega momo lau gari, unai dainai lau idia gwauraia gari momo kekeni. Motuka ena dala lau hanaia totona lau gari danu! To emai lalona ai hadaia, Liberia dekenai ai lao totona.

Paul: Lau bona Anne be England ena west kahana dekenai ai tubu daekau. Ai ruaosi be haisikuli murinai painia gaukara ai karaia. Egu tama sina bona Anne ena sinana ese ai idia durua bada. Idia moale bada, badina ai ura ful-taim hesiai gaukara ai karaia. Egu mauri lagani be 19 neganai, Betele dekenai lau vareai. Bona lagani 1982 ai, Anne lau adavaia murinai, Betele dekenai ai noho.

Anne: Betele ai ura henia, to emai ura badana be pablisa momo lasi gabuna ta dekenai do ai lao. Betele ai guna misinari gaukara idia karaia taudia ida ai gaukara dainai, edia ekspiriens ese ai ia hagoadaia bada. Lagani toi lalonai, hanuaboi ibounai unai ai gurigurilaia, unai dainai 1985 ai lau bona Anne be Gilead ena klas 79 dekenai idia boiria neganai, ai moale bada! Bona ai abia asainmen be Liberia, West Africa.

Paul: Liberia dekenai ia lao peleini ginigunana dekenai ai guia. Taunimanima be taravatu dainai  hanuaboi ai edia ruma idia rakatania lasi. Bona idia gari dainai, maketi ai motuka ta be rege badana ta ia karaia neganai, taunimanima idia boiboi bona idia heau. Emai gari mamina ia ore totona, hanuaboi ta ta lalonai Salamo bukana ai duahia. To emai asainmen ai ura henia bada. Anne be misinari gaukara ia karaia, bona lau be tadikaka ta ladana, John Charuk ida Betele ai lau gaukara. a Ia amo gau momo lau dibaia, badina ia be Liberia ai ia noho daudau, bona unai gabu ena mauri dalana bona tadikaka taihu ia diba namonamo.

Anne: Dahaka dainai Liberia ai ura henia haraga? Badina tadikaka taihu edia kara be namo herea. Idia be lalokau bona abidadama goada taudia. Idia be emai tura namodia bona emai famili bamona. Edia sisiba namodia ese ai ia hagoadaia. Unuseniai haroro gaukara be namo herea. Taunimanima ai haroro henia, bona idia ura kamonai noho dainai, idia ai rakatania haraga neganai idia moale lasi! Taunimanima be dala dekenai Baibel idia herevalaia. So ia auka lasi idia ida ai herevahereva totona. Emai Baibel stadi be momo herea dainai, ia auka idia ibounai ai stadi henia totona. Unai be teritori namona!

Paul: Lagani foa lalonai Liberia dekenai mauri be ia namo. To lagani 1989 ai, tuari ia vara. Bona July 2, 1990 ai, gavamani idia inai henia taudia ese Betele ia noho taoni idia abia. Hua toi lalonai, emai famili bona iseda hedikwota ai kontek diba lasi. Dagedage bada ia vara, aniani be momo lasi, bona hahine momo idia reipia. Lagani 14 lalonai Liberia ai unai gaudia idia vara.

Anne: Iduhu taudia ma haida be iduhu haida idia tuari henia bona idia hamasedia. Tuari taudia mai edia ipidi be dala ai idia loaloa bona idia henaohenao. Haida idia gwau, unai ala-ala karana be “kokoroku idia hamasedia bamona.” Dala ai mase tauanidia idia haboua, haida be iseda brens ena badinai idia haboua. Iseda abidadama Witnes taudia haida idia hamasea, bona misinari taudia rua danu.

Tuari taudia be idia inai henia iduhu taudia idia davaria neganai, idia hamasedia. Iseda tadikaka be edia mauri idia haboioa diba, to idia ese unai iduhu tadikaka taihu idia hunidia. Misinari taudia bona Betele taudia be unai bamona idia karaia danu. Betele ai, idia heau mauri Witnes taudia haida be henuna daiutu ai idia mahuta, ma haida be ai ida ataiai daiutu haida dekenai idia mahuta. Ruma bese ta, idia ibounai 7, be ai ida emai daiutu dekenai ai noho.

 Paul: Dina ta ta ai, tuari taudia be idia ura Betele idia vareai bona idia sekea bema taunimanima haida ai hunia. Unai taudia idia mai neganai, tadikaka rua be Betele ena geiti dekenai idia lao bona tuari taudia idia hereva henia, bona ma rua be windo amo idia itaia. Bema geiti dekenai tadikaka rua edia imana be edia vairana kahanai ia noho, unai be namo. To bema tadikaka edia imana be murina kahanai idia atoa, anina be tuari taudia idia badu, unai dainai windo amo idia itaia noho taudia be emai turadia do idia hunia haraga.

Anne: Dina ta, tadikaka be idia hegeregere lasi unai tuari taudia idia koua totona, unai dainai Betele dekenai idia vareai. Lau bona taihu ta be bathroom lalonai ai vareai, bona taihu be kabodi ta lalonai ia vareai bona ia hunia. Tuari taudia mai edia ipidi be egu murinai idia daekau mai bona mai badu ida emai iduara idia botaia. Paul ia boiboi, “Egu adavana be bathroom ia gaukaralaia.” Kabodi lau koua neganai, kabodi ia rege. Bona kabodi gaudia lau atoa lou totona nega bada ia abia. Unai dainai lau gari bona heudeheude. Iduara lau kehoa be auka. Lalona dekenai Iehova ena heduru totona lau noinoi. Bena iduara lau kehoa bona mai manau ida idia lau hanamoa. Lau idia doria siri bona ta be maoromaoro ia lao kabodi ia sekea, to gau ta ia davaria lasi. Ia bona ena grup be daiutu ma haida bona guhi ena ataiai idia sekea danu. To gau ta idia davaria lasi.

Paul: Hua haida lalonai, nega momo dabai ai aniani lasi, to Betele ena daba tomadihona be emai aniani bamona, bona ai ia durua dina ta ta lalonai ai haheauka totona.

Bema emai aniani bona ranu ia ore, bona unai abia totona Betele ai rakatania, idia hunia tadikaka bona taihu be idia hamasea diba. Nega haida Iehova ese emai dabu gaudia be nega korikori ai bona hoa dalanai ia henia. Iehova be eda dabu gaudia ia henia bona ita ia durua ita gari lasi totona.

Liberia ai hekwakwanai be bada herea, to hereva momokani ese ai ibounai ia hagoadaia. Nega momo iseda tadikaka bona taihu be edia mauri totona idia heau, to edia abidadama ia goada. Idia haida idia gwau unai tuari ese idia ia hegaegaelaia hisihisi badana totona. Elda taudia bona tadikaka matamata be mai gari lasi ida idia gaukara goada edia tadikaka taihu durua totona. Gabu ma haida dekenai idia heau lao tadikaka taihu be idia haroro noho. Uda badadia lalonai idia noho gaudia amo Kingdom Hall idia karaia bona hebou idia abia. Unai negadia lalonai, hebou bona haroro gaukara ese tadikaka taihu ia hagoadaia bada idia haheauka totona. Aniani, dabua bona gau ma haida ai hariharilaia neganai, tadikaka momo be haroro baege totona idia noinoi. Unai ese ai ia hagoadaia bada. Tuari dainai idia lalometau taudia momo be idia ura sivarai namona idia kamonai. Unai  taudia idia hoa badina Witnes taudia be idia moale bona ta ta idia lalokau henia. (Mat. 5:14-16) Iseda tadikaka edia abidadama goadana dainai, tuari idia havaraia taudia haida be Witnes taudia ai idia lao.

Paul: Lagani 14 unai hekwakwanai ia vara lalonai, lau bona Anne be nega 5 Liberia ai rakatania: nega toi be ai noho daudau lasi bona ai giroa lou, bona nega rua be lagani tamona murinai ai giroa lou. Misinari taihu ta be emai hemami ia gwauraia, ia gwau: “Gilead dekenai, ai idia hadibaia mai kudouna ibounai ida emai asainmen do ai lalokau henia, bona unai bamona ai karaia. Unai dainai unai bamona negadia ai emai tadikaka ai rakatania neganai, emai lalona ia metau bada!” To ai moale, Liberia kahirakahira idia noho tanodia dekenai ai noho dainai, Liberia tadikaka taihu ai durua diba.

Anne: May 1996 ai, ai foa be brens ena motuka amo ai lao. Motuka lalonai brens ena mai anina bada rekodi idia noho. Ai ura tuari ia vara lasi taoni ta dekenai ai lao, ena daudau be 16 kilomita bamona. Unai nega ai emai noho gabuna dekenai tuari taudia idia mai. Mai badu ida atai dekenai edia ipidi idia pidia, ai idia koua, bona motuka amo ai toi idia kokia, motuka idia abia bona idia lao, Paul be lalonai ia do noho. Ai hoa momokani. To daudau lasi, Paul be hutuma huanai ia raka mai, ena kwarana amo rara ia diho. Ai laloa ia idia pidia, to ai laloa bema ia idia pidia do ia raka lasi! Tuari tauna ta ese ia botaia bona motuka amo ia doria raka-lasi. To unai be bero maragina sibona.

Ami motuka ta ai itaia, unai motuka lalonai idia guia taudia be idia gari noho. Ai ura motuka lalonai ai vareai to ia honu dainai motuka ena saidi ai dogoatao bona ai lao. Motuka ia heau haraga dainai, kahirakahira ai moru. Taria tauna ai hadibaia ia stop totona, to ia gari dainai ia stop lasi. Ai gini sibona ela bona ai ginidae, to ai diho neganai ai hesiku bada bona ai gari dainai ai heudeheude.

Paul: Bena ai ta ta ai itaia, emai dabua idia miro bona darea. Bona ai laloa edena bamona ai do mauri noho. Ai be helikopta ta, mai ena buleti maka momo badinai ai mahuta. Murina dinana ai, unai helikopta ese Sierra Leone dekenai ai ia abia lao. Ai ginidae neganai, ai moale bada, to danu emai Keristani tadikaka totona ai laloa momo.

Anne: Sierra Leone, Freetown ena Betele dekenai ai ginidae, bona ai idia naria namonamo. To Liberia ai idia vara gaudia lau laloa lou. Dina ai nega momo lau gari bona lau laloa namonamo lasi. Hanuaboi ai nega momo do lau noga, bona lau heudeheude bona gari, badina lau laloa gau dikana ta do ia vara. Lau hahodi be auka. Paul be lau ia rosia bona ai guriguri hebou. Basileia anedia ai abia ela bona egu heudeheude ia ore. Lau mamia lau laloa namonamo lasi dainai misinari gaukara lau rakatania be namo.

To gabeai ia vara gauna lau laloaboio diba lasi. Unai wiki lalonai magasin rua ai abia. Ta be Awake! June 8, 1996 gauna. Magasin lalonai inai atikol ia noho, “Coping With Panic Attacks.” Hari lau laloparara lau dekenai dahaka ia vara noho. Magasin ta be Gima Kohorona, May 15, 1996 gauna, lalonai inai atikol ia noho, “Edia Goada be Edeseni amo Idia Abia?” Unai atikol ai kaubebe ena laulau ia noho, ena apena ia dika momokani. Unai atikol ia hahedinaraia, ena be kaubebe ena apena ia dika momokani, to sibona ia ubua bona ia roho loaloa noho. Unai hegeregerena, lalometau taudia be Iehova ena lauma helaga ena heduru amo ma haida idia durua noho diba. Unai be Iehova ese nega korikori ai ia henia aniani bamona. (Mat. 24:45) Unai bamona atikol haida lau stadilaia bona lau haboua. Unai ese lau ia durua bada. Gabeai, egu lalometau ia ore ia lao.

Paul: Liberia dekenai ai giroa lou negadiai, ai moale bada. Lagani 2004 be kahirakahira lagani 20 emai asainmen lalonai ai noho vadaeni. Tuari ia ore danu. Brens dekenai konstraksen gaukara do ia hamatamaia. To, ai be asainmen matamata ai abia.

Ai be emai tadikaka taihu ai lalokau henia bada, emai famili bamona, bona idia ai rakatania be auka. To Gilead ai lao totona emai famili ai rakatania neganai, Iehova ese ai ia durua bona hanamoa  dalana ai itaia, unai dainai emai asainmen matamata ai abia dae. Unai be Ghana dekenai.

Anne: Liberia ai rakatania neganai, ai tai dikadika. Elda burukana ta mai ena aonega ese ai ia hamaoroa, ia gwau: “Ai umui laloaboio be namo!” Unai hereva dainai ai hoa. To ia gwau: “Ai diba umui ese ai do umui laloaboio lasi, to mai kudouna ibounai ida emu asainmen matamata umui karaia be namo. Unai be Iehova amo, unai dainai unuseniai idia noho tadikaka taihu umui laloa bada.” Unai ese ai ia hagoadaia emai asainmen matamata ai abia dae bona tura matamatadia ai hedavari totona, ena be unai be gabu matamata bona momo be ai idia diba lasi.

Paul: To daudau lasi murinai , Ghana ai idia noho tadikaka taihu be emai famili bamona idia lao. Unai tano ai Witnes taudia be momo herea! Iseda tadikaka taihu be emai tura namodia, bona edia Dirava badinaia karana bona abidadama amo gau momo ai dibaia. Bena Ghana ai lagani 13 lalonai hesiai gaukara ai karaia murinai, asainmen ma ta ai abia. Unai be East Africa ena brens, Kenya dekenai. Ena be Liberia bona Ghana ai emai tura namodia ai reaia, to daudau lasi Kenya ai idia noho tadikaka taihu be emai famili bamona idia lao. Bona hari Kenya ai gaukara bada ia noho ai karaia totona.

Anne: Unai laganidia lalonai, nega aukadia lau davaria. Dika bada idia vara gabudia bona nega aukadia ai oi noho neganai, gorere oi davaria diba bona do oi gari bona laloa momo. Ita gwau lasi Iehova ese nega ibounai ita do ia gimaia. Bema ipidi bona tuari gaudia edia regena lau kamonai, egu bogana ai gorere mamina lau abia bona egu imana idia mase bamona. To Iehova ese ia henia heduru dekenai lau tabekau bona unai ese lau ia hagoadaia bada. Danu iseda tadikaka taihu be heduru bada idia henia. Bona lau itaia, bema ita stadi, guriguri, hebou dekenai ita lao bona ita haroro, Iehova ese ita do ia durua iseda asainmen ita karaia noho totona.

Paul: Reana haida idia henanadai, “Emu asainmen oi moalelaia, a?” Tano ta ta be mai edia hairai, to unai tanodia ai dika badadia idia vara diba. Unai dainai unai tanodia ai dahaka ai lalokau henia bada? Unai be emai tadikaka taihu namodia, emai famili bamona. Ena be bese bona gabu idauidau amo ai mai, to lalohadai bona hemami Iehova dekenai be tamona. Ai laloa ai be idia ai hagoadaia totona ai lao, to idia ese ai idia hagoadaia bada.

Tanobada ibounai ai idia noho tadikaka taihu oreana be Iehova amo ia mai hoa gauna ta. Iseda famili be gabu ibounai dekenai idia noho, bona ita be mai eda noho gabuna. Ita diba bema Iehova ita abidadama henia noho, ena be dahaka hahetoho ita davaria, ita dekenai goada do ia henia ita haheauka totona.—Fili. 4:13.