1, 2. Mose ia mase murinai Iosua be dahaka hekwakwanai haida ia davaria?

IEHOVA ese Iosua ia hamaoroa ia gwau: “Lauegu hesiai tauna Mose be ia mase vadaeni. Unai dainai oi toreisi, inai Ioridane Sinavai do oi hanaia, oi bona Israela taudia, idia dekenai lau ura do lau henia tanona do umui raka vareai.” (Ios. 1:1, 2) Unai be senisi badana Iosua dekenai, badina lagani 40 lalonai ia be Mose ena hesiai tauna ai ia lao!

² Mose be lagani momo Israela besena ia gunalaia dainai, reana Iosua ia laloa Dirava ena taunimanima ese ena hakaua dalana do idia abia dae eiava lasi. (Deu. 34:8, 10-12) Baibel ia herevalaia buka ta ai, Iosua 1:1, 2 ia herevalaia neganai, ia gwau: “Idaunegai bona hari iseda negai bema gunalaia tauna ta idia senisia, unai kara ese edia bese lalonai hekwakwanai ia havaraia diba.”

3, 4. Dahaka dainai ita gwau diba Iosua be Dirava ia abidadama henia, bona ita sibona dekenai edena henanadai do ita henia?

³ Iosua be reana badina maorodia dainai ia lalohekwarahi, to karaharaga dina haida lalonai Dirava ena hadibaia herevadia ia badinaia.  (Ios. 1:9-11) Ia ese Dirava ia abidadama henia. Baibel ena sivarai hegeregerena, Iehova ese ena aneru ta ia gaukaralaia Iosua bona Israela taudia ia hakaua totona. Ita gwau diba unai aneru be Hereva, Dirava ena vara guna Natuna.​—Eso. 23:20-23; Ioa. 1:1.

⁴ Iehova ese Israela taudia ia durua dainai, Mose ena gunalaia gaukarana be Iosua ese ia karaia neganai unai idia badinaia. Hari ita danu be senisi idia vara negana ai ita noho bona reana do ita laloa, ‘Dirava ena orea ia heau haraga noho dainai, dahaka badina namodia dainai Dirava ese ia abia hidi Hakaua Tauna, Iesu, ita abidadama henia diba?’ (Mataio 23:10 duahia.) Unai henanadai ita haerelaia totona, idaunegai Iehova ese ena taunimanima ia hakaua dalana do ita herevalaia.

5. Iosua be Ieriko kahirakahira ia lao neganai, daika ia hedavari henia? (Laulau ginigunana itaia.)

⁵ Israela taudia be Ioridane idia hanaia murinai, Iosua dekenai gau idauna ta ia vara. Iosua be Ieriko kahirakahira ia lao neganai, tau ta mai ena tuari kaia ida ia hedavari henia. Iosua ia diba lasi unai tauna be daika unai dainai ia henanadai, ia gwau: “Oi be ai dekenai oi durua, o ai dekenai oi tuari?” Unai tuari tauna be sibona ia gwauraia hedinarai neganai, Iosua ia hoa. Unai be “[Iehova] ena tuari oreana ena gunalaia tauna,” bona ia noho hegaegae Dirava ena taunimanima ia gimaia totona. (Iosua 5:13-15 duahia.) Ena be Baibel ia gwau Iehova ese Iosua ia hereva henia, to ita diba Dirava be aneru ia gaukaralaia Iosua ia hereva henia totona, bona toana be Dirava ese unai aneru ia gaukaralaia ma nega haida ai ena gaukara ia karaia totona.​—Eso. 3:2-4; Ios. 4:1, 15; 5:2, 9; Kara 7:38; Gal. 3:19.

6-8. (a) Dahaka dainai Iehova ese ia henia hadibaia hereva haida be taunimanima ese idia lalopararalaia lasi? (b) Edena dala ai ita diba unai hadibaia herevadia be aonega dalanai idia henia bona nega korikori ai idia abia? (Mani futnout itaia.)

⁶ Ieriko ena siti do idia tuari henia totona, Hakaua aneru goadana amo Iosua be hadibaia herevadia ia abia. Matamanai, unai hadibaia hereva haida be reana palani namodia lasi. Hegeregere, Iehova ese oda ia henia tatau ibounai edia kopina do idia utua dainai, dina haida lalonai idia tuari diba lasi. Unai be nega maorona unai tatau goadadia edia kopina idia utua, a?​—Gen. 34:24, 25; Ios. 5:2, 8.

⁷ Israela tuari taudia be reana idia laloa, bema edia inai taudia be edia kamepa ai idia mai neganai, edena dala ai edia famili do idia gimaia. To, sivarai idia kamonai “Ieriko hanua ena magu iduara idia koua momokani, Israela taudia dekenai idia gari dainai.” (Ios. 6:1) Dirava ena hadibaia hereva idia badinaia dainai ia vara gauna ese edia abidadama ia hagoadaia!

⁸ Danu, Dirava ese Israela taudia ia oda henidia Ieriko hanua do idia tuari henia lasi, to dina siks lalonai nega tamona hanua ena magu do idia raka hagegea bona dina namba seven ai nega seven hanua ena magu do idia raka hagegea. Reana tuari taudia haida do idia laloa, ‘Iseda goada bona nega ita haorea kava noho!’ To Israela taudia edia Hakaua Tauna, Iehova, ia diba dahaka ia karaia. Iena palani ese Israela taudia edia abidadama sibona ia hagoadaia lasi, to idia ia gimaia Ieriko ena tuari taudia goadadia ida idia tuari lasi totona.​—Ios. 6:2-5; Heb. 11:30. *

9. Dahaka dainai Dirava ena orea amo ita abia hadibaia herevadia ibounai ita badinaia be namo? Haheitalai gwauraia.

⁹ Unai sivarai amo dahaka ita dibaia? Reana nega haida Iehova ena orea be gau matamatadia idia halasia bona reana ita be hanaihanai ena badina ita lalopararalaia lasi. Hegeregere, reana ita laloa dahaka dainai elektronik gaudia be sibona iseda stadi,  haroro gaukara, bona hebou gabudiai ita gaukaralaia. Hari unai gaudia ita gaukaralaia ena namo ita lalopararalaia. Bona unai senisi edia namo ita itaia neganai, unai ese iseda abidadama bona lalotamona karana tadikaka taihu ida ia hagoadaia.

10. Daika ena hakaua dalana dainai Ierusalema ai hakaua oreana ese mai anina bada hebouna ta idia karaia?

¹⁰ Lagani 13 bamona idau bese tauna Korenelio be Keristani tauna ai ia lao murinai, Iuda abidadama taudia haida be idia gwau kopina utua karana be maoro. (Kara 15:1, 2) Antioka ai tadikaka be unai idia hepapahuahulaia neganai, dala idia karaia Paulo ese Ierusalema ai idia noho hakaua oreana dekenai unai do ia herevalaia totona. To daika ena hakaua dalana dainai unai ia karaia? Paulo ia gwau: “Lau daekau lao, badina Lohiabada be lau dekenai ia hahedinaraia.” Momokani, Keriso ena hakaua dalana dainai unai hekwakwanai be idia abia lao hakaua oreana ese idia hamaoromaoroa totona.​—⁠Gal. 2:1-3.

11. (a) Iuda Keristani taudia ese kopina utua karana be edena bamona idia laloa? (b) Edena dala ai Paulo be mai manau ida Ierusalema ai idia noho elda taudia edia hereva ia badinaia? (Futnout itaia danu.)

¹¹ Keriso ena hakaua henunai, hakaua oreana ese idia hahedinaraia goevagoeva Iuda lasi Keristani taudia ese edia kopina do idia utua lasi. (Kara 15:19, 20) To unai abia hidi idia karaia bona lagani haida murinai, abidadama Iuda taudia momo be edia natudia edia kopina idia utua. Bena Ierusalema dekenai elda taudia ese Paulo ena sivarai idia kamonai neganai, haida idia gwau ia be Mose ena taravatu ia badinaia lasi, unai dainai ia dekenai hadibaia hereva haida idia henia ia karaia totona. * (Kara 21:20-26) Idia hamaoroa dubu dekenai tatau foa do ia hakaua lao unai amo do idia diba Paulo be ‘Taravatu ia badinaia noho.’ Reana Paulo be do ia laloa: ‘Unai be anina lasi! Dahaka dainai lau umui hamaoroa unai lau karaia totona? Kopina utua karana idia lalopararalaia lasi Iuda Keristani taudia  dainai unai hekwakwanai ia vara.’ To, Paulo ia laloparara elda taudia idia ura abidadama taudia huanai lalotamona ia noho dainai, Paulo be mai manau ida edia hadibaia hereva ibounai ia badinaia. To reana do ita laloa, ‘Dahaka dainai Iesu be unai hekwakwanai be nega daudau lalonai ia hamaoromaoroa lasi, ena be Mose ena taravatu be Iesu ia mase murinai ia ore?’​—⁠Kol. 2:13, 14.

12. Dahaka dainai Iesu ese kopina utua karana ena hekwakwanai ia hamaoromaoroa haraga lasi?

¹² Haida be nega daudau murinai diba matamata o hadibaia hereva matamata idia lalopararalaia namonamo. Iuda Keristani taudia haida be nega daudau murinai edia lalohadai Mose ena taravatu dekenai idia haidaua. (Ioa. 16:12) Haida idia abia dae kopina utua karana be Dirava tura henia karana ena toana ta. (Gen. 17:9-12) Ma haida idia gari badina Iuda taudia ese do idia dagedage henidia bona idia ura lasi Iuda taudia amo idia idau. (Gal. 6:12) Gabeai, Keriso be Paulo ese ia torea revarevadia amo heduru hereva ma haida ia henia.​—⁠Roma 2:28, 29; Gal. 3:23-25.

13. Hari inai negai dahaka ese ita ia durua diba Keriso ese ita ia hakaua dalana ita laloa bada totona?

¹³ Bema orea ese idia karaia senisi haida ita daradaralaia o lalopararalaia namonamo lasi, namona be idaunegai Keriso ena gunalaia dalana ita laloa. Herevana Iosua o aposetolo edia negai, Keriso be hanaihanai hakaua dala namodia ia henia Dirava ena taunimanima edia abidadama ia hagoadaia, bona idia ia durua edia huanai lalotamona ia noho totona.​—Heb. 13:8.

14-16. Edena dala ai “Hesiai tauna mai ena kamonai bona mai ena kara maoromaoro” amo ia mai hakaua dalana ese ia hahedinaraia Keriso ese ita ia laloa bada?

¹⁴ Hari inai negai, nega korikori ai “hesiai tauna mai ena kamonai bona mai ena kara maoromaoro” amo hakaua daladia ita abia, unai ese ia hahedinaraia Iesu ese ita ia laloa bada. (Mat. 24:45) Marc, tama ta mai ena natuna foa, ia gwau: “Satani ia ura ruma bese taudia dagedage henia karana amo kongrigeisen ia hamanokaia. Hari wiki ta ta ai, ruma bese ta ta ese edia ruma bese tomadiho idia karaia be namo, ruma bese kwarana ta ta dekenai inai hereva be mai anina bada, ‘emui ruma bese umui gimaia!’”

¹⁵ Keriso ena hakaua dalana ita lalopararalaia neganai, do ita diba ena ura badana be ita ia durua iseda hetura karana Dirava ida ita hagoadaia totona. Patrick, elda tauna ta, ia gwau: “Matamanai, tadikaka taihu haida be wikeni ai haroro gaukara idia karaia totona grup maragina idia bamoa dainai idia moale lasi. To Iesu ese ia hahedinaraia, ia be kongrigeisen lalonai idia noho taudia ibounai ia laloa bada. Hegeregere, bema idia hemarai bona nega daudau haroro gaukara idia karaia lasi tadikaka bona taihu haida be idia mamia idia ita laloa bada, unai ese idia ia hagoadaia haroro gaukara idia goadalaia totona.”

¹⁶ Ma danu Keriso be ita ia durua haroro gaukarana ita laloa bada totona, unai be hari inai negai idia karaia noho mai anina bada gaukarana. (Mareko 13:10 duahia.) André, elda matamata ta, be hanaihanai Dirava ena orea amo idia mai diba matamatadia ia laloa bada. Ia gwau: “Betele ai gau haida idia haidaua karana ese nega dokona ena toana bona haroro gaukara laloa bada karana ia hahedinaraia.”

17, 18. Dahaka dainai idia vara senisi idauidau edia namo laloa karana ese ita idia durua?

¹⁷ King, Iesu Keriso be ena hakaua dala amo ia hahedinaraia ia be iseda vaira nega ia laloa bada. Unai dainai, namona be idia vara noho senisi idauidau edia namo ita moalelaia. Reana wiki ena hebou o haroro gaukara ai idia vara senisi edia namo be emui ruma  bese tomadiho ai umui herevalaia neganai, unai ese umui ia hagoadaia diba.

¹⁸ Bema Iehova ena orea amo idia mai hadibaia herevadia bona ita idia durua daladia edia namo ita itaia, mai moale ida unai hakaua daladia do ita badinaia. Ita moale badina idia printaia pablikeisen ena namba idia hamaragia bona teknoloji matamata ita gaukaralaia karana amo moni momo ita halusia kava lasi, to tanobada hegegemadai Basileia ena gaukara ita habadaia. Unai dainai bema dala ia noho iseda kompiuta amo idia halasia pablikeisen bona vidio ita gaukaralaia momo be namo. Unai dala amo, mai aonega ida orea ena kohu ita gaukaralaia, Keriso ese ia laloa dalana hegeregerena.

19. Dahaka dainai Keriso ena hakaua dalana ita badinaia?

¹⁹ Bema ita hekwarahi Keriso ena hakaua daladia ita badinaia, ma haida edia abidadama do ita hagoadaia bona mai lalotamona ida ita gaukara hebou diba. André be Betele taudia edia namba idia hamaragia karana ia laloa neganai, ia gwau: “Guna Betele ai idia gaukara taudia be unai senisi idauidau idia badinaia, unai ese lau ia durua bada unai senisi idauidau lau laloa bada bona matauraia. Herevana dahaka asainmen idia abia, to mai moale ida idia karaia bona Iehova ena kariota ia heau dalana idia badinaia sibona.”

20, 21. (a) Dahaka dainai mai abidadama ida iseda Hakaua Tauna, Keriso ita badinaia? (b) Edena henanadai be wiki vaira ena stadi ai do herevalaia?

²⁰ Iseda Hakaua Tauna, Iesu Keriso be kahirakahira do “ia kwalimu” bona “hoa karadia mai garidia danu do ia hedinaraia.” (Apok. 6:2; Sal. 45:4) To nega ia do noho lalonai, Iesu ese Dirava ena taunimanima ia durua noho idia hegaegae toreisi lou neganai hadibaia bona haginia gaukara badana do idia karaia totona.

²¹ Iseda King be ita do ia hakaua lao tanobada matamata ai dainai, herevana iseda mauri ia auka ia lao to namona be mai momokani ida ia ita badinaia be namo. (Salamo 46:1-3 duahia.) Nega haida, bema ita dekenai hekwakwanai badana ta ia vara senisi ta ita badinaia be auka. Edena dala ai ita lalomaino bona Iehova ita abidadama henia momokani? Inai henanadai be vaira wiki ena stadi ai do ita herevalaia.