Nega ta, vadivadi tauna ta ese unai mero ia nanadaia, ia gwau: “Oi diba unai golo koini ena metau ese nega rua siliva koini ena metau ia hereaia, a?” Unai mero ia kiri bona ia gwau: “Io, lau diba.” Bena vadivadi tauna ia henanadai: “Vadaeni dahaka dainai siliva koini oi abia hidi?” Mero ia gwau: “Bema golo koini oi abia hidi, oi be moni momo do abia! To, bema golo koini lau abia hidi, taunimanima be lau ida unai gadara do idia karaia lou lasi. Oi diba siliva koini hida lau gogoa vadaeni, a?” Unai mero maragina ese ia hahedinaraia karana ese badadia ia durua diba, unai be aonega.

Baibel ia gwau: “Aonega namona bona laloa kehoa do oi dogoatao noho. Unai neganai oiemu dala, be do oi raka lao mai maino danu, bona oiemu aena do idia hekwakwanai lasi.” (Aon. 3:21, 23) Momokani, bema ita be mai iseda “aonega,” dika ta do ita davaria lasi. Bona ita ia durua iseda abidadama hamanokaia gaudia ita dadaraia bona iseda “aena do idia hekwakwanai lasi.”

Aonega be diba bona laloparara amo ia idau. Mai ena diba tauna ese hereva idauidau ia haboua. Bona mai ena laloparara tauna ese unai hereva ta ta idia gaukara hebou dalana ia hahegeregerea. To mai ena aonega tauna ese diba bona laloparara ia gaukaralaia hebou gau namona ta ia karaia totona.

Hegeregere, reana ta be nega kwadogina lalonai, Baibel be Dahaka Ia Hadibaia? bukana ia duahia bona lalopararalaia diba. Iena Baibel stadi lalonai, haere maorodia ia henia diba. Reana kongrigeisen heboudia ia lao bona ia haere danu. Unai ibounai ese idia hahedinaraia ena hetura karana Dirava ida be ia goada ia lao, to unai ena anina be ia be mai aonega, a? Lasi. Reana ia be hereva haida ia lalopararalaia haraga diba. To, bema ia dibaia hereva momokanidia ia badinaia, dala maorona ai iena diba bona laloparara ia gaukaralaia, ia be ia aonega. Danu, bema ia laloa namonamo guna bena abia hidi ia karaia, ia be aonega tauna.

Mataio 7:24-27 ai, Iesu ese parabole ta ia gwauraia. Unai parabole ai tatau rua be ruma idia haginia. Idia ta be “aonega tauna.” Ia be vaira nega ia laloa dainai, iena ruma be nadi badana latanai ia haginia. Ia laloa lasi, ‘bema miri latanai egu ruma lau haginia moni bada do lau negea lasi, o ruma lau haginia haraga diba.’ To, iena abia hidi dainai do ia vara diba dika ia lalohadailaia guna. Unai dainai lai gubana ia mai neganai, ena ruma be ia moru lasi. Henanadai be inai: Edena dala ai aonega do ita abia bona dogoatao noho?

Gau ginigunana be, Mika 6:9 (BHḡ) ena hereva ita laloa, ia gwau: “Emu ladana gari henia karana be aonega karana namona.” Iehova ena ladana gari henia ena anina be ia ita matauraia. Unai be iena ladana bona kara maoromaoro taravatudia ita matauraia bada. Tau ta oi matauraia totona,  namona be iena lalohadai oi diba guna. Unai amo ia oi abidadama henia diba, ia amo diba oi abia, bona ia oi tohotohoa diba. Bema ita laloa iseda kara ese iseda hetura karana Iehova ida do ia hadikaia dainai, iena taravatu hegeregerena abia hidi ita karaia, ita be aonega ita hahedinaraia unai.

Gau iharuana be Aonega Herevadia 18:1 ai, ia gwau: “Ia sibona ia noho, turana lasi tauna, ese sibona ena ura mo ia tahua noho. Ia ese taunimanima haida edia laloa namodia ia ura lasi.” Bema ita naria namonamo lasi, Iehova bona ena taunimanima amo ita noho daudau diba. Sibona noho karana ita dadaraia totona, namona be Dirava ena ladana idia gari henia bona ena taravatu idia matauraia taudia ita bamoa. Namona be Kingdom Hall dekenai ita noho, bona nega ibounai iseda Keristani tadikaka taihu ita bamoa. Hebou negadiai, namona be iseda lalona bona kudouna ita kehoa, unai amo ita kamonai herevadia ese iseda kudouna idia hamarerea diba.

Unai sibona lasi, bema guriguri amo Iehova dekenai iseda lalohekwarahilaia ita gwauraia, ia kahirakahira do ita lao. (Aon. 3:5, 6) Iehova ena orea ese ia halasia Baibel bona Baibel bukadia ita duahia neganai, namona be iseda lalona bona kudouna ita kehoa, unai amo iseda kara dainai idia vara diba dika do ita lalopararalaia bona dala maorona ita badinaia diba. Danu, lo taudia ese ita idia sisiba henia neganai, namona be ita kamonai. (Aon. 19:20) Bena “aonega” do ita dadaraia lasi, to unai mai anina bada karana do ita habadaia.

Aonega daladia ese famili ia gimaia diba. Hegeregere, Baibel ese hahine ia haganidia edia tatau idia “matauraia bada” totona. (Efe. 5:33) Tau be dahaka ia karaia be namo ena adavana ese ia matauraia bada totona? Bema tau ese hahine ia doria unai kara ia hahedinaraia totona, edia headava do idia moalelaia lasi. Hepapahuahu ia vara lasi totona, reana tau ia noho negana sibona ai hahine ese ia matauraia. To tau ia noho lasi neganai danu hahine ese ia matauraia be namo, a? Reana unai ia vara lasi. Namona be tau ese edia headava hamoalea daladia ia laloa. Bema lauma ena huahua ia hahedinaraia, hegeregere ena hahine ia lalokau henia, ia hebogahisi henia, hahine ese ia do ia matauraia bada. To momokani, Keristani hahine ese ena tau be nega ibounai ia matauraia be namo.​​—⁠Gal. 5:22, 23.

Danu, Baibel ia gwau namona be tau ese ena hahine ia lalokau henia. (Efe. 5:28, 33) Iena adavana ese ia lalokau henia totona, reana hahine do ia laloa ia karaia kerere be ena tau amo ia hunia be namo. Unai be aonega karana, a? Gabeai, hahine ese ia hunia karana be ena adavana ese ia dibaia neganai, dahaka do ia vara? Ia do ia lalokau henia noho, a? Reana do ia auka unai ia karaia totona. To bema nega maorona ta ai ia karaia kererena be ena adavana ida ia herevalaia, iena kara momokani dainai reana ena adavana do ia moale. Bona iena hahine do ia lalokau henia bada.

Namona be natudia ese edia tama sina idia kamonai henia bona tama sina ese Iehova ena dala hegeregerena edia natudia idia matahakani henia. (Efe. 6:1, 4) Unai ena anina be tama sina ese edia natudia dekenai taravatu momo idia henia be namo, a? Natudia ese ruma ena taravatu o idia kerere neganai do idia abia panisi idia diba sibona be hegeregere lasi. Aonega tama o sina ese ena natuna do ia durua ia kamonai ena badina ia lalopararalaia totona.

Hegeregere, bema natu ta be mai hemataurai lasi ida ena tama o sina ia hereva henia, namo lasi ia oi hereva auka henia eiava oi panisia, badina unai ese ia do ia hahemaraia o hagaria diba. Bona reana ena lalona ai do ia badu noho, bona ena hetura karana ena tama sina ida ia hadikaia diba.

Aonega tama sina ese edia natudia do idia matahakani henia dalana bona ena namo bona dika idia laloa be namo. Namo lasi tama sina idia hemarai dainai idia hereva haraga. Reana taunimanima idia noho lasi gabuna ai mai manau bona lalokau ida edia natuna idia hereva henia diba, bona idia hahedinaraia Iehova ia ura ia ese ena tama sina ia matauraia, bona unai be ena namo totona. Vadaeni bema natu ia hahedinaraia ena tama sina ia matauraia, do ia laloparara ia be Iehova ia hanamoa. (Efe. 6:2, 3) Mai manau ida unai dala ai natu oi hereva henia neganai, do ia moale. Danu, do ia mamia ena tama sina ese ia idia lalokau henia, bona ena tama sina do ia matauraia bada. Unai dainai hekwakwanai ia vara neganai, natu be tama sina ena heduru ia abia diba.

Tama sina haida idia laloa bema edia natuna idia sisiba henia, ena lalona do idia hahisia, unai dainai idia sisiba henia lasi. To, natu ia bada neganai, dahaka do ia vara? Iehova do ia gari henia bona Dirava ena taravatu badinaia karana do ia laloparara, a? Iehova dekenai ena lalona bona kudouna do ia kehoa, eiava sibona do ia noho?​—Aon. 13:1; 29:21.

Gau idauidau ia koroa tauna (sculptor) be ia ura koroa gauna ia lalohadailaia guna. Ia be maoromaoro gau ta do ia koroa haraga lasi. Unai hegeregerena, aonega tama sina be nega bada idia atoa Iehova ena taravatu idia dibaia bona badinaia totona, unai amo idia hahedinaraia Iehova ena ladana idia gari henia. Sibona idia noho lasi, to Iehova bona ena orea kahirakahira idia noho, unai amo aonega idia abia bona unai aonega idia gaukaralaia edia ruma bese idia durua totona.

Dina ta ta ai ita be abia hidi momo ita karaia, bona unai ese iseda vaira nega maurina ia haidaua diba. Unai dainai abia hidi ta ita ura karaia neganai, namona be ita laloa namonamo guna. Iseda abia hidi dainai do ia vara gauna ita laloa. Iehova ena heduru ita tahua bona ia amo ita abia aonegana ita gaukaralaia. Unai amo aonega ita gimaia bona unai aonega ese ita dekenai mauri do ia henia.​—Aon. 3:21, 22.