1-2. (a) Edena dala ai siahu taudia ese Iehova ena taunimanima idia dagedage henia, to iena taunimanima be edena bamona idia kara? (b) Dahaka dainai idia moale? (Rau 1 ena laulau herevalaia danu.)

 HARI, tanobada hegegemadai iseda gaukara be tano 30 mai kahana ai idia taravatua. Tano haida ai, siahu taudia ese dibura ruma ai iseda tadikaka taihu idia atodia. Dahaka kerere idia karaia? Iehova ia diba idia be kerere ta idia karaia lasi. Idia karaia gaudia be Baibel idia duahia bona stadilaia, idia haroro, bona hebou dekenai idia lao. Danu politikol karadia lalonai idia vareai lasi. Ena be dagedage bada idia davaria, to Iehova idia badinaia noho. Bona unai idia karaia dainai idia moale!

² Reana unai gari lasi Witnes taudia haida edia laulau bona edia kiri toana oi itaia. Idia moale bada badina idia diba Iehova idia badinaia dainai Ia idia hamoalea. (1 Siv. 29:17a) Iesu ia gwau: “Kara maoromaoro dainai dagedage idia davaria taudia be idia moale, . . . Umui moale bada herea badina emui davana . . . be bada.”​—Mat. 5:10-12.

3. Kara 4:19, 20 ai Iesu ena aposetolo taudia be dagedage idia davaria neganai dahaka idia karaia, bona dahaka dainai?

³ Guna aposetolo taudia be Iesu idia harorolaia dainai dagedage idia davaria, unai hegeregerena hari iseda tadikaka taihu danu be dagedage idia davaria noho. Nega momo, Iuda taudia edia kota badana ena diadi taudia ese aposetolo taudia “idia oda henidia, Iesu ena ladanai hereva ta do idia gwauraia lasi.” (Kara 4:18; 5:27, 28, 40) Aposetolo taudia be dahaka idia karaia? (Kara 4:19, 20 duahia.) Idia diba mai ena siahu bada tauna ta, ese idia ia hagania taunimanima dekenai do idia haroro bona Keriso idia herevalaia namonamo totona. (Kara 10:42) Unai dainai, Petero bona Ioane be mai gari lasi  ida aposetolo taudia totona idia gwau, Dirava idia kamonai henia to diadi taudia lasi, bona idia hahedinaraia Iesu ena sivarai harorolaia karana do idia hadokoa lasi. Unai be hegeregere, siahu taudia idia nanadaia, ‘Umui laloa taunimanima be umui do idia kamonai henia, to Dirava idia kamonai henia lasi, a?’

4. Kara 5:27-29 hegeregerena, aposetolo taudia be dahaka haheitalai namona idia hahedinaraia, bona edena dala ai idia ita tohotohoa?

⁴ Aposetolo taudia be haheitalai namona idia hahedinaraia, unai nega amo Keristani momokanidia ese edia haheitalai idia tohotohoa ema bona hari. Aposetolo taudia be edia lalona idia hadaia ‘Dirava be lohia dainai ia idia kamonai henia be maoro, to taunimanima lasi.’ (Kara 5:27-29 duahia.) Aposetolo taudia idia kwadidia badina Dirava idia badinaia, unai murinai Iuda taudia edia kota badana amo idia raka-lasi bona “mai moale ida idia lao, badina Dirava ia laloa idia be hegeregere Iesu ena ladana dainai hemarai idia abia totona,” bona idia haroro noho!​—Kara 5:40-42.   

5. Edena henanadai do ita haerelaidia?

⁵ Aposetolo taudia edia haheitalai dainai inai henanadai idia vara. Hegeregere, edena dala ai Dirava idia kamonai henia to taunimanima lasi, bona danu Baibel ena hakaua herevana, “taunimanima ibounai be gavamani henunai do idia noho” ena hakaua hereva idia badinaia? (Roma 13:1) Edena dala ai aposetolo Paulo ena hereva, ‘gavamani bona siahu taudia do ita kamonai henia,’ bona iseda Lohia Badana, Dirava, badinaia karana do ita hahedinaraia noho?​—Tito 3:1.

6. (a) Roma 13:1 ai “gavamani” taudia be daidia, bona edena bamona idia ita kara henia be namo? (b) Taunimanima edia lohia taudia edia siahu be mai ena hetoana, a?

⁶ Roma 13:1 duahia. Inai siri ai, inai hereva “gavamani” taudia be taunimanima edia lohia taudia ia herevalaia, idia ese ma haida idia biagua. Keristani taudia be unai lohia taudia henunai idia noho. Unai lohia taudia be maino ia noho totona taravatu idia atoa bona taunimanima ese unai taravatua idia badinaia be namo, bona nega haida idia ese Iehova ena  taunimanima idia gimaia. (Apok. 12:16) Unai dainai idia dekenai takisi moni ita henia bona idia ita matauraia. (Roma 13:7) To, tanobada gavamanidia be Iehova ese maoro ia henia dainai idia lohia. Roma Gavana Pontio Pilato ese Iesu ia nanadaia neganai, Iesu ese unai ia hahedinaraia namonamo. Pilato be Iesu dekenai ia gwau ia be mai ena maoro ia do ia hamauria eiava hamasea, unai neganai Iesu ese ia hamaoroa: “Bema Dirava ese oi dekenai siahu ia henia lasi, oi be siahu lasi lau dekenai kara ta oi karaia totona.” (Ioa. 19:11) Pilato hegeregerena, hari inai negai danu taunimanima edia lohia bona politikol taudia edia siahu be mai ena hetoana.

7. Edena bamona negadiai tanobada ena lohia taudia ita kamonai henia lasi, bona dahaka idia laloatao be namo?

⁷ Keristani taudia be gavamani ese idia atoa taravatu idia badinaia diba, bema unai ese Dirava ena taravatu ia utua lasi. To bema idia ura ita karaia gauna ta be Dirava ena taravatu ia utua, idia ita kamonai henia lasi. Hegeregere, reana do idia ura tatau matamata be edia bese totona idia tuari. * Eiava reana iseda Baibel bona pablikeisen idia taravatua bona iseda haroro gaukara bona tomadiho karana idia koua. Bema lohia taudia ese edia siahu idia gaukaralaia kerere bona Keriso ena hahediba taudia idia dagedage henia, vadaeni Dirava dekenai unai ena badina idia herevalaia be namo. Iehova be unai ia itaia noho!​—Had. 5:8.

8. Iehova bona “gavamani” edia idau be dahaka?

⁸ “Gavamani” be mai ena siahu, gau namodia momo ia karaia, bona ma haida ia gunalaia. To, unai ese ia hahedinaraia lasi idia be goevadae bona edia siahu be bada herea. Badina Goevadae bona Siahu Ibounai Diravana ia noho, unai be Iehova. Baibel ai Iehova Dirava ena dagi ladana “Ataiai Momokani Diravana” be nega 4 ia hedinarai.​—Dan. 7:18, 22, 25, 27.

9. Peroveta tauna Daniela be matahanai lalonai dahaka ia itaia?

⁹ Peroveta tauna Daniela ese ia itaia matahanai lalonai ia hedinarai goevagoeva haida edia siahu amo Iehova ena siahu be bada herea. Daniela ena matahanai lalonai dagedage animal badadia 4 ia itaia, bona idia be guna bona hari ena basileia badadia ia laulaulaia, idia be Babulonia, Mede Parasa, Gris, bona Roma bona hari ia lohia noho basileiana, unai be Anglo-America. (Dan. 7:1-3, 17) Bena Daniela ia itaia Iehova Dirava be kota karaia totona terona dekenai ia helai. (Dan. 7:9, 10) Unai abidadama peroveta tauna ese matahanai ma ta ia itaia, unai ese hari idia lohia taudia dekenai gau ta ia hadibaia.

10. Daniela 7:13, 14, 27 hegeregerena, tanobada lohiaia totona Iehova be daika dekenai siahu ia henia, bona unai amo Iehova dekenai dahaka ita dibaia?

¹⁰ Daniela 7:13, 14, 27 duahia. Dirava ese taunimanima edia gavamani amo lohia siahuna ia kokia bona mai edia siahu taudia dekenai ia henia. Unai be daidia? Iesu Keriso, ia be “taunimanima ena natuna bamona,” bona 144,000 taudia, idia be “Ataiai Momokani Diravana ena helaga taudia,” bona do idia lohia “ela bona hanaihanai.” (Dan. 7:18) Unai ese ia hahedinaraia, Iehova be “Ataiai Momokani Diravana,” badina ia sibona be mai ena siahu unai ia karaia totona.

11. Daniela be ma dahaka ia gwau, unai ese ia hahedinaraia Iehova ese bese ibounai ia hereaia?

¹¹ Daniela ese matahanai lalonai ia itaia gauna ese guna ia gwauraia gauna ia hamomokania. Daniela ia gwau, “guba ena Dirava . . . ese  king dagi ia kokia bona king dagi ia henia.” Ma ia gwau: “Ataiai Momokani Diravana be taunimanima edia basileia edia Lohia Tauna bona . . . , ia ura tauna dekenai ia henia.” (Dan. 2:19-21; 4:17) Iehova ese lohia taudia edia dagi ia kokia bona lohia taudia ma haida dekenai ia henia negadia haida oi laloa, a? Oibe!

12. Iehova ese guna king haida be edia terona amo ia kokia dalana oi herevalaia. (Laulau herevalaia.)

¹² Iehova ese ia hahedinaraia iena siahu ese “gavamani” edia siahu ia hereaia momokani. Haheitalai toi mani ita laloa. Aigupito ena lohia Farao ese Iehova ena taunimanima be igui hesiai taudia ai ia halaoa bona ia ura lasi idia ia ruhaia. To Dirava ese idia ia ruhaia bona Farao be Davara Kakakaka lalonai ia hamasea. (Eso. 14:26-28; Sal. 136:15) Babulonia ena king, Belesasa, be aria ta ia karaia bona ‘sibona ia abia isi, bona guba ena Lohiabada ia dadaraia’ bona ‘siliva, golo, . . . amo idia karaia diravadia ia hanamoa,’ to Iehova ia hanamoa lasi. (Dan. 5:22, 23) To Dirava ese unai hekokoroku tauna ia hahemaraia. “Unai hanuaboi ai,” Belesasa idia hamasea bona ena basileia be Iehova ese Mede bona Parasa dekenai ia henia. (Dan. 5:28, 30, 31) Palestine ena king, Heroda Agripa I, ese aposetolo Iamesi ia hamasea bona unai murinai dibura ruma ai aposetolo Petero ia atoa, badina ia ura Petero ia hamasea danu. To Iehova ese Heroda ena palani ia koua. Baibel ia gwau “Iehova ena aneru ese ia botaia,” bona ia mase.​—Kara 12:1-5, 21-23.

13. Iehova ese lohia oreadia ia halusia dalana mani oi herevalaia.

¹³ Iehova ese ia hahedinaraia iena siahu ese lohia oreadia ibounai edia siahu ia hereaia momokani. Ia be Israela taudia totona ia tuari, bona idia ia durua Kanana ena king ibounai 31 idia halusia bona Gwauhamata Tanona ena gabu badadia idia abia. (Ios. 11:4-6, 20; 12:1, 7, 24) Danu Iehova ese Israela taudia ia durua dainai, King Bene-hadada bona Suria ena lohia taudia 32 idia halusia.​—1 Kin. 20:1, 26-29.

14-15. (a) King Nebukanesa bona King Dariuse ese Iehova ena lohia siahuna be edena bamona idia herevalaia? (b) Salamo torea tauna ese Iehova bona Iena bese be edena bamona ia herevalaia?

¹⁴ Nega ibounai, Iehova be sibona ia hamomokania ia be Ataiai Momokani Diravana!  Babulonia ena king, Nebukanesa, be ‘ena lohia siahu ena hairai, bona ena goada’ dainai ia hekokoroku bona Iehova ia hanamoa lasi, unai dainai Dirava ese kavakava tauna ai ia halaoa. Nebukanesa ia namo lou murinai, ‘Ataiai Momokani Diravana ia hanamoa’ bona ia gwau “[Iehova] ena lohia dalana . . . be do ia noho ela bona hanaihanai.” Nebukanesa ma ia gwau: “Ta ese [Dirava] do ia koua lasi.” (Dan. 4:30, 33-35) Daniela be ena Dirava badinaia karana idia tohoa bona laiona edia guri amo Iehova ese ia hamauria murinai, King Dariuse ia gwau: “Egu basileia lalonai idia noho taudia ibounai ese Daniela ena Dirava idia gari henia be namo. Badina ia be mauri Diravana bona ia noho hanaihanai. Iena basileia be ta ese do ia hadikaia lasi, bona iena lohia siahuna be do ia noho hanaihanai.”​—Dan. 6:7-10, 19-22, 26, 27.

¹⁵ Salamo torea tauna ia gwau: “Iehova ese bese idauidau edia palani ia hadikaia, bona ia ese taunimanima idia ura karaia gauna ia koua.” Ma ia gwau: “Bema bese ta ena Dirava be Iehova, unai bese be ia moale, Ia ese ia sibona totona ia abia hidi bese taudia unai.” (Sal. 33:10, 12) Unai be badina namona, Iehova ita badinaia noho totona!

16. “Hisihisi badana” lalonai dahaka do ia vara, bona dahaka dainai? (Laulau herevalaia.)

¹⁶ Iehova ese guna ia karaia gaudia edia sivarai ita duahia. Kahirakahira dahaka do ia vara? Ita abia dae Iehova ese ia idia badinaia momokani taudia be “hisihisi badana” amo do ia hamauria. (Mat. 24:21; Dan. 12:1) Idia haboua tanobada besedia, Goga Magoga tauna unai, be tanobada hegegemadai ai Iehova ena abidadama taudia do idia tuari henia neganai, Iehova ese ena taunimanima do ia hamauria. Ena be idia haboua tanobada besedia lalonai United Nation ena memba taudia 193 idia noho, to do idia hegeregere lasi Ataiai Momokani Diravana bona ena guba tuari oreana idia tuari henia totona!  Iehova ia gwauhamata: “Idau besedia edia vairanai egu ladana do lau abia isi bona sibona do lau hahelagaia, bona egu siahu do lau hahedinaraia. Unai amo do idia diba lau be Iehova.”​—Ese. 38:14-16, 23; Sal. 46:10.

17. Vaira nega ai tanobada ena king taudia bona Iehova idia badinaia taudia totona Baibel be dahaka ia perovetalaia?

¹⁷ Goga ena tuari ese Aramagedono tuarina do ia havaraia, unai neganai Iehova ese “tanobada ibounai edia king taudia” do ia hadikaia ore. (Apok. 16:14, 16; 19:19-21) To, “kara maoromaoro taudia sibona be tanobada ai do idia noho, bona kerere lasi taudia,” unai be Dirava idia badinaia taudia, be “tanobada do idia noholaia.”​—Aon. 2:21.

18. Keristani momokani taudia idia ura dahaka idia karaia, bona dahaka dainai? (Daniela 3:28)

¹⁸ Idaunega amo ema bona hari, Keristani momokani taudia momo be edia ura idia dadaraia bona edia mauri idia haboioa danu, badina edia Lohia Tauna Badana, Iehova, idia lalokau henia. Unai Keristani momokani taudia be edia lalona idia hadaia Iehova idia badinaia noho totona. Idia be Heberu memero toi bamona, Ataiai Momokani Diravana idia badinaia dainai lahi bada ena siahu amo idia ia hamauria.​—Daniela 3:28 duahia.

19. Iehova ena taunimanima be edena bamona do ia hahemaoro henia, bona hari dahaka ita karaia be namo?

¹⁹ Salamo torea tauna Davida ese ia hahedinaraia Dirava badinaia karana be mai anina bada, ia gwau: “Iehova ese taunimanima panisia herevana do ia gwauraia. Iehova e, egu kara maoromaoro hegeregerena bona egu abidadama hegeregerena lau oi hahemaoro henia.” (Sal. 7:8) Davida ma ia gwau: “Oi lau badinaia karana bona egu kara maoromaoro ese lau ia gimaia.” (Sal 25:21) Herevana dahaka do ia vara, to gau badana be Iehova ita abidadama henia bona badinaia noho! Bena do ita moale, bona iseda hemami be salamo torea tauna hegeregerena, ia gwau: “Iehova be ia idia badinaia taudia dekenai gau namodia ia henia noho.”​—Sal. 84:11.