TANOBADA Tuarina Iharuana ai, Nazi ena ofesa tauna ta ese Iehova ena Witnes taudia dekenai ia boiboi, ia gwau: “Bema France o England tuari henia karana lalonai umui vareai lasi, umui ibounai do umui mase!” Ena be Nazi soldia taudia mai edia tuari kohu be idia kahirakahira idia gini, to iseda tadikaka ese Iehova ena taravatu idia makohia lasi. Unai be gari lasi karana, ani? Iehova ena Witnes taudia ese tuari karana idia laloa dalana dekenai unai be haheitalai namona: Ita be inai tanobada ena tuari karadia idauidau lalonai ita vareai lasi. Ena be ita do idia hamasea totona ita idia hagaria, to inai tanobada ena hepapahuahu lalonai ita vareai lasi.

1. DIRAVA ENA TAUNIMANIMA BE BESE TAMONA

Guna, Iehova ese bese tamona ia abia hidi iena taunimanima ai idia lao totona. Ia ese Israela taudia ia gwauraia, “taunimanima ibounai amo [idia] be dava bada kohuna bamona.” (Eso. 19:5) Danu Dirava ese ia abia hidi tanona dekenai ia atodia. Unai dainai Dirava ese oda ia henia tuari do idia lao neganai, idia be Iehova tomadiho henia taudia idia tuari henia o hamasea lasi. *

Hari, Iehova idia tomadiho henia taudia be “bese ibounai, iduhu ibounai, taunimanima bona gado idauidau” amo idia mai. (Apok. 7:9) Bema Dirava ena taunimanima be tuari lalonai idia vareai, idia ese edia tomadiho tamona taudia do idia heatu henia bona hamasea diba.

 2. IEHOVA ESE ISRAELA TAUDIA IA ODA HENIA IDIA TUARI TOTONA

Guna, Iehova ese abia hidi ia karaia, Israela taudia be edena negai bona dahaka dainai do idia tuari. Hegeregere, Kanana taudia be demoni idia tomadiho henia, matabodaga kara dika rohoroho idia karaia, bona natudia idia bouboulaia dainai, Dirava ese ia hahemaoro henidia totona Israela taudia ia oda henia unai bese do idia tuari henia. Iehova ese Israela taudia dekenai ia gwauhamatalaia tanona amo kara dikadia idia karaia taudia idia kokia be namo, unai amo idia danu be kara dikadia do idia karaia lasi. (Lev. 18:24, 25) Israela taudia be Gwauhamata Tanona ai idia vareai murinai, Dirava ese idia ia hamaoroa do idia tuari edia inai taudia amo idia sibona do idia gimaia totona. (2 Sam. 5:17-25) To, Iehova ia gwau lasi idia sibona be abia hidi do idia karaia bema tuari dekenai do idia lao eiava lasi. Sibona ese abia hidi idia karaia neganai, nega momo dika badadia idia davaria.​—Num. 14:41-45; 2 Siv. 35:20-24.   

Hari, Iehova ese taunimanima ia hamaoroa lasi tuari dekenai idia lao totona. Bese ta ta be sibona edia ura dainai idia tuari, to Dirava ena ura dainai lasi. Idia be tano ma haida idia ura henia, moni momo idia ura abia, eiava politikol karadia idia durua totona tuari idia karaia. To bema haida idia gwau Dirava ena ladana dekenai tuari idia karaia, unai amo edia tomadiho do ia gimaia eiava Dirava ena inai taudia do idia hamasea be edena bamona? Iehova be vaira nega ai ia idia tomadiho henia taudia do ia gimaia bona ena inai taudia do ia hadikaia ore. Unai be Aramagedono tuarina ai do ia vara. (Apok. 16:14, 16) Dirava ena tuari oreana guba dekenai ese unai tuari do idia karaia, to tanobada ai Iena tomadiho taudia ese do idia karaia lasi.​—Apok. 19:11-15.

3. ISRAELA TAUDIA ESE IEHOVA IDIA ABIDAMAMA HENIA TAUDIA IDIA HAMASEA LASI

Guna, Israela ena tuari taudia be nega momo Dirava idia abidadama henia taudia dekenai hebogahisi karana idia hahedinaraia bona Iehova ia ura idia hamasea taudia sibona idia hamasea. Haheitalai rua mani ita itaia. Ena be Iehova ese Israela  taudia ia oda henia Ieriko idia hadikaia totona, to Rahaba ena abidadama karana dainai ia bona ena famili idia hamauria. (Ios. 2:9-16; 6:16, 17) Gabeai, Gibeona taudia be Dirava gari henia karana idia hahedinaraia murinai, Gibeona siti be dika ia davaria lasi.​—Ios. 9:3-9, 17-19.

Hari, tuari besedia be tuari lalonai abidadama taudia idia hamasedia danu. Bona nega haida, tuari lalonai kerere lasi taudia idia hamasea sibona.

4. ISRAELA TAUDIA ESE DIRAVA ENA TARAVATU TUARI DEKENAI IDIA BADINAIA

Guna, Iehova ia ura Israela taudia be iena hakaua daladia hegeregerena tuari do idia karaia be namo. Hegeregere, nega haida Dirava ese Israela taudia ia noia siti ma ta ida “maino karaia herevana” idia gwauraia be namo. (Deu. 20:10) Danu Iehova ia ura Israela ena tuari taudia be tauanina dalanai idia goeva bona Iehova ena kara maoromaoro taravatudia idia badinaia be namo. (Deu. 23:9-14) Israela taudia edia badinai idia noho idau bese taudia be tuari lalonai siti ta idia halusia neganai, unai siti hahinedia idia reipia, to Iehova ia gwau Israela taudia be unai bamona do idia karaia lasi. Badina, siti ta idia halusia murinai, unai siti ai idia noho hahine do idia adavaia lasi ela bona hua ta ia ore.​—Deu. 21:10-13.

Hari, tano momo be idia lalotamona, tuari ena taravatu do idia badinaia be namo. Ena be unai tuari idia karaia taunimanima idia gimaia totona, to madi, bese idauidau ese unai taravatu idia badinaia lasi.

5. DIRAVA BE ENA BESE TOTONA IA TUARI

Guna, Iehova be Israela taudia totona ia tuari, bona tuari lalonai idia kwalimu totona nega momo hoa karadia ia karaia. Hegeregere, edena dala ai Iehova ese Israela taudia ia durua Ieriko siti idia halusia totona? Iehova ena hakaua dalana hegeregerena, Israela taudia be “tuari totona idia boiboi badabada bena magu ia moru” neganai, ia auka lasi unai siti idia abia totona. (Ios. 6:20) Bona edena dala ai Israela taudia ese Amoro taudia idia tuari henia bona idia kwalimu? “Iehova ese idia latanai guba amo aisi nadi badadia ia hadihoa . . . Momokani, unai aisi nadi amo idia mase taudia edia namba ese Israela taudia edia tuari kaia amo idia mase taudia edia namba ia hereaia.”​—Ios. 10:6-11.

KERISTANI MOMOKANI TAUDIA BE MAINO KARAIA TAUDIA

Ita herevalaia hegeregerena, hari iseda noho dalana be idaunegai Israela taudia amo ia idau. To, tuari ita vareai lasi ena badina idauidau be unai sibona lasi. Badina ma haida idia noho danu. Hegeregere, Dirava ia peroveta nega dokona ai, ia ese ia hadibaia taudia be “tuari do idia dibaia lou lasi.” Oibe, unai ese ia hahedinaraia idia be tuari lalonai do idia vareai lasi danu. (Isa. 2:2-4) Danu, Keriso ia gwau iena hahediba taudia be “tanobada taudia bamona lasi,” bona idia be tanobada ena politikol karadia amo do idia gini siri.​—Ioa. 15:19.

Keriso ese ena murinai idia raka taudia ia noia kara ma haida idia karaia totona. Ia ese idia ia hadibaia heiriheiri, badu, bona tuari do ia havaraia karadia idia dadaraia totona. (Mat. 5:21, 22) Danu, idia ia hadibaia “maino idia karaia” bona edia inai taudia idia lalokau henia totona.​—Mat. 5:9, 44.   

Edena dala ai unai ita karaia? Reana ita ura lasi tuari lalonai ita vareai, to nega haida ita mamia kongrigeisen ai ta ita inai henia, a? Namona be ita gaukara goada unai bamona hemami ita kokia totona.​—Iam. 4:1, 11.

Ita be bese idauidau edia tuari karadia lalonai ita vareai lasi. To, ita gaukara goada ta ta huanai maino bona lalokau ita havaraia totona. (Ioa. 13:34, 35) Iehova ese tuari karadia ibounai do ia haorea momokani negana ita naria noho lalonai, gau badana be iseda lalona ita hadaia gini siri karana ita hahedinaraia noho totona.​—Sal. 46:9.