1. Edena bamona ita diba taunimanima be hahediba taudia ai ita halaoa gaukarana be hahemauri gaukarana?

TAUNIMANIMA be hahediba taudia ai ita halaoa gaukarana be hahemauri gaukarana! Edena bamona unai ita diba? Iesu ese Mataio 28:​19, 20 ai hahegani ta ia henia, ia gwau: “Umui lao . . . bese ibounai taudia be hahediba taudia ai umui halaoa, bona . . . idia do umui bapatisoa.” Dahaka dainai ita bapatiso be mai anina bada? Bema ta ia ura mauri hanaihanai ia abia, ia bapatiso be gau badana. Ia ura bapatiso ia abia tauna be do ia abia dae momokani mauri hanaihanai do ia abia, badina Iesu be ita totona ia mase bona ia toreisi lou. Unai dainai aposetolo Petero be Keristani tadikaka ia hamaorodia: “Umui ia hamauria noho gauna . . . be umui abia bapatisona, badina umui ese Iesu Keriso, ia toreisi lou vadaeni tauna, umui abidadama henia.” (1 Pet. 3:21) Unai dainai hahediba tauna matamatana ia bapatiso neganai, mauri hanaihanai ia abia diba.

2. Hadibaia gaukara totona 2 Timoteo 4:​1, 2 be ita dekenai dahaka ia hahedinaraia?

² Taunimanima be hahediba taudia ai ita halaoa totona, iseda hadibaia dalana ita hanamoa be namo. (2 Timoteo 4:​1, 2 duahia.) Dahaka dainai? Badina Iesu ese ita ia hagania: “Umui lao . . . bese ibounai taudia be hahediba taudia ai umui halaoa, bona idia umui hadibaia.” Aposetolo Paulo ia gwau unai gaukara ita “badinaia noho” be namo “badina unai bamona oi karaia neganai, oi sibona bona oi dekenai idia kamonai taudia do oi hamauria.” Badina namona dainai Paulo ia gwau: “Emu hadibaia hereva [eiava dalana] dekenai oi naria namonamo.” (1 Tim. 4:16) Ita ura taunimanima be hahediba taudia ai ita halaoa dainai, ita hadibadia be namo, bona ita ura iseda hadibaia dalana do ita hanamoa.

3. Inai atikol ai, dahaka do ita herevalaia?

³ Tanobada hegegemadai Baibel stadi milioni momo ita karaia noho. To atikol 41 ai ita herevalaia bamona, ita ura diba edena dala ai idia momo do ita durua, bapatiso idia abia bona Iesu Keriso ena hahediba taudia ai do idia lao. Inai  atikol ai, stadi naria taudia ese edia stiuden do idia durua ela bona bapatiso idia abia totona do idia karaia gaudia faiv do ita herevalaia.

4. Dahaka dainai stadi naria tauna be stadi ia karaia neganai sibona ia biagua be namo? (Futnout itaia.)

⁴ Dirava ena Hereva amo ita hadibaia herevadia ita ura henia. Unai dainai, reana ita ura henia herevadia be nega daudau lalonai ita kikilaia. To, herevana Gima Kohorona Stadi, Kongrigeisen Baibel Stadi, eiava stiuden ena stadi ita karaia, namona be stadi naria tauna do ia hereva momo lasi. Ita ura Baibel ita gaukaralaia stiuden ita hadibaia totona. Unai dainai namona be stadi naria tauna be sibona ia biagua, bona namo lasi Baibel siri eiava hereva edia anina ibounai be nega tamona do ia gwauraia. * (Ioa. 16:12) Mani oi laloa, emu bapatiso negana ai Baibel ena hahediba herevadia haida sibona oi diba, to hari oi be gau momo oi diba. Unai nega ai oi be Baibel ena hahediba hereva badadia sibona oi laloparara. (Heb. 6:1) Hari oi diba gaudia be lagani momo lalonai oi dibaia, unai dainai namo lasi nega tamona lalonai emu Baibel stiuden dekenai gau ibounai oi hadibaia.

5. (a)1 Tesalonika Ginigunana 2:13 ena hereva bamona, ita ura stiuden be ena stadi amo dahaka do ia lalopararalaia? (b) Edena dala ai stiuden ita durua ia dibaia gaudia ia herevalaia totona?

⁵ Ita ura stiuden do ia laloparara ia dibaia noho gaudia be Dirava ena Hereva amo idia mai. (1 Tesalonika 2:13 duahia.) Edena dala ai unai ita karaia diba? Stiuden ita hagoadaia ia dibaia noho gaudia be ma haida dekenai do ia herevalaia. Namo lasi nega ibounai Baibel siri edia anina be oi sibona ese oi gwauraia hedinarai, to oi noia ia ese haida do ia gwauraia. Unai amo oi durua ia sibona ese unai siri ia badinaia dalana ia lalopararalaia totona. Oi noia siri ia duahia neganai, dahaka ia laloa bona mamia do ia gwauraia. (Luka 10:​25-28) Hegeregere, oi nanadaia: “Edena dala ai inai siri ese oi ia durua Iehova ena kara namona ta oi diba totona?” “Edena dala ai inai Baibel ena hereva momokani ese oi ia durua diba?” “Hari oi dibaia gauna dekenai dahaka oi laloa?” (Aon. 20:5) Stiuden ese ena diba ia ­habadaia be namo, to gau badana be ia dibaia gaudia ia ura henia bona ena mauri lalonai ia badinaia.

6. Dahaka dainai ekspiriens pablisa ese iseda stadi dekenai ita idia bamoa be namo?

⁶ Stadi ta oi karaia neganai, ekspiriens pablisa ese oi idia bamoa, a? Bema oi idia bamoa, oi noidia oiemu stadi karaia dalana  bona Baibel gaukaralaia dalana do idia itaia bona oi idia durua. Bema oi ura emu hadibaia dalana oi hanamoa, oi manau be namo. (Kara 18:​24-26 hahegeregerea.) Gabeai, ekspiriens pablisa oi nanadaia bema ia itaia stiuden ese ia dibaia gaudia ia laloparara? Danu, bema oi be pura tamona o rua do oi noho lasi, unai ekspiriens pablisa oi noia diba unai stadi do ia naria. Unai amo stiuden be ena stadi ta do ia reaia lasi, bona do ia laloparara iena stadi be mai anina bada. Namo lasi oi laloa ia be “oiemu” stadi dainai ma ta ese do ia naria lasi. Oi be stiuden ena namo oi laloa, oi ura pura ta ta ai hereva momokani do ia dibaia noho.

7. Dahaka ese stiuden ia durua do ia dibaia gaudia ia moalelaia totona?

⁷ Namona be stiuden do ia itaia oi be Baibel amo oi hadibaia hereva momokani oi ura henidia bona oi abia dae momokani. (1 Tes. 1:5) Bena ia danu be ia dibaia gaudia do ia ­moalelaia. Reana Baibel ena hakaua herevadia ese oi idia durua dalana ena sivarai be ia dekenai oi gwauraia. Unai amo do ia laloparara ­Baibel ena sisiba herevadia ese ia idia durua diba.

8. Stadi negana ai dahaka gaudia ma haida oi karaia diba? Bona dahaka dainai?

⁸ Bema stiuden be hekwakwanai ta ia davaria, emui stadi lalonai tadikaka taihu ese idia davaria hekwakwanai bona unai idia hanaia daladia be ia dekenai oi gwauraia. Kongrigeisen amo tadikaka o taihu ta oi abia lao diba, reana iena haheitalai ese stiuden do ia hagoadaia. Eiava jw.org ai, “Hereva Momokani ese Mauri Ia Haidaua” * ena kahanai ekspiriens haida oi davaria diba. Unai bamona atikol eiava vidio ese emu stiuden do ia durua bona ena mauri lalonai Baibel ena hakaua herevadia ia badinaia be aonega karana.

9. Edena dala ai stiuden oi hagoadaia ia dibaia gaudia be ena ruma bese bona turadia dekenai ia harorolaia totona?

⁹ Bema emu stiuden ia headava, ena adavana be Baibel ia stadilaia danu, a? Bema lasi, ena adavana oi noia stadi lalonai ia helai totona. Emu stiuden oi hagoadaia, ia diba gaudia be iena ruma bese bona turadia dekenai do ia harorolaia. (Ioa. 1:​40-45) Edena dala ai? Reana oi nanadaia: “Edena dala ai inai hereva momokani be emu ruma bese taudia dekenai oi  harorolaia diba?” Eiava “Edena siri do oi gaukaralaia emu turana dekenai inai hereva oi hamomokania totona?” Unai dala ai, stiuden tauna oi treinia hadibaia tauna ai ia lao totona. Bena ia hegeregere neganai, bapatiso lasi pablisa bamona ia haroro matamaia diba. Stiuden oi nanadaia bema ia be Baibel idia ura stadilaia taudia ma haida ia diba. Bema ta ia diba, dala ia karaia diba oi ese unai tauna dekenai inai vidio Baibel Stadi ai Dahaka Ia Vara? * oi hahedinaraia totona.

10. 1 Tesalonika Ginigunana 2:​7, 8 ena hereva bamona, edena dala ai stadi naria tauna be Paulo ena haheitalai ia tohotohoa diba?

¹⁰ Stadi naria taudia ese edia stiuden idia laloa bada be namo. Namona be oi laloa, gabeai idia be emu tadikaka eiava taihu ai do idia lao. (1 Tesalonika 2:​7, 8 duahia.) Edia tanobada turadia do idia rakatania bona Iehova hesiai henia totona senisi haida idia karaia be mai ena hekwarahi. Namona be ita durua kongrigeisen lalonai tura namodia idia davaria totona. Baibel stadi negadia sibona lasi, to nega ma haida ai emu stiuden oi bamoa danu, unai amo iena turana ai oi lao. Namona be oi rini henia, teks mesiji oi siaia, o umui stadi lasi negadia ai oi vadivadi henia, unai amo oi hahedinaraia ia oi laloa bada.

11. Ita ura iseda stiuden ese kongrigeisen lalonai dahaka do idia davaria, bona dahaka dainai?

¹¹ Africa taudia edia aonega herevana ta ia gwau: “Hanua taudia ibounai ese natuna ta ena tubu dalana idia durua.” Unai hegeregerena, ita gwau diba: “Kongrigeisen taudia ibounai ese stadi tauna idia durua hahediba tauna ai ia lao totona.” Unai dainai, stadi naria taudia namodia ese edia stiuden idia hagoadaia kongrigeisen lalonai ma haida idia tura henia totona, bena unai turadia ese idia durua danu Dirava ena turana ai do idia lao. Danu stiuden be Dirava ena taunimanima edia hebamo do ia moalelaia, bona hekwakwanai negadia ai idia hagoadaia bona idia durua. Ita ura stiuden ta ta do idia mamia idia be iseda Keristani famili bona kongrigeisen taudia. Ita ura idia be iseda Keristani tadikaka taihu bamoa karana do idia moalelaia. Unai amo, Iehova ia dibaia karana idia koua taudia edia hebamo ia dadaraia diba. (Aon. 13:20) Bema iena tura gunadia ese idia dadaraia, ia diba Iehova ena orea lalonai tura korikoridia idia noho.​—Mar. 10:​29, 30; 1 Pet. 4:4.

12. Dahaka dainai iseda Baibel stiuden dekenai gwauhamata bona bapatiso ita herevalaia be namo?

¹² Baibel stiuden oi hadibaia ta be Iehova dekenai iena mauri do ia gwauhamatalaia bona ia bapatiso be mai anina bada. Oibe, ta ida ita stadi  ena badina be ita ura ia ita durua Iehova ia hesiai henia bona bapatiso ia abia. Bema hua haida lalonai ena stadi umui karaia hanaihanai bona hebou ia mai noho, namona be stiuden tauna ia laloparara ia ida Baibel oi stadilaia ena badina be oi ura ia oi durua Iehova ena Witnes ta ai ia lao totona.

13. Baibel stiuden ia ura bapatiso ia abia totona, dahaka gaudia ia karaia diba?

¹³ Bapatiso ia ura abia Baibel stiuden be gau haida ia karaia diba. Gau ginigunana be, stiuden ese Iehova ia dibaia bona ia abidadama henia. (Ioa 3:16; 17:3) Bena stiuden be Iehova bona kongrigeisen taudia edia turana ai ia lao diba. (Heb. 10:​24, 25; Iam. 4:8) Metairametaira, stiuden be kara dikadia ia rakatania bona ia helalo-kerehai. (Kara 3:19) Danu, ia abia dae hereva momokanidia be ma haida dekenai ia harorolaia. (2 Kor. 4:13) Bena Iehova dekenai ena mauri ia gwauhamatalaia bona bapatiso amo unai ia hamomokania. (1 Pet. 3:21; 4:2) Bona ibounai ese unai dina do idia moalelaia! Bapatiso ia abia totona stiuden be gau haida ia karaia neganai, namona be ita hagoadaia bona durua ena tahua gauna ia hagugurua totona.

14. Stadi naria tauna be edena dala ai stiuden ena tubu dalana ia sekea diba?

¹⁴ Namona be mai haheauka ida stiuden ita durua ena mauri ia gwauhamatalaia bona bapatiso ia abia totona. To namona be ita tahua bema ia ura momokani Iehova Dirava do ia hesiai henia. Stiuden ena kara amo oi itaia ia ura Iesu ena oda herevadia ia badinaia, a? Eiava ia ura Baibel amo diba sibona ia abia, a?

15. Dahaka gaudia ese do idia hamomokania stiuden be ia hegeregere bapatiso ia abia totona?

¹⁵ Nega ta ta stiuden ena tubu dalana oi sekea. Hegeregere, ena lalokau Iehova totona ia gwauraia hedinarai, a? Iehova ia guriguri henia, a? (Sal. 116:​1, 2) Baibel duahia karana ia moalelaia, a? Hebou dekenai ia mai hanaihanai, a? (Sal. 22:22) Ena stadi amo ia dibaia gaudia be ena mauri lalonai ia badinaia, a? (Sal. 119:112) Ena famili bona turadia dekenai ia dibaia gaudia ia herevalaia, a? (Sal. 9:1) Bona mai anina bada gauna be, ia  ura Iehova ena Witnes tauna ai ia lao, a? (Sal. 40:8) Bema stiuden be unai gaudia idauidau ia badinaia lasi, ena badina oi tahua, bena mai hemataurai bona momokani ida oi hereva henia. *

16. Dahaka gaudia ese idia hahedinaraia ta ena Baibel stadi ita hadokoa be namo?

¹⁶ Nega ta ta ai, sibona oi nanadaia bema stiuden do oi stadi henia noho eiava lasi. Sibona oi nanadaia: ‘Stiuden be ena stadi totona ia hegaegae, a? Ia ura lasi hebou ia lao, a? Kara dika ia do karaia noho, a? Tomadiho koikoi ena dubu ta dekenai ia do lao noho, a?’ Bema emu haere be oibe, bona ena stadi oi karaia noho, unai be hegeregere tau ta dekenai nahu dalana oi hadibaia to ia ura lasi ia paripari! Bema stiuden ia hahedinaraia ia dibaia gaudia ia laloa bada lasi bona ena mauri ia haidaua lasi, ia ita stadi henia noho be namo, a?

17. 1 Timoteo Ginigunana 4:16 ia hereva bamona, Baibel stadi naria taudia ibounai ese dahaka idia karaia be namo?

¹⁷ Ita dekenai taunimanima be hahediba taudia ai do ita halaoa gaukarana be mai anina bada, bona ita ura iseda stiuden ita durua ela bona ia bapatiso. Unai dainai, stadi ita karaia neganai Baibel ita gaukaralaia momo bona mai ura bada ida stiuden do ita hadibaia. Ita ese stiuden tauna do ita hagoadaia kongrigeisen lalonai ma haida ia tura henia totona. Bena nega ta ta stiuden ena tubu dalana oi sekea. (Rau 13 ai ia noho maua itaia, “ Stiuden Ia Bapatiso Totona Stadi Naria Tauna ese Ia Karaia Gaudia.”) Ita moale badina inai hahemauri gaukarana ita durua! Ita ura gau ibounai ita karaia unai amo iseda stiuden taudia ita durua bapatiso idia abia totona.