1. Dahaka dainai taunimanima momo idia daradara?

SIBONA idia gwauraia Keristani tomadiho momo idia laloa Dirava ese edia tomadiho dalana ia abia dae. Unai dainai taunimanima momo idia daradara! Idia henanadai, “Tomadiho momokani be tamona, eiava tomadiho ibounai be Dirava idia hamoalea, a?” Ita abia dae momokani ita Iehova ena Witnes taudia be hereva momokani ita hadibaia, a? Bona ita abia dae iseda tomadiho dalana ese Iehova ia hamoalea, a? Unai ena hamomokania gaudia ita tahua diba, a? Hari, unai do ita herevalaia.

2. Tesalonika Ginigunana 1:5 hegeregerena, dahaka dainai aposetolo Paulo be ia dibaia gaudia ia abia dae momokani?

² Aposetolo Paulo be ia dibaia gaudia ia abia dae momokani. (1 Tesalonika 1:5 duahia.) Ia ese Dirava ena Hereva ia stadilaia namonamo dainai, ia abia dae gaudia ia moalelaia. Bona ia hamomokania “Toretore Helagadia be Dirava ena siahu amo idia torea.” (2 Tim. 3:16) Paulo ese Toretore Helagadia ia stadilaia karana amo dahaka ia dibaia? Ia ese hamomokania gaudia amo ia davaria Iesu be gwauhamata Mesiana, bona Iuda tomadiho gunalaia taudia ese idia dadaraia. Idia gwau idia be taunimanima dekenai Dirava ena hereva momokani idia hadibaia, to idia karaia gaudia be Dirava ese ia inai henia. (Tito 1:16) Paulo be unai taudia bamona lasi. Ia ese Dirava ena Hereva ena kahana ibounai ia abia dae. Oibe, Paulo ia noho hegaegae Dirava ena Hereva ibounai ia hadibaia bona badinaia totona.​—Kara 20:27.

3. Henanadai ibounai edia haere ita abia guna, bena do ita gwau inai be hereva momokani, a? (Maua itaia danu: “ Iehova Ena Gaukara Bona Lalohadai ‘be Momo Herea, Duahia Diba Lasi.’”)

 ³ Haida idia laloa tomadiho momokani ese henanadai idauidau ia haerelaia be namo, bona Baibel ese ia haerelaia diba lasi henanadai danu. Unai be maoro, a? Mani Paulo ena haheitalai ita laloa. Ia ese ena abidadama tamona taudia ia hamaoroa ‘gau ibounai idia tahua namonamo’ totona, to danu ia gwau gau momo ia lalopararalaia diba lasi. (1 Tes. 5:21) Ma ia gwau, “Iseda diba be sisina sibona,” bona “ita itaia namonamo lasi, auri hevarivari amo gaudia ita itaia goevagoeva lasi bamona.” (1 Kor. 13:9, 12) Oibe, Paulo be gau ibounai ia lalopararalaia lasi, bona ita danu be unai bamona. To, Paulo be hereva momokani badadia ia lalopararalaia. Bona unai ia abia dae momokani!

4. Edena dala ai ita abia dae ita be hereva momokani ita davaria, bona dahaka gaudia 4 do ita herevalaia?

⁴ Dala ta be, Iesu ese ia karaia tomadiho dalana bona Iehova ena Witnes taudia ese idia karaia tomadiho dalana ita hahegeregerea, unai amo do ita abia dae ita be hereva momokani ita davaria. Inai atikol ai do ita itaia, Keristani momokani taudia be (1) kaivakuku idia dadaraia, (2) Iehova ena ladana idia matauraia, (3) hereva momokani idia ura henia, bona (4) ta ta idia lalokau henia.

5. Dala maorona ai Dirava ita tomadiho henia totona Iesu dekenai dahaka ita dibaia, bona edena dala ai ia hadibaia gaudia ita badinaia diba?

⁵ Iesu be guba ai bona tanobada ai ia noho neganai, Iehova sibona ia tomadiho henia, badina ia lalokau henia bada. (Luka 4:8) Bona ena hahediba taudia ia hadibaia unai bamona do idia karaia. Iesu bona ena hahediba taudia edia tomadiho lalonai, kaivakuku  edia laulau idia gaukaralaia lasi. Dirava ita itaia diba lasi, unai dainai ta ese iena toana be gau ta ida ia hahegeregerea diba lasi! (Isa. 46:5) To ta ena laulau ita karaia bona ita tomadiho henia be edena bamona? Taravatu 10 lalonai, Iehova ia gwau: “Namo lasi laulau ta umui koroa eiava guba ai eiava tanobada ai . . . idia noho gauna ta ena laulau umui koroa. Namo lasi idia dekenai umui tui diho.” (Eso. 20:4, 5) Dirava idia ura hamoalea taudia ese unai hereva idia lalopararalaia.

6. Hari, Iehova ena Witnes taudia be edena tomadiho dalana idia badinaia?

⁶ Histori stadilaia taudia idia gwau aposetolo edia nega ai, Keristani taudia be Dirava sibona idia tomadiho henia. Hegeregere, histori bukana ta ia gwau, Keristani taudia ginigunadia ese tomadiho gabudia ai kaivakuku gaukaralaia karana idia “inai henia.” Hari inai negai, Iehova ena Witnes taudia ese Keristani ginigunadia edia tomadiho dalana idia badinaia. Ita be ma haida edia laulau, aneru, eiava Iesu ita guriguri henia lasi. Bona flag ita salut lasi eiava gavamani tomadiho henia karana ta ita karaia lasi. Ena be ta ese ita ia doria, to lalona ita hadaia Iesu ena hereva ita badinaia, ia gwau: “Iehova oiemu Dirava oi tomadiho henia be namo.”​—Mat. 4:10.

7. Edena dala ai Iehova ena Witnes taudia be idia idau?

⁷ Hari inai negai, momo be ladana bada tomadiho gunalaia taudia idia badinaia. Bona unai taudia idia ura henia bada dainai, idia tomadiho henidia diba. Momo be unai tomadiho gunalaia taudia edia dubu dekenai idia lao, edia buka idauidau idia hoia, bona edia orea durua totona moni bada idia henia. Danu edia hereva ibounai idia abia dae. Idia ese unai tomadiho gunalaia taudia idia itaia neganai idia moale bada, reana bema Iesu idia itaia neganai unai bamona do idia karaia danu! To, dala maorona ai Dirava idia tomadiho henia taudia be taunimanima idia badinaia lasi. Ena be ita idia gunalaia taudia ita matauraia, to Iesu ena hadibaia herevana ita abia dae. Ia gwau: “Umui ibounai be tadikaka.” (Mat. 23:8-10) Ita be tomadiho gunalaia taudia eiava gavamani taudia ita tomadiho henia lasi. Bona edia lalohadai ita durua lasi. Ita gini siri bona tanobada ita dadaraia. Unai dainai, sibona idia gwauraia Keristani taudia amo ita be idau.​—Ioa. 18:36.

8. Edena dala ai ita diba Iehova ia ura ena ladana ia hahelagaia bona ma haida dekenai ita hadibaia?

⁸ Nega ta, Iesu ia guriguri: “Tamagu e, emu ladana oi hanamoa.” Iehova be guba amo mai gado badana ida unai guriguri ia haerelaia, bona ia gwauhamata iena ladana do ia hahelagaia. (Ioa. 12:28) Iesu ena tanobada maurina lalonai, ena Tamana ena ladana ia hahelagaia. (Ioa. 17:26) Unai dainai, Keristani momokani taudia idia diba Dirava ena ladana idia gaukaralaia bona ma haida dekenai idia hadibaia be hahenamo badana.

9. Edena dala ai Keristani ginigunadia ese idia hamomokania Dirava ena ladana idia matauraia?

⁹ Keristani kongrigeisen ia matamaia bena daudau lasi murinai, Iehova ese “idau bese taudia ia laloa, bona idia huanai haida ia abia hidi ena ladana idia abia totona.” (Kara 15:14) Unai Keristani ginigunadia be mai moale ida Dirava ena ladana idia gaukaralaia bona ma haida dekenai idia hadibaia. Idia haroro bona Baibel bukadia idia torea neganai, idia ese Dirava ena ladana idia gaukaralaia. * Unai amo idia hamomokania idia sibona be Dirava ena ladana idia gaukaralaia.​—Kara 2:14, 21.

10. Dahaka ese ia hamomokania Iehova ena Witnes taudia be Iena ladana idia gaukaralaia?

 ¹⁰ Iehova ena Witnes taudia be Iena ladana idia gaukaralaia, a? Mani hamomokania gaudia haida ita herevalaia. Hari inai negai, tomadiho gunalaia taudia momo be Dirava ena ladana korikorina idia hunia. Edia Baibel amo unai ladana idia kokia, bona taravatu idia atoa edia dubu ai unai ladana idia gaukaralaia lasi totona. * Ia hedinarai goevagoeva, Iehova ena Witnes taudia sibona ese Dirava ena ladana idia matauraia bona hanamoa. Ita ese tanobada ibounai lalonai Dirava ena ladana korikorina ita harorolaia! Oibe, ita gaukara goada ita abia ladana hegeregerena ita noho totona. Ita be Iehova ena Witnes taudia! (Isa. 43:10-12) Ita ese Nega Matamata Trensleisen Ena Buka Helaga ena kopi 240 milioni ita karaia, unai Baibel ai Iehova ena ladana be ena gabu korikori ai ita atoa lou. Bona Iehova ena ladana ita gaukaralaia Baibel bukadia bona magasin be gado 1,000 mai kahana ai ita karaia!

11. Edena dala ai Keristani ginigunadia be hereva momokani idia ura henia?

¹¹ Iesu ese hereva momokani ia ura henia, unai be Dirava momokani be daika bona Ena ura be dahaka. Bona iena mauri dalana amo ia hamomokania unai be hereva momokani, bona ma haida dekenai ia hadibaia.  (Ioa. 18:37) Danu Iesu ena murinai idia raka taudia ese hereva momokani idia ura henia bada. (Ioa. 4:23, 24) Oibe, aposetolo Petero ese Keristani tomadiho ia gwauraia “hereva momokani ena dala.” (2 Pet. 2:2) Keristani ginigunadia be hereva momokani idia ura henia bada dainai, idia ese tomadiho idauidau edia lalohadai, kastom karadia, bona lalohadai koikoidia idia dadaraia. (Kol. 2:8) Unai hegeregerena, hari Keristani taudia momokanidia ese idia abia dae gaudia bona edia mauri dalana amo Iehova ena Hereva idia badinaia, unai amo “hereva momokani ai idia raka noho.”​—3 Ioa. 3, 4.

12. Hakaua Oreana ia itaia hereva momokani ta ita lalopararalaia lasi neganai, dahaka ia karaia? Bona dahaka dainai?

¹² Iehova ena Witnes taudia idia gwau lasi idia be Baibel ena hereva ibounai idia diba goevagoeva. Lasi, nega haida Baibel ena hahediba herevana ta ena anina idia gwauraia kerere, eiava kongrigeisen ena hakaua dalana dekenai idia kerere. Unai kara dainai ita hoa lasi be namo. Baibel ese ia hahedinaraia Dirava ena taunimanima be nega ia lao noho lalonai hereva momokani idia lalopararalaia. (Kol. 1:9, 10) Iehova ese metairametaira hereva momokani ia hahedinaraia, bona namona be mai haheauka ida ita naria ela bona hereva momokani ibounai ita lalopararalaia. (Aon. 4:18) Hakaua Oreana ia itaia ita be hereva momokani ta ita lalopararalaia lasi neganai, unai ia hahedinaraia namonamo totona senisi ia karaia haraga. Hari, tomadiho momo be edia dubu taudia eiava lada bada taudia hamoalea totona edia hahediba herevadia idia haidaua. To, ita Iehova ena Witnes taudia be senisi ita karaia badina ita ura Dirava kahirakahira ita noho bona ia ita tomadiho henia, Iesu ia karaia bamona. (Iam. 4:4) Tanobada taudia edia lalohadai ia idau dainai senisi ita karaia lasi, to Baibel ena hereva ita lalopararalaia namonamo dainai senisi ita karaia. Oibe, ita be hereva momokani ita ura henia!​—1 Tes. 2:3, 4.

13. Keristani taudia momokanidia edia kara badana be dahaka, bona edena dala ai Iehova ena Witnes taudia ese unai idia hahedinaraia?

¹³ Keristani ginigunadia be kara namodia momo idia hahedinaraia, to edia kara badana be lalokau. Iesu ia gwau: “Unai amo taunimanima ibounai do idia diba umui be egu hahediba taudia, bema umui huanai lalokau ia noho.” (Ioa. 13:34, 35) Hari, Iehova ena Witnes taudia be lalokau bona lalotamona ai idia noho. Ita be tomadiho ibounai amo ita idau, badina ena be tano bona noho daladia be idauidau, to ruma bese tamona bamona ita noho. Iseda kongrigeisen hebou, sekit bona rijinol hebouhebou ai unai ita itaia. Unai ese ia hamomokania Iehova be iseda tomadiho dalana ia abia dae.

14. Kolose 3:12-14 hegeregerena, ta ta dekenai lalokau ita hahedinaraia dala badana be dahaka?

¹⁴ Baibel ese ita ia hagoadaia, ‘ta ta do ita lalokau henia bada.’ (1 Pet. 4:8) Lalokau ita hahedinaraia dalana ta be, ita gwauatao heheni bona ita haheauka. Bona dala ita tahua tadikaka taihu dekenai hariharibada bona heabidae karadia ita hahedinaraia, ita idia hahisia taudia dekenai danu. (Kolose 3:12-14 duahia.) Unai bamona lalokau ita hahedinaraia neganai, ita hamomokania ita be Keristani momokani taudia.

15. Edena dala ai Keristani ginigunadia ese idia karaia tomadiho dalana ita badinaia?

¹⁵ Ita be Keristani ginigunadia ese idia karaia  tomadiho dalana ita badinaia danu. Hegeregere, ita be mai iseda sekit taudia, elda taudia, bona hesiai taudia. (Fili. 1:1; Tito 1:5) Bona danu idia hegeregerena, ita ese Iehova ena taravatu, hegeregere mahuta hebou karana, headava, bona rara gaukaralaia karana dekenai ita matauraia, bona helalo-kerehai lasi taudia amo kongrigeisen ita gimaia.​—Kara 15:28, 29; 1 Kor. 5:11-13; 6:9, 10; Heb. 13:4.

16. Efeso 4:4-6 amo dahaka ita dibaia?

¹⁶ Iesu ia gwau momo do idia gwau idia be iena hahediba taudia, to edia kara amo unai idia hamomokania lasi. (Mat. 7:21-23) Danu, Baibel ia gwau dina gabedia ai, momo ese “Dirava badinaia karana be toana sibona do idia hahedinaraia.” (2 Tim. 3:1, 5) To, Baibel ese ia hahedinaraia goevagoeva, Dirava ese ‘abidadama tamona’ eiava tomadiho tamona sibona ia abia dae.​—Efeso 4:4-6 duahia.

17. Daidia be Iesu murinai idia raka bona tomadiho momokani tamona idia badinaia?

¹⁷ Hari, daidia ese tomadiho momokani tamona idia badinaia? Ita ese hamomokania gaudia ita herevalaia vadaeni. Bona Iesu ese ia hadibaia tomadiho dalana bona Keristani ginigunadia ese unai idia badinaia dalana ita itaia. Oibe, Iehova ena Witnes taudia sibona be tomadiho momokanina. Iehova ena Witnes ta ai ita lao bona Iehova bona ena ura ita dibaia karana be hahenamo badana! Unai dainai, ita gaukara goada hereva momokani ita dogoatao auka totona.