Iehova ese mai lalona ibounai ida idia haroro taudia ia hagoadaia. Unai lagani ai, kolpota eiava painia taudia edia namba be 225 amo ia daekau 350. Bona nega ginigunana, pablisa taudia 8,000 ia hanaia be hedikwota dekenai edia haroro ripoti idia siaia. Iehova ese idia edia gaukara ia hanamoa bada.

Unai nega ai Joseph F. Rutherford be Bible Student taudia edia gaukara ia naria tauna, bona March 21, 1920 ai ia ese tok ladana, “Millions Now Living Will Never Die” ia henia. Bible Student taudia be idia gaukara goada kamonai taudia idia boiria unai tok idia kamonai totona. New York City ena hall badana ta idia rentaia bona boiboi pepadia 320,000 idia hariharilaia.

Taunimanima momo idia mai. Taunimanima 5,000 ese unai ruma idia hahonua momokani, bona 7,000 be idia vareai diba lasi. The Watch Tower ia gwau, unai hebou be International Bible Student taudia ese idia karaia hebou badana bona taunimanima ia durua momokani.”

Taunimanima momo idia diba Bible Student taudia ese “hari idia noho taudia milioni momo be do idia mase lasi” herevana idia harorolaia. Unai nega ai, idia laloparara lasi Basileia ena sivarai be gabu momo ai do idia harorolaia. To, idia gaukara goadagoada. Taihu ta ladana, Ida Olmstead be lagani 1902 ai hebou ia lao matamaia, ia gwau: “Ai diba taunimanima ibounai totona hahenamo momo do idia vara bona haroro gaukara ai unai sivarai namona ai gwauraia.”

Dirava ena hereva idia halasia buka bona magasin idia ore lasi totona, Betele ai tadikaka sibodia ese printaia gaukara idia hamatamaia. Idia ese masini idia hoia bona idia rentaia rumana, 35 Myrtle Avenue, Brooklyn, New York dekenai idia atoa. Unai be Betele kahirakahira ia noho.

Leo Pelle bona Walter Kessler be January 1920 ai, Betele gaukara totona idia ginidae. Walter ia gwau: “Ai ginidae neganai, printaia dipatmen ena ovasia be ai ia itaia bona ia gwau, ‘Hari be hora tamona mai kahana ia do noho bena dina tubua. Gaukara haida do umui karaia.’ Ai ia hamaoroa henuna daiutu amo boksi haida mai edia buka do ai abia daekau.”

Leo be unai dina murinai idia karaia gaukara ia laloa giroa. Ia gwau: “Aiemai gaukara bildin ena  first floor ena haba ai huria. Unai be egu nega ginigunana unai bamona miro bada gaukarana lau karaia. To unai be Lohiabada ena gaukara dainai, ai moalelaia bada.”

Pura haida murinai, mai edia lalona ibounai ida idia volantia tadikaka haida ese The Watch Tower idia printaia. February 1, 1920 ena The Watch Tower ibounai 60,000 be unai ruma ena foloa iharuana ai ia noho flatbed printa masini amo idia printaia. Unai ia vara noho lalonai, tadikaka ese unai ruma ena henunai kahana dekenai printa masini ta ladana Battleship idia atoa. Bena April 14, 1920 ai, The Golden Age idia halasia danu. Momokani, Iehova ese unai gaukara goadagoada taudia edia gaukara ia hanamoa.

Iehova ena abidadama taudia be gaukara dalana matamatana bona gaukara hebou karana idia moalelaia. To, lagani 1917 ia lao 1919 huanai hahetoho idia vara neganai, Bible Student taudia haida be orea idia rakatania. Idia durua totona orea be dahaka ia karaia?

The Watch Tower April 1, 1920 ese inai atikol, “Namona be Maino ai Ita Noho” ia halasia. Mai lalokau ida ia hamaorodia: “Ai diba . . . idia ura Lohiabada idia badinaia taudia ibounai be . . . guna idia karaia kerere do idia laloaboio, . . . bona Dirava ena taunimanima ida do idia hakapua bona mai lalotamona ida do idia gaukara.”

Momo be unai hebogahisi herevadia idia abia dae. Headava tau bona hahine idia gwau: “Ai diba idia hanaia lagani lalonai ai noho kava bona ma haida ese haroro gaukara idia karaia be kerere. . . . Ai ura lasi unai bamona do ai karaia lou.” Idia goada lou gaukara taudia totona gaukara momo idia noho.

June 21, 1920 ai, Bible Student taudia ese The Finished Mystery, the seventh volume of the Studies in the Scriptures, magasin bamona gauna idia hariharilaia goadagoada. Lagani 1918 ai unai buka idia taravatua dainai, momo idia do noho.

 Painia sibodia lasi to pablisa ibounai idia boiria unai buka idia hariharilaia totona. Kongrigeisen ibounai lalonai idia bapatiso taudia ta ta be mai edia ura ida idia karaia diba. Namona be inai hereva ita badinaia: ‘Kara tamona do lau karaia: FINISHED MYSTERY do lau hariharilaia.’ Edmund Hooper ia laloatao unai buka hariharilaia karana be nega ginigunana momo ese ruma-ta-ruma-ta gaukara idia karaia. Ma ia gwau: “Ai laloparara ai karaia gaukarana be do ia bada ia lao.”

Tanobada Tuarina Ginigunana ai, tano ma haida ai idia noho Bible Student taudia ida herevahereva dalana be ia auka dainai, Tadikaka Rutherford ia ura idia do ia hagoadaia bona haroro gaukara idia karaia dalana ia haidaua. Unai dainai August 12, 1920 ai, ia bona tadikaka foa be Britain, Continental Europe, bona Middle East dekenai idia lao.

Tadikaka Rutherford be Britain ia lao neganai, Bible Student taudia be hebouhebou toi bona hebou maragidia 12 idia karaia. Idia mai taudia ibounai be 50,000 bamona. The Watch Tower ese unai vadivadi be inai bamona ia herevalaia, ia gwau: “Tadikaka taihu be goada idia abia. Mai lalokau ida idia lalotamona bona idia gaukara hebou, bona idia lalomanoka taudia be idia moale lou.” Paris ai, Tadikaka Rutherford be inai tok ladana “Millions Now Living Will Never Die” ia henia. Ena tok ia hamatamaia neganai, ruma badana be ia honu momokani. Taunimanima 300 be hereva ma haida idia ura diba totona idia henanadai.

Gabeai, Athens, Cairo, bona Jerusalem dekenai idia lao. Unuseniai idia noho kamonai taudia idia durudia totona, Tadikaka Rutherford ese, Jerusalem kahirakahira ai ia noho taoni ladana Ramallah dekenai, buka bona magasin abia gabuna ta ia haginia. Bena Europe dekenai ia giroa lou bona Central European Ofesi ia haginia, bona dala ia karaia unuseniai buka bona magasin do idia printaia.

September 1920 ai, Bible Student taudia ese The Golden Age No. 27 idia halasia. Unai magasin be lagani 1918 ai, Bible Student taudia ese idia davaria dagedage karana ia gwauraia hedinarai. Guna ita herevalaia Battleship printa masini be hanuaboi ai bona dina ai ia gaukara unai magasin ibounai 4 milioni ia halasia totona.

Unai magasin idia abia taudia ese Emma Martin ena sivarai idia duahia. Taihu Martin be California,  U.S.A. ai painia gaukara ia karaia. March 17, 1918 ai, ia bona tadikaka toi, E. Hamm, E.J Sonnenburg, bona E. A. Stevens, be Bible Student taudia edia hebou maragina ta dekenai idia noho.

Unai hebou dekenai ia noho tauna ta be Baibel ena hereva dibaia totona ia lao lasi. Gabeai ia hereva hedinarai, ia gwau: “Lau be gavamani ena loea ena ofesi ese lau idia hamaoroa unai hebou dekenai do lau lao. Unuseniai lau lao edia kerere hamomokania gaudia lau tahua totona.” Ia davaria hamomokania gauna be The Finished Mystery bukana ta. Dina haida murinai, Taihu Martin bona tadikaka toi be pulisi ese idia abidia. Idia ese gavamani ia taravatua bukana idia hariharilaia dainai, pulisi idia gwau idia be gavamani idia spai taudia.

Kota ia gwau Emma bona ena turadia be idia kerere bona ia siaidia lagani toi dibura ruma ai do idia noho. Kota dekenai nega momo apil idia karaia, to kota ese ia abia dae lasi, bena May 17, 1920 ai dibura ruma dekenai idia atodia. To daudau lasi murinai, senisi namodia idia vara.

June 20, 1920 ai, Tadikaka Rutherford ese edia sivarai be San Francisco dekenai idia karaia hebouhebou ai ia gwauraia. Hebou idia lao taudia be unai tadikaka bona taihu idia kara dika henidia sivaraina idia kamonai neganai idia moale lasi, bona United States ena presiden dekenai telegram idia siaia. Idia gwau: “Ai ura hahedinaraia Emma . . . dekenai umui gwau ia be gavamani ia spai hahinena be maoro lasi. . . . Gavamani ena ofesi taudia ese edia siahu idia gaukaralaia . . . Emma idia koia . . . bona gabeai ia idia samania bona dibura ai idia atoa karana ai ura henia lasi bona ai gwau unai be kara dikana.”

Unai dina murinai, Presiden Woodrow Wilson be karaharaga oda ia karaia Taihu Martin, Tadikaka Hamm, Sonnenburg, bona Stevens be dibura ruma amo idia kokidia. Koikoi dalanai idia ura dibura ruma dekenai idia ura siaidia karana ia koua.

Lagani 1920 ena dokona ai, Bible Student taudia be unai lagani ai idia karaia gaudia dainai idia moale bada. Hedikwota ai gaukara ia bada ia lao, bona Keristani taudia momokanidia momo be Dirava ena Basileia idia harorolaia goadagoada, bona idia gwau ia be taunimanima edia hekwakwanai ia haorea dalana. (Mat. 24:14) Unai lagani murinai, lagani 1921 ai Basileia ena hereva momokani harorolaia gaukarana idia habadaia.