1. Hari momo be aonega ena boiboi idia kamonai neganai, edena bamona idia kara? (Aonega Herevadia 1:20, 21)

 TANO momo ai, ita itaia Basileia harorolaia taudia be mai moale ida dala dekenai idia gini bona idia raka hanai taudia dekenai buka bona magasin idia hariharilaia. Nega ta oi be unai bamona haroro gaukara oi karaia, a? Bema oibe, reana Aonega Herevadia bukana ai ia noho laulau herevana oi laloatao​—aonega be dala dekenai ia boiboi badabada noho taunimanima ese ena sisiba idia kamonai totona. (Aonega Herevadia 1:20, 21 duahia.) Baibel bona iseda pablikeisen lalonai “aonega korikori,” Iehova ena aonega unai, idia hahedinaraia. Taunimanima ese unai aonega idia abia be namo, unai amo mauri hanaihanai idia abia diba. Ta ese iseda pablikeisen ta ia abia neganai, ita moale. To momo be idia ura lasi. Haida be idia ura lasi Baibel ena hereva idia kamonai. Bona haida be ita idia kirikirilaia. Idia laloa Baibel be buka gunana. To haida be Baibel ena kara maoromaoro taravatudia idia gwauraia dika, bona idia gwau Baibel idia badinaia taudia be idia kara auka bona ma haida idia hahemaoro henia. Herevana unai ia vara, to Iehova be mai lalokau ida aonega korikori be ibounai dekenai ia halasia noho. Edena dala ai?

2. Hari edeseniai aonega korikori ita abia diba, to momo be dahaka idia abia hidi?

² Iehova ese ena Hereva, Baibel amo iena aonega korikori ia halasia. Taunimanima ibounai dekenai unai buka ia noho. Bona Baibel idia herevalaia pablikeisen be edena bamona? Iehova ese ia henia hahenamo dainai ita moale, badina Baibel be gado 1,000 mai kahana ai idia halasia. Idia kamonai taudia be idia duahia bona idia dibaia gauna idia badinaia karana amo namo do idia davaria. To, taunimanima momo be aonega korikori ena  gadona idia ura lasi kamonai. Abia hidi idia karaia neganai, sibodia edia aonega bona ma haida edia aonega dekenai idia tabekau. Danu Baibel ena hereva ita badinaia dainai ita idia laloa maragi. Inai atikol ese unai taudia edia kara ena badina do ia herevalaia. To namona be Iehova amo ia mai aonega ita herevalaia guna.

3. Aonega korikori abia totona, dahaka ita karaia be namo?

³ Aonega korikori ena anina be, ita dibaia gaudia ita gaukaralaia abia hidi maorodia ita karaia totona. To, aonega korikori be unai sibona lasi. Baibel ia gwau: “Iehova gari henia karana be aonega ena matamana, bona Helaga Herea Diravana dibaia karana ese laloparara ia henia.” (Aon. 9:10) So bema abia hidi badana ta ita ura karaia, namona be Iehova ena lalohadai, ‘Helaga Herea Diravana ena diba,’ ita tahua. Unai ita karaia totona, Baibel bona Baibel idia herevalaia pablikeisen ita stadilaia. Unai ita karaia neganai aonega korikori do ita hahedinaraia.​—Aon. 2:5-7.

4. Dahaka dainai Iehova sibona ese ita dekenai aonega korikori ia henia diba?

⁴ Iehova sibona ese ita dekenai aonega korikori ia henia diba. (Roma 16:27) Dahaka dainai? Ginigunana, ia be Havaraia Tauna bona ia havaraia gaudia ia diba bona ia lalopararalaidia goevagoeva. (Sal. 104:24) Iharuana, Iehova ena kara ibounai ese ena aonega idia hahedinaraia. (Roma 11:33) Ihatoina, Iehova ena sisiba idia badinaia taudia be hanaihanai namo idia davaria. (Aon. 2:10-12) Bema ita ura aonega korikori ita abia, namona be unai hereva momokani ita abia dae, bona abia hidi eiava kara ta ita ura karaia neganai, unai badina toi ese ita ia hakaua be namo.

5. Taunimanima ese aonega korikori ena Badina, Iehova, idia dadaraia dainai dahaka ia vara?

⁵ Haroro gaukara ai ita davaria taudia momo idia gwau, havaraia gaudia edia toana be namo herea; to, idia ura lasi abia dae Havaraia Tauna be ia noho, bona idia gwau unai gaudia be evolusen amo idia vara. Ita davaria taudia haida be Dirava idia abia dae, to idia gwau Baibel ena hakaua herevadia be lalohadai gunadia, bona idia ura sibodia edia lalohadai idia badinaia. Unai ese dahaka ia havaraia? Taunimanima be sibodia edia aonega idia badinaia bona Dirava ena aonega idia dadaraia dainai, tanobada be gabu namona lasi. Moale korikori eiava vaira nega ena helaro idia davaria lasi. Idia vara gaudia dainai inai hereva momokani ita abia dae: “Taunimanima edia aonega, laloa kehoa, bona sisiba ese Iehova ena ura ia koua diba lasi.” (Aon. 21:30) Unai ese ita ia hagoadaia Iehova ena aonega korikori ita tahua totona! To madi, taunimanima momo be unai idia ura lasi. Dahaka dainai?

6. Aonega Herevadia 1:22-25 hegeregerena, daidia idia ura lasi aonega korikori ena boiboi idia kamonai?

⁶ Aonega korikori be “dala dekenai ia boiboi badabada” neganai, momo idia ura lasi kamonai. Baibel siri hegeregerena, orea toi be aonega idia dadaraia, idia be “kamonai lasi taudia,” “hevaseha taudia,” bona “kavakava taudia.” (Aonega Herevadia 1:22-25 duahia.) Unai bamona taudia edia kara do ita stadilaia, bona do ita itaia dahaka dainai Dirava ena aonega idia dadaraia, danu do ita tahua edena dala ai unai kara do ita dadaraia.

7. Dahaka dainai haida be idia ura “kamonai lasi taudia” bamona idia noho?

⁷ “Kamonai lasi taudia” be diba bada lasi taudia, haida ese edia lalona idia veria bona idia koidia haraga. (Aon. 14:15.) Haroro  gaukara dekenai nega momo unai bamona taudia ita davaria. Hegeregere, taunimanima milioni momo be tomadiho bona politikol taudia ese idia hakaua kerere. Haida idia laloparara unai lohia taudia ese idia koidia neganai, idia hoa bona idia gari. To Aonega Herevadia 1:22 ese ia herevalaia taudia idia kamonai lasi, badina idia ura unai bamona idia noho. (Ier. 5:31) Sibodia edia ura idia karaia bona idia ura lasi Baibel ena hereva idia dibaia, eiava ena kara maoromaoro taravatudia idia badinaia. Momo be Quebec, Canada ai tomadiho ia laloa bada hahinena ta bamona, ia ese Witnes tauna ta ia hamaoroa, ia gwau: “Bema aiemai pris ese ai ia hakaua kerere, unai be emai kerere lasi, unai be iena kerere!” Ita ura lasi diba bada lasi taudia ita tohotohoa!​—Aon. 1:32; 27:12.

8. Dahaka ese ita do ia durua ita aonega totona?

⁸ Unai dainai, Baibel ese ita ia hagoadaia diba bada lasi taudia bamona do ita noho lasi, to ‘taunimanima badana bamona ita laloa.’ (1 Kor. 14:20) Iseda mauri ai Baibel ena taravatu ita badinaia neganai, aonega do ita abia. Metairametaira, ita laloparara unai taravatu ese ita idia durua hekwakwanai ita dadaraia bona disisen maorodia ita karaia totona. Namona be ita karaia vadaeni disisen do ita laloa lou. Bema nega daudau lalonai Baibel ita stadilaia bona hebou ita mai, namona be sibona ita nanadaia, dahaka dainai gwauhamata ita karaia lasi Iehova dekenai bona bapatiso ita abia lasi. Bema ita bapatiso vadaeni, iseda sivarai namona ita harorolaia bona hadibaia gaukarana ita hanamoa, a? Ita karaia disisen ia hahedinaraia Baibel ena hakaua herevadia ese ita idia biagua, a? Ma haida dekenai Keristani kara namodia ita hahedinaraia, a? Bema ita itaia iseda kara ita hanamoa be namo, vadaeni namona be Iehova ena aonega herevadia ita laloa dobu, badina idia ese “diba bada lasi tauna dekenai aonega ia henia.”​—Sal. 19:7.

9. Edena dala ai “hevaseha taudia” ese Dirava ena aonega idia dadaraia?

⁹ Dirava ena aonega idia dadaraia orea iharuana be “hevaseha taudia.” Nega haida iseda haroro gaukara lalonai unai bamona taudia ita davaria. Ma haida kirikirilaia karana idia moalelaia. (Sal. 123:4) Baibel ia gwau dina gabedia ai, hevaseha taudia do idia momo herea. (2 Pet. 3:3, 4) Kara maoromaoro tauna Lota ena ravana tatau bamona, hari inai negai taunimanima haida be Dirava ena hadibaia herevadia idia kamonai lasi. (Gen. 19:14) Idia ese Baibel ena hereva idia badinaia taudia idia kirikirilaia. Unai hevaseha taudia be “sibodia edia ura dikadia” ese idia biagua. (Iuda 7, 17, 18) Baibel ese ia herevalaia hevaseha taudia edia kara be aposteit taudia bona Iehova idia dadaraia taudia edia kara bamona!

10. Salamo 1:1 hegeregerena, edena dala ai hevaseha taudia edia kara ita dadaraia diba?

¹⁰ Edena dala ai hevaseha taudia edia kara ita dadaraia diba? Dala ta be gau ibounai idia maumauraia taudia ita bamoa lasi. (Salamo 1:1 duahia.) Unai ena anina be, aposteit taudia ese idia halasia gauna ta ita kamonai eiava duahia lasi. Ita laloparara bema ita naria namonamo lasi, Iehova bona iena orea amo idia mai hakaua herevadia do ita maumauraia bona ita daradaralaia diba. Unai ita karaia lasi totona, namona be sibona ita nanadaia: ‘Hakaua herevadia o diba matamata ita abia neganai, lau maumau, a? Ita idia hakaua tadikaka edia kerere lau tahua momo, a?’ Unai kara ita hadokoa haraga neganai, Iehova be ita dekenai do ia moale.​—Aon. 3:34, 35.

11. “Kavakava taudia” ese Iehova ena kara maoromaoro taravatudia be edena bamona idia laloa?

¹¹ Dirava ena aonega idia dadaraia orea ihatoina  be “kavakava taudia.” Idia be kavakava taudia badina idia ura lasi edia mauri lalonai Dirava ena kara maoromaoro taravatudia idia badinaia. Sibodia edia dala idia abia hidi bona idia laloa unai be maoro. (Aon. 12:15) Unai bamona taudia ese aonega ena Badina, Iehova, idia dadaraia. (Sal. 53:1) Haroro gaukara ai ita davaridia neganai, Baibel ena taravatu ita badinaia dainai, mai badu ida ita idia gwau henia. To idia ese ita dekenai mauri namona do idia henia lasi. Baibel ia gwau: “Kavakava tauna be hegeregere lasi aonega korikori ia abia totona, bona siti ena geiti ai gau ta ia herevalaia diba lasi.” (Aon. 24:7) Unai dainai Iehova ese ita ia hagania “kavakava tauna amo[ita] noho daudau”!​—Aon. 14:7.

12. Dahaka ese ita do ia durua kavakava taudia bamona do ita kara lasi?

¹² Ita be Dirava ena sisiba idia dadaraia taudia bamona lasi, to ita be Dirava ena kara namodia bona ena taravatu ita lalokau henia. Unai lalokau ita hagoadaia diba bema kamonai karana ena namo bona kamonai lasi karana ena dika ita hahegeregerea. Bona taunimanima ese Iehova ena sisiba namona idia dadaraia dainai hekwakwanai idia davaria dalana ita itaia. Bena iseda mauri ai Iehova ita kamonai henia dainai ita abia namo ita laloa.​—Sal. 32:8, 10.

13. Iehova be ita ia doria ena sisiba namona ita badinaia totona, a?

¹³ Iehova ese taunimanima ibounai dekenai ena aonega ia henia, to ta ia doria lasi unai idia abia dae totona. To, ena sisiba idia kamonai lasi taudia dekenai do idia vara gaudia ia hahedinaraia danu. (Aon. 1:29-32) Bona Iehova idia kamonai henia lasi taudia be “idia badinaia noho dalana dainai dika do idia davaria.” Gabeai, edia mauri dalana dainai hisihisi bona hekwakwanai momo do idia davaria bona dokonai Iehova ese idia do ia hamasea. To, Iehova ese ena sisiba idia kamonai bona badinaia taudia dekenai inai gwauhamata ia henia: “Lau dekenai ia kamonai noho tauna be do ia noho namonamo bona dika gaudia dainai do ia gari lasi.”​—Aon. 1:33.

14-15. Aonega Herevadia 4:23 amo dahaka ita dibaia?

¹⁴ Dirava amo ita abia aonega ita badinaia neganai, hanaihanai namo do ita abia. Ita herevalaia bamona, Iehova ese taunimanima ibounai dekenai ena sisiba ia henia. Hegeregere, Aonega Herevadia bukana ai, Iehova ese ita totona sisiba namodia ia henia, ita badinaia neganai, iseda mauri do ia hanamoa. Mani unai sisiba namodia edia haheitalai foa ita herevalaia.

¹⁵ Emu kudouna oi gimaia. Baibel ia gwau: “Oi gimaia gaudia ibounai amo, emu kudouna oi gimaia be gau badana, badina kudouna dainai oi mauri noho.” (Aon. 4:23) Iseda kudouna korikori ita naria totona do ita karaia gaudia mani ita laloa. Namona be aniani namodia ita ania, ita eksasais, bona gau dikadia  ita dadaraia. Iseda kudouna ita gimaia karana be unai bamona. Hanaihanai Dirava ena Hereva ita stadilaia, Keristani heboudia lao totona ita hegaegae bona hebou ai haere ita henia. Ita goada noho totona, hanaihanai haroro gaukara ita karaia. Bona kara dikadia ita dadaraia totona namona be iseda lalohadai idia hadikaia gaudia hegeregere, moale kara dikadia bona hebamo dikadia ita dadaraia.

16. Dahaka dainai Aonega Herevadia 23:4, 5 ena sisiba be hari mai anina bada?

¹⁶ Oi dekenai idia noho gaudia be hegeregere. Baibel ese inai sisiba ia henia: “Namo lasi kohu momo abia totona emu goada oi haorea. . . . Oi ura unai oi itaia neganai, do ia noho lasi, badina ia be apena do ia vara bona ugava bamona do ia roho lao.” (Aon. 23:4, 5) Kohu bona moni do ia noho daudau lasi. To, hari taga bona ogogami taudia momo be moni momo abia karana idia laloa bada. Unai dainai idia karaia gaudia ese hanaihanai edia ladana, edia hetura karana ma haida ida bona edia helt ia hadikaia. (Aon. 28:20; 1 Tim. 6:9, 10) To, aonega karana ese ita ia durua moni dekenai lalohadai maorona ita abia totona. Bona unai ese ita ia durua do ita mataganigani lasi, to ita dekenai idia noho gaudia be hegeregere dainai do ita moale noho.​—Had. 7:12.

17. Aonega Herevadia 12:18 hegeregerena, edena dala ai iseda hereva be “aonega tauna ena hereva” bamona?

¹⁷ Oi laloa guna bena oi hereva. Bema ita naria namonamo lasi, iseda hereva ese dika bada ia havaraia diba. Baibel ia gwau: “Ia laloa namonamo lasi tauna ena hereva be tuari kaia amo ta ia gwadaia bamona, to aonega tauna ena hereva ese namo ia havaraia.” (Aon. 12:18) Ita huanai maino ia noho diba bema haida edia kerere ita maumauraia lasi. (Aon. 20:19) Bema ita ura iseda hereva ese ta ia hagoadaia bona ia hahisia lasi, namona be Dirava ena Hereva ibounai be iseda kudouna dekenai ita atoa. (Luka 6:45) Baibel ena hereva ita laloa dobu neganai, iseda hereva namodia ese ma haida ia hagoadaia diba.​—Aon. 18:4.

18. Edena dala ai Aonega Herevadia 24:6 badinaia karana ese haroro gaukara ai ita ia durua?

¹⁸ Hakaua herevana badinaia. Baibel ese  inai sisiba namona ia henia: “Oi be emu hakaua dala namona amo emu tuari do oi karaia, bona sisiba taudia be momo neganai, ta ia kwalimu diba.” (Aon. 24:6) Edena dala ai inai siri badinaia karana ese ita ia durua haroro bona hahediba tauna namona ai ita lao totona? Sibona iseda diba dekenai haroro bona hadibaia gaukara ita karaia lasi, to namona be idia henia hakaua herevadia ita badinaia. Iseda Keristani heboudia ai hakaua hereva namodia ita abia, unuseniai tadikaka ese Baibel amo tok idia henia bona idia karaia haheitalai ese ita idia treinia. Danu, Iehova ena orea ese tulu namodia idia henia, hegeregere pablikeisen bona vidio idauidau, unai ese taunimanima ia durua Baibel idia lalopararalaia totona. Unai tulu gaukaralaia namonamo daladia oi dibaia noho, a?

19. Iehova amo ia mai aonega be edena bamona oi laloa? (Aonega Herevadia 3:13-18)

¹⁹ Aonega Herevadia 3:13-18 duahia. Ita moale bada badina Dirava ena Hereva lalonai sisiba namodia ita davaria! Bema Iehova ena sisiba hereva namodia be lasi, iseda mauri do ita moalelaia lasi. Inai atikol ai, ita ese Aonega Herevadia bukana lalonai aonega herevadia haida ita dibaia. Oibe, Baibel be Iehova ena aonega herevadia amo ia honu. Namona be iseda lalona ita hadaia hanaihanai Iehova ena aonega do ita badinaia. Tanobada taudia be unai bamona lasi, to ita be Dirava amo ia mai aonega ita laloa bada. Badina ita abia dae momokani “unai aonega idia dogoatao noho taudia do idia moale.”