1, 2. (a) Keristani korikoridia edia helaro be edena dala ai taunimanima momo edia helaro amo ia idau? (b) Edena mai anina bada henanadai rua do ita herevalaia?

KERISTANI taudia momokani edia helaro vaira nega totona be namo herea! Ita ibounai, horoa taudia bona “mamoe ma haida,” ita ura Iehova ena ura ginigunana ia guguru bona Iehova ena ladana do ia hahelagaia negana ita itaia. (Ioa. 10:16; Mat. 6:9, 10) Bona mai moale ida unai nega ita naria noho. Danu, ita ura bada Dirava ese ia gwauhamatalaia mauri hanaihanai ita abia, herevana ia be “guba matamata” ai eiava “tanobada matamata” ai. (2 Pet. 3:13) Oibe, unai nega ita naria noho lalonai, ita ura Iehova ese ita do ia hanamoa noho.

² Taunimanima momo danu be mai edia helaro, to reana idia daradara bema idia naria noho gauna be do ia vara momokani. Hegeregere, laki gadara taudia milioni momo be idia ura moni bada idia kwalimulaia, to idia diba lasi bema unai do ia vara. To, abidadama korikorina ena anina be “oi daradara lasi to oi diba oi naria noho gauna,” mauri hanaihanai helarona unai, be do ia vara. (Heb. 11:1) To reana oi henanadai, edena bamona lau diba, lau naria noho gauna be do ia vara momokani? Bona bema unai gauna lau abidadama henia, dahaka namo do lau davaria?

3. Keristani abidadama korikorina be edena bamona ia vara?

 ³ Ita ibounai ita vara neganai, ita be mai abidadama ida ita vara lasi, bona ia be ta ena lalona ai ia vara kava karana ta lasi. Keristani abidadama be Dirava ena lauma helaga ese kamonai kudouna ai ia havaraia karana ta. (Gal. 5:22) Baibel ia gwau lasi Iehova be mai ena abidadama o abidadama ia ura. Badina Iehova be siahu ibounai Diravana bona ena aonega be bada, bona gau ta ese ia do ia koua lasi ena gwauhamata ia hagugurudia totona. Iseda guba Tamana ia diba iena gwauhamata be do idia guguru, badina ia dekenai idia be idia guguru vadaeni. Unai dainai, ia gwau: “Unai hereva be idia guguru vadaeni!” (Apokalupo 21:3-6 duahia.) Keristani abidadama ia vara badina ita abia dae Iehova be abidadama Diravana, ia be hanaihanai iena gwauhamata ia hagugurudia.​—Deu. 7:9.

4. Idaunegai abidadama tatau bona hahine be dahaka idia diba?

⁴ Heberu karoa 11 ai, abidadama tatau bona hahine 16 edia ladadia idia noho. Heberu bukana ia torea tauna ese idia bona ma haida ia herevalaia neganai, ia gwau “edia abidadama dainai, Dirava ese ia hahedinaraia ia be idia dekenai ia moale.” (Heb. 11:39) Idia ibounai be idia “daradara lasi to [idia] diba” Dirava ese ia gwauhamatalaia “garana” be do ia vara, bona unai garana ese Satani do ia hadikaia bona Iehova ena ura ginigunana do ia hagugurua. (Gen. 3:15, BHḡ) Unai abidadama taudia idia mase murinai, Dirava ese ia gwauhamatalaia “garana,” Iesu Keriso unai, ese guba maurina ena dala ia kehoa. (Gal. 3:16) Ita moale badina Iehova ese ena gwauhamata do ia hagugurudia, bona unai abidadama taudia be do idia toreisi lou bona tanobada paradaisona ai mauri goevadaena do idia abia.​—Sal. 37:11; Isa. 26:19; Hos. 13:14.

5, 6. Aberahamo bona ena ruma bese be dahaka idia laloa bada, bona edena dala ai edia abidadama idia hagoadaia? (Laulau ginigunana herevalaia.)

⁵ Heberu 11:13 ia gwau: “Idia ibounai be edia abidadama idia dogoatao ela bona idia mase, ena be Dirava ese idia dekenai ia gwauhamatalaia gaudia idia abia lasi. To idia ese daudau amo unai gaudia idia itaia bona mai moale ida idia abia dae.” Unai abidadama taudia ta be Aberahamo. Ia be Dirava ese ia gwauhamatalaia “garana” ena lohia henunai do ia abia mauri namona ia laloa bada, a? Iesu ese ia idia inai henia taudia ia hereva henia neganai, unai ia haerelaia, ia gwau: “Emui tamana Aberahamo be ia moale bada egu dina ia itaia totona, bona ia itaia bona ia moale.” (Ioa. 8:56) Sara, Isako, Iakobo, bona abidadama taudia ma haida danu be do ia mai Basileiana idia naria, unai Basileia ena “palani ia karaia tauna bona ia haginia tauna be Dirava.”​—Heb. 11:8-11.

⁶ Edena dala ai Aberahamo bona ena ruma bese ese edia abidadama idia hagoadaia? Dirava idia dibaia totona, idia ese abidadama buruka taudia idia kamonai henia, Dirava ena gwauhamata idia laloa dobu, eiava idaunega toretore idia duahidia. Mai anina bada gauna be, idia dibaia gaudia idia laloaboio lasi, to Dirava ena gwauhamata idauidau bona iena ura idia laloa dobu. Oibe, unai tatau bona hahine edia abidadama be ia goada dainai, hisihisi idauidau idia haheaukalaia, unai amo Dirava idia badinaia noho diba.

7. Iehova ese edena dala ai iseda abidadama ia hagoadaia, bona dahaka ita karaia be namo?

⁷ Iseda abidadama ia goada totona, Iehova ese ita dekenai Baibel ia henia. Unai dainai ita “moale” bona “kwalimu” totona, namona  be dina ta ta ai Dirava ena Hereva ita duahia. (Sal. 1:1-3; Kara 17:11 duahia.) Bena idaunegai Keristani taudia bamona, Dirava ena gwauhamata idauidau ita laloa dobu bona iena ura ita badinaia. Danu, Iehova ese “igui hesiai tauna mai ena kamonai bona mai ena kara maoromaoro” amo iseda abidadama idia hagoadaia gaudia momo ia henia. (Mat. 24:45) Iehova ese ita dekenai ia henia gaudia ita laloa bada neganai, idaunega abidadama taudia bamona do ita ‘daradara lasi to ita diba,’ vaira nega ena helaro be do ia vara momokani.

8. Edena dala ai guriguri karana ese iseda abidadama ia hagoadaia diba?

⁸ Guriguri karana ese idaunega Keristani taudia edia abidadama ia hagoadaia danu. Idia itaia Dirava ese edia guriguri ia haerelaia neganai, edia abidadama ia goada. (Neh. 1:4, 11; Sal. 34:4, 15, 17; Dan. 9:19-21) Ita danu be Iehova dekenai iseda lalohekwarahi ita gwauraia diba, badina ita diba do ia kamonai bona ita do ia hagoadaia mai moale ida ita haheauka noho totona. Bona iseda guriguri ia haerelaia neganai, iseda abidadama ia goada. (1 Ioane 5:14, 15 duahia.) Abidadama be lauma helaga ena huahua ta dainai, namona be lauma helaga totona ita “noinoi noho,” Iesu ese ita ia hagania hegeregerena.​—Luka 11:9, 13.

9. Ita sibona bona daidia totona ita guriguri danu be namo?

⁹ To namo lasi ita sibona totona Dirava ita guriguri henia. Iehova ena “durua karadia” be “momo herea, duahia diba lasi,” bona dina ta ta ai unai gaudia dainai ia ita tanikiu henia bona hanamoa diba! (Sal. 40:5) Danu, ‘dibura ruma lalonai idia noho taudia ita laloa, hegeregere ita be idia danu dibura ruma ai ita noho.’ Bona iseda tanobada hegegemadai tadikaka oreana totona ita guriguri diba, ita “idia hakaua taudia” totona danu. Iehova ese iseda guriguri ia haerelaia neganai, ita moale!​—Heb. 13:3, 7.

10. Edia abidadama idia nega lasi taudia haida be daika, bona edia goada be edeseni amo idia abia?

¹⁰ Heberu karoa 11 ai, aposetolo Paulo ese Dirava ena hesiai taudia ese idia davaria hahetoho ia herevalaia. Hegeregere, Paulo ese abidadama hahine haida ia gwauraia, ena be idia haida edia natudia idia mase, to gabeai idia toreisi lou. Bona ma haida be “idia ura lasi edia abidadama idia negea bena do idia ruhaia. Unai bamona idia karaia, unai amo toreisi lou hereadaena do idia abia.” (Heb. 11:35) Ena be ita diba momokani lasi, Paulo be daidia ia herevalaia, to idia haida hegeregere, Naboto bona Sekaraia be Dirava idia kamonai henia bona iena ura idia karaia dainai, nadi amo idia hododia mase. (1 Kin. 21:3, 15; 2 Siv. 24:20, 21) Daniela bona ena bamodia idia ruhadia diba, bema edia abidadama idia negea. To, Dirava ena siahu idia abidadama henia dainai, idia diba momokani ia ese “laiona edia uduna” bona “lahi ena siahu” ia koua diba.​—Heb. 11:33, 34; Dan. 3:16-18, 20, 28; 6:13, 16, 21-23.

11. Peroveta taudia haida be edia abidadama dainai dahaka hahetoho idia haheaukalaia?

¹¹ Edia abidadama dainai, peroveta tauna Mikaia bona Ieremia be “inai dala ai hahetoho idia davaria, hegeregere haida ese idia kirikirilaidia, . . . bona dibura rumadia ai idia atodia.” Ma haida, hegeregere Elia be “tano gagaena ai, ororo ai, kohua bona guri lalodiai idia noho.” Idia ibounai idia haheauka, badina ‘idia daradara lasi to idia diba idia naria noho gauna be do ia vara.’​—Heb. 11:1, 36-38; 1 Kin. 18:13; 22:24-27; Ier. 20:1, 2; 28:10, 11; 32:2.

12. Hahetoho haheaukalaia karana dekenai, daika be haheitalai hereadaena, bona dahaka ese ia durua?

¹² Paulo ese abidadama tatau bona hahine ia herevalaia murinai, ia ese haheitalai hereadaena ia hahedinaraia tauna​—iseda Lohiabada Iesu Keriso—ia herevalaia.  Heberu 12:2 ia gwau: “Ia be iena vairanai ia noho moalena dainai, hisihisi auna ia haheaukalaia, bona do ia abia hemaraina ia laloa lasi. Bona ia be Dirava ena terona ena idibana kahanai ia helai vadaeni.” Oibe, hahetoho badadia ita davaria neganai, namona be Iesu ese abidadama ia hahedinaraia dalana ita “laloa namonamo.” (Heberu 12:3 duahia.) Iesu bamona, edia abidadama dainai idia hamasedia Keristani taudia ginigunadia ese edia abidadama idia negea lasi, idia ta be hahediba tauna Anetipa. (Apok. 2:13) Edia ahuna be guba maurina, unai ese idaunegai abidadama taudia ese idia naria “toreisi lou hereadaena” ia hereaia. (Heb. 11:35) Lagani 1914 ai Basileia ia vara bena nega sisina murinai, idia mase abidadama horoa taudia ibounai be idia toreisi lou bona lauma maurina guba dekenai idia abia. Idia be Iesu ida taunimanima do idia lohiaia.—Apok. 20:4.

13, 14. Rudolf Graichen be dahaka hahetoho ia davaria, bona dahaka ese ia durua ia haheauka totona?

¹³ Iesu hegeregerena, hari Dirava idia tomadiho henia taudia milioni momo be edia helaro idia laloa bada, bona idia davaria hahetoho ese edia abidadama ia hamanokaia  lasi. Rudolf Graichen mani ita laloa. Ia be lagani 1925 ai ia vara, Germany ai. Ia ese ena ruma ai idia noho Baibel laulau ia lalodia. Ia gwau: “Laulau ta dekenai be uda sisia bona mamoe natuna, nanigosi natuna bona lepadi, boromakau natuna bona laiona​—idia ibounai huanai maino ia noho, bona mero maragina ta ese ia hakaudia. . . . Unai bamona laulau lau lalodiaboio diba lasi.” (Isa. 11:6-9) Ena be lagani momo lalonai Rudolf be dagedage bada ia davaria, guna Nazi Gestapo oreana bona gabeai East German Stasi eiava pulisi oreana amo, to ia ese ena abidadama tanobada paradaisona dekenai ia dogoatao auka.

¹⁴ Rudolf ese ia davaria hahetoho ma ta be Ravensbrück dibura kamepa ai, iena sinana be typhus gorerena amo ia mase, bona ia itaia ena tamana ena abidadama ia manoka dainai, pepa ta ia sainia, ia gwau ia be Iehova ena Witnes tauna ta lasi. Rudolf be dibura ruma ia rakatania murinai, ia be sekit gaukara ia karaia bona gabeai Gilead Sikuli dekenai ia lao. Unai murinai Chile dekenai idia siaia misinari gaukara ia karaia totona, bona sekit gaukara ia matamaia lou. To Rudolf be hahetoho ma haida ia davaria. Misinari taihu ta, Patsy, ia adavaia bena lagani ta murinai, edia beibi kekeni ia mase. Gabeai, iena adavana ia mase, iena mauri lagani be 43 sibona. Rudolf ese unai hahetoho ibounai ia haheaukalaia, bona ena be ia buruka bona ia gorere momo, to regula painia gaukara ia karaia bona elda maduna ia huaia danu. Iena mauri sivaraina be August 1, 1997, Gima Kohorona, rau 20-25 ai ia noho. ^[1]

15. Hari inai negai, tadikaka be edena dala ai dagedage idia haheaukalaia?

¹⁵ Ena be Iehova ena Witnes taudia be dagedage idia davaria, to mai moale ida edia vaira nega idia laloa. Hegeregere, iseda tadikaka taihu momo be Eritrea, Singapore, bona South Korea ai idia hadiburadia, badina idia ese Iesu ena hereva idia badinaia bona tuari kaia idia gaukaralaia lasi. (Mat. 26:52) Unai dibura taudia haida be Isaac, Negede, bona Paulos, idia be lagani 20 mai kahana Eritrea ena dibura ruma ai idia noho! Dibura ruma ai idia noho dainai, edia buruka tama sina idia naria eiava idia headava diba lasi. Ena be dagedage bada idia davaria, to Dirava idia badinaia noho. Iseda jw.org websait ai edia moale toana ita itaia neganai, ita diba idia be edia abidadama idia negea lasi. Bona dibura ruma gadi taudia ese idia matauraidia danu.

16. Abidadama goadana ese edena dala ai oi ia gimaia?

¹⁶ Iehova ena taunimanima momo be dagedage aukadia idia haheaukalaia lasi. To edia abidadama ia tohoa gaudia be idau. Idia momo be idia ogogami eiava tuari o disasta amo ia vara hisihisina idia haheaukalaia noho. Idia haida be Mose bona bese kwaradia bamona, edia mauri namona idia rakatania. Bona hari idia hekwarahi noho, kohu momo tahua maurina eiava sibona laloa bada maurina idia dadaraia totona. Dahaka ese idia ia durua? Idia ese Iehova idia lalokau henia bona iena gwauhamata idia abidadama henia. Oibe, idia abia dae momokani Iehova ese kara gageva ibounai do ia haorea bona iena abidadama hesiai taudia be tanobada matamatana ai mauri hanaihanai do idia abia.​—Salamo 37:5, 7, 9, 29 duahia.

17. Emu lalona oi hadaia dahaka do oi karaia, bona stadi gabena ai dahaka do ita herevalaia?

¹⁷ Inai stadi ai inai ita dibaia: Guriguri hanaihanai karana bona Dirava ena gwauhamata laloa dobu karana ese iseda abidadama ia hagoadaia diba. Unai ese ita do ia durua iseda abidadama idia tohoa hahetoho ita haheaukalaidia, bona vaira nega ena helaro ita naria totona. To, abidadama ena anina be unai sibona lasi, stadi gabena ese ena badina ma haida do ia herevalaia.