1. Iehova ese ita dekenai dahaka helaro ia henia?

 IEHOVA ese ita dekenai mauri hanaihanai helarona ia henia. Haida be guba ai mase diba lasi maurina do idia abia. (1 Kor. 15:50, 53) To, momo be tanobada ai mauri hanaihanai do idia abia, do idia gorere lasi bona do idia moale. (Apo. 21:3, 4) Ena be mauri hanaihanai be guba eiava tanobada ai do ita abia, to iseda helaro ita laloa bada.

2. Iseda helaro be dahaka latanai ita haginia, bona dahaka dainai?

² Baibel ese ia gaukaralaia herevana, “helaro” ena anina be “oi daradara lasi to oi diba oi naria noho gauna be do ia vara.” Ita diba momokani iseda helaro be do ia vara momokani badina unai be Iehova ena gwauhamata. (Roma 15:13) Iena gwauhamata ita diba, bona ita diba hanaihanai iena hereva ia hagugurua. (Num. 23:19) Ita abia dae momokani, Iehova be mai ena siahu bona ia ura ia gwauhamatalaia gaudia ibounai do ia hagugurua. Iseda helaro be nihi ta sibona lasi, to ita diba momokani gaudia latanai ita haginia.

3. Inai atikol ai dahaka do ita herevalaia? (Salamo 27:14)

³ Iseda guba Tamana be ita ia lalokau henia bona ia ura ia ita abidadama henia. (Salamo 27:14 duahia.) Iseda helaro Iehova dekenai ia goada neganai, hekwakwanai ita haheaukalaia diba bona mai gari lasi bona moale ida vaira negana ita naria diba. Iseda helaro ese ita ia gimaia dalana mani ita itaia. Helaro be dogo bona kwara gauna bamona. Mani unai ita herevalaia guna, bena murinai iseda helaro hagoadaia daladia do ita herevalaia.

4. Edena dala ai helaro be dogo bamona? (Heberu 6:19)

⁴ Aposetolo Paulo ese Heberu tadikaka dekenai revareva ia torea neganai, ia gwau helaro be dogo bamona. (Heberu 6:19 duahia.) Paulo be nega momo bouti amo ia loaloa, bona ia  diba dogo idia gaukaralaia, bouti ia hure oho lasi totona. Nega ta bouti ta ai ia noho lalonai lai gubana ta ia vara. Unai negai, ia itaia bouti ai idia gaukara taudia ese davara lalonai dogo idia negea diho unai amo bouti be nadi badadia do ia botaia lasi. (Kara 27:29, 39-41) Dogo ese bouti ia dogoatao bamona, iseda helaro ese ita ia hagoadaia, unai amo herevana hekwakwanai badadia idia vara, to Iehova amo do ita hure oho lasi. Iseda helaro dainai unai hekwakwanai badadia ita haheaukalaia badina ita diba gabeai gau ibounai do idia namo. Laloatao, Iesu ese ita ia hadibaia dagedage do ita davaria. (Ioa. 15:20) Unai dainai Iehova ena gwauhamata ita dekenai ita laloa neganai, ita ia durua ia ita hesiai henia noho totona.

5. Edena dala ai helaro ese Iesu ia durua ena be do ia mase?

⁵ Mani Iesu ita laloa. Ena be ia diba hisihisi bada do ia mamia bona do idia hamasea, to ena helaro dainai ia gini goada. Pentekoste 33 C.E. dinana ai, aposetolo Petero be Salamo bukana amo siri ta ia gwauraia bona unai ese Iesu ena gari lasi karana ia herevalaia: “Helaro dainai do lau naria noho; badina Mase Gurina lalonai lau do oi rakatania lasi, danu oi ia abidadama henia tauna be do oi rakatania lasi ia bodaga totona. . . . Bona mai lalonamo ida lau oi itaia neganai, egu moale ia bada herea.” (Kara 2:25-28; Sal. 16:8-11) Ena be Iesu ia diba do ia mase, to helaro dainai ia abia dae momokani Dirava ese ia do ia hatorea isi lou bona mai moale ida guba ai ena Tamana ida do ia hedavari lou.​—Heb. 12:2, 3.

6. Tadikaka ta ena lalohadai helaro dekenai be dahaka?

⁶ Helaro ese iseda tadikaka taihu momo ia durua idia haheauka totona. England ai ia noho tadikaka, Leonard Chinn, mani ita laloa. Tanobada Tuarina Ginigunana ai, dibura ruma dekenai idia atoa badina tuari lalonai ia vareai lasi. Hua rua lalonai, dibura ruma lalonai sibona ia noho bena unai murinai ia idia doria gaukara aukadia ia karaia totona. Ia gwau: “Egu ekspiriens dainai lau laloparara, ita haheauka totona helaro be mai anina bada. Baibel lalonai Iesu, aposetolo taudia, peroveta taudia edia haheitalai bona gwauhamata namodia idia noho. Unai gaudia ibounai ese vaira nega totona ita dekenai helaro idia henia bona ita idia hagoadaia ita haheauka totona.” Tadikaka Leonard dekenai helaro be dogo bamona, bona ita dekenai be unai bamona danu.

7. Edena dala ai hekwakwanai ese iseda helaro ia hagoadaia? (Roma 5:3-5; Iamesi 1:12)

⁷ Hekwakwanai ita haheaukalaia bona Iehova ena heduru bona lalonamo ita abia murinai iseda helaro ia goada. (Roma 5:3-5; Iamesi 1:12 duahia.) Sivarai namona be nega ginigunana ita kamonai neganai iseda helaro be ia goada lasi, to hari be ia goada momokani. Satani ia ura hekwakwanai ese ita ia hamanokaia, to Iehova ena heduru dainai hekwakwanai ta ta ita hanaia diba.

8. Edena dala ai helaro be kwara gauna bamona? (1 Tesalonika 5:8)

⁸ Baibel ese iseda helaro be kwara gauna ida ia hahegeregerea. (1 Tesalonika 5:8 duahia.) Soldia ta be kwara gauna ia atoa unai amo ena inai taudia amo ena kwarana ia gimaia. Satani ita tuari henia karana lalonai, namona be iseda lalohadai ita gimaia. Hahetoho idauidau amo ia ura iseda lalohadai ia hadikaia. Kwara gauna ese soldia ena kwarana ia gimaia hegeregerena, iseda helaro ese eda lalohadai ia gimaia unai amo Iehova ita badinaia noho diba.

9. Helaro lasi taudia edia mauri be edena bamona?

 ⁹ Iseda helaro ese ita ia durua mai aonega bona laloparara ida abia hidi maorodia ita karaia totona. To danu, bema iseda helaro ia goada lasi bona tauanina ena ura dikadia ese iseda lalohadai idia biagua, mauri hanaihanai helarona ita haboioa diba. Idaunegai Korinto ai idia noho Keristani taudia haida mani ita laloa. Dirava ena gwauhamata toreisi lou helarona dekenai, edia abidadama ia manoka. (1 Kor. 15:12) Paulo ia gwau vaira nega ena helaro idia diba lasi taudia be hari nega ena mauri sibona idia laloa bada. (1 Kor. 15:32) Hari Dirava ena gwauhamata idia abidadama henia lasi taudia momo danu be unai bamona, moale karadia idauidau idia laloa bada. To, ita be Dirava ena vaira nega gwauhamatadia ita abidadama henia. Iseda helaro be kwara gauna bamona, iseda lalohadai ia gimaia bona ita ia durua ita sibona ita laloa bada lasi totona, badina unai ese iseda hetura karana Iehova ida ia hadikaia diba.​—1 Kor. 15:33, 34.

10. Edena dala ai helaro ese lalohadai koikoidia amo ita ia gimaia diba?

¹⁰ Iseda helaro ese ita ia gimaia unai amo Iehova hamoalea diba lasi lalohadaina ita dadaraia. Hegeregere, haida idia laloa: ‘Mauri hanaihanai do lau abia lasi. Lau be hegeregere lasi. Dirava ena taravatu lau do badinaia lasi.’ Laloatao, Iobu ia hagoadaia koikoi tauna Elipasa be unai bamona lalohadai kererena ia gaukaralaia. Elipasa ia gwau: “Taunimanima be edena bamona idia goeva diba?” Ma Dirava ia herevalaia ia gwau: “Kamonai! Dirava be ena helaga taudia ia abidadama henia lasi, bona ena matana ai guba be goeva lasi.” (Iobu 15:14, 15) Unai be koikoi herevadia! Laloatao, Satani ia ura unai bamona lalohadai oi abia. Ia diba unai bamona lalohadai oi abia neganai, emu helaro do ia goada lasi. To, unai bamona lalohadai koikoi oi dadaraia bona Iehova ena gwauhamata sibona oi laloa. Namona be oi diba momokani Dirava ia ura mauri hanaihanai do oi abia bona oi do ia durua unai oi abia totona.​—1 Tim. 2:3, 4.

11. Iseda helaro do ia guguru negana ita naria noho lalonai dahaka dainai ita haheauka be gau badana?

¹¹ Iseda helaro hagoadaia totona be mai ena hekwarahi. Dirava ita naria noho lalonai, reana nega haida do ia auka ita haheauka totona. Iehova be noho hanaihanai Diravana, bona ia dekenai nega be kwadogina sibona, to ita dekenai nega be daudau. (2 Pet. 3:8, 9) Dirava ia gwauhamatalaia gaudia be do ia hagugurua, to ita diba lasi negana ai do ia karaia. Dirava ese ena gwauhamata do ia hagugurua negana be mai haheauka ida ita naria noho lalonai, dahaka ese ita do ia durua iseda helaro ita hagoadaia totona?​—Iam. 5:7, 8.

12. Heberu 11:1, 6 ena hereva hegeregerena, edena dala ai helaro be abidadama ida ia gaukara hebou?

¹² Iseda helaro do ia goada noho bema Iehova kahirakahira ita noho, badina ia sibona ese iseda helaro do ia hagugurua. Oibe, Baibel ia gwau helaro ia goada totona namona be ita abia dae momokani Iehova be ia noho bona ia be “mai momokani ida ia idia tahua taudia edia davana do ia henia.” (Heberu 11:1, 6 duahia.) Bema ita abia dae Iehova be ia noho, do ita diba momokani ia gwauhamatalaia gaudia ibounai do ia hagugurua. Namona be iseda hetura karana Iehova ida bona iseda helaro hagoadaia daladia ita herevalaia.

13. Edena dala ai Dirava kahirakahira ita lao diba?

¹³ Iehova guriguri henia bona ena Hereva duahia. Ena be Iehova ita itaia lasi to ia kahirakahira ita lao diba. Guriguri amo ia ita hereva henia diba bona ita abia dae iseda guriguri do ia kamonai. (Ier. 29:11, 12) Dirava  ita kamonai henia dalana be iena Hereva ita duahia bona ita laloa dobu. Iehova ese guna ia idia badinaia taudia ia naria dalana ita duahia neganai, iseda helaro do ia goada ia lao. Dirava ena Hereva lalonai “idia torea herevadia ibounai be ita hadibaia totona idia torea. Bona unai hereva ese ita idia durua ita haheauka totona, bona Toretore Helagadia ese ita dekenai goada ia henia, unai amo helaro ita abia.”​—Roma 15:4.

14. Dahaka dainai Iehova ese ma haida totona ia karaia gaudia ita laloa?

¹⁴ Iehova ese ena gwauhamata ia hamomokania daladia oi laloa dobu. Dirava ese Aberahamo bona Sara totona ia karaia gauna mani ita laloa. Idia buruka dainai natudia idia havaraia diba lasi. To, Dirava be idia dekenai ia gwauhamata natuna ta do idia havaraia. (Gen. 18:10) Aberahamo be dahaka ia laloa? Baibel ia gwau: “Ia diba momokani ia be bese momo edia tamana ai do ia lao.” (Roma 4:18) Herevana taunimanima edia laloa dalana dekenai be ia auka, to Aberahamo ia abia dae momokani Iehova be Iena gwauhamata do ia hagugurua. Aberahamo be ia lalohisihisi lasi. (Roma 4:19-21) Unai bamona sivarai ese ita ia hadibaia Iehova be hanaihanai ena gwauhamata do ia hagugurua, ena be ita laloa ita dekenai be ia auka.

15. Dahaka dainai Dirava ese ita totona ia karaia gaudia ita laloa?

¹⁵ Iehova ese oi totona ia karaia gauna oi laloa. Dirava ena Hereva ai idia guguru vadaeni gwauhamata ese oi ia durua dalana mani oi laloa. Hegeregere, Iesu ia gwauhamata, iena Tamana ese emu mauri durua gaudia do ia henia. (Mat. 6:32, 33) Danu Iesu ia gwau, Iehova ese oi dekenai lauma helaga do ia henia, bema unai totona oi noinoi. (Luka 11:13) Iehova be unai gwauhamata ia hagugurudia. Bona danu oi totona ia hagugurua  gwauhamata haida oi laloa diba. Hegeregere, ia gwauhamata emu dika do ia gwauatao, oi do ia hagoadaia, bona ia kahirakahira oi noho totona, heduru gaudia do ia henia. (Mat. 6:14; 24:45; 2 Kor. 1:3) Bema Dirava ese oi totona ia karaia gaudia oi laloa dobu, vadaeni vaira nega ai oi totona do ia karaia gauna ese emu helaro do ia hagoadaia.

16. Dahaka dainai helaro be harihari gauna ta?

¹⁶ Iseda mauri hanaihanai ena helaro be Dirava amo ia mai harihari gauna. Vaira nega ena mauri namona ita naria noho​—ita abia dae do ia vara momokani. Iseda helaro be dogo bamona, ita ia hagoadaia hekwakwanai idauidau, dagedage, bona mase idia vara neganai ita haheauka diba. Iseda helaro be kwara gauna bamona, iseda lalohadai ia gimaia unai amo gau dikadia ita dadaraia bona gau namodia sibona ita karaia. Iseda helaro ese Dirava kahirakahira ita ia hakaua lao bona unai ese iena lalokau ita totona ia hahedinaraia. Iseda helaro ita hagoadaia neganai, namo bada do ita abia.

17. Dahaka dainai iseda helaro ese moale ia havaraia?

¹⁷ Aposetolo Paulo be Roma taudia dekenai revareva ia torea neganai, inai hereva “emui helaro dainai umui moale” ese ia hagoadaia. (Roma 12:12) Paulo ia moale diba badina ia diba momokani, bema ia abidadama noho guba ai mauri hanaihanai ia abia diba. Ita danu be iseda helaro dainai ita moale diba badina ita diba momokani Iehova ese ena gwauhamata ibounai do ia hagugurua. Salamo torea tauna ia hereva hegeregerena: “Dirava amo heduru ia tahua tauna be ia moale, Ia ese Iehova, iena Dirava ia abidadama henia, . . . Ia be hanaihanai ia kara momokani.”​—Sal. 146:5, 6.