1. Edena dala ai 2 Korinto 3:1-3 ese ita ia durua, ta ita stadi henia ela bona ia bapatiso ena hahenamo ita laloa totona? (Rau 1 ena laulau itaia.)

EMU KONGRIGEISEN amo Baibel stiuden ta ia bapatiso oi itaia neganai emu hemami be edena bamona? Do oi moale bada. (Mat. 28:19) Bema unai hahediba tauna matamatana be emu Baibel stiuden, ena bapatiso do oi moalelaia bada! (1 Tes. 2:19, 20) Ia bapatiso hahediba tauna matamatana be “hamomokania revareva” bamona, ena Baibel stadi naria tauna bona kongrigeisen taudia ibounai totona.​—2 Korinto 3:1-3 duahia.

2. (a) Edena mai anina bada henanadai do ita laloa, bona dahaka dainai? (b) Baibel stadi be dahaka? (Futnout itaia.)

² Ita moale badina idia hanaia lagani 4 lalonai, tanobada hegegemadai hua ta ta ai idia ripotilaia Baibel stadi * be 10 milioni bamona. Unai lagani ta ta ai taunimanima 280 tausen idia bapatiso, bona Iehova ena Witnes bona Iesu Keriso ena hahediba taudia matamatadia ai idia lao. Edena dala ai Baibel stadi taudia milioni momo ita durua idia bapatiso totona? Iehova be taunimanima dekenai nega ia henia Keriso ena hahediba taudia ai do idia lao, unai dainai ita ura ita gaukara goada idia ita durua bapatiso idia abia haraga totona. Nega be ia ore haraga noho!​—1 Kor. 7: 29; 1 Pet. 4:7.

3. Inai atikol ai Baibel stadi karaia dalana dekenai dahaka do ita herevalaia?

 ³ Taunimanima be hahediba taudia ai do ita halaoa gaukarana be mai anina bada dainai, Hakaua Oreana ese brens ofesi ta ta ai tahua gaukara idia karaia. Idia ura diba edena dala ai Baibel stiuden momo ita durua bapatiso idia abia totona. Inai atikol bona atikol 42 ai, tano idauidau amo hahediba gaukara idia manadalaia painia, misinari bona sekit naria taudia amo gau haida do ita dibaia. * (Aon. 11:14; 15:22) Idia ese Baibel stadi naria tauna bona ena stiuden ese idia karaia gaudia do idia herevalaia. Inai atikol ai, stiuden tauna do ia goada ia lao bona ia bapatiso totona do ia karaia gaudia faiv do ita herevalaia. Bema oi be stadi naria tauna, namona be ia oi durua unai ia karaia totona.

4. Geiti o iduara ai Baibel stadi karaia dalana dekenai dahaka ita dibaia?

⁴ Iseda tadikaka taihu momo be ruma tauna ena geiti o iduara ai Baibel stadi idia karaia. Ena be nega ginigunana ai unai be dala namona ruma tauna ida Baibel ita herevalaia, to reana unai be nega kwadogina sibona ita herevahereva bona wiki ta ta ai do ita karaia lasi. Ruma tauna ena ura habadaia totona, haida be iena fon namba idia abia bona idia vadivadi henia lasi neganai, idia rini henia eiava teks meseij amo Baibel siri ta idia siaia. Hua haida lalonai unai dala amo idia haroro henia, to stadi korikorina idia hamatamaia lasi. Bema unai dala sibona amo stiuden tauna * ese Baibel ia stadilaia, oi laloa do ia goada, gwauhamata ia karaia bona ia bapatiso, a? Reana lasi.

5. (a) Luka 14:27-33 ai, Iesu be dahaka ia hereva? (a) Edena dala unai ai ita gaukaralaia diba iseda Baibel stiuden ita durua totona?

⁵ Nega ta, Iesu ese ta be ena hahediba tauna ai ia lao totona do ia karaia gauna be haheitalai ta amo ia gwauraia. Iesu be kohoro ia ura haginia tauna bona ia ura tuari do ia lao king ta ia herevalaia. Iesu ia gwau kohoro ia ura haginia tauna be do ia “helai guna bona ena davana do ia laloa,” bema ia be hegeregere kohoro ia haorea diba eiava lasi. Bona king ta be tuari ia do lao lasi neganai “do ia helai, bona haida edia lalohadai do ia tahua guna,” bema ia be hegeregere ia kwalimu totona. (Luka 14:27-33 duahia.) Unai hegeregerena, Iesu ia diba ena hahediba taudia ai idia ura lao taudia be ia murinai do idia raka ena anina do  idia tahua namonamo guna be namo. Unai dainai, namona be iseda Baibel stiuden ita hagoadaia wiki ta ta ai edia stadi do ita karaia. Edena dala ai unai ita karaia diba?

6. Stiuden ia goada ia lao totona dahaka ita karaia diba?

⁶ Namona be geiti o iduara dekenai ita karaia stadi ita halataia. Reana wiki ta ta ia oi vadivadi neganai, Baibel siri rua oi herevalaia be namo, to tamona lasi. Ruma tauna be nega daudau lalonai umui herevahereva karana ia manadalaia neganai, oi noia diba gabu ta dekenai do umui helai, umui herevahereva totona. Ruma tauna ena haere amo do oi diba ia ura momokani do ia stadi eiava lasi. Ia goada ia lao haraga totona, oi nanadaia bema ia ura wiki tamona lalonai nega rua do ia stadi. To unai sibona be hegeregere lasi, gau ma haida ia karaia danu be namo.

7. Stadi naria tauna be edena dala ai stadi ta ta totona ia hegaegae diba?

⁷ Oi be stadi naria tauna dainai, stadi negadia ta ta totona oi hegaegae guna be namo. Umui stadilaia kahana bona siri oi duahia. Bona point badadia oi lalopararalaia. Stadi ena sinado, hereva kwarana maragidia, ena henanadai, duahia siri, laulau, bona unai stadi idia durua vidio haida oi laloa. Bena oi laloa, edena dala ai stadi gaudia edia anina be auka lasi dalanai emu stiuden dekenai do oi gwauraia, unai amo ia laloparara bona ia badinaia totona.​—Neh. 8:8; Aon. 15:28a.

8. Eda stiuden totona ita guriguri karana dekenai Kolose 1:9, 10 ese dahaka ia hadibaia?

⁸ Oi hegaegae neganai, Iehova dekenai emu stiuden bona ia durua gaudia totona oi guriguri. Iehova oi noia oi do ia durua unai amo Baibel amo emu stiuden oi hadibaia totona, mai lalona ibounai ida ia dibaia gaudia do ia abia dae. (Kolose 1:9, 10 duahia.) Emu stiuden ese do ia daradaralaia eiava abia dae lasi gaudia oi laloa guna be namo. Laloatao, emu tahua gauna be stiuden do oi durua ia goada bona ia bapatiso totona.

9. Stadi naria tauna ese edena dala ai stiuden ia durua ena stadi ia hegaegaelaia totona?

⁹ Iseda ura be hanaihanai stadi ita karaia neganai, stiuden be Iehova bona Iesu ese idia karaia gaudia do ia lalopararalaia, bona do ia ura diba ma haida ia abia. (Mat. 5:3, 6) Stiuden  ese ena stadi amo namo ia davaria totona, namona be ena stadi karana ia goadalaia. Unai ia karaia totona, namona be oi hadibaia ena stadi totona do ia hegaegae, bona stadi ese do ia durua dalana do ia laloa. Stadi naria tauna ese edena dala ai ia durua diba? Stiuden ida stadi do ia hegaegaelaia dalana oi hadibaia. * Oi hadibaia edena dala ai henanadai edia haere do ia davaria, bona oi hamaoroa stadi ena point badana ia hahedinaraia hereva tamona eiava haida do ia makaia, unai amo ena haere ia laloatao diba. Bona oi noia sibona ena hereva amo do ia haere. Unai bamona ia karaia neganai, do oi diba umui stadilaia gauna ia lalopararalaia eiava lasi. To, emu stiuden oi hagoadaia diba gau ma ta ia karaia totona.

10. (a) Dahaka dainai stiuden ese dina ta ta ai Baibel ia duahia be mai anina bada? (b) Dahaka ia karaia diba ena Baibel duahia karana ia moalelaia totona?

¹⁰ Stiuden be wiki ta ta ai ena stadi naria tauna ida ia stadi, to ia goada ia lao totona, namona be dina ta ta ai ia sibona ese gau haida do ia karaia. Namona be Iehova ida ia herevahereva. Edena dala ai? Iehova do ia kamonai henia bona ia hereva henia. Dirava ia kamonai henia diba bema dina ta ta ai Baibel ia duahia. (Ios. 1:8; Sal. 1:1-3) Ia dekenai jw.org * ai ia noho “Baibel Duahiduahi Program” gaukaralaia dalana oi hadibaia. To, iena Baibel duahia karana ia moalelaia totona, namona be oi durua ia duahia sirina amo Iehova dekenai ia dibaia gauna, bona ena mauri lalonai do ia badinaia dalana do ia laloa dobu.​—Kara 17:11; Iam. 1:25.

11. (a) Edena dala ai emu stiuden dekenai guriguri dalana oi hadibaia diba? (b) Dahaka dainai Iehova ia guriguri henia hanaihanai be mai anina bada?

¹¹ Oiemu stiuden oi hagoadaia dina ta ta ai guriguri amo Iehova do ia hereva henia. Stadi ena matamana bona dokona ai, mai emu lalona ibounai ida oi guriguri, bona guriguri lalonai emu stiuden ena ladana oi gwauraia danu. Emu guriguri ia kamonai neganai, ena lalona ibounai ida guriguri do ia gwauraia dalana do ia dibaia, bona mai momokani ida Iesu Keriso ena ladana amo Iehova Dirava dekenai do ia guriguri. (Mat. 6:9; Ioa. 15:16) Dina ta ta ai Baibel ia duahia (unai be Iehova ia kamonai henia) bona Iehova ia guriguri henia (unai be Iehova ia hereva henia) karana ese emu stiuden do ia durua Dirava kahirakahira ia lao totona! (Iam. 4:8) Bema dina ta ta ai unai bamona ia karaia, unai ese do ia durua  gwauhamata ia karaia bona bapatiso ia abia totona. Dahaka gau ma ta ese do ia durua diba?

12. Stadi naria tauna ese edena dala ai ena stiuden ia durua diba Iehova ia tura henia totona?

¹² Namona be stiuden ese Baibel stadi amo diba ia abia sibona lasi, to ena kudouna ai ia atoa danu. Dahaka dainai? Ita ura iseda stiuden ese Iehova do ia dibaia. To namona be ia dibaia gaudia ese ena kudouna do ia hamarerea, unai amo ena mauri lalonai do ia badinaia. Iesu ese hereva maorodia ia gaukaralaia dainai taunimanima idia ura kamonai henia. To, taunimanima be iena murinai idia raka, badina edia kudouna ia hamarerea. (Luka 24:15, 27, 32) Namona be emu stiuden ia abia dae Iehova be ia noho momokani, bona ia tura henia diba. Oibe, Iehova be iena Tamana, iena Dirava bona iena Turana ai ia lao diba. (Sal. 25:4, 5) Baibel stadi lalonai, iseda Dirava ena kara namodia do oi gwauraia hedinarai. (Eso. 34:5, 6; 1 Pet. 5:6, 7) Herevana dahaka topik umui stadilaia, to namona be Iehova be edena bamona Dirava oi gwauraia hedinarai. Stiuden oi durua Iehova ena kara namodia, hegeregere lalokau, hariharibada bona hebogahisi ia laloa bada totona. Iesu ia gwau “Iehova emu Dirava oi lalokau henia,” “unai taravatu be hereadae bona ia be ginigunana.” (Mat. 22:37, 38) Emu stiuden oi durua ena kudouna ai Iehova ia lalokau henia totona.

13. Edena dala ai stiuden oi durua Iehova ena kara namodia ia dibaia totona? Haheitalai gwauraia.

¹³ Emu stiuden ida oi herevahereva neganai, emu lalokau Iehova totona oi hahedinaraia. Unai amo emu stiuden do ia laloparara ia ese Iehova ia lalokau bona tura henia diba. (Sal. 73:28) Hegeregere, umui stadilaia bukana lalonai hereva o siri ta ese Iehova ena lalokau, aonega, kara maoromaoro eiava siahu ia hahedinaraia, bona unai ese emu kudouna ia hamarerea, a? Emu stiuden dekenai unai oi herevalaia, bona oi hahedinaraia iseda guba Tamana oi lalokau henia ena badina ta be unai. Baibel stiuden ta ta be idia goada idia lao bona idia bapatiso totona, gau ma ta idia karaia be namo.

14. Heberu 10:24, 25 ese kongrigeisen heboudia be edena bamona ia gwauraia, bona edena dala ai unai ese stiuden ia durua diba?

¹⁴ Ita ibounai ita ura iseda stiuden idia goada idia lao bona idia bapatiso. Idia ita durua diba dalana ta be idia do ita hagoadaia kongrigeisen hebou idia do mai. Stadi naria gaukarana  idia manadalaia taudia idia gwau, hebou idia mai stiuden be idia goada haraga. (Sal. 111:1) Stadi naria taudia haida ese edia stiuden idia hamaoroa edia Baibel stadi karana amo gau ibounai do idia dibaia lasi, to Baibel idia dibaia namonamo totona hebou dekenai do idia mai be namo. Emu stiuden ida Heberu 10:24, 25 oi duahia, bona hebou dekenai ia mai ena namo oi gwauraia hedinarai. Ia dekenai Kingdom Hall ai Dahaka Idia Karaia? * ena vidio oi hahedinaraia. Emu stiuden oi hagoadaia namona be wiki ta ta ena hebou do ia reaia lasi.

15. Dahaka ita karaia diba stiuden ita hagoadaia hebou ia lao hanaihanai totona?

¹⁵ Dahaka do oi karaia bema emu stiuden be hebou ta dekenai ia do mai lasi eiava ia mai hanaihanai lasi? Mai moale ida ia dekenai vanegai ena hebou ta amo oi dibaia gauna ta oi herevalaia. Ia itaia oi be hebou lao henia karana oi moalelaia neganai, do ia ura hebou ia lao. Ia dekenai wiki lalonai hebou ai ita stadilaia Gima Kohorona eiava Haroro bona Mauri Dalana Hebou Pepana oi henia. Wiki vaira ai do ita stadilaia gauna oi hahedinaraia, bona oi nanadaia edena kahana ia ura henia. Emu stiuden ese ena hebou ginigunana ai ia itaia bona kamonai gaudia ese tomadiho ma ta ena hebou ai ia itaia bona kamonai gaudia do idia hereaia. (1 Kor. 14:24, 25) Haheitalai namona idia hahedinaraia tadikaka taihu do ia hedavari henia, bona idia ese ia do idia durua ia goada ia lao bona ia bapatiso totona.

16. (a) Baibel stiuden ita durua ela bona ia bapatiso totona dahaka ita karaia be namo? (b) Vaira wiki ena stadi ai dahaka do ita stadilaia?

¹⁶ Edena dala ai stiuden ita stadi henia ela bona bapatiso ia abia diba? Stiuden ta ta ita hagoadaia edia stadi idia laloa bada bonawiki ta ta ena stadi do idia hegaegaelaia. Danu do ita hagoadaia dina ta ta ai Iehova ida do idia herevahereva bona Iena turana ai do idia lao. Bona iseda stiuden ita hagoadaia kongrigeisen heboudia idia lao totona. (Ena maua itaia, “ Stiuden ese Bapatiso Totona Do Ia Karaia Gaudia.”) To, vaira wiki ena stadi ai, Baibel stadi naria taudia ese edia stiuden do idia durua ela bona bapatiso idia abia daladia faiv do ita stadilaia.