1, 2. (a) Keristani tauna ta ena mauri lalonai dahaka ia vara diba bema senisi ia vara? (Laulau ginigunana herevalaia.) (b) Salamo 131 ena hereva hegeregerena, dahaka ese ita ia durua diba ita lalomaino totona?

LLOYD bona Alexandra be idia hamaoroa edia asainmen idia haidaua bona painia gaukara do idia karaia neganai, matamanai idia lalohisihisi. Badina idia be lagani 25 bamona Betele dekenai idia gaukara vadaeni. Lloyd ia gwau: “Lau mamia Betele bona egu asainmen be egu mauri ena kahana badana ta. Egu lalona dekenai unai senisi lau abia dae, to wiki bona hua haida lalonai lau mamia toana be ta ese lau ia laloa lasi. Nega momo lau daradara, badina nega haida lau moale, to danu nega haida lau lalohisihisi.”

² Bema iseda mauri lalonai senisi ta ia vara haraga neganai, do ita laloa momo bona lalometau diba. (Aon. 12:25) Reana ita dekenai do ia auka unai senisi ita abia dae totona. Bema unai senisi ita abia dae be auka, ita lalomaino totona dahaka ita karaia be namo? (Salamo 131:1-3 duahia.) * Baibel ese ia sivarailaia taudia bona hari iseda negai idia noho Iehova ena hesiai taudia do ita  herevalaia. Edena dala ai idia lalomaino ena be edia noho dalana ia idau.

3. Iosepa dekenai dahaka ia vara?

³ Iosepa ena mauri lagani be 17 neganai, ena tadikaka ese idia mama henia dainai hesiai tauna ta bamona idia hoihoilaia. Unai ia do vara lasi neganai, Iosepa be ena tamana ese ia lalokau henia bada. (Gen. 37:2-4, 23-28) Lagani 13 bamona lalonai, Iosepa be Aigupito ai mai haheauka ida hesiai tauna ta bamona dibura ruma dekenai ia noho, bona ena lalokau tamana Iakobo amo ia daudau. Dahaka ese Iosepa ia durua ia lalometau bona lalohisihisi lasi totona?

4. (a) Iosepa be dibura ruma ai ia noho neganai, dahaka ia laloa bada? (b) Edena dala ai Iehova ese Iosepa ena guriguri ia haerelaidia?

⁴ Dibura ruma dekenai ia noho neganai, Iosepa be reana hanaihanai Iehova ese ia hanamoa dalana ia laloa. (Gen. 39:21; Sal. 105:17-19) Iosepa ia matamata neganai Dirava ese ia perovetalaia gaudia be nihi amo ia hahedinaraia, unai amo ia diba momokani Iehova ese ia ia lalonamo henia. (Gen. 37:5-11) Nega momo Iehova dekenai ena lalohekwarahi gaudia ia gwauraia. (Sal. 145:18) Iosepa be mai kudouna ibounai ida ia guriguri dainai, hahetoho ibounai lalonai Iehova ese ena lalona ia hagoadaia unai amo ia abia dae “Dirava be ia ida.”​—Kara 7:9, 10. *

5. “Dirava ena maino” ese edena dala ai ita ia hagoadaia diba iseda hesiai gaukara dekenai ita atoa tahua gaudia ita hagugurua totona?

⁵ Ena be iseda noho dalana ia auka, to hari ita mamia diba “Dirava ena maino” ese iseda lalona bona kudouna ia gimaia diba. (Filipi 4:6, 7 duahia.) Danu, bema ita lalohekwarahi bada, Dirava ena maino ese ita ia hagoadaia diba iseda hesiai gaukara dekenai ita atoa tahua gaudia ita hagugurua bona ita ia gimaia ita hesiku lasi totona. Hari inai negai idia noho haheitalai namodia haida do ita herevalaia.

6, 7. Edena dala ai ita laloa gauna ita gurigurilaia karana ese ita ia durua diba lalomaino ita abia totona? Haheitalai gwauraia.

⁶ Ryan bona Juliette be idia hamaoroa edia lagani ta lalonai spesel painia gaukarana do idia hadokoa neganai, idia mamia ta ese idia ia laloa lasi. Ryan ia gwau: “Karaharaga unai gauna totona Iehova ai guriguri henia. Ai diba unai be nega namona emai abidadama karana Ia dekenai ai hahedinaraia totona. Emai kongrigeisen dekenai momo be hereva momokani dekenai idia do noho daudau lasi, unai dainai Iehova ai noia ia ese ai do ia durua emai abidadama karana dekenai haheitalai namona ai hahedinaraia totona.”

⁷ Iehova be edena dala ai edia guriguri ia haerelaia? Ryan ia gwau: “Karaharaga ai guriguri murinai, ai mamia emai lalohadai kereredia bona matamanai ai lalohekwarahilaia gaudia idia ore. Dirava ena maino ese emai kudouna bona lalona ia gimaia. Ai laloparara bema lalohadai maorona ai abia, Iehova ese ai do ia gaukaralaia noho.”

8-10. (a) Edena dala ai Dirava ena lauma helaga ese ita ia durua diba lalohekwarahi karana ita haheaukalaia totona? (b) Edena dala ai Iehova ese ita ia durua diba ena hakaua dalanai lalohadai maorona ita abia totona?

⁸ Danu do ita lalomaino sibona lasi, to Dirava ena lauma helaga ese ita ia durua diba Baibel ena siri badadia ita laloa unai amo Dirava ena hesiai gaukara idauidau ita atoa guna. (Ioane 14:26, 27 duahia.) Kahirakahira lagani 25 lalonai Betele gaukara idia karaia headava taudia haida, Philip  bona Mary mani ita laloa. Hua foa lalonai, idia ruaosi be edia sinana bona edia varavara ta ia mase bona idia ruaosi be Mary ena tamana idia naria, ia be dementia gorere ia abia.

⁹ Philip ia gwau: “Lau laloa unai hekwakwanai lau haheaukalaia diba, to toana be gau ta lau reaia. Gima Kohorona ena stadi ta ai Kolose 1:11 ena hereva lau itaia. Momokani, ena be lau haheauka to lau do lalohekwarahi noho. Namona be lau ‘hesiku lasi bona do lau moale.’ Unai siri amo lau diba egu mauri lalonai idia vara senisi ese moale ia havaraia lasi, to Dirava ena lauma helaga ena heduru ese egu mauri ia durua.”

¹⁰ Iehova ese Philip bona Mary ia hanamoa badina ena be edia mauri ai gau momo idia vara, to Iehova ena hakaua dalanai lalohadai maorona idia abia. Betele idia rakatania murinai, idia ruaosi be Baibel stadi momo idia davaria, bona edia stadi taudia idia ura nega momo idia stadi. Mary ia gwau: “Stadi taudia durua karana ai moalelaia bona unai be hegeregere Iehova ese ai ia hamaoroa gau ibounai do idia namo.”

11, 12. (a) Iosepa be dahaka ia karaia, unai amo Iehova ese ia hanamoa? (b) Iosepa ena haheauka karana dainai dahaka hahenamo ia abia?

¹¹ Iseda mauri lalonai senisi idia vara haraga neganai, reana vaira negai do idia vara gaudia dainai do ita lalohekwarahi. Reana Iosepa dekenai unai ia vara diba. To, ia dekenai ia vara gauna dainai kara ta ia karaia, unai amo Iehova ese ia hanamoa. Ena be dibura ruma dekenai ia noho, Iosepa ia gaukara goada ofesa tauna badana ese ia henia gaukara ibounai ia hagugurua, Potifara henunai ia gaukara hegeregerena.​—Gen. 39:21-23.

¹² Nega ta, Farao be ena ruma lalonai idia gaukara taudia rua be Iosepa ena naria henunai ia atoa. Iosepa ena kara namona dainai, unai taudia rua ese idia lalohekwarahilaia bona daradaralaia nihi be Iosepa dekenai idia gwauraia. (Gen. 40:5-8) Iosepa ia diba lasi, to unai herevahereva karana amo anina namona ia vara. Ena be lagani rua lalonai dibura ruma ai ia noho, to idia ruhaia neganai, ia idia abia hidi Farao henunai lohia tauna iharuana ai ia lao.​—⁠Gen. 41:1, 14-16, 39-41.

13. Ena be iseda noho dalana ia idau, dahaka ita karaia diba unai amo Iehova ese ita ia hanamoa?

¹³ Iosepa hegeregerena, nega haida idia vara gaudia ita haidaua diba lasi. Ena be iseda noho dalana ia idau, to bema mai haheauka ida ita gaukara goada bona kara ta ita karaia, Iehova ese ita do ia hanamoa. (Sal. 37:5) Momokani, reana nega haida do ita daradara, to aposetolo Paulo ena hereva bamona, hekwakwanai “hanaia dalana ia noho.” (2 Kor. 4:8) Bema iseda haroro gaukara ita laloa bada, Paulo ena hereva be ita dekenai do ia momokani.

14-16. Edena dala ai evanelia tauna Filipo ese ena haroro gaukara ia laloa bada herevana ena noho dalana ia idau?

¹⁴ Evanelia tauna Filipo be haheitalai namona badina ena be ena noho dalana ia idau, to ena haroro gaukara ia laloa bada. Ierusalema dekenai Stefano idia hamasea murinai dagedage karadia momo idia vara. * Unai negai, Filipo be hesiai gaukara matamata ia moalelaia. (Kara 6:1-6) To Keriso ena murinai idia raka taudia be gabu idauidau dekenai idia heau lao neganai, Filipo be ia heau lasi to gau ta ia karaia. Ia be Samaria dekenai ia lao bona ia haroro, unai taoni be bada herea bona unuseniai idia noho taudia ese sivarai namona idia do kamonai lasi.​—Mat. 10:5; Kara 8:1, 5.

¹⁵ Filipo be mai ena ura ida Dirava ena lauma helaga ese ia hakaua gabudia dekenai ia lao. Unai dainai Iehova ese ia gaukaralaia sivarai namona idia do kamonai lasi gabudia dekenai ia haroro totona. Iuda taudia momo be Samaria taudia idia kara namo henidia lasi. To Filipo be ma haida edia toana ia laloa lasi to mai ena ura ida sivarai namona ia harorolaia. Unai dainai, Samaria taudia be “mai lalotamona ida” ena hereva idia kamonai.​—Kara 8:6-8.

¹⁶ Bena Dirava ena lauma helaga ese Filipo ia hakaua Asadoda bona Kaisarea dekenai ia lao totona, unai hanua badadia rua lalonai idau bese taudia momo idia noho. (Kara 8:39, 40) Samaria dekenai ia haroro bona lagani 20 idia ore murinai, Filipo ena noho dalana ma ia idau. Ia bona ena ruma bese ese edia noho gabuna be edia haroro teritori ai idia halaoa. Herevana ena noho dalana ia idau, Filipo be ena haroro gaukara ia laloa bada, unai dainai Iehova ese ia bona ena ruma bese ia hanamoa bada.​—Kara 21:8, 9.

17, 18. Herevana iseda noho dalana ia idau, dahaka ese ita ia durua diba lalohadai maorona ita abia totona?

¹⁷ Ful-taim hesiai gaukara idia karaia taudia momo idia gwau, herevana edia noho daladia idia idau to haroro gaukara laloa bada karana ese idia ia durua lalohadai maorona idia abia totona. South Africa amo headava taudia, Osborne bona Polite, be Betele idia rakatania neganai, idia laloa pat-taim moni gaukara bona noho gabuna ta do idia davaria haraga. Osborne ia gwau: “Ai laloa moni gaukara do ai davaria haraga, to unai ia vara lasi.” Ena adavana Polite ia gwau: “Hua toi lalonai moni gaukara ta ai davaria  lasi, bona ai be moni lasi. Unai be hahetoho badana.”

¹⁸ Dahaka ese idia ia durua idia lalohekwarahilaia gauna idia haheaukalaia totona? Osborne ia gwau: “Kongrigeisen danu ai haroro hebou karana ese ai ia durua bada lalohadai maorona ai abia totona. Emai lalona ai hadaia haroro gaukara ai karaia hanaihanai bona ai lalohekwarahi lasi, unai ai karaia neganai ai moale bada. Gabu ibounai dekenai moni gaukara ai tahua, ela bona ta ai davaria.”

19-21. (a) Dahaka ese ita do ia durua ita lalomaino noho totona? (b) Senisi idauidau ita abia dae karana ena namo ita ta ta dekenai be dahaka?

¹⁹ Unai haheitalai ta ta ese idia hahedinaraia, bema iseda noho dalana hegeregerena Iehova ita hesiai henia bona ia ita abidadama henia, lalomaino do ita abia. (Mika 7:7 duahia.) Do ita diba unai senisi idauidau ita abia dae karana ena namo ese iseda hetura karana Iehova ida ia hagoadaia. Polite, matamanai ita herevalaia taihu, ia gwau: “Emai asainmen idia haidaua bona Betele ai rakatania karana ese ai ia durua ena be mauri ia auka, to Iehova dekenai do ai tabekau. Egu hetura karana Iehova ida be ia goada.”

²⁰ Mary, matamanai ita herevalaia taihu be ena buruka tamana ia naria bona painia gaukara ia karaia noho. Ia gwau: “Lau dibaia gauna be inai, bema lau lalohekwarahi, lau guriguri guna. Danu Iehova dekenai lau tabekau, bona unai be mai anina bada hari bona vaira negai.”

²¹ Lloyd bona Alexandra, matamanai ita herevalaia headava tau bona hahine idia gwau, edia mauri lalonai idia vara senisi idauidau be idia laloa lasi dalanai edia abidadama ia tohoa. To idia gwau: “Iseda abidadama idia tohoa gaudia ese do ia hahedinaraia bema iseda abidadama ia goada bona nega aukadia ai ita do ia durua ita gini goada totona. Ai mamia unai ese ai durua taunimanima namodia ai ai lao totona.”

22. Bema iseda noho dalana hegeregerena Dirava ita hesiai henia, dahaka do ia vara diba?

²² Bema mauri lalonai senisi haida idia vara​—hegeregere asainmen matamatana ta oi abia, gorere, eiava ruma bese ena maduna​—⁠namona be oi diba Iehova ese oi ia laloa bada bona nega korikori ai oi do ia durua. (Heb. 4:16; 1 Pet. 5:6, 7) Hari emu noho dalana hegeregerena Dirava oi hesiai henia diba. Guriguri amo emu guba Tamana kahirakahira oi lao, bona ia dekenai oi tabekau. Unai amo ena be emu noho dalana ia idau, to Iehova amo ia mai lalomaino do oi abia.