1. Ita ibounai ese ita karaia diba abia hidi namona be dahaka?

NEGA momo, tama sina ese idia karaia abia hidi ese natudia dekenai namo eiava dika ia havaraia diba. Bema tama sina be abia hidi kereredia idia karaia, edia natudia ese hekwakwanai idia davaria diba. To abia hidi maorodia idia karaia neganai, edia natudia idia durua edia mauri idia moalelaia totona. Natudia danu ese abia hidi maorodia idia karaia be namo. To ita ibounai ese ita karaia abia hidi namona be iseda lalokau guba Tamana, Iehova ita hesiai henia.​—Sal. 73:28.

2. Iesu bona ena tama sina be dahaka abia hidi namodia idia karaia?

² Iosepa bona Maria idia ura edia natudia idia durua Iehova idia hesiai henia totona. Bona idia karaia abia hidi ese ia hamomokania edia mauri lalonai Iehova hesiai henia karana be mai anina bada. (Luka 2:40, 41, 52) Iesu danu be abia hidi namodia ia karaia, bona unai ese ia durua Iehova ena ura ia karaia totona. (Mat. 4:1-10) Iesu ia tubu daekau neganai, ia be hebogahisi, badinaia, bona gari lasi karana ia hahedinaraia. Iehova idia lalokau henia tama sina ibounai be do idia moale bema edia natudia danu be unai bamona kara idia hahedinaraia.

3. Inai stadi ai edena henanadai do ita haerelaia?

³ Inai stadi ai, henanadai haida do ita haerelaia: Iehova ese Iesu totona dahaka abia hidi haida ia karaia? Iosepa bona Maria ese idia karaia abia hidi amo Keristani tama sina be dahaka idia dibaia? Bona Iesu ese ia karaia abia hidi amo Keristani matamata taudia be dahaka idia dibaia?

4. Iehova ese Iesu totona dahaka mai anina bada abia hidi ia karaia?

⁴ Iehova ese Iesu totona tama sina namodia ia abia hidi.  (Mat. 1:18-23; Luka 1:26-38) Baibel lalonai Maria ia gwauraia herevadia ese ia hahedinaraia, Iehova ia lalokau henia bada bona iena Hereva ia ura henia. (Luka 1:46-55) Bona Iosepa ese Iehova ena hakaua herevadia ia badinaia karana ese ia hahedinaraia Dirava ia gari henia bona ia lalokau henia.​—Mat. 1:24.

5-6. Dahaka dainai Iehova ese ena Natuna dekenai idia vara hekwakwanai ibounai ia koua lasi?

⁵ Laloatao, Iehova ese Iesu totona ia abia hidi tama sina be taga taudia lasi. Iesu ia vara murinai, Iosepa bona Maria ese idia henia boubou gauna ese ia hahedinaraia idia be ogogami taudia. (Luka 2:24) Nasareta ai, reana Iosepa be ena ruma badinai workshop maragina ta ia noho, unuseniai kapenta gaukara ia karaia. Danu, edia moni bona kohu be bada lasi badina gabeai natudia seven ma idia havaraia.​—Mat. 13:55, 56.

⁶ Iehova ese nega haida Iesu be dika amo ia gimaia, to Iena Natuna dekenai idia vara hekwakwanai ibounai ia koua lasi. (Mat. 2:13-15) Hegeregere, Iesu ena varavara haida ese ia idia abia dae lasi. Reana ia lalohisihisi diba badina matamanai, ena famili taudia idia abia dae lasi ia be Mesia. (Mar. 3:21; Ioa. 7:5) Danu, Iesu be ena ubua tamana, Iosepa ia mase neganai, ia lalohisihisi bada. Reana Iesu be vara guna natuna dainai, Iosepa ia mase murinai, ena tamana ena gaukara ia karaia. (Mar. 6:3) Iesu ia tubu daekau neganai, iena famili do ia naria dalana ia dibaia. Bona ia gaukara goada tauanina dalanai idia ia durua totona. Unai dainai Iesu be hora momo oi gaukara murinai emu tauanina ia hesiku ena hemami ia diba.

7. (a) Edena henanadai ese headava tau bona hahine ia durua diba edia natudia idia naria totona? (b) Edena dala ai Aonega Herevadia 2:1-6 ese tama sina ia durua diba edia natudia idia hadibaia totona?

⁷ Bema oi be headava tau bona hahine bona umui ura natuna umui havaraia, sibona umui nanadaia: ‘Ita be mai manau ida Iehova ita lalokau henia bona ena Hereva ita ura henia, a? Iehova ese ita ia abia hidi diba beibi ta ita naria totona, a?’ (Sal. 127:3, 4) Bema oi be tama bona sina ta, sibona oi nanadaia: ‘Egu natuna dekenai gaukara goada karana ena namo lau hadibaia, a?’ (Had. 3:12, 13) ‘Lau gaukara goada egu natudia lau gimaia Satani ena tanobada ena kara dikadia idia dadaraia totona, a?’ (Aon. 22:3) Momokani, emu natudia be hekwakwanai ibounai amo oi gimaia diba lasi. To mai lalokau  ida idia oi durua diba mauri lalonai hekwakwanai idia davaria neganai, Dirava ena Hereva amo heduru idia tahua. (Aonega Herevadia 2:1-6 duahia.) Hegeregere, bema emu varavara ta be abia hidi ia karaia Iehova ia hesiai henia lasi totona, Baibel amo emu natuna dekenai oi hahedinaraia Iehova badinaia karana be mai anina bada. (Sal. 31:23) Eiava bema emui lalokau tauna ta ia mase, emu natuna dekenai Baibel siri haida oi hahedinaraia unai hisihisi ia haheaukalaia bona lalomaino ia abia totona.​—2 Kor. 1:3, 4; 2 Tim. 3:16.

8. Deuteronomi 6:6, 7 ena hereva bamona, Iosepa bona Maria be dahaka idia karaia?

⁸ Iesu be tanobada ai ia noho neganai, ena tama sina ese ia idia durua Dirava ena lalonamo ia abia totona; idia ese Iehova ena hakaua herevadia tama sina totona idia badinaia. (Deuteronomi 6:6, 7 duahia.) Iosepa bona Maria ese Iehova idia lalokau henia bada, bona edia tahua gauna badana be edia natudia idia hagoadaia idia danu ese Iehova idia lalokau henia totona.

9. Iosepa bona Maria be dahaka mai anina bada abia hidi idia karaia?

⁹ Iosepa bona Maria be nega ibounai edia natudia ida Iehova idia tomadiho henia hebou. Unai dainai, Nasareta ena sinagoga ai, wiki ta ta ena hebou ibounai, bona Ierusalema dekenai lagani ta ta ai idia karaia Pasova totona idia lao. (Luka 2:41; 4:16) Reana Ierusalema dekenai idia lao lalonai, unai nega idia gaukaralaia Iesu bona ena tadidia dekenai Iehova ena taunimanima edia sivarai idia hadibaia. Bona Buka helaga ese ia herevalaia gabudia idia vadivadi henia. Iosepa bona Maria ese natudia ma haida idia havaraia neganai, reana ia auka nega ibounai Iehova idia tomadiho henia totona. To idia haheauka dainai hahenamo momo idia moalelaia! Iehova tomadiho henia karana idia atoa guna dainai, edia famili ena hetura karana Iehova ida be ia goada.

10. Keristani tama sina be Iosepa bona Maria amo dahaka idia dibaia?

¹⁰ Dirava idia lalokau henia tama sina be Iosepa bona Maria amo dahaka idia dibaia? Mai anina bada gauna be inai, namona be emu hereva bona kara amo emu natudia dekenai oi  hahedinaraia Iehova oi lalokau henia. Idia dekenai oi henia diba harihari gauna namona be, idia oi durua Iehova idia lalokau henia totona. Danu, idia oi hadibaia hanaihanai Baibel idia stadilaia, idia guriguri, hebou dekenai idia lao, bona idia haroro. (1 Tim. 6:6) Bona tauanina dalana ai idia oi naria danu be namo. (1 Tim. 5:8) Laloatao, emu natudia be moni eiava kohu ese inai nega oromana ena dokona amo idia ia hamauria diba lasi. To edia hetura karana Iehova ida ese idia do ia durua Dirava ena tanobada matamatana lalonai idia vareai totona. *​—Ese. 7:19; 1 Tim. 4:8.

11. (a) Edena dala ai 1 Timoteo 6:17-19 ena sisiba ese tama sina ia durua edia natudia totona abia hidi namodia idia karaia? (b) Emu famili ida dahaka tahua gaudia umui atoa diba, bona ena namo be dahaka? (Maua itaia: “ Dahaka Tahua Gaudia Oi Hagugurua Diba?”)

¹¹ Ita moale badina hari Keristani tama sina momo ese abia hidi namodia idia karaia edia natudia idia durua Iehova kahirakahira idia noho totona! Nega ibounai Iehova idia hesiai henia hebou. Hebou badadia bona maragidia dekenai idia lao. Bona sivarai namona idia harorolaia. Famili haida be momo idia haroro lasi teritori dekenai idia haroro. Ma haida be Betele rumadia idia vadivadi eiava konstraksen gaukara idauidau idia durua. Ena be unai bamona famili momo be sibona edia moni bona kohu idia gaukaralaia tiokratik gaukara idauidau idia durua totona, bona nega haida hekwakwanai idia davaria, to Iehova ese edia hekwarahi ia hanamoa. (1 Timoteo 6:17-19 duahia.) Unai bamona famili lalonai idia tubu daekau natudia be edia tama sina ese idia hadibaia gaudia idia badinaia dainai, idia moale! *​—Aon. 10:22.

12. Iesu ia tubu daekau neganai, dahaka ia karaia be namo?

¹² Iesu be hanaihanai ena guba Tamana, bona tanobada ai ia idia naria tama sina ese ia totona abia hidi namodia idia karaia. To Iesu ia tubu daekau neganai, ia sibona be abia hidi ia karaia be namo. (Gal. 6:5) Ia danu be ita bamona, mai ena ura kwalimu. Sibona ena ura gaudia ia tahua diba. To, abia hidi ia karaia ena hetura karana Iehova ida ia gimaia totona. (Ioa. 8:29) Edena dala ai Iesu ena haheitalai ese hari inai negai matamata taudia ia durua diba?

13. Iesu be mero matamata neganai, dahaka abia hidi badadia ia karaia?

¹³ Iesu be mero maragi neganai, ena tama sina ia kamonai henidia. Ena tama sina edia sisiba ia dadaraia lasi, bona ia laloa lasi iena diba ese edia diba ia hanaia. To, “idia henunai ia noho.” (Luka 2:51) Iesu be vara guna natuna dainai, ia gaukara goada ena maduna idauidau  ia hagugurua totona. Iena ubua tamana, Iosepa, amo kapenta gaukara ia dibaia, unai amo tauanina dalanai ena famili ia naria diba.

14. Edena bamona ita diba Iesu be Dirava ena Hereva ia diba namonamo?

¹⁴ Iosepa bona Maria be hoa dalana ai Iesu ia vara ena sivarai bona Dirava ena aneru ese ia totona idia gwauraia herevana be Iesu dekenai idia gwauraia. (Luka 2:8-19, 25-38) To Iesu be ia dekenai idia hadibaia gaudia sibona ia laloa lasi, to Buka Helaga ia stadilaia danu. Edena bamona ita diba Iesu be Dirava ena Hereva ia diba namonamo? Badina Iesu ia do maragi neganai, Ierusalema ena hadibaia taudia be “iena laloparara karana bona haere dekenai idia hoa.” (Luka 2:46, 47) Bona ena mauri lagani be 12 neganai, Iesu be sibona dekenai ia hamomokania Iehova be iena Tamana.​—Luka 2:42, 43, 49.

15. Edena dala ai Iesu ia hahedinaraia ia ura Iehova ena ura ia karaia?

¹⁵ Iesu be Iehova ena ura ia lalopararalaia neganai, ena asainmen ia abia dae. (Ioa. 6:38) Iesu ia diba momo be ia do idia inai henia, reana unai dainai ia lalohekwarahi. To mai ura ida Iehova ia kamonai henia. Lagani 29 C.E. ai Iesu ia bapatiso neganai, ia ura ena mauri lalonai Iehova ena ura do ia karaia. (Heb. 10:5-7) Bona hisihisi auna dekenai idia kokoa neganai, Iesu be Tamana ena ura ia karaia ela bona ia mase.​—Ioa. 19:30.

16. Natudia ese Iesu amo idia dibaia gauna ta be dahaka?

¹⁶ Emu tama sina oi kamonai henia. Iosepa bona Maria bamona, emu tama sina danu be goevadae lasi. To, Iehova be emu tama sina dekenai maduna ia henia oi do idia naria bona hadibaia totona. Bema edia sisiba oi kamonai bona idia oi matauraia, ‘mauri namona do oi abia.’​—Efe. 6:1-4.

17. Iosua 24:15 ena hereva bamona, matamata taudia be dahaka abia hidi idia karaia be namo?

¹⁷ Abia hida oi karaia daika oi hesiai henia totona. Namona be oi sibona dekenai oi hamomokania Iehova be daika, iena ura be dahaka, bona ena ura do oi karaia dalana oi dibaia. (Roma 12:2) Unai amo abia hidi do oi karaia Iehova oi hesiai henia totona, unai be mai anina bada. (Iosua 24:15 duahia; Had. 12:1) Bema hanaihanai Baibel oi duahia bona sibona  emu stadi oi karaia, emu lalokau Iehova dekenai be do ia bada bona emu abidadama do ia goada.

18. Matamata taudia ese dahaka abia hidi do idia karaia, bona ena namo be dahaka?

¹⁸ Emu mauri lalonai Iehova ena ura oi atoa guna. Satani ena tanobada ena lalohadai be inai, bema sibona emu namo totona emu diba oi gaukaralaia, do oi moale. To unai be momokani lasi, badina kohu idia laloa bada taudia be “hisihisi momo amo idia sibodia idia gwadaia.” (1 Tim. 6:9, 10) Danu, bema Iehova oi kamonai henia bona emu mauri lalonai ena ura atoa guna, “do oi kwalimu bona mai aonega ida do oi kara.”​—Ios. 1:8, NWT.

19. Tama sina ese dahaka idia laloatao be namo?

¹⁹ Tama sina e, umui gaukara goada emui famili umui durua Iehova idia hesiai henia totona. Ia dekenai umui tabekau, bona ia ese umui do ia durua abia hidi maorodia umui karaia. (Aon. 3:5, 6) Laloatao, emu hereva bona kara ese emu natudia do ia durua. Unai dainai namona be oi karaia abia hidi ese emu natudia do ia durua, Iehova ena lalonamo idia abia totona.

20. Bema matamata taudia be Iehova idia hesiai henia dahaka hahenamo do idia moalelaia?

²⁰ Matamata taudia e, emui tama sina ese umui idia durua diba mauri lalonai abia hidi maorodia umui karaia totona. To Iehova ena lalonamo oi abia totona oi sibona ese abia hidi namona oi karaia be namo. Unai dainai Iesu oi tohotohoa bona abia hidi oi karaia emu lalokau guba Tamana oi hesiai henia totona. Bema unai oi karaia, hari inai negai emu mauri do oi moalelaia. (1 Tim. 4:16) Bona vaira negai, mauri namona do oi moalelaia ela bona hanaihanai!