Tadikaka taihu momo be haroro gaukara idia karaia dainai, pablikeisen momo idia abia be namo. Brooklyn Betele ai, tadikaka be magasin idia karaia, to kampani ma haida ese buka idia printaia. Bena hua momo lalonai, unai kampani be buka momo idia printaia diba lasi, bona unai ese haroro gaukara ia hamaragia sisina. Unai dainai tadikaka Rutherford ese Robert Martin, faktori ia naria tauna ia nanadaia, bema idia be hegeregere buka idia printaia totona.

Tadikaka Martin ese unai nega ia laloatao, ia gwau: “Unai be lalohadai namona, badina unai amo buka karaia faktori ta ai haginia diba.” Tadikaka ese 18 Concord Street, Brooklyn dekenai bildin ta idia rentaia bona printa kohudia haida idia abia.

Tadikaka be sibona edia buka do idia printaia dainai, momo idia moale lasi. Iseda buka idia printaia kampani ta ena biaguna, be faktori matamatana ia vadivadi. Ia gwau: “Umui dekenai printa kohu namodia idia noho, to umui ta be unai masini gaukaralaia daladia umui diba lasi. Hua 6 lalonai inai kohu ibounai do idia dika.”   

Tadikaka Martin ia gwau: “Toana be ena hereva be maoro, to ai diba Iehova be ai do ia durua, bona momokani ai ia durua.” Tadikaka  Martin be ia maoro. Daudau lasi murinai, printa matamata ese dina ta ta lalonai buka 2,000 ia printaia.   

Iehova ena taunimanima be sibona edia buka idia printaia sibona lasi, to reidia amo sivarai namona idia harorolaia matamaia. Lagani 1922 February 26, Sunday adorahi ai, Tadikaka Rutherford ese nega ginigunana reidio dekenai ia hereva. Los Angeles, California, U.S.A. ai, KOG reidio steiseni dekenai tok ta ia henia. Ena sinado be,  “Hari Idia Noho Taudia Milioni Momo be Do Idia Mase Lasi.”

Taunimanima 25,000 mai kahana ese unai tok idia kamonai bona revareva amo edia tanikiu hereva idia siaia. Unai revareva ta be Willard Ashford amo, ia be Santa Ana, California dekenai ia noho. Ia ese Tadikaka Rutherford ia tanikiu henia bona ia gwau, unai tok ia “moalelaia bada.” Bena ma ia gwau: “Egu famili lalonai, toi be idia gorere bona ruma dekenai sibona idia noho dainai, ai mai lasi emu hereva ai kamonai totona, to ai noho gabuna dekenai ai kamonai diba.”

Gabeai wiki lalodiai reidio amo idia haroro. Lagani 1922 ena dokonai, The Watch Tower ia gwau, “taunimanima 300,000 mai kahana be reidio amo sivarai namona idia kamonai.”

Kamonai taudia edia revareva bona hanamoa herevadia ese Bible Student taudia idia hagoadaia dainai, idia ura Staten Island dekenai reidio steiseni ta idia haginia, unai gabu be Brooklyn Betele amo ia daudau lasi. Idia mai laganidia ai, Bible Student taudia ese unai steiseni ladana, WBBR, idia gaukaralaia Basileia ena sivarai namona idia harorolaia totona.

Lagani 1922 ena June 15 The Watch Tower ai idia hahedinaraia, September 5 ia lao 13 1922 ai, Cedar Point, Ohio dekenai hebouhebou badana ta do idia karaia. Bible Student taudia be mai moale ida Cedar Point dekenai idia ginidae.

Tadikaka Rutherford be ena tok ginigunana ai, helai taudia ia hamaoroa: “Lau diba momokani, Lohiabada ese . . . inai hebouhebou do ia hanamoa bona Ia ese haroro gaukara do ia habadaia, guna inai tanobada ai unai bamona ia vara lasi.” Unai hebouhebou ai, tok henia taudia ese haroro gaukara idia herevalaia loulou.

Bena Friday, September 8 ai, mai moale ida taunimanima 8,000 mai kahana be ruma badana ta dekenai idia hebou Tadikaka Rutherford ena tok idia kamonai totona. Idia ura ia ese invateisen dekenai ia noho leta, “ADV,” ena anina do ia herevalaia. Idia helai neganai, haida ese platfom ena ataiai ia noho lokua palai badana ta idia itaia. Arthur Claus be Tulsa, Oklahoma, U.S.A., amo unai hebouhebou dekena ia lao. Ia be helai gabuna namona ta ia davaria unai amo tok do ia kamonai namonamo diba. Unai be mai ena mai  anina bada badina unai nega ai, maikrofon o spika badadia be lasi.

Seamani ese helai taudia ia hadibaia, Tadikaka Rutherford be ena tok ia henia lalonai leiti taudia be do idia vareai lasi, unai amo ena tok henia karana do idia hadikaia lasi. Daba 9:30 ai, Tadikaka Rutherford be ena hereva ia matamaia neganai, Iesu ena hereva Mataio 4:17 dekenai ia herevalaia: “Guba Basileia be ia kahirakahira vadaeni.” Taunimanima ese unai Basileia idia kamonai dalana ia herevalaia neganai, ia gwau: “Iesu ia gwau iena noho negana lalonai ena taunimanima haboua gaukarana do ia karaia, unai negai ia idia badinaia momokani taudia do ia haboua.”   

Tadikaka Claus be hebou rumana lalonai ia helai bona ia gwau: “Hereva ibounai ai kamonai namonamo.” To karaharaga, gorere mamina ia abia dainai hebou rumana amo ia raka-lasi. Ia diba unai gabu ia rakatania neganai do ia vareai lou lasi, badina ia diba Tadikaka Rutherford ena tok ia henia lalonai ta do ia vareai lasi.

Miniti haida murinai, ena hemami ia namo. Ia gwau hebouhebou rumana dekenai ia raka giroa neganai, ia kamonai edia imana idia patapataia ena regena be bada herea. Unai ia kamonai neganai, ia moale dikadika! Ia ura guhi dekenai do ia daekau, unai amo tok ena kahana oredia ia kamonai diba. Unai negai Tadikaka Claus ena mauri lagani 23 be ruma ena guhi dekenai ia daekau. Bona guhi ena windo be idia kehoa dainai, “tok ia kamonai namonamo diba.”

To Arthur be sibona lasi. Ena turana haida danu be guhi dekenai idia daekau vadaeni. Idia ta ladana, Frank Johnson be ia dekenai ia lao bona ia nanadaia: “Oi be mai emu kaia maragina ta, a?”

Arthur ia haere: “Oibe.”

Frank ia gwau: “Ai guriguri noho, mai ena kaia tauna ta do ai davaria. Unai lokua palai badana oi itaia, a? Unai be idia torea saini ia noho,  bona inai ikoko dekenai idia kwatua. Diadi tauna * ena hereva oi kamonai namonamo. Ia ese inai hereva, ‘bona umui haroro, haroro,’ ia gwauraia neganai, inai varo foa oi utua.”

Unai dainai, Arthur be ena kaia ia dogoatao bona ena turadia ida Tadikaka Rutherford ena hadibaia hereva idia naria, unai amo lokua dabua ena varo do idia utua. Daudau lasi murinai Tadikaka Rutherford be ena tok ena kahana badana dekenai ia ginidae. Mai moale bona gado bada ida ia gwau: “Mai abidadama bona momokani ida Lohiabada ena hereva umui harorolaia. Gabu ibounai do umui haroro ela bona Dirava ese Babulonia Badana do ia haorea momokani. Gau badana be tanobada taudia idia diba Iehova be Dirava bona Iesu Keriso be pavapava edia Pavapava bona lohia edia Lohia. Hari be dina iboudiai edia dina badana. Itaia, Pavapava ia lohia! Umui be iena hereva gwauraia taudia. Unai dainai umui haroro, haroro, haroro, Pavapava bona iena Basileia umui harorolaia!”

Arthur ia gwau, ia bona tadikaka ma haida ese lokua dabua ena varo idia utua neganai, ia kehoa bona ena toretore ia hedinarai. Inai leta toi “ADV” hegeregerena, lokua dabua lalonai inai hereva ia noho, “King bona Basileia harorolaia.” Inai leta “ADV” be English gado herevana, ‘advertise’ ena hereva kwadogina, ena anina be ‘haroro’ eiava ‘witnes.’

Cedar Point ai ia idia karaia hebouhebou ese tadikaka taihu ia durua Basileia harorolaia gaukarana idia laloa bada totona, bona unai gaukara idia ura durua taudia be mai moale ida idia haroro. Oklahoma, U.S.A amo kolpota (hari idia gwauraia painia) ta ia gwau: “Ai haroro gabuna dekenai, taunimanima momo be coal maini dekenai idia gaukara, bona idia be ogogami taudia.” Ma ia gwau, nega momo taunimanima be Golden Age magasin amo sivarai namona idia duahia neganai “do idia tai” bona “ai moale badina idia ai hagoadaia diba.”

Unai Bible Student taudia idia diba Luka 10:2 ai Iesu ena hereva be mai anina bada, ia gwau: “Uma aniani gogoa gaukarana be bada, to gaukara taudia be momo lasi.” Lagani ena dokona ia kahirakahira lalonai, edia lalona idia hadaia Basileia ena sivarai be gabu ibounai dekenai idia harorolaia totona.