1. Hebogahisi tauna ita laloa neganai, dahaka do ita laloa?

HEBOGAHISI tauna ita laloa neganai, reana lalokau bona hariharibada tauna ta do ita laloa. Bona reana Iesu ese ia gwauraia Samaria tauna ena sivarai do ita laloa danu. Ia be Iuda tauna dekenai “hebogahisi ia hahedinaraia,” badina henaohenao taudia ese idia dadabaia bona ena kohu idia henaoa. Bona Iuda tauna “ia hebogahisi henia” bona naria. (Luka 10:29-37) Unai haheitalai ese iseda Dirava ena kara namona ta ia hahedinaraia, unai be hebogahisi. Dirava be ita ia lalokau henia dainai, dina ta ta ai ita ia kara henia dalana amo hebogahisi ia hahedinaraia.

2. Edena dala ai ta ese hebogahisi ia hahedinaraia diba?

² Dala ma ta ai, ta ese hebogahisi karana ia hahedinaraia diba. Hebogahisi tauna ese kerere tauna ia panisia be maoro, to unai ia karaia lasi. Unai hegeregerena, Iehova be ita dekenai hebogahisi karana ia hahedinaraia. Salamo torea tauna ia gwau: “[Dirava] ese iseda kara dika hegeregerena ita ia kara henia lasi.” (Sal. 103:10) To, nega haida kara dika ia karaia tauna be Iehova ese ia matahakani henia.

3. Edena henanadai do ita haerelaia?

³ Inai atikol ai, inai henanadai toi do ita haerelaia: Dahaka dainai Iehova be hebogahisi ia hahedinaraia? Ta matahakani henia karana be hebogahisi karana, a? Bona dahaka ese ita ia durua hebogahisi karana ita hahedinaraia totona? Baibel ese unai henanadai ia haerelaia dalana mani ita itaia.

4. Dahaka dainai Iehova be hebogahisi ia hahedinaraia?

⁴ Iehova ia ura bada hebogahisi ia hahedinaraia. Aposetolo Paulo ia gwau Dirava ena “hebogahisi be bada herea.” Unai  siri ai, Paulo be Dirava ena hebogahisi karana ia herevalaia, badina ia ese horoa taudia dekenai guba helarona ia henia. (Efe. 2:4-7) To Iehova ese horoa taudia sibona dekenai hebogahisi karana ia hahedinaraia lasi. Salamo torea tauna Davida ia gwau: “Iehova be taunimanima ibounai dekenai kara namo ia hahedinaraia, bona iena hebogahisi be ia karaia gaudia ibounai dekenai ia hahedinaraia.” (Sal. 145:9) Iehova be taunimanima ia lalokau henia dainai, badina maorodia dekenai hebogahisi ia hahedinaraia.

5. Edena dala ai Iesu be Iehova ena hebogahisi karana ia dibaia?

⁵ Iesu ia diba Iehova be ia ura bada hebogahisi ia hahedinaraia. Ia be tanobada ai ia do mai lasi neganai, Iehova ida guba dekenai lagani tausen momo idia noho. (Aon. 8:30, 31) Iesu ia itaia, nega momo ena Tamana ese kara dika taudia dekenai hebogahisi ia hahedinaraia. (Sal. 78:37-42) Unai dainai, Iesu ena hadibaia karana lalonai, nega momo ena Tamana ena kara namona ia herevalaia.

6. Edena dala ai Iesu ese ita ia durua, ena Tamana ena hebogahisi karana ita lalopararalaia totona?

⁶ Atikol 40 ai ita herevalaia bamona, Iesu ese boio merona ena parabole ia gaukaralaia, unai amo ita laloparara Iehova ia ura bada hebogahisi karana ia hahedinaraia. Natuna mero be ruma ia rakatania bona “gwau-edeede mauri dekenai ena kohu ibounai ia haorea.” (Luka 15:13) Gabeai, matabodaga mauri dalana ia rakatania, sibona ia hamanaua, bona ia giroa lou. Ena tamana be dahaka ia karaia? Iesu ia gwau: “Daudau amo [natuna] ia mai noho lalonai, ena tamana ese ia itaia bona ia hebogahisi henia bena ia heau lao, ia rosia bona ia kisi henia.” Tamana ese ena natuna mero ia hahemaraia lasi. To, mai hebogahisi ida ena natuna mero ena dika ia gwauatao bona ruma bese lalonai ia abia dae lou. Natuna mero be kara dika badana ia karaia, to ia helalo-kerehai dainai ena tamana ese ena dika ia gwauatao. Parabole ai hebogahisi ia hahedinaraia tamana be Iehova ia laulaulaia. Unai sivarai amo Iesu ese ia hahedinaraia, Iehova ia ura idia helalo-kerehai momokani taudia edia dika ia gwauatao.​—Luka 15:17-24.

7. Edena dala ai Iehova ena hebogahisi karana ese ia hamomokania ena aonega be bada?

⁷ Iehova ena aonega be bada herea dainai hebogahisi ia hahedinaraia. Iehova ese ia karaia abia hidi ese hanaihanai ena taunimanima dekenai namo ia havaraia. Unai dainai,  Baibel ia gwau “ataiai amo ia mai aonegana” be ‘hebogahisi bada, bona kara namodia ia hahedinaraia.’ (Iam. 3:17) Tama lalokauna ta bamona, Iehova ia diba ena natudia dekenai ia hahedinaraia hebogahisi karana ese namo do ia havaraia. (Sal. 103:13; Isa. 49:15) Iehova be ena taunimanima ia hebogahisi henia dainai vaira nega ena helaro ia henia, ena be idia goevadae lasi. Bona ena aonega be bada herea dainai, nega ibounai badina maorodia dekenai hebogahisi karana ia hahedinaraia. To danu, ia diba edena nega ai hebogahisi karana do ia hahedinaraia lasi. Oibe, Dirava ena hebogahisi karana be mai ena hetoana.

8. Nega haida elda taudia be dahaka idia karaia, bona dahaka dainai?

⁸ Bema Dirava ena hesiai tauna ta be mai ura ida kara dika ia karaia, dahaka do ita karaia? Paulo ia gwau, ‘ia do ita bamoa lasi.’ (1 Kor. 5:11) Elda taudia ese helalo-kerehai lasi taudia be kongrigeisen amo idia atoa siri, unai amo iseda tadikaka taihu idia gimaia bona Iehova ena hakaua daladia idia badinaia. To, haida idia laloa atoa siri karana be Dirava ena hebogahisi karana lasi. Unai be momokani, a? Mani ita itaia.

9-10. Heberu 12:5, 6 hegeregerena, dahaka dainai ta atoa siri karana be hebogahisi karana? Haheitalai gwauraia.

⁹ Kongrigeisen ena hebou ai, hadibaia herevana ta dekenai ita kamonai iseda lalokau tauna ta be “Iehova ena Witnes ta lasi” neganai, ita lalohisihisi bada. Reana do ita laloa ita lalokau henia tauna idia atoa siri be maoro lasi. Ta atoa siri karana be hebogahisi karana, a? Oibe. To bema kerere tauna dekenai matahakani ita henia lasi, unai be aonega, hebogahisi, bona lalokau karana lasi. (Aon. 13:24) Atoa siri karana ese ta ia durua ena kara ia haidaua bona ia helalo-kerehai totona, a? Oibe. Kara dika idia karaia tadikaka bona taihu momo idia gwau, murimuri ai idia atoa karana ese idia ia durua, idia laloparara edia kara idia haidaua, bona Iehova dekenai idia giroa lou be namo.​—Heberu 12:5, 6 duahia.

¹⁰ Haheitalai ta ita laloa. Mamoe naria tauna ta be ia itaia ena mamoe ta ia gorere. Ia diba unai mamoe ia namo totona, mamoe ma haida amo ia hapararaia be namo. To, mamoe idia ura idia noho hebou, unai dainai ta ia kokia neganai do idia lalohisihisi. Mamoe naria tauna ese hebogahisi karana ia hahedinarai, a? Oibe. Ia diba bema gorere mamoe be mamoe oreana ida ia noho hebou, gorere ia hanaia diba. Mamoe naria tauna ese gorere mamoe ia atoa siri neganai, mamoe orea ia gimaia diba.​—Levitiko 13:3, 4 hahegeregerea.

11. (a) Edena dala ai idia atoa siri tauna be gorere mamoe bamona? (b) Idia atoa siri taudia be dahaka do idia karaia bona dahaka heduru idia abia diba?

¹¹ Idia atoa siri Keristani tauna be unai gorere mamoe bamona. Iehova ida ena hetura karana ia dika dainai, ia be gorere tauna bamona. (Iam. 5:14) Ta ena gorere be ma ta dekenai ia hanaia hegeregerena, Iehova ida ena hetura karana ia dika tauna be ma ta ia hakaua kerere diba. Unai dainai, kongrigeisen amo ia idia atoa siri be maoro. Unai matahakani karana ese ia hahedinaraia, Iehova be ena abidadama hesiai taudia ia lalokau henia, bona danu kerere tauna ia durua ena kara dikadia ia lalopararalaia bona do ia helalo kerehai lou. Ia idia atoa siri neganai, kongrigeisen hebou ia mai diba, badina unuseniai Baibel ena hakaua herevadia ia kamonai bona ena abidadama ia goada lou. Danu, pablikeisen ia abia diba ia duahia bona stadilaia totona, bona JW Broadcasting^® ia itaia diba. Bona elda taudia ese idia itaia ena kara ia haidaua noho lalonai, nega ta ta ia do idia durua Iehova ida ena hetura karana  ia hanamoa lou totona, unai amo Iehova ena Witnes tauna ta ai do ia lao lou. *

12. Edena dala ai elda taudia be helalo-kerehai lasi taudia dekenai lalokau bona hebogahisi karana idia hahedinaraia?

¹² Namona be ita laloatao, idia helalo-kerehai lasi taudia sibona be kongrigeisen amo idia atoa siri. Elda taudia idia diba ta idia ura atoa siri neganai, unai idia laloa namonamo guna be namo. Idia diba Iehova ese “dala maorona ai” matahakani ia henia, bona ia ura idia danu be unai bamona idia karaia. (Ier. 30:11) Elda taudia ese edia tadikaka taihu idia lalokau henia, bona idia ura lasi idia karaia karana ese edia hetura karana Iehova ida ia hadikaia. To, nega haida kongrigeisen amo ta idia atoa siri diba, unai be lalokau bona hebogahisi karana.

13. Dahaka dainai Korinto ai Keristani tauna ta idia atoa siri be maoro?

¹³ Aposetolo Paulo ese helalo-kerehai lasi tauna ia kara henia dalana mani ita laloa. Korinto ai, Keristani tauna ta be ena tamana ena adavana ida matabodaga karadia ia karaia. Unai be dika momokani! Idaunegai, Iehova ese Israela taudia ia hamaoroa: “Bema tau ta be ena tamana ena adavana ida ia mahuta hebou, unai kara ese ena tamana do ia hahemaraia. Idia ruaosi idia hamasea be namo.” (Lev. 20:11) Paulo ese kongrigeisen taudia do ia hamaoroa lasi unai tauna idia hamasea totona. To tadikaka ia hamaorodia kongrigeisen amo ia idia atoa siri totona. Unai tauna ena matabodaga karana ese kongrigeisen lalonai haida ia hakaua kerere. Bona haida idia laloa ia karaia karana be kara dika badana lasi!​—1 Kor. 5:1, 2, 13.

14. Edena dala ai, Paulo ese idia atoa siri tauna ia hebogahisi henia, bona dahaka dainai? (2 Korinto 2:5-8, 11)

¹⁴ Gabeai, Paulo ia kamonai unai tauna be ena kara ia haidaua. Bona ia helalo-kerehai momokani! Ena be unai tauna ese kongrigeisen ena ladana ia hadikaia, to Paulo ese elda taudia ia hamaoroa ia do idia “hereva auka henia” lasi. Bona ia gwau: “Mai hebogahisi ida ia umui gwauatao bona umui hagoadaia be namo.” Paulo ese unai do idia karaia ena badina ia herevalaia, ia gwau: “Vadaeni ia be ena lalohisihisi ese do ia hadikaia ore lasi.” Paulo ese helalo-kerehai tauna ia hebogahisi henia. Ia ura lasi itaia unai tauna be ia karaia karana dainai do ia lalohisihisi bada, bona dika  gwauatao karana do ia tahua lasi.​—2 Korinto 2:5-8, 11 duahia.

15. Edena dala ai elda taudia be edia disisen idia badinaia goada, bona hebogahisi karana idia hahedinaraia?

¹⁵ Elda taudia be Iehova idia tohotohoa, idia ura bada hebogahisi karana idia hahedinaraia. Idia karaia disisen idia badinaia goada, bona bema badina korikorina ia noho, hebogahisi karana idia hahedinaraia. To, bema hebogahisi karana dainai kerere tauna idia matahakani henia lasi, unai be kerere abia dae karana. To elda taudia sibona ese hebogahisi karana idia hahedinaraia be namo, a?

16. Aonega Herevadia 21:13 hegeregerena, Iehova ese hebogahisi idia hahedinaraia lasi taudia dekenai dahaka ia karaia?

¹⁶ Keristani taudia idia gaukara goada Iehova ena hebogahisi karana idia tohotohoa totona. Dahaka dainai? Badina ta be, ma haida dekenai hebogahisi idia hahedinaraia lasi taudia be Iehova ese do ia kamonai henia lasi. (Aonega Herevadia 21:13 duahia.) Ita ura Iehova ese iseda guriguri do ia kamonai henia, unai dainai ita kara auka lasi be namo. Ita ura lasi ia hisihisi noho tadikaka ena noinoi ita dadaraia, to nega ibounai ita noho hegaegae “ladana maragi tauna ena taitai” ita kamonai totona. Badina Baibel ia gwau: “Hebogahisi ia hahedinaraia lasi tauna be hebogahisi lasi ida do idia hahemaoro henia.” (Iam. 2:13) Ita ura haida ese ita idia hebogahisi henia, unai dainai idia dekenai unai kara ita hahedinaraia be namo. Helalo-kerehai tauna be kongrigeisen ai ia giroa mai neganai, hebogahisi ita hahedinaraia diba.

17. Edena dala ai King Davida be mai momokani ida hebogahisi karana ia hahedinaraia?

¹⁷ Baibel ai haheitalai namodia ese ita do ia durua hebogahisi ita hahedinaraia bona ita kara auka lasi. Hegeregere, King Davida mani ita laloa. Nega momo mai momokani ida hebogahisi karana ia hahedinaraia. Ena be Saulo ia ura ia hamasea, to Davida ese Dirava ena abia hidi king dekenai hebogahisi ia hahedinaraia, bona ia ura lasi ena kerere davana ia henia o ia hahisia.​—1 Sam. 24:9-12, 18, 19.

18-19. Edena dala rua ai Davida be hebogahisi karana ia hahedinaraia lasi?

¹⁸ To, nega haida Davida be hebogahisi karana ia hahedinaraia lasi. Hegeregere, kara auka tauna Nabala be hemataurai lasi herevadia ia gwauraia bona ia ura lasi Davida bona ena tuari taudia dekenai aniani ia henia neganai, Davida ia badu dikadika bona ia ura Nabala bona ena ruma bese taudia ia hamasea. To, Nabala ena adavana, Abigaila, ena kara namo bona haheauka karana dainai, Davida ese Nabala bona ena tatau ia hamasea lasi.​—1 Sam. 25:9-22, 32-35.

¹⁹ Nega ma ta ai, peroveta tauna Natana ese Davida dekenai taga tauna be ogogami tauna ena mamoe ia henaoa ena sivarai ia gwauraia. Davida ia badu bona ia gwau: “Ia mauri noho Diravana, Iehova, ena ladana ai oi lau hamaoroa momokani, unai ia karaia tauna ia mase be namo!” (2 Sam. 12:1-6) Davida be Mose ena Taravatu ia diba. Bema ta ese mamoe ia  henaoa, vadaeni namona be biaguna dekenai mamoe 4 do ia henia. (Eso. 22:1) To henaohenao tauna hamasea karana be edena bamona? Unai be hahemaoro aukana. Natana ese ia gwauraia sivaraina amo, ia ura Davida ia durua bona do ia laloparara ia be kara dika badadia ia karaia! Bona Iehova be Davida dekenai hebogahisi bada ia hahedinaraia, to mamoe ia henaoa tauna dekenai Davida be hebogahisi ia hahedinaraia lasi!​—2 Sam. 12:7-13.

20. Davida ena haheitalai amo dahaka ita dibaia?

²⁰ Davida ia badu dikadika neganai, ia ura Nabala bona ena tatau ibounai ia hamasea. Bona gabeai, Davida ia gwau Natana ena sivarai lalonai ia gwauraia taga tauna ia mase be namo. Davida be tau namona, to dahaka dainai unai henaohenao tauna ia hahemaoro auka henia? Mani Davida dekenai ia vara gauna ita laloa. Unai nega ai, Davida ena lalomamina be ia dika. Bema ta be ia kara auka bona hebogahisi ia hahedinaraia lasi, anina be ena hetura karana Iehova ida ia goada lasi. Iesu be ena murinai idia raka taudia ia hadibaia, ia gwau: “Ma haida hahemaoro henia karana umui hadokoa, vadaeni Dirava ese umui do ia hahemaoro henia lasi, badina ma haida umui hahemaoro henia hegeregerena, umui do ia hahemaoro henia.” (Mat. 7:1, 2) Namona be ita kara auka lasi bona ita gaukara goada ‘hebogahisi bada herea’ ita hahedinaraia, iseda Dirava hegeregerena.

21-22. Edena dala ma haida ai hebogahisi ita hahedinaraia diba?

²¹ Hebogahisi be hemami ta sibona lasi. Hebogahisi tauna be gau haida ia karaia ma haida ia durua totona. Namona be iseda famili, kongrigeisen, bona noho gabuna ai heduru idia ura taudia ita durua. Momokani dala idauidau idia noho ta dekenai hebogahisi ita hahedinaraia totona! Ta be heduru ia ura, a? Idia dekenai aniani ita henia eiava idia totona gaukara ma haida ita karaia diba, a? Reana idia abia-vareai-lou Keristani tauna be do ia ura tura namona ta ese ia hagoadaia, a? Ma haida dekenai sivarai namona ita harorolaia diba, a? Unai dala namodia amo taunimanima ibounai dekenai hebogahisi ita hahedinaraia diba.​—Iobu 29:12, 13; Roma 10:14, 15; Iam. 1:27.

²² Bema ita diba haida be heduru idia ura, namona be dala ita tahua idia dekenai hebogahisi ita hahedinaraia totona. Unai bamona ita karaia neganai, iseda guba Tamana, ‘hebogahisi bada herea’ Diravana ita hamoalea diba!